Read abua Jerimaya 52 Bible Online

Jerimaya 52 - abua bible

Jerimaya 52

¹ẠZedekaya ạman bọ ịyaldi rꞌoniin ạsia kụ ọdi agbi bọ ọda aJuda. Kụ ọdi ạda bọ ḍioph rꞌoniin ạsia ẹpe Jeruselem. Ḍien onhiin ọdi ughol mọ aHamutal ọnyani aJerimaya ọpo ạrol bọ ẹmha phọ aLibna.

²ẠZedekaya ọdaam mọ aḍighi yogh ịdi ị́nighe risigh Ọmoogh-we phọ, ạdaph oomo ịkaraph phọ ịpe aJehoyakim aḍighi yogh bọ kụ aḍighi ghan.

³Ọmoogh-we phọ ạghagham ni ologhi iboom weye phọ aJeruselem rꞌaJuda, dị tụtu ọdi aphorogh bịdi ọḍua risigh ọdi. ẠZedekaya ạḅaar ẹmhu esi ạNebukadnezar ogbogh ọdaam mọ ạBabilon.

⁴Omuneniom aḍioph Aḍughul-otu omuneniom aḍioph ụnwanyu esi ạlha dị emuneniom esugha dị ạZedekaya mạda bọ, ạNebukadnezar ogbogh ọdaam mọ ạBabilon rꞌaḍita awe ẹgham mọ ọdi ọghi ozuom ẹgham Jeruselem. Adoghoḍi rugbogo akitonom, adoghoḍi ruutu ẹgham akoom Jeruselem.

⁵Akpobiom ẹmha phọ aruphiom ẹgham tụtu ẹteeny lhạ dị emuneniom ḍioph rꞌaḍiniin ạlha ạZedekaya ạda bọ.

⁶Omuneniom esugha aḍio omuneniom inya ụnwanyu ạlha phọ ạḍiphe phọ, ịgbakuro mẹphughan sịphe ẹmha phọ. Eḍien dị awe ịsiphe ẹmha phọ kole ị́tol.

⁷Kụ okputon iikpe ẹmha phọ. Ghạlamo ịduon awe ạbuo ạBabilon oko bọ ni ẹmha phọ okitonom mem mọ ạmuphe phọ ozuom ẹgham, oomo awe ẹgham mọ osumughu ḍughul eten ịsiphe eḍighom ẹmha phọ sịphe ịbaay ịyal phọ iikpe phọ edi bọ sịphe ọgbal oghoony ozo ọdaam mọ; kụ ọdaam mọ asuma agheel ẹpe Eḍiiny ạJodan.

⁸Kụ awe ẹgham mọ ạBabilon ophorogh Zẹdekaya ọteeny ẹpe ạḍiyaghaghaany ade phọ aJeriko, kụ osiph nyọdi; kụ awe ẹgham mọ ọdi ọwile nyọdi sịphe phọ osumughu.

⁹Ụsighe ni Zẹdekaya ọghiom Nẹbukadnezar ẹpe Ribla ẹpe eelhe phọ ạHamat, kụ bịdi osophonaan nyọdi ọoruen.

¹⁰Sịphe Ribla kụ ẹdi ọdi ạze nmụny phọ ạZedekaya risigh ọdi, kụ ạḅile ạze bugbogh awe iiḍighi phọ aJuda.

¹¹Mem dị ịpe eten, ọdi ạponyon riḍien ạZedekaya, kụ ạḅile ạlhogh nyọdi izime kụ ạpham ạghimom Bạbilon. ẠZedekaya ạrol ikoli ẹpe Bạbilon tụtu ẹteeny ḍio dị ọdi amugh.

¹²Omuneniom aḍioph Aḍughul-otu omuneniom oogh ụnwanyu esi ạlha dị emuneniom ḍioph rꞌesugha dị ạNebukadnezar mạda bọ Bạbilonia, ạNebuzaradan otomoghiom ọdaam mọ rꞌoḍiemiom ẹgham mọ, aru asi Jeruselem.

¹³Ọdi ạsu nịan Otu Ịiḅereghi phọ rꞌotu ọdaam mọ rꞌaruutu oomo abugbogh awe phọ orugh bọ ẹpe Jeruselem,

¹⁴ḅịle awe ẹgham mọ ọdi olhereghi oomo iikpe phọ ekoom bọ ẹmha phọ.

¹⁵ẠNebuzaradan ạpham ạḍuanam bụphe osugha bọ sịphe ẹmha phọ rꞌạbueri phọ awe ạmaka phọ rꞌạbuphe osumughu bọ ọtuonom ọdaam mọ ạBabilon.

¹⁶Arukulom mọ rꞌighiil ạagia awe bịn kụ ạbudi uwo ẹmhu awe ẹgham mọ ạwile sịphe eelhe phọ aJuda mọ bịdi ọzuphogh ghan ịghol, oḅephogh ghan iizo sịphe ade phọ.

¹⁷Awe phọ ạBabilon uḅomoghi ni ọogbighiḍi rọko enaba phọ rꞌarughuugh-ude phọ ẹrol bọ sịphe Otu Ịiḅereghi phọ ḅịle rꞌogbogh ạbafu enaba phọ, ọsighe kẹn oomo ạraraar enaba phọ ọpham ogheelom Bạbilon.

¹⁸Bịdi ụsighenom kẹn ni ịghophom rꞌaretelheleeny dị rookoroghiom ghan ịpherepe ạraraar sịphe enmeny phọ, rạraar lọ rọḅamam ghan ịtozi, rụkpa lọ rokonom ghan ịḅaal lọ rẹteph mem ạrikia, rụkpa osuom ghan ịnsens rꞌoomo ịnon ạraraar lọ oḍighinom enaba dị roḍighinom ghan rạraar sịphe Otu Ịiḅereghi phọ.

¹⁹Ụsighenom kẹn ni oomo ạraraar phọ oḍighinom bọ gol rꞌasilva ọḍuanam: ịbam ạrukpa, sịgbagba ọḅamam ghan iiḅu dị reda, ạrukpa oghonom ghan ịḅaal, sịgbagba ọlogh ghan ọoru, ịmeremiom ọtozi, rụkpa ọphamam ghan ịnsens rꞌạrukpa ọmoorom ghan amiim.

²⁰Ẹemor ạraraar phọ ọlhemom bọ enaba phọ ịpe ạSolomon aḍighinaan bọ ạngo Otu Ịiḅereghi phọ, ịyal phọ ạroko phọ rꞌarughuugh-ude phọ rꞌogbogh aguugh phọ rꞌaḍioph rꞌịyal ilephiri ạsinam dị eḅeghom, ịphughan ni olegheri.

²¹Ịyal phọ ạroko phọ ịighighighan ni. Oniin ạman ghan ọphaanya akuḅu ḍiphoph ḅịle oogh rꞌọony egbem akuḅu ọto ooghironom. Ologhi phọ ạrol poghoroko, kụ ạmama phọ aḍighi oḍualdi rꞌoogh ịkala oogbiim. Ạnyu ạroko phọ useeriom ẹmhu dị ẹman ịyal rꞌọony egbem akuḅu ḍiphoph, ọḅile okoom oomo phọ ọdi ọnighemiom ịyaar dị ẹghigh rughuuny ekpetughe dị oḍighinom enaba, oomo phọ ịdi uḍighinom enaba. Ịduon phọ kẹn kụ ịdi ẹko phọ ẹpe emuneniom bọ ịyal phọ ẹrol.

²³Ạnyu ạroko phọ oniin okuron ịyaar dị ẹghigh arughuuny ekpetughe kụ ịrol, oomo phọ ịdi — kụ ọlo esughadi rꞌodiiny kụ iganana dị ọrol ude kụ ophogh.

²⁴ẠNebuzaradan uwo ẹmhu ạbuo ẹgham mọ asiph Seraya uwo ẹmhu oyil ạrikia phọ rꞌạZefanaya oyil ạrikia phọ atum bọ pạ rꞌịraar awe phọ ạbuphe rokori ghan bọ sịphe ọnhu-aḍibuo Otu Ịiḅereghi phọ ạpham ạḍuanam.

²⁵Sịphe ẹmha phọ, ọdi asiph nyọpo ạda bọ we ẹgham mọ, rꞌoḍual awe dị rotomoghiom ghan ọdaam mọ dị osugha sịphe ẹmha phọ, rꞌotum uwo ẹmhu ẹgham mọ dị rạgeeghi ghan ịlo ẹgham, ḅịle ra odiinydi ikpolom awe ẹmha phọ.

²⁶ẠNebuzaradan ạpham bụen phọ ạghiom ọdaam mọ ạBabilon ẹpe Ribla.

²⁷Kụ ọdaam mọ aḍighi ịdi okophogh bịdi ọze ẹpe Ribla ẹpe ade phọ ạHamat. Ịdipho kụ ịdi osiphi bọ weye phọ aJuda ọpham ọḍuanam sịphe ade phọ ạbidi osiom iiruen arikpisi.

²⁸Ịphen kụ ịpe ọge bọ ịlo awe phọ ạNebukadnezar asiphi bọ ạḍuanam: lhạ phọ emuneniom bọ oḍual phọ, ọdaam mọ ạsighe ạḍuanam — 3,023 awe;

²⁹lhạ phọ emuneniom bọ ḍioph rꞌọphaanya phọ — 832 awe dị ọrol sịphe Jeruselem;

³⁰lhạ phọ ạḍiphe emuneniom bọ ịyaldi rꞌịraar phọ — 745, dị ạNebuzaradan ạsighe ạḍuanam. Esi ookpomoghi, 4,600 awe kụ edị ọsighe bọ ọḍuanam.

³¹Lhạ phọ ạḍiphe Evil Merodak aḍighi bọ ọdaam eelhe phọ ạBabilon, ọdi ạnma ni ighirigiir Jehoyasin ọdaam mọ aJuda kụ ạtagharan nyọdi ẹpe otu ikoli phọ. Ịphen phọ imite ḍio dị emuneniom ịyaldi rꞌoogh, ụnwanyu dị amuneniom ḍioph rꞌịyal esi ạlha dị emuneniom ịraardi rꞌoḍual dị ọsighe bọ Jehoyasin ọḍuanam ịdipho ọnyo-ikoli.

³²Evil Merodak ạsighe oodugha ọnhu ạphamam nyọdi, kụ ạsighe ạgada igbogh ạngo nyọdi apuemi bụeri phọ ạbudaam mọ rꞌọdi ọrol bọ sịphe Bạbilonia.

³³Ameera mọ aJehoyasin ạkporonaan iinmenan ikoli phọ ọdi kụ alhe ghan eḍien sịphe ịdaabili ọdaam mọ oomo asiḍughul-otu aghuḍum mọ ọdi.

³⁴Tọrotoro aḍio esi oomo asiḍughul-otu aghuḍum mọ ọdi, ụkpe ghan ni nyọdi ikpoki dị ọdi ạrolom ghan.