Read abua Jerimaya 51 Bible Online

Jerimaya 51 - abua bible

Jerimaya 51

¹Ọmoogh-we phọ ạḅem mọ, “Mị mạsighe oghim ọphueghiom ạraraar ratuomaan Bạbilonia rꞌawe ọdi.

²Mị katom ni ruuruen ophiemi ạBabilon ịdipho oghim dị rapula ghan ịzeghe kạsighiogh. Mem dị aḍio ophiemi phọ ẹteeny, bịdi kozuom tọrobo ạga kụ ade phọ eḍighi ịdi ịyaar kẹ́tol mun.

³Kẹ́ngo weye ẹgham mọ ạbidi eepoogh ọraph ịkpina ạbidi ḅịle rꞌoonmenan ịinya ẹgham ạbidi. Kẹ́nma ighirigiir ugheel ạnmuny phọ! Ipiemi oomo awe ẹgham mọ!

⁴Koḍighi yogh ni bịdi rạraar kụ omuughu ẹpe reten ạramha phọ ạbidi.

⁵Mị Ọmoogh-we Egbogh Ẹnaan Oomo Ịikpo phọ kőghel Ịzirel rꞌaJuda, ghạlamo ịduon bịdi mụpioman bọ ni ịmi Oye Aruukuan phọ Ịzirel.

⁶Ikiil ẹḍua Bạbilonia! Ikiil ọphelom asighuḍum mọ anyina! Inyina kị́ze loor ịkaraph ạBabilon. Nyịidipho mị raḅulemian kụ rạliom ẹmha phọ ịdi ẹkpianaan.

⁷ẠBabilon ạghigh ịdipho ẹgo agol dị mị ạpham ḍịghaagh ạmi, kụ eḍighi ịdi oomo aḅirini phọ ọphughol ghan. Areelhe phọ ụphughol li miim mọ kụ oyeela.

⁸ẠBabilon mameel ekperenom kụ mophiemi! Imoghinaan! Ịwa rọogho eḍighi riisi phọ ọdi oḍighima bọ ịyaar phọ, kụ iini sịen kekeleghu ni.

⁹Aruuruen dị orugh ẹpe ụḅem mọ, ‘Yoor ụwa ọloghonaan ạḍighaagh Bạbilonia, kụ amem kụ iten. Itu ọwile nyọdi ogheel. Ẹnaan mẹlhiom Bạbilonia rꞌoomo ịnyaam ọdi kụ maphiemi ạmadan.’”

¹⁰Ọmoogh-we phọ ạḅem, “Awe phọ ạmi rọlooghi mọ ‘Ọmoogh-we phọ maḍeenaan mọ yoor odi ni elhiom. Itu ọghi ọḅeni we phọ odi bọ Jeruselem ịpe Ọmoogh-we Ẹnaan phọ ayira maḍighi bọ.’”

¹¹Ọmoogh-we phọ maphighemi bụdaam mọ aMedia aḅerion, loor esi dị ọdi ạmoogh ịitughian ophiemi ạBabilon. Ịdipho kụ ẹdi oḅulemian phọ ọdi kạtol loor esi ịpe oogulemi bọ Otu Ịiḅereghi phọ ọdi. Bụphe oḍiemiom bọ we ẹgham mọ ọto ọngo, “Ikola yogh ịnhu ịkpina anyina! Ịsighe ịsuaram anyina ẹpham!

¹²Ịngo elegh ozuom iikpe ạBabilon. Ịkparami bukoriom mọ. Itom bụo ọmeregha phọ! Isereghi we riisi ịbooghian!” Ọmoogh-we phọ maḍighi ịpe ọdi ạḅem bọ mọ ọno kaḍighi we ạBabilon phọ.

¹³Eelhe phọ ẹpe ẹmoogh ịbadi ạriphiiny rꞌẹelha dị ẹmanam, kụ ọlo amem ọdi mẹteeny kụ oḍigh aghuḍum mọ ọdi mosoph.

¹⁴Ẹnaan Oomo Ịikpo phọ Ọmoogh-we phọ maghunya rꞌaghuḍum ọdi mọ ọno kạsighe ịbadi awe ịdipho aḍita igurubia kụ atumom ozuom ạBabilon, kụ bịdi ọlo ḍịolho ọkpar opu.

¹⁵Ẹnaan phọ ạlemom de phọ rꞌịikpo ọdi; rꞌolegheri ịyaar ọdi kụ ẹdi ọdi ạlhemom bọ aḅirini phọ ạḅile arere kẹ phọ.

¹⁶Esi ịto ọdi kụ ạrumuum ạnyu okuaḍio phọ oghur; ọdi aakpomoghi ọotu dị ạrol ruukuna ade phọ. Ọdi aḍighi ịdi aḍio ẹmeephian mem ọlophia kụ amitiom oghim dị ạrol esi dị ọdi raseere ghan.

¹⁷Awe dị ọmiin ịphen phọ ologhoma mọ bụno olegheri-ịyaar rꞌọnaghanan ạḍughum ụ́moogh. Bụphe rọkaaghi bọ rụmugh ọmoogh mabi loor esi dị ạrumugh phọ bịdi rọkaaghi bọ oopho ịyaar dị ị́moogh ghuḍum.

¹⁸Bịdi ị́man mạar kụ ẹkpe ophogh ọḅitonaan; kopiemi ni bịdi mem dị Ọmoogh-we phọ katu bọ oogulemi ạbidi.

¹⁹Ẹnaan phọ ạJekob ị́kigh ịdipho ạbidi; ọdi kụ ọpo ạlhem bọ oomo ạraraar, kụ ọdi mạsaḅar Ịzirel oḍighi ọkar awe ọdi. Ẹnaan Oomo Ịikpo Ọmoogh-we phọ kụ aḍien ọdi.

²⁰Ọmoogh-we phọ ạḅem, “Bạbilonia, nạ ạmana ạmi, ịyaar ẹgham ạmi. Mị ạsighe nyịna ịlo oogbonyonom ghan areelhe rꞌọmar kịrokiro,

²¹ootughuḍiom rụsu rꞌawe lọ rokiilom bịdi, oḅomoghiom arughuugh-ude rꞌabukiilom ạbidi,

²²ọziom alephiri rꞌạnmariir, ophiemiom ikumoor rꞌugheel, ọziom alephiri ạnmuny rꞌạnmanyaan,

²³ọkanyanam abukoriom rꞌasita ịnam ạbidi, ọkanyanam abubulom iizo rꞌạrusu ạbidi, ophiemiom ạbudaam ạramha rꞌabugbogh awe iiḍighi.”

²⁴Ọmoogh-we phọ ạḅem, “Nyina kẹmiin ịdi mị kaḅulemian Bạbilonia rꞌawe ọdi esi oomo ịkaraph phọ bịdi oḍighi bọ Jeruselem.

²⁵Bạbilonia, nạ ạkigh eegum dị ephiemi oomo aḅirini phọ kụ mị Ọmoogh-we phọ kụ ạmulogh-ḍien ạna. Mị kạpham ni nyịna, ạawalami nyịna kꞌude kụ nạ aten ọoru.

²⁶Mem dị maatughuḍian, rꞌọpherepe kạ́tol mun kꞌạna dị kọloghom nịiniin otu. Nạ kạkigh de ịisaar kꞌagee-pọ. Mị Ọmoogh-we phọ kụ mạḅem.

²⁷“Ịngo elegh ozuom mọ! Ipula ọkuodu phọ ẹrol dị areelhe phọ ọnaghan! Ịḅeni reelhe phọ ọnyaaghian eenom ẹgham rꞌạBabilonia! Ịḅeni ọmar kịrokiro ạbuphe Ạrarat, Mini rꞌAskenaz mọ ozuom. Ịma ogbogh dị kaḍiemiom ozuom mọ! Ịpam erumom rụsu phọ ịdipho aḍita igurubia.

²⁸Iikolobian reelhe phọ eenaan rꞌạBabilonia. Itom ẹghiom bụdaam aMedia, buḍiemiom mọ ạbidi rꞌawe iiḍighi phọ rꞌawe ẹgham oomo areelhe dị bịdi kụ ropogh.

²⁹Ade phọ ekperenom kụ ephiigha loor esi dị Ọmoogh-we phọ raḍighi igbiighi phọ ọdi kamitiom otene ạBabilon de ịisaar, esi dị oye útugh.

³⁰Awe ẹgham ạBabilon phọ mosophe elephiri kụ ọtologhu riisi ẹkpar phọ ạbidi. Oḅio bịdi ólho mun kụ mọrol mụdi ạnmariir. Ịnhu-aḍibuo ẹmha phọ meḅonyonu emeleghu, kụ aruutu phọ reemor nịan.

³¹Otelhedom atum otelhedom akiil ghan rạḅeni ọdaam-ẹmha phọ ạBabilon mọ moḅomoghi iikpe phọ oḍiku ẹmha phọ tọro ạga.

³²Ạbumulogh-ḍien phọ mọsighe esi ọḅeeny ọphiiny phọ kụ ạlogh nịan oomo aruutu ogonaam aloor phọ. Awe ẹgham ạBabilon phọ mọmoogh oghiilaan.

³³Kébia ạbumulogh-ḍien phọ koogbo bịdi kụ ọozeghi ịdipho ịbiakpa dị edi esi rọponyon. Mị Ọmoogh-we Egbogh Ẹnaan phọ Ịzirel kụ mạḅem.”

³⁴Ọdaam-ẹmha phọ ạBabilon aagbo ẹmha phọ aJeruselem ạkiriph kụ ale; Ọdi akpululumi ẹmha phọ mụdi izoki; ọdi ạmin bịn mụdi egbogh ẹnam. Ọdi ạsighe ịlo ọdi ạwa kụ aroph ịpheri phọ.

³⁵Ẹkpe dị awe phọ ạZayon kọḅem mọ, “Ọpham Bạbilonia mọ bịdi kụ uḍighi bọ iyoor igbagbaar ạraraar phọ ịphen!” Ẹkpe dị awe phọ aJeruselem kọḅem mọ, “Ọpham Bạbilonia mọ bịdi kụ ụngo bọ iyoor ịminimiin phọ ịphen!”

³⁶Kụ iḍighi kụ Ọmoogh-we phọ ạḅeni we phọ aJeruselem, “Mị kịghaaphaan ni inyina kụ mị aḍighi ịdi ạbumulogh-ḍien anyina kọkpe ịpe bịdi iḍighi bọ inyina. Mị kạkaragharami okol ạmuum mọ ạBabilon kụ aḍighi ịdi rịphiiny phọ ạmuum kạ́tol mun.

³⁷Eelhe phọ ẹpe keten egu asighiigh, esi dị ilhom ịnam kụ kẹtol ghan. Kebeeph iboom ọmiin; rꞌoye sịphe kátugh, kụ oomo ạbulo ọmiin kokpereghaan ni.

³⁸Awe ạBabilon phọ omoogha mụdi ạnam-dịka kụ ọḅile ọkughian mụdi ạnmuny ạnam-dịka.

³⁹Bịdi rọwa ghan olhe ẹpher ḍụghum? Mị kạsaanaan bịdi malhe kụ aḍighi ịdi bịdi kọyegheyeghe yogh kụ iloghi ẹḅaal. Bịdi kọnaani kụ kọ́suma.

⁴⁰Mị kạsighe bịdi ọkanyan mụdi ạnmuny iyool-ịga rꞌạrutu-ịga rꞌidughuna. Mị, Ọmoogh-we phọ, kụ mạḅem.”

⁴¹Ọmoogh-we phọ ạghaaph ịlo ạBabilon: “Ẹmha phọ oomo aḅirini phọ kụ ọseph ghan bọ, awe mọsighe! Pọ eeghe ịdi ạBabilon meeph ọmiin esi oomo areelhe!

⁴²Ọphiiny phọ mạmin ạBabilon kụ oomo oologh phọ aaghironom nyọdi.

⁴³Ạramha phọ meeph ọmiin kụ meten de ịisaar dị ạmuum ólho, kụ rꞌoye dị katelhe ạḅeeny ólho mun.

⁴⁴Mị kạliom ni Bẹl, ẹnaan phọ ạBabilon, kụ aḍighi ịdi ọdi kamiteghom ruphua phọ ọdi amiighi bọ; areelhe phọ nyọdi kéeseeny mun. “Iikpe phọ ạBabilon memeleghu.

⁴⁵Awe Ịzirel, ikiil ẹḍua sịphe! Ikiil akpetenaan ogbogh ophin ologhi phọ ạmi ẹphela siloor.

⁴⁶Oḅio anyina kúḅonyonu. Kékiilaan loor ẹmhu iphiligba phọ nyina ẹnaghan bọ. Tọrobo ạlha ịdo kịrokiro ịinaghan kụ releeny ghan — ịinaghan ọwa asighiton sịphe ade phọ rꞌịdi oniin ọdaam azuom ọnon elephiri.

⁴⁷Amem retu ni dị mị kapiemi ịkaaghineen ạraraar phọ ạBabilon. Koseere oomo eelhe phọ dọl aroofola, ḅịle oomo awe phọ kọze ni.

⁴⁸Tọrobo ịyaar ịsien ade phọ rꞌẹpe okuaḍio phọ kẹlo ḍịolho iboh mem dị ạBabilon mameel aḍigh rạghaagh awe phọ ọḍua bọ ẹpe ephunom mọ kụ oru ophiemi ọdi.

⁴⁹ẠBabilon kụ aḍighi ịyaar dị awe omuughu oomo aḅirini phọ, kụ nyịidipho ạBabilon kameel li loor esi dị ọdi kụ aḍighi ịyaar dị ịbadi awe Ịzirel omuughu. Mị Ọmoogh-we phọ kụ mạḅem.”

⁵⁰Ọmoogh-we phọ ạḅeni we phọ ọdi dị odi Bạbilonia mọ, “Nyina mekpetenaan ḍuugh. Nyịidipho ịki! Kéebinyemi! Ghạlamo ịduon nyina ẹkelan bọ ni ẹmha phọ, ịitughian ni ịmi Ọmoogh-we phọ anyina, kụ ẹḅile ẹetughian Jeruselem.

⁵¹Nyina ẹḅem mọ, ‘Muufolomi iyoor ọḅile uḍighi iyoor ịlo umugholoor; yoor ologhoma mọ ịyaar dị kịlhoghonaan iyoor ḍịghaagh ílho loor esi dị aruuruen kụ mọsighe riisi ạdol iigbia sịphe Otu Ịiḅereghi phọ.’

⁵²Kụ iḍighi, kụ mị ạḅem mọ amem retu ni dị mị kapiemi ịkaaghineen ạrumugh phọ ạBabilon kụ bụphe oḍighi yogh bọ rạraar elegh kọkonan ni oomo eelhe phọ.

⁵³Ghạlamo awe ạBabilon ụsiiny okuaḍio kụ ọlogh ogey otu-ịikpo ọrol kụ ogona aloor, mị katom ni we ọghi olhereghi. Mị, Ọmoogh-we phọ, kụ mạḅem.”

⁵⁴Ọmoogh-we phọ ạḅem mọ, “Ịnaghanan ẹḍogh emoghi ẹpe Bạbilon, emoghi ịlo ạraraar dị mophiemi sịen ade phọ.

⁵⁵Mị rapiemi Bạbilon kạḅile akpomori ọnhu ọdi. Asita awe ẹgham oogborion otu mụdi oologh kụ ozuom ọdi rꞌịlooghi.

⁵⁶Bịdi moru ophiemi ạBabilon; mosiphi we ẹgham mọ ọdi, kụ mowunughi sịkumugh ạbidi. Mị kụ Ẹnaan dị rạliom ghan ịkaraph kụ mị kaḍighi ni Bạbilon ịdi ẹkpianaan nyọdi.

⁵⁷Mị kaḍighi bụphe ọda bọ ẹmha phọ ọyegheyeghe — we ologhi, buḍiemiom, ḅịle rꞌawe ẹgham. Bịdi ọnaani kụ kọ́suma. Mị ọdaam mọ kụ mạghaaph. Mị kụ Ọmoogh-we Ogbogh phọ.

⁵⁸Iikpe oboom mọ ạBabilon kosiemi ude, kụ ọsu nịan iiphopha ạrunhu-aḍibuo phọ ọdi. Oḍighi areelhe phọ ape ni bịn; ẹkpar phọ ạbidi meḍigh nịan. Mị, Ẹnaan Oomo Ịikpo Ọmoogh-we phọ, kụ mạḅem.”

⁵⁹Oye dị arelhe ghan sidom ạZedekaya ọdaam mọ ughol mọ aSeraya, ọony aNeraya rꞌọony ọony aMaseya. Lhạ dị emuneniom inya dị ạZedekaya mạda Juda, aSeraya ạdaph ni nyọdi rạki Bạbilonia, kụ mị ạḅeni nyọdi ịdi ọdi kaḍighi.

⁶⁰Mị ụge ni loor ạḍinya oomo ịpe kopiemi bọ Bạbilonia rꞌoomo ịnon ạraraar ịlo ạBabilon.

⁶¹Mị ạḅeni Seraya, “Mem dị nạ asi Bạbilon, mạar ạal tọrobo ịlo ọge sịen phọ ạḅeni we phọ.

⁶²Kụ agbi ọoḅereghi mọ, ‘Ọmoogh-we, nạ mạḅem ni mọ nạ kapiemi esi phọ ẹphen, ịdi ịyaar lọ repooghu kẹ́tol mun, mꞌoye mꞌẹnam, ḅịle mọ ade phọ kẹkigh de ịisaar kꞌagee-pọ.’

⁶³Seraya, mem dị nạ mạmadan ạal ạḍinya phọ ạḍien ạḅeni we phọ, kụ ạsighe ḍịnya phọ ạkpoom ḍighiigh asumeeny Ọphiiny aYufratis,

⁶⁴kụ ạḅem, ‘Ịphen kụ ịdi kemitenaan eelhe phọ ạBabilon — keḅi ni bịn képooph mun, loor esi ophiemi phọ Ọmoogh-we phọ katuomaan bọ nyọdi.’” Ikpo ọnhu aJerimaya ekureri sịen.