Read abua Jerimaya 49 Bible Online

Jerimaya 49 - abua bible

Jerimaya 49

¹Ịphen kụ ịdi Ọmoogh-we phọ ạḅem bọ ịlo egbolomaam Amon: “Odi ẹghen awe phọ Ịzirel? Rꞌoniin oye ólho dị kabe ạpamam de phọ ḍụghum? Uḍighi ika kụ bịdi ọwilenaan bọ we dị rooseeny ghan Mọlek mọ ọsighe de eghun phọ ạGad orugh phọ?

²Kụ amem retu ni dị mị kaḍighi ịdi awe ẹkpana ẹmha aRaba kọnaghan ọyugh elephiri, kụ keegulaan ni; kụ rạmha phọ etuman bọ ạnian kele oguulemi. Pọ kụ amem dị Ịzirel kọsighe de ạbidi ḍịghaagh ạbuphe ạar bọ de phọ bịdi.

³Weye aHesbon, imoghi eeleghaan mọ mophiemi Eai! Nmạriir aRaba, ịtol dọl okururu. Iinmenan iinmenan ọto kụ emoghi. Ikilighuan ịlo awe dị ọwalala. Eru phọ anyina Mọlek kọsighe ọkimom iiruen arikpisi, ḅịle rꞌariil ạrikia phọ ọdi rꞌịkpana ạnmuny phọ ọdi.

⁴Eeghe kụ nyina awe dị ụ́moogh omeeraam roobaga ghan bọ? Ịnyaam anyina redugh. Eeghe kụ nyina eḍuom ologhi ịnyaam anyina kụ ẹḅem mọ oye ólho dị kizuom inyina?

⁵Mị kạsighe ni ḍiigu tọrotoro ạḍighaagh iruomaan inyina. Oomo anyina kekiil ẹḍua. Oye ye kakiil ọphelaam aghuḍum ọdi, kụ oye kạ́tol dị kaakpomoghi weye ẹgham anyina eniin esi.

⁶“Kụ mọony amem mị kạḅile ni aḍume Amon. Mị Ọmoogh-we phọ kụ mạḅem.”

⁷Ịphen kụ ịdi Ọmoogh-we phọ ạḅem bọ ịlo Idom: “Awe phọ Idom moroph igey ịiruen phọ ạbidi ḍụghum? Awe oromoghiom mọ ạbidi útue mun ụ́ḅeni ịlo oḍighi ḍụghum? Oomo ologhi phọ ạbidi mạḍuaghu ḍụghum?

⁸Awe aDedan, ịgum ọman eghiil! Ịbooghian! Mị kapiemi ni ẹemara ẹemara phọ Ịso, loor esi dị amem mọ mẹteeny dị mị kạliom bịdi.

⁹Mem lọ awe ọku iimuma avain, bịdi rọbile ghan ni iniin iizin phọ, kụ mem dị ạruḅa oru ḍughul, bịdi rọsighe ghan ịlo bịdi orue bịn.

¹⁰Kụ mị matukelemi ẹemara ẹemara phọ Ịso ạmadan kụ akpenyon riisi ịbooghian phọ ạbidi, bịn bịdi kọ́booghian mun. Oomo awe Idom mophiemi. Rꞌoniin ósugha.

¹¹Ịwilenaan ịmi bụnyigo ạnmuny phọ anyina kụ mị kạmaar ri ạpam bịdi. Arukpukele ạnmariir phọ anyina kuḍuom ịmi ologhi.

¹²“Ghạlamo ạbuphe ụ́kpe bọ ọliom bịn ụphugholom ni ẹgo ịminimiin, nạ ragbi mọ nạ kakpetenaan ni dị kọ́liom ḍụghum? Eeye, nạ ạmoogh ọphugholom ẹgo phọ.

¹³Mị rꞌaloor maghunya mọ ẹkpana ẹmha Bozra keten esi dị kebeeph ọmiin, de ịisaar dị awe kotulughi kụ aḍien phọ eḍighi itonyonaan. Oomo ạramha phọ etuman bọ kẹpu ni kꞌagee-pọ. Mị Ọmoogh-we phọ kụ mạḅem.”

¹⁴Mị ạḅem mọ, “Idom, adom mẹḍua kꞌỌmoogh-we phọ ịteeny ịmi. Ọdi marom oniin otelhedom mọ ạḅeni oomo areelhe phọ mọ ookpomoghi weye ẹgham ạbidi ookolobian ozuom ạna.

¹⁵Ọmoogh-we phọ kadughe ni nyịna, kụ rꞌoniin oye nyịna eegu kạ́logh.

¹⁶Ophoophe aloor phọ ạna maakeleghi nyịna. Oye ólho dị aghiilaan nyịna ịdipho nạ ạatughian bọ. Nạ atugh ẹpe ogbo asighiigh dị ekpululu ạnyu eegum mọ; kụ ghạlamo nạ ụrol esi dị ephoph iboom ịdipho uga, Ọmoogh-we phọ kasoore ni nyịna ude. Ọmoogh-we phọ kụ mạḅem.”

¹⁷Ọmoogh-we phọ ạḅem, “Oogulaan phọ kạteeny bọ Idom kabeeph ni iboom dị tọrobo oye lọ raten kabughaan ni kụ eḍigh ḍiigu.

¹⁸Eniin phọ ịyaar phọ kụ kemitenaan Idom ịdipho emitenaan bọ Sọdom rꞌaGomora mem mọ ophiemi bọ bịdi rꞌạramha phọ etuman bọ bịdi. Oye ólho dị kạ́tol mun sịphe phọ. Mị Ọmoogh-we phọ kụ mạḅem.

¹⁹Ịdipho ạnam-dịka dị ẹḍua emite rụukpua phọ ịpe edi bọ ọgbal ạJodan kụ rẹki de ạroogho, kụ ẹdi mị katu aḍighi ịdi awe Idom kokiil ekperenom ọḍua sịphe eelhe phọ ạbidi. Kụ oḍiemiom mọ ọpo mị ạsaḅar bọ kạda ni eelhe phọ. Ạnhian kụ ẹdi kụtomaam ịmi nụun? Ạnhian kụ kạmeera ghisigh ạmi? Ọghen ọdaam ẹmha kụ katue apogh egbodo ạmi?

²⁰Loor ịphen, mạar ạnaghan igbiighi dị mị mạmooghaan weye phọ Idom, rꞌịdi mị ạatughian oḍighi awe ẹkpana ẹmha phọ aTeman. Ghạlamo rꞌạnmuny ạbidi bịn kọkogh ni ọḍuanam, kụ tọrobo oye kakiilaan ni.

²¹Mem dị Idom emeel, aḍiboom ạḍiaḅa kẹtol li dị oomo ade phọ kepiigha ni kụ ịlooghi aḍiigu kọnaghan ni kꞌekpisi dị ẹkel iboom ẹpe Ọphiiny Akaba.

²²Ẹpomoghian phọ kozuom ni Bozra mụdi uga dị ạrar raphaaph rasoor ude. Ḍio phọ ạḍiphe awe ẹgham Idom kọmoogh oḅio-kakaph ịdipho ạnir dị oghunughun rakun.”

²³Ịphen kụ ịdi Ọmoogh-we phọ ạḅem bọ ịlo ạDamaskos: “Awe phọ odiighi bọ igbogh ạramha phọ ạHamat rꞌApad okiriri ni kụ iloghi ị́ḅaal loor esi dị bịdi mọnaghan ịkaraph iphirigba. Iloghi ạbidi ị́po, ịdipho oologh ogbogh ọphiiny.

²⁴Awe ạDamaskos modugh kụ mosumughu loor oghiilaan. Bịdi odimom rꞌeephina rꞌịminimiin ịdipho ạnir dị oghunughun rakun.

²⁵Egbogh ẹmha dị aḍien eeleghaan kụ ẹmoogh ghan ọḅaal ologhi kụ rꞌoye ólho mun.

²⁶Ḍio phọ ạḍiphe kọze ni ugheel ạnmuny ọdi sịphe areten ẹmha phọ kụ opiemi oomo awe ẹgham mọ ọdi.

²⁷Mị kạsu nịan iikpe phọ ạDamaskos ḅịle rꞌaruutu ogiga ạBen Hadad ọdaam mọ aguulemi. Mị Ẹnaan Oomo Ịikpo Ọmoogh-we phọ kụ mạḅem.”

²⁸Ịphen kụ ịdi Ọmoogh-we phọ ạḅem bọ ịlo eghun aKedar rꞌarikpisi phọ ịpe aHazor rapogh bọ, ịpe ạNebukadnezar ogbogh ọdaam mọ ạBabilon mạsighe bọ ạmooghom: “Izuom weye aKedar ephiemi eghun awe phọ odi bọ ẹpe erumuḍio phọ remite ghan bọ!

²⁹Izirion rugbogo rꞌaḍita ịnam mọ ạbidi, rukpe phọ osophom bọ rugbogo phọ rꞌạtorotoro ịyaar lọ edi sịphe ologhi phọ. Ịsighiogh sịkamel phọ ạbidi kụ ẹḅeni we phọ mọ ‘Aḍiigu mikoom inyina!’

³⁰“Weye aHazor, mị Ọmoogh-we phọ rịphur inyina rụru mọ ikiil ẹghi rikpisi lọ ẹkel kụ ạaghian yogh. ẠNebukadnezar ogbogh ọdaam mọ ạBabilon miḍighom inyina ẹkaraph ezue, kụ ịduon kụ ẹdi ọdi ạḅem:

³¹‘Itu ọghi. Yira kozuom we phọ ạbuphe ogbi bọ mọ bụno odi ịma ạdol phọ! Ịnhu-aḍibuo egbogh ẹmha phọ ạbidi ị́moogh rughuugh, ḅịle rꞌịkasiom, kụ edi ẹyaghaghaany bịn.’

³²“Ịsighiogh sịkamel rꞌoomo ịnam mọ ạbidi ẹḍuanam! Mị kạwalalami we phọ ạbuphe ọsama yogh bọ rụmhu phọ ạbidi ọkiom tọrobo ekpisi, kụ mị ạsighe ịminimiin atuomaan bịdi tọro ạga.

³³AHazor katen de ịisaar kꞌagee-pọ, esi dị asuogh eḍum bịn kụ kẹtol ghan. Rꞌoye kạ́tol mun sịphe. Mị Ọmoogh-we phọ kụ mạḅem.”

³⁴Ke̋bia ạZedekaya aḍighi ọdaam eelhe phọ aJuda, Ẹnaan Oomo Ịikpo Ọmoogh-we phọ ụḅaanaan ịmi ịlo eelhe Ilam.

³⁵Ọdi ạḅem, “Mị kạze ni oomo ạbuphe ọmaar bọ ọraph ạkumugh phọ, ạbuphe oḍighi bọ ịdi Ilam ọmoogh ịikpo iboom.

³⁶Mị kaḍighi ịdi oghim kakimom Ilam tọro ạga, kụ mị ạwalalami we phọ ọdi ạkiom tọrobo ekpisi, tụtu eelhe kẹ́tol mun dị awe ọdi kősuma ọghi.

³⁷Mị kaḍighi ịdi awe Ilam kokiilaan bụmulogh-ḍien phọ ạbidi rọwa bọ ọze ạbidi. Esi ogbogh ophin ologhi ạmi mị kapiemi ni we Ilam kụ atom bụo ẹgham ạkiomaan tụtu mị agbuurogh bịdi ạmadan.

³⁸Mị kapiemi ni bụdaam rꞌabuḍiemiom mọ ạbidi kụ amitiom ạgada ọdaam ạmi ẹpe.

³⁹Kụ ẹsighe mem mị kạḅile ni aḍume Ilam. Mị Ọmoogh-we phọ kụ mạḅem.”