Read abua Jerimaya 7 Bible Online

Jerimaya 7 - abua bible

Jerimaya 7

¹Ọmoogh-we phọ urom ịmi ọghi ịsiphe ọnhu-aḍibuo Otu Ịiḅereghi phọ ọpo awe phọ aJuda rọki ghan bọ kooseeny Ẹnaan. Ọdi ụḅeni ịmi ọmeera ịsiphe phọ kụ ọghaaph bọ ịpe Egbogh Ẹnaan phọ Ịzirel Ọmoogh-we phọ rẹwa bọ ọḅeni ạbidi: “Inme dọl phọ nyina edi bọ ḅịle kẹn rꞌạraraar phọ nyina reḍighi bọ, bịn mị kameera ni nyina erugh sịen phọ ẹghiom risigh.

⁴Kémeeraam mun ikpo ọnhu areekeleghian phọ, ‘Ịiḅaghami ílho! Ọphon Otu Ịiḅereghi Ọmoogh-we phọ! Ọphon Otu Ịiḅereghi Ọmoogh-we phọ! Ọphon Otu Ịiḅereghi Ọmoogh-we phọ!’

⁵“Inme dọl phọ nyina edi bọ ẹwile oḍighi ạraraar phọ nyina reḍighi yogh bọ. Oniin kụ́gbiphoghom nyoniin.

⁶Kẹ́tuan mọ oye phọ aḍighi ooruen, mꞌọnyigo ọony, mꞌekpukele ạnir bịn ephogh iniin eḍighi ghan bịdi. Kẹ́ze mun weye dị ịyaar ụ́piom sịen ade phọ aḍien. Kẹ́eḅereghi mun ịnon ạrumugh, ịphen phọ kiphiemi ni inyina.

⁷Eḍighi ịyaar lọ nyina enmia, pọ mị kameera ni nyina erugh sịen ade phọ mị ạngo bọ bụrude ạburude phọ anyina mọ ọmoogh kꞌagee-pọ phọ.

⁸“Ịmiin, nyina ẹsighe emooph anyina ẹkpasi esi ikpo ọnhu areekeleghian.

⁹Nyina remiighi ghan, kẹze weye, kele ẹmha, keghunya kụ egbi ọgba ọkpe, kẹphinyon rịkia ẹngo Baal, kẹḅile ẹeḅereghi rụmugh dị nyina ke̋lhegheri ghan.

¹⁰Nyina reḍighi ghan rạraar phọ ịpe mị aghel bọ, kụ nyina egbi nụun oru ọmeera aghisigh ạmi, sịphe Otu Ịiḅereghi phọ ạmi kụ ọḅem mọ, ‘Ịiḅaghami ílho!’

¹¹Nyina regbiom ghan mọ Otu Ịiḅereghi phọ ạmi aḍighi esi ịbooghian ạruḅa ḍụghum? Mị mạmiin ịpe nyina reḍighi bọ.

¹²Ịki ẹpe Sailo, ẹḅel esi phọ mị ạsaḅar bọ mọ ọrol ghan ụuḅereghi ịmi, ẹmiin ịpe mị aḍighi bọ esi phọ loor esi ịkaraph awe phọ ạmi Ịzirel.

¹³Nyina meḍighi oomo ịkaraph phọ ịphen, kụ ghạlamo ịduon mị mịḅeni bọ ni inyina ạḅile ạḅeni, nyina ímeera ị́naghanan. Mị ạmagh, nyina ímeera.

¹⁴Loor esi ịduon phọ, ịpe mị aḍighi bọ Sailo kụ ịdi mị kaḍighi Otu Ịiḅereghi phọ ạmi ọphon nyina ẹkpasi bọ emooph phọ anyina. Sịen phọ mị ạngo bọ bụrude ạburude phọ anyina ḅịle kẹn rꞌanyina, mị kaḍighi ni iniin ịpe mị aḍighi bọ Sailo.

¹⁵Mị kiphorogh ni inyina sịen egbodo phọ ạmi ịdipho mị aphorogh bọ siya phọ anyina, weye phọ Ịzirel. Mị Ọmoogh-we phọ kụ ụḅem.”

¹⁶Ọmoogh-we phọ ạḅem mọ, “Jerimaya, kạ́aḅereghinaan weye phọ ạbuen. Kákol ẹmhu ạbidi amoghi mụghumo ọoḅereghi; ịmi kụ́uḅereghian, loor esi dị mị nyịna kạ́naghanan.

¹⁷Nạ rạ́miin ghan ịpe bịdi roḍighi yogh bọ ẹpe ạramha phọ aJuda ḅịle kẹn rꞌaroḅodo phọ aJeruselem ḍụghum?

¹⁸Ịbam ạnmuny phọ rọso ghan ịpe, kụ alephiri phọ ọkpooni nịan kụ ạnmariir phọ okirion ịbiakpa dị ọgbe kụ ọgbaghaḍi rooḅoghoḍi ịyaar olhe kụ ọngo eru phọ ẹpe bịdi oghol bọ mọ Ogbogh Ạnir kꞌẠke. Bịdi ọḅile kẹn ni romoroghi ghan miim kọngo ịnon ạrumugh ọbo ephin ologhi ạmi.

¹⁹Kụ ạmina phọ ni kụ ẹdi bịdi rọdegh ghan bọ ḍụghum? Eeye, bịdi roḍighinaan ni siloor ạbidi kọḅile osiphe umugholoor siloor ạbidi.

²⁰Kụ iḍighi kụ mị Ọkar Ogbogh Ọmoogh-we phọ kaakuom ni ogbogh ọghagh ologhi phọ ạmi Otu Ịiḅereghi phọ ọphon. Mị kaakuom ni weye phọ rꞌịnam mọ iniin phọ, ghạlamo kẹn ireeny phọ rꞌịizupha phọ. Ọghagh ologhi phọ ạmi kạkigh ịdipho ạnian dị oye kátue aḍime.

²¹“Weye ạmi, iniin ạrikia phọ nyina keguom ghan nịan ẹmadan sịphe enmeny phọ, iniin ịngo ni inyina ọgel mọ ịba ghan. Kụ ọlo ịdi mị Ọmoogh-we phọ ạḅem ịduon: mọ nyina ketue ni ẹba oomo phọ ịdi.

²²Mị ụ́to ụ́ḅeni bụrude ạburude phọ anyina ịlo ạrikia dị oguom nịan mụghumo ịnon ọdo ạrikia, mem mọ ọpo mị ạsighe bọ bịdi amitiom ẹpe Ijipt.

²³Kụ ọlo mị ụto ni ạḅeni bịdi mọ ụnaghanan ghan ịmi, pịdi mị aḍighi Ẹnaan ạbidi ḅịle kẹn bịdi oḍighi weye ạmi. Ḅịle kẹn mị ụḅeni ni bịdi mọ bịdi ọtuugh ọrol pịdi ạraraar ẹnighenaan bịdi.

²⁴Kụ bịdi ụ́naghanan. Kpạripe ghụn bịdi uḍighi ghan tọrotoro ịlo ịkaraph iloghi phọ ạbidi ẹḅeni bịdi oḍighi, ḅịle kẹn bịdi eeph ni ọloghori kpạripe rꞌọnighe.

²⁵Emiigh kꞌaḍio phọ ạburude ạburude phọ anyina ọḍua bọ ẹpe Ijipt omite tụtu ẹteeny rodon phọ ạḍien, mị ratom ghan ni butelhedom mọ ạmi, riil phọ, kiruomonaan inyina.

²⁶Kụ ọlo rꞌoniin oye ọ́naghanan. Kpạripe ghụn, nyina ịḅile ghụn bịn kụ ẹḅaar ẹmhu epu bụrude ạburude phọ anyina.

²⁷“Kụ iḍighi, Jerimaya, nạ kạkaaph oomo phọ ikpo ọnhu phọ ịphen phọ ạḅeni weye phọ ạmi, kụ ọlo bịdi nyịna kọ́naghanan; nạ kạmagh ni bịdi, kụ ọlo bịdi kómeera.

²⁸Nạ kạḅeni ni bịdi mọ eelhe phọ ạbidi ụ́naghanan ịmi Ẹnaan phọ ạbidi Ọmoogh-we phọ ḅịle kẹn bịdi úpogh ịpe ọliom bọ bịdi ọsighe olegheriom. Omeeraam mamugh. Oye rạ́kaaph ghan mun kaghol.

²⁹“Ịmoogh ọto, weye aJeruselem; ịsama yogh sịlaal anyina eroḅologhi. Ịmoor ḍụor amaḍi sịphe ạnyu ạraaḅaraph mọ, loor esi dị mị Ọmoogh-we phọ rạkagh ni ologhi kụ mạḅile akel weye phọ ạmi.

³⁰“Awe phọ aJuda moḍighi ịkaraph. Bịdi mọsighe ịkaaghineen aruru phọ ạbidi, ịpe mị aghel bọ, ọlogh sịphe Otu Ịiḅereghi phọ ạmi bịn ọopu esi phọ.

³¹Sịphe Eḍiiny aHinom bịdi mọghi ọkan enmeny dị oghol mọ aTofet, pịdi bịdi ọsighe ghan nmụny rꞌạnmanyaan ạbidi oguom nịan ọpinyonom ghan rịkia sịphe phọ. Mị ụ́to ịphen phọ ụ́ḅeni bịdi — ịphen phọ ítu kẹn roru ologhi ạmi.

³²Kụ iḍighi kụ amem ketu ni dị kókol mun esi phọ mọ aTofet mụghumo Eḍiiny aHinom, kokol ghan ghụn mọ Eḍiiny Aḍuugh-Aḍuugh. Bịdi koḍiighi weye sịphe phọ loor esi dị ẹnon esi kẹ́tol mun oḍiighi awe phọ.

³³Aḍizu ạbuphe momuughu bọ keḍighi eḍien ịnun rꞌilhom ịnam, ḅịle kẹn oye kạ́tol ophorogh ạbidi.

³⁴Ade phọ keten ọkpagha. Sịphe ạramha phọ aJuda rꞌaroḅodo phọ aJeruselem mị kakunughi ḍịolho iboh rꞌạsuor ọḅaal ologhi amem apinien.