Read abua Ịkunuma 1 Bible Online

Ịkunuma 1 - abua bible

Ịkunuma 1

¹Pọ eeghe ạdol ookurughan dị aJeruselem odi, ẹmha dị awe omuza ghan mem dị meten! Mem dị meten aḅirini kụ ụlogh nyọdi eghuan, nyịidipho ọdi mạghigh ekpukele ạnir. Ẹmha ẹkar eghuan memeel dọl ạrebene.

²Oomo aḍughul phọ ọdi ramoghi ni; izin rẹkoghi riḍien kesoroghu. Sịphe ogbo oomo igbaany ạrighiri phọ ọdi, rꞌoniin ólho mun ọodereghi ọdi. Awe ạmuḅoph ọdi mookeleghi nyọdi, kụ oomo ạbidi rotu esi ọdi sighiton.

³Awe aJuda ạrebene dị ẹpelenaan ílho, dị mophorogh sịphe ẹmha phọ. Bịdi odiighi ịnon arere, dị esi ílho ọḅem mọ ẹlo ạbidi. Ạbumulogh-ḍien okoom, kụ eten okpetenaan ílho.

⁴Rꞌoye rátu ghan otu ịiḅereghi phọ nyịidipho ooko ariiḍio iigbia phọ. Ạnmanyaan phọ ọmoor ghan bọ sịphe phọ rọmiinom, kụ ariil ạrikia phọ odi ghan ịkuph bịn. Ạrunhu-aḍibuo ẹmha phọ epoghogho, kụ ạZayon odi dọl ịminimiin.

⁵Mẹnighenom bụmulogh-ḍien ọdi; bịdi ọpam nyọdi ḍịghaagh. Ọmoogh-we phọ mạmiine nyọdi loor esi oomo ịkaraph phọ ọdi; mosiphi nmụny ọdi ọḍuanam.

⁶Eegu phọ aJeruselem eḍighi ogbaany ọghaaph. Abuḍiemiom mọ ạbidi ọkigh rụnuen dị medugh loor esi ọkoony, dị ịnyaam ílho mun mem dị bịdi okpetenaan bụo ịtaya.

⁷Esi dị mephe nyịidipho, aJeruselem rạatughian ghan eegu ageedi phọ ọdi. Mem dị ọdi ameel aḍigh ḍịghaagh ạbumulogh-ḍien phọ, rꞌoye ọphel ọdi ọ́rol; bụphe ọkpar bọ opu nyọdi ụmilogh ghan emeel phọ ọdi.

⁸Eghuan ọdi mephe; ọdi odi ẹdaḅa kụ asoor dọl aroofola. Ọdi rạkuph kụ ạbooghi risigh ọdi loor esi umugholoor. AJeruselem kụ ạphuenaan loor rꞌịminighan ạsipioghom.

⁹Ẹenir ọdi iganana ni ọmiin, kụ esi ọdi mạar ị́kigh. Emeel phọ ọdi iḍigh ḍiigu; oye nyọdi kạ́adereghi. Ạbumulogh-ḍien ọdi mọkpar opu, kụ ọdi amoghiom Ọmoogh-we phọ ọnma ighirigiir.

¹⁰Ạbumulogh-ḍien odi omiighi oomo aruphua ọdi. Ọdi ạmiin dị bịdi oḍigh ọkar Otu Ịiḅereghi phọ, esi phọ Ọmoogh-we phọ mạḅem bọ mọ aruuruen kụ́ki ghan phọ.

¹¹Awe ọdi rọkuph mem dị bịdi rọwa ghan ịyaar olhe. Bịdi oonmenenom ruphua ạbidi eḍien olhe ọbo bịdi ọtol eye. “Uphogh ịmi, Ọmoogh-we,” ẹmha phọ emoghi, “Ụmiin ịmi sịen mị odimom bọ dọl ịminimiin phọ ạḍien.”

¹²“Uphogh ịmi!” ọdi amoghiom tọrobo ọlo raten. “Rꞌoye kőlhoghoma ghan eephina dị ẹrol ịduon ẹphen ạmi, eephina dị Ọmoogh-we phọ kụ uruom ịmi mem dị ophin ologhi kụ ạrol esi ọdi.

¹³“Ọdi ạsighe nịan ẹpe kꞌạke asoore, nịan dị ẹghologhol ologhi aloor ạmi. Ọdi ụkpaminaan ịmi ḍiphil kụ ụsighe ịmi asoore ude. Kụ ọdi ụḅitonaan ịmi kụ ụwile ịmi loor eephina ẹgbagba amem.

¹⁴“Ọdi ạmiin oomo ịkaraph ạmi kụ ạghoroghi oomo ịne eniin esi. Ọdi anyorom orum ạmi, kụ iwiririom ịmi tụtu aloor ạmi edugh. Ọmoogh-we phọ kụ ụḅogh ịmi ạngo bụmulogh-ḍien ạmi, kụ ạpeleeny ịmi ụ́rolonaan ghisigh ạbidi.

¹⁵“Ọmoogh-we phọ ạnmoghoghoom oomo ikakara awe ẹgham mọ ạmi; ọdi arom we ẹgham mọ ophiemi oomo ugheel ạmi. Ọdi aatughuḍi we ạmi ịdipho iimuma avain dị mosumeeny esi omiim ghan.

¹⁶“Ịdipho kụ iḍighi bọ kụ izin eekpereghiom bọ riḍien ạmi. Rꞌoye ịmi ụ́udereghi; rꞌoye oḅio ạmi ọ́kparami. Ạbumulogh-ḍien phọ mọkpar upu ịmi; awe ạmi ụ́moogh mun ịyaar lọ esugha.

¹⁷“Mị asele rạghaagh ạmi, kụ rꞌoye ịmi ụ́loghonaan ḍịghaagh. Ọmoogh-we phọ mạamaghagh bụmulogh-ḍien dị ọḍua oomo ạga ozuom ạmi. Bịdi uphoghom ịmi ekpeḍien dị mị aḍighi oopho ịyaar bịn.

¹⁸“Mị mạḅaar ẹmhu esi Ọmoogh-we phọ kụ ọlo Ọmoogh-we phọ ạmoogh egey eḍighinom ịyaar. Iler rụru ẹnaghan, weye ạtorobo ekpisi; ịmiin ịmi rꞌeephina ạmi. Mosiphi ugheel ạnmuny ạmi rꞌạnmanyaan ọḍuanam oseere dọl ikoli.

¹⁹“Mị ạmagh we ạmuḅoph ạmi kụ bịdi úmeera ọphel ạmi. Ạbupinyon rịkia phọ rꞌabuḍiemiom mọ omuughu reten ịsiphe ẹmha phọ mem dị rọwa ghan eḍien olhe ọphamam asiloor ạbidi.

²⁰“Mịin, Ọmoogh-we, dọl ọmiinom mọ ạmi, dọl ighirigiir phọ ạmi! Ologhi ạmi maḅonyonu esi ọto ịkaraph ạmi. Ọko enu edi ni sịphe areten phọ; ghạlamo iloghi aruutu bịn aḍuugh edi kẹn ni.

²¹“Nạghanan ịkuph phọ ạmi; rꞌoye ọodereghi ạmi ólho. Ologhi ạbumulogh-ḍien ạmi ạḅaal dị nạ maḍighi ịdi ịiḅaghami mimeelom ịmi. Sịghe ḍio phọ nạ aguanaan bọ aru; ḍighi ịdi ạbumulogh-ḍien ạmi kạmiinom ịdipho mị ạmiinom bọ.

²²“Soph ọoruen aphume bịdi loor ẹkaraph ẹrolom mọ ạbidi; Lịom bịdi ịdipho nạ ụliom bọ ịmi loor ịkaraph phọ ạmi. Mị rạkuph esi ịminimiin, kụ ologhi ạmi ómoon.”