Read abua Jerimaya 50 Bible Online

Jerimaya 50 - abua bible

Jerimaya 50

¹Ịphen kụ ịdi Ọmoogh-we phọ ạḅem bọ ịlo ẹmha phọ ạBabilon rꞌawe phọ ọdi:

²“Ịgba iphiligba phọ ẹḅeni reelhe phọ! Igbeelom! Iḍeenaan elegh phọ ẹkar eeleghemi iphiligba phọ! Kẹ́booghinaan we! ẠBabilon mameel. Eru phọ ọdi Maduk moḅomoghi! Ịkaaghineen ạrumugh phọ ạBabilon moseere dọl aroofola! Igbudu isa phọ ọdi mootughuḍi!

³“Eniin eelhe mẹḍua ẹpe ephunom mọ retu ozuom ạBabilon kụ ketene ẹmha phọ de ịisaar. Awe rꞌịnam kekiil ẹḍua, kụ rꞌoye sịphe kạ́tol.”

⁴Ọmoogh-we phọ ạḅem mọ, “Mem dị amem mọ ạmuphe ẹteeny, awe Ịzirel rꞌaJuda kotu ni rꞌemoghi kụ ụwa ghan ịmi Ẹnaan phọ ạbidi.

⁵Bịdi koopuruan olegheri eten ọghi ạZayon, kụ ogbi onyeene ạga phọ ọpo. Bịdi kokiran ịyo kꞌagee-pọ rꞌạmi kụ kóogbonyon.

⁶“Awe ạmi ọkigh iyool-ịga dị abukoriom mọ mọwile kụ ophe ẹpe aruugum mọ. Bịdi moyeela ịdipho iyool-ịga dị ẹḍua eegum ẹgba eegum, kụ mewula esi ạdol phọ ạbidi.

⁷Tọrobo oye lọ ạmiin bịdi azuom bịdi. Ạbumulogh-ḍien ạbidi ọḅem, ‘Bịdi ụpioman esi Ọmoogh-we phọ. Loor ịduon phọ ịpe yira moḍighi bọ bịdi kọ́pioman. Ạburude ạburude ạbidi uḍuom ni ologhi esi Ọmoogh-we phọ, kụ bịdi rꞌaloor ọkpe omeelom aani ọdi.’

⁸“We Ịzirel, ikiil ẹḍua Bạbilonia! Ịḍua eelhe phọ! Iḍighi bụḅel dị kọḍua!

⁹Mị kapighemi ḍita areelhe dị ẹmoogh ịnyaam ẹpe ephunom mọ kụ aḍighi ịdi bịdi kozuom Bạbilonia! Bịdi kọkoolan ịlo elephiri kụ ọkpar opu. Bịdi awe dị ọmaar ịtaya dị ẹkpina ạbidi rẹ́piom ghan.

¹⁰Kobum ni rạraar ạBabilon, kụ bụphe owum bọ kọsighe tọro ịyaar lọ ẹḅeeraan bịdi. Mị Ọmoogh-we phọ kụ mạḅem.”

¹¹Ọmoogh-we phọ ạḅem, “Weye ạBabilon, nyina memiighi eelhe ạmi. Mẹḅaalami ologhi phọ anyina orelhe ghan ịlo ẹeregh mụdi ạnam dị rạponyonom ikpo ịbiakpa ḅịle mụdi ạsu dị raḅeela loor iboh,

¹²kụ ọlo egbogh ẹmha phọ anyina kosiphe umugholoor ọḅile oofolomi. ẠBabilon kụ kesoorom epu oomo ịnon areelhe, ẹḅile eḍighi ọkpagha dị ạmuum kạ́tol.

¹³Loor esi ophin ologhi ạmi rꞌoye kạ́tol Bạbilon; keegulaan ni kụ oomo awe lọ roten kobughaan kụ eḍighi iikia.

¹⁴We ạsikumugh, ịkoolan ịlo elephiri rꞌawe ạBabilon kụ ekoom ẹmha phọ. Itaḅal oomo ịkpina phọ anyina Bạbilon, loor esi dị bịdi moḍighi ịkaraph esi ạmi Ọmoogh-we phọ.

¹⁵Ịki ekitonom ẹmha phọ ẹḅeni we ịlo ẹgham mọ! Nyịidipho ạBabilon maphoophe rạghaagh. Iikpe phọ ọdi molhereghi osiemi ude. Mị raḅulemian we ạBabilon. Ịduon kụ iḍighi kụ iḅulemian aani bịdi kụ ẹmiine bịdi ịdipho bịdi ọmiine bọ bụnon.

¹⁶Kémeera ọzuph ịizupha sịphe eelhe phọ ẹpe ọbo kobugha ghan bọ ibugha. Tọrobo ooruen lọ odi ghan ẹpe kakiilaan ni mem dị awe ẹgham rozuom kụ okeel ẹmha ạbidi.”

¹⁷Ọmoogh-we phọ ạḅem mọ, “Awe phọ Ịzirel ọkigh iyool-ịga, dị ạnam-dịka ephorogh ẹewalalami. Emiighom mọ, ọdaam-ẹmha phọ Asiria kụ azuom bịdi kụ, ịphen reten, ạNebukadnezar ogbogh ọdaam mọ ạBabilon ạraal ịḅarara ạbidi.

¹⁸Loor esi ịduon, mị Ọmoogh-we Egbogh Ẹnaan phọ Ịzirel kạliom ạNebukadnezar rꞌeelhe phọ ọdi, ịdipho mị ạlhiom bọ ọdaam-ẹmha phọ Asiria.

¹⁹Mị kạḅile ni aḅulemi we phọ Ịzirel sịphe ade phọ ạbidi. Bịdi kole ni eḍien dị emite sịphe Eegum ạKarmel ḅịle rꞌẹkpigh ạBasan, kụ bịdi kole ni oomo ịlo bịdi ọwa olhe iimuma lọ emite reelhe phọ Ifraim rꞌạGiliad.

²⁰Ẹteeny mem mọ ọpo, ạsipioghom kẹ́tol mun Ịzirel ḅịle ẹkaraph eḍighinom ịyaar kẹ́tol sịphe Juda loor esi dị mị kạsar ạbilenaan we phọ ạbuphe mị mạphel bọ sighuḍum mọ ạbidi. Mị, Ọmoogh-we phọ, kụ mạḅem.”

²¹Ọmoogh-we phọ ạḅem mọ, “Izuom we aMerataim rꞌạbuo ạPekod. Ịze bịdi. Iḍighi tọrobo ịlo mị ạto ịḅeni inyina. Mị Ọmoogh-we phọ kụ mạḅem.

²²Ọnaghan ẹḍogh ẹgham sịen ade phọ, ḅịle rꞌoboom ọphueghi ạraraar.

²³ẠBabilon ạgurogh oomo aḅirini phọ aatughuḍi, kụ nyịidipho ọguroghom mọ ọdi mowunughi! Oomo areelhe phọ rọki aani ọmiin ịpe emitenaan bọ ẹmha phọ ẹpe.

²⁴Bạbilonia, nạ eenan rꞌạmi kụ nạ mameel ḍiphil phọ mị ạkpaminaan bọ nyịna, ghạlamo ịduon nạ úlegheri bọ.

²⁵Mị maghughuron esi phọ osereghi bọ rạraar ẹgham mọ, kụ rꞌophin ologhi ạmi kụ ẹdi mị amiteghom, loor esi dị mị, Ọkar Ogbogh Ọmoogh-we Oomo Ịikpo phọ, ạmoogh oḍighi oḍighi ẹpe Bạbilonia.

²⁶Izuom tọro ạga kụ ẹka eḍigh ewum riisi osereghi eḍien ikpo phọ ạbidi! Ikpol ruphua phọ oziriom bọ ịdipho rokpol ghan bọ ikpo lọ eḍighi eḍien. Ipiemi eelhe phọ! Késugheeny rꞌịyaar!

²⁷Ịze oomo ạbuo ẹgham ạbidi! Ịkanyan bịdi! Awe phọ ạBabilon mophe! Amem mọ mẹteeny dị kọliom bịdi!”

²⁸(Awe dị oghiil ẹgham ẹpe Bạbilonia usi ni Jeruselem kụ ọghaaph ịdi Ọmoogh-we Ẹnaan phọ ayira aḅulemian ịpe awe ạBabilon phọ oḍighi bọ Otu Ịiḅereghi phọ.)

²⁹“Ịḅeni weye ạsikumugh phọ bịdi ozuom Bạbilon. Itom tọrobo ọlo ạmaar ạraph ạkumugh rꞌịkpina. Ikoom ẹmha phọ ḅịle kémeera rꞌoniin akpetenaan. Iḅulemian bịdi oomo ịpe bịdi moḍighi bọ, kụ ẹmiine ẹmha phọ ịdipho ọdi ạmiine bọ bụnon, loor esi dị ọdi aphoophe loor esi ạmi Oye Aruukuan phọ Ịzirel.

³⁰Ịdipho kụ iḍighi kụ ugheel ạnmuny phọ ọdi kọze ni sịphe areten ẹmha phọ, kụ opiemi oomo ạbuo ẹgham ḍio phọ ạḍiphe. Mị Ọmoogh-we phọ kụ mạḅem.

³¹“Bạbilonia, ophoophe aloor kụ amuza loor ạna. Loor ịduon phọ mị, Ọkar Ogbogh Ọmoogh-we Oomo Ịikpo phọ, mị úlhoonaan rꞌạna. Amem mọ mẹteeny ọliom ạna.

³²Eelhe ophoophe aloor phọ ạna kekpetaan ni emeel, kụ rꞌoye ọlhoghonaan ạḍighaagh oḅeton ạna kạ́tol. Mị kạsu rạmha ạna nịan, kụ oomo ạraraar lọ ekoom oogulemi.”

³³Ẹnaan Oomo Ịikpo Ọmoogh-we phọ ạḅem mọ, “Oomo ạbuphe osiph bọ we phọ Ịzirel rꞌaJuda mọkpiloghom bịdi; okiririom ropogh, kómeera mọ bịdi ọḍua.

³⁴Kụ ọlo ọpo kạtagharan bọ bịdi ạmoogh ịnyaam — aḍien ọdi, Ẹnaan Oomo Ịikpo Ọmoogh-we phọ. Ọdi kaḍighan ni rꞌạbidi kụ ạsighe ẹepho atu sịen ade phọ, kụ ịiḅaghami kesoorom ni Bạbilonia.”

³⁵Ọmoogh-we phọ ạḅem mọ, “Aḍuugh esoorom Bạbilonia! Aḍuugh ẹteeny we phọ ọdi, rꞌabuḍiemiom mọ ọdi, rꞌawe ọdi lọ ọmoogh ologhi.

³⁶Aḍuugh esoorom riil phọ ọdi, bụphe rọgba ghan bọ ọkpe phọ — pọ eeghe awe elologhi bịdi phọ! Aḍuugh esoorom we ẹgham mọ ọdi — pọ eeghe awe eepuph bịdi phọ!

³⁷Ịze rụsu phọ ẹphueghi rꞌarughuugh-ude ẹgham mọ ạbidi! Aḍuugh esoorom we ẹgham ọdi dị ophir — pọ eeghe ọdo aḍidugh phọ ạbidi. Iḅomoghi ruutu aruphua phọ ạbidi, erool ruphua phọ ẹḍuanam.

³⁸Sịghe ẹkuom ạmuum aruom sịphe ade phọ ọdi kụ amooph rịphiiny phọ ọdi. ẠBabilon ade ịkaraph aruru dị meḍighi ruugu reefolomi we phọ.

³⁹“Kụ iḍighi kụ aruru rꞌịkaraph aruwaloor ḅịle rꞌịnun dị ị́serere kẹtaya ghan Bạbilon. Awe ẹpe kótugh mun, mem dị retu.

⁴⁰Eniin phọ ịyaar phọ kụ kemitenaan Bạbilon ịdipho emitenaan bọ Sọdom rꞌaGomora, mem mọ mị aphiemi bọ bịdi rꞌạramha phọ etuman bọ bịdi. Rꞌoniin oye kátugh mun ẹpe. Mị, Ọmoogh-we phọ, kụ mạḅem.”

⁴¹“Awe ọḍua eelhe dị edi ẹpe ephunom mọ kụ rotu, eboom eelhe dị edi ekpisi dị ẹkel; ịbadi ạbudaam rookolobian ẹgham.

⁴²Bịdi mọsighiogh sịkumugh rꞌarolhool ẹgham ạbidi; bịdi obeeph kụ ụ́moogh kẹn ọnma ighirigiir. Bịdi rokur ghan mụdi ogbogh ọphiiny, mem dị bịdi rokiilom rụsu phọ ạbidi. Bịdi ọnya eenan elephiri rꞌạBabilonia.

⁴³Ọdaam-ẹmha phọ ạBabilon ạnaghan iphiligba phọ bịn kụ ẹpher. Aḍiigu esiph, ạmoogh eephina mụdi ẹlo ạnir dị oghunughun rakun.

⁴⁴“Ịdipho ạnam-dịka dị ẹḍua emite kꞌạruukpua phọ ịpe edi bọ ọgbal ạJodan kụ rẹki de ạroogho, kụ ịdi mị Ọmoogh-we phọ katu kụ aporogh we ạBabilon ekperenom sịphe ẹmha phọ ạbidi. Pọ kụ amem dị oḍiemiom mọ mị ạsaḅar bọ kạda eelhe phọ. Ạnhian kụ ẹdi kụtomaam ịmi nụun? Ạnhian kụ kạmeera ghisigh ạmi? Ọghen ọdaam ẹmha kụ katue apogh egbodo ạmi?

⁴⁵Ịnaghan igbiighi dị mị ạmooghaan olher ẹmha phọ ạBabilon rꞌịdi mị ạatughian oḍighi awe phọ ọdi. Ghạlamo rꞌạnmuny ạbidi bịn kọkogh ni ọḍuanam, kụ tọrobo oye kakiilaan ni.

⁴⁶Mem dị ạBabilon ameel, aḍiboom ạḍiaḅa kẹtol li dị oomo ade phọ kepiigha ni, kụ ịnon areelhe kọnaghan ḍịaḅa ịlooghi ọmagham awe.”