Read abua Jerimaya 8 Bible Online

Jerimaya 8 - abua bible

Jerimaya 8

¹“Mem mọ ạmuphe phọ kọsighiogh ni ịḅarara ạbudaam-ẹmha phọ rꞌạbuo ịtooghi phọ aJuda, rꞌịḅarara ariil ạrikia phọ rꞌariil phọ rꞌịlo ạbueri phọ awe phọ orugh bọ Jeruselem omiteghom sịphe iiḍi phọ ạbidi.

²Kpạripe rꞌookpomoghi oḍi, ịḅarara phọ ạbidi kẹtol ạnyu ade phọ ẹngo ẹnuum de phọ. Kọotarion esi lọ erumuḍio phọ kesoorom rꞌụnwanyu phọ rꞌạraanaan phọ kụ ịdi ịpe awe phọ ạbuen phọ ọphomoghian ghan bọ ọḅile okumu, ọḅile kẹn ọoḅereghi ghan ọḅile ọghi ghan ḍipuru.

³Ḅịle kẹn awe ẹkaraph eelhe phọ ẹphen phọ lọ osugha sịphe ạramha phọ ịpe mị aagulemi bọ kọmoogh ḍịḅeeraan omugh aani kpạripe rꞌọrol ọghiom aghisigh. Mị Ẹnaan Oomo Ịikpo, Ọmoogh-we phọ kụ mạḅem.”

⁴Ọmoogh-we phọ ụḅeni ịmi ọḅeni awe phọ ọdi mọ, “Mem lọ oye ameel ude, ọdi rạ́ḅile ghan kaḅetenu ḍụghum? Eḍighi ịyaar dị oye aphe eten, ọdi ráaghiraan ghan kaḅula ḍụghum?

⁵Eeghia kụ iḍighi bọ kụ nyina awe phọ ạmi ẹḍua bọ esi ạmi bịn réḅula mun bọ? Nyina ekuraam ịkaaghineen aruru phọ anyina bịn ímeera mun íḅula esi ạmi.

⁶Mị ulher ri rụru agey, kụ ọlo nyina ị́kaaph igey. Rꞌoniin ọnyo anyina ókiriri loor esi ịkaraph phọ anyina; rꞌoniin ọnyo anyina ópuru mọ ‘Iḍighen kụ ẹdi mị ạpioman bọ?’ Tọrotoro oye rạki ghan eten phọ ẹpe ọdi bịn, ịdipho ạsu dị rọkimom ẹgham.

⁷Ghạlamo ọgbaghaghaany bịn alegheri ni mem dị mẹkpe origheel; arukurughozo rꞌạsimugeem ḅịle kẹn rꞌạsimutia bịn elegheri ni mem lọ mẹkpe ọḍua ekpisi ọghi ẹnon esi. Kụ ọlo awe phọ ạmi úlegheri iilogh phọ mị rapoghom bọ bịdi.

⁸Nyina kẹḅem bọ ika mọ nyina ẹsu ni iloghi, bịle kẹn mọ nyina elegheri ni iilogh phọ ạmi? Ịmiin, awe areekeleghian monme ẹgeom iilogh phọ.

⁹Mosiphe umugholoor weye olegheri-ịyaar phọ anyina; bịdi úlegheri mun esi ọkpaph. Bịdi moghel ikpo ọnhu phọ ạmi; nyịidipho bịdi ọmoogh eeghia ọdo olegheri-ịyaar?

¹⁰Kụ iḍighi kụ mị kạsighe iizo phọ ạbidi ạngo bumoom awe, ạḅile ạsighe nmạriir phọ ạbidi ạngo bụnon awe. Tọrotoro oye, mꞌogbogh mꞌọbam, rabianan ghan ọmoogh ikpoki ịkaraph areten. Ghạlamo ariil phọ ḅịle rꞌariil ạrikia phọ kẹn bịn roogbegheḍiom ni weye.

¹¹Bịdi roḍighi ghan mụdiadi igbogh ạrelem awe phọ ạmi eḍighi riisi dị ịyaar bịn kụ ẹgoor. Bịdi rọḅem ghan mọ, ‘Oomo ạraraar ẹnighe ni,’ mem dị oomo ạraraar ị́nighe.

¹²Weye ạmi, umugholoor isiph ni inyina loor esi ạraraar isa phọ ịphen phọ nyina eḍighi yogh bọ ḍụghum? Eeye, umugholoor inyina ísiph rꞌẹnum; nyina ílegheri rolegheri ịlo okiriri. Kụ iḍighi kụ nyina kemeel li ịdipho ạbueri phọ momeel bọ; mem dị mị ịliom inyina, ẹpe kụ keḍighi eekuna anyina. Mị Ọmoogh-we phọ kụ ụḅem.”

¹³“Mị ụwa ni ookpomoghi awe phọ ạmi, ịdipho oye raakpomoghi ghan bọ eḍien ibugha ọdi; kụ ọlo bịdi ọkigh oreeny avain mụghumo ạfig dị úmuum rughuuny, ghạlamo ạrinya phọ bịn mẹghara. Kụ iḍighi kụ mị mạngo ọgel mọ ạbunon awe ọsighe de phọ.”

¹⁴Awe phọ Ẹnaan opuru mọ, “Eeghe kụ iḍighi kụ yira ọtol bọ bịn oḅoorian? Itu yira kokiil ọki ẹpe igbogh ạramha phọ oghoonyogh bọ kụ ọtol omuughu. Ọmoogh-we Ẹnaan phọ ayira mụḅogh iyira ạngo ḍuugh; ọdi mạsighe ịyaar dị kekiigh oye ụngo iyira mọ ọphughol, loor esi dị yira moḍighi ịkaraph esi ọdi.

¹⁵Yira uḍuom ni ologhi ọmoogh ẹepho ḅịle kẹn rꞌamem arookonom, kụ ọlo aruugu ghụn kụ ạḅile aru.

¹⁶Ẹpomoghian phọ ayira mosi ghụn ni ẹpe ẹmha phọ ạDan; yira rọnaghan ni ḍiphooghu ạrusu phọ ạbidi. Aruugu rasiph ni oomo phọ ade phọ mem dị ạrusu phọ ạbidi ẹḅeela. Ẹpomoghian phọ ayira moru oogulemi ade phọ ayira rꞌoomo phọ ạraraar phọ edi bọ sịen ade phọ, ẹmha phọ ayira rꞌoomo phọ awe phọ ọdi.”

¹⁷Ọmoogh-we phọ ạḅem mọ, “Igona siloor anyina, mị mạsighe rạkaraph-ạraraar ratu sịphe ogbo phọ anyina, ạrakaraph-ạraraar dị oye kátue ạze, kụ bịdi kilomi ni inyina.”

¹⁸Kótue ookonom ọto phọ ạmi; Mephin esi ekpom ạmi.

¹⁹Ịnaghanan! Sịen oomo phọ ade phọ mị ạnaghan ịdi awe phọ ạmi romoghi yogh mọ, “Ọmoogh-we phọ ólho mun Zạyon ḍụghum? Ọdaam-ẹmha mọ ạZayon ólho mun sịphe ḍụghum?” Ọmoogh-we phọ, Ọdaam phọ ạbidi, ạpagharanaan mọ, “Eeghe kụ iḍighi kụ nyina eḍighi bọ ịphen repin bọ ologhi phọ ạmi, esi ọoḅereghi aruru phọ anyina ḅịle kẹn rꞌokpuḍian ooseeny iiruen ạrumugh dị ị́moogh ịyaar oḍighinom?”

²⁰Awe phọ omoghi agey, “Osoor phọ maten, ibugha phọ emuneen, kụ yira kọ̋moogh pẹleeny.”

²¹Ekpom mọ ạmi mẹegbighiḍian loor esi dị awe phọ ạmi mọogbighiḍian; mị odi ọto; eḍigh ni ruugu esi ạmi.

²²Ọogho ólho mun ẹpe Gịliad ḍụghum? Ariil eekonom úlho mun ẹpe phọ? Iḍighi bọ ika kụ útue bọ úukonom weye phọ ạmi?