Read abua Jerimaya 6 Bible Online

Jerimaya 6 - abua bible

Jerimaya 6

¹Weye ạBenjamin, ikiil esumughu! Isumughu ẹḍua Jeruselem! Ipula ọkuodu phọ ẹpe Tekoa kụ ẹkpooni nịan eḍeenaan phọ ẹpe Bẹt Hakherem. Ilhom ịiḅaghami rꞌoogulemi mẹḍua ẹpe ephunom mọ retu.

²Ẹmha phọ ạZayon ẹnighe ni, kụ ọlo kopiemi ni;

³ạbudaam rꞌawe ẹgham ạbidi kụ kotugh. Bịdi kodoghoḍi rugbogo ẹgham kụ okoonyom ẹmha phọ, kụ tọrotoro ọnyo ạbidi katugh ghan esi lọ ẹḅeeraan nyọdi.

⁴Bịdi kọḅem ghan mọ, “Iikolobian ozuom ẹgham Jeruselem! Iikolobian! Yira kozuom bịdi mem ootaany!” Kụ bịdi kọḅem mọ, “Amem meten, aḍio phọ remuneen, oogho oye mạdoony.

⁵Yira kozuom bịdi ḍughul; yira koogulemi riisi ịikpo ẹmha phọ.”

⁶Ẹnaan Oomo Ịikpo Ọmoogh-we phọ mạto ạḅeni bụdaam mọ ạbuen phọ mọ olher ireeny okpol rugu ọbo okpobiom Jeruselem. Ọdi mạḅem mọ, “Mị kạliom ni ẹmha phọ ẹphen loor esi dị ịgbiphoghom mọ ẹphughan.

⁷Ịdipho aghuḍia rạpam ghan bọ mụum mọ ọdi kụ ịdi aJeruselem ạphamanam ịkaraph phọ ọdi. Mị rạnaghan ghan mụzian rꞌọphueghi ạraraar dị edi sịphe ẹmha phọ; ạrelem dị obenogh weye rꞌariiphina kụ oomo ịdi mị rạmiin ghan.

⁸Nyina aweye aJeruselem, ịiḅaghami phọ ịphen phọ ẹphur aḅeri anyina, ịduon kụ ílho pọ mị kịḅitonaan inyina; mị kakiton ẹmha phọ anyina atene de ophugh, esi dị oye kátugh mun.”

⁹Ẹnaan Oomo Ịikpo Ọmoogh-we phọ ụḅeni ịmi mọ, “Koḅeer Ịzirel ịdipho ozo iimuma avain lọ mọku ọmadan. Kụ iḍighi kụ pẹl tọrotoro oye lọ nạ katue ạpel sịen amem mọ edi bọ.”

¹⁰Kụ mị ạphagharanaan mọ, “Ạnhian kụ kụnaghanan ịmi eḍighi ịyaar dị mị ạḅaanaan bịdi ịlo ọphurom aḅeri? Bịdi oḍighi weye oḅom ẹmhu ḅịle kẹn úmeera ụ́naghanan dom mọ ạna; bịdi ụmilogh ghan bịn ịpe nạ ụḅeni bọ ịmi mọ kạaph phọ.

¹¹Ọghagh ologhi phọ ạna, Ọmoogh-we, aamor aani kẹn ni esi ạmi, ḅịle kẹn mị útue mun ụ́kparam.” Kụ Ọmoogh-we phọ ụḅeni ịmi mọ, “Sịghe ọghagh ologhi phọ ạmi aakuom ịbam ạnmuny phọ ẹpe aroḅodo phọ rꞌạtorobo esi lọ ugheel ạnmuny ookpomoghan. Kọsighe ni ọḍuanam burulhom rꞌạnmariir, ḅịle kẹn ghạlamo ọkaraghi ikumoor awe phọ bịn kókpetenaan.

¹²Ruutu phọ ạbidi kọngooghi bụnon awe, ịduon kẹn kụ ịdi keḍighi iizo phọ rꞌạnmariir phọ ạbidi. Mị kạliom weye ade phọ ạḍien.

¹³Tọrotoro oye, bugbogh rꞌạbubam, robianan ghan ọmoogh ikpoki ịkaraph areten; ghạlamo ariil Ẹnaan phọ rꞌariil ạrikia phọ bịn roogbegheḍiom ni weye phọ.

¹⁴Bịdi roḍighi ghan mụdiadi igbogh ạrelem awe phọ ạmi eḍighi riisi dị ịyaar bịn kụ ẹgoor. Bịdi rọḅem ghan mọ, ‘Oomo ạraraar ẹnighe ni,’ mem dị oomo ạraraar ị́nighe.

¹⁵Umugholoor asiph ni bịdi loor esi ạraraar isa phọ bịdi oḍighi yogh bọ ḍụghum? Eeye, umugholoor ósiph bịdi rꞌẹnum; bịdi úlegheri rolegheri ịlo okiriri. Kụ iḍighi kụ bịdi komeel li ịdipho ạbueri phọ momeel bọ; mem dị mị ạliom bịdi, ẹpe kụ keḍighi eekuna ạbidi. Mị Ọmoogh-we phọ kụ ụḅem.”

¹⁶Ọmoogh-we phọ ạḅeni weye phọ ọdi mọ, “Ịmeera sịphe ịgbaranuom areten phọ kụ ephogh. Iipuruan reten ageedi phọ ḅịle kẹn rꞌekpisi lọ ọkaraghi egey eten phọ edi bọ. Itelhe nyẹpe phọ bịn nyina kẹmoogh ni ẹepho.” Kụ ọlo bịdi ụḅem mọ, “Eeye, yoor kọ́daph!”

¹⁷Kụ Ọmoogh-we phọ ạmaaghi bukoriom kụ ạḅeni mọ olher ghan aḅeri ọnaghan mem lọ ọkuodu phọ rạḅa ọpur awe rụru. Kụ ọlo bịdi ọḅem mọ, “Yoor kóler aḅeri ọnaghan.”

¹⁸Kụ iḍighi kụ Ọmoogh-we phọ ạḅem mọ, “Ịnaghan nyina areelhe phọ, ẹḅile elegheri ịpe kemitenaan bọ weye phọ ạmi.

¹⁹Nạ ade phọ, nạghan! Esi ọliom ạbidi loor oomo phọ ịphen bịdi roḍighi bọ, mị kaagulemi bịdi, loor esi dị bịdi moghel ịtughemi phọ ạmi ḅịle kẹn ikpo ọnhu phọ ạmi bịdi ụ́naghanan.

²⁰Ịnsens phọ bịdi rọsighe ghan bọ kꞌẹpe Siba kuruom ịmi, ḅịle rꞌarolho eḍu kịrokiro kꞌẹekela ekpisi, mịna kaḍighinom eeghe? Mị kạ́sighe inmo phọ ạbidi; ạrikia phọ ạbidi kẹn bịn ịmi ị́ḅeeraan.

²¹Kụ iḍighi kụ mị kaḍighi ịdi awe phọ ạbuen kokpeghaan omeleghu. Ạburude rꞌạnmuny phọ ạbidi komuughu ni, ịduon kẹn kụ ịdi ạrighiri rꞌamatuman komuughu.”

²²Ọmoogh-we phọ ạḅem mọ, “Awe mọḍua eniin eelhe ẹpe ephunom mọ rotu; eelhe dị ẹmoogh ịikpo kụ ẹkel iboom, bịdi rookolobian ẹgham.

²³Bịdi mọsighiogh ni sịkumugh rꞌarolhool ẹgham ạbidi; bịdi oḍighi ni ịgbagara awe dị ụ́moogh ọnma ighirigiir. Mem dị bịdi oḍiku ạsu kụ rotu, oghur phọ ạkigh oologh otu-ḅualhe. Bịdi mookolobian ozuom ẹgham Jeruselem.”

²⁴Kụ awe aJeruselem ọḅem mọ, “Yoor mọnaghan ni ịinaghan phọ, kụ ạraghaagh ayoor mẹḅoonian; aruugu rusiph iyoor ịdipho ạnir lọ oghunughun rakun.

²⁵Yoor kótue osuma ọki ẹpe ịbam ạramha phọ ọbo kẹn omite ẹpe aroḅodo phọ, loor esi dị ẹpomoghian phọ ayoor ọpam ni reenema kụ aruugu mukoom iyoor.”

²⁶Ọmoogh-we phọ ạḅeni weye phọ ọdi mọ, “Ịkpologhian ạsuoma ọto kụ eekila esi ọoru. Imoghi igey izin ịdipho oye lọ ogina ọony ọdi amugh loor esi dị ọpo ratu bọ oogulemi anyina kizuom ni inyina ekperenom.

²⁷Jerimaya, dẹgh weye phọ ạmi aphogh, ịdipho ropogh ghan bọ okuron mụghumo ogey ni, ạwaaghi alegheri ịpe bịdi ọrol bọ.

²⁸Oomo ạbidi oḍighi ịgbagara awe oḅom ẹmhu, ọgbagara ịdipho enaba mꞌokuron. Oomo ạbidi ịḅoria awe, awe ẹphiiny rꞌịkalaghian.

²⁹Ạnian phọ reemor ri iboom, kụ ọlo okuron phọ ọ́gbo ókilogh omite. Oolemi ghan awe phọ ạmi ọghiom arisigh eḍighi ni oroph amem, loor esi dị ụ́sighe ịkaraph awe phọ ụ́ḍuanam.

³⁰Kokol bịdi irughuza, loor esi dị mị Ọmoogh-we phọ maghel bịdi.”