Read abua Ịkunuma 3 Bible Online

Ịkunuma 3 - abua bible

Ịkunuma 3

¹Mị oniin ọdi alegheri ịdi ẹrol mem dị Ẹnaan kụ ẹlhiom.

²Ọdi uphorogh ịmi kụ ạkar akele esi ufiri.

³Kụ ukuph ịmi ạḅile akuph dị ọnma ighirigiir ụ́tol.

⁴Ọdi mạwile iphulupul ạmi ẹgelele dị ọogho úḍighi, kụ abunughi ịḅarara ạmi.

⁵Ọdi mughughiom ịmi otu ikoli ịminimiin rꞌokururu.

⁶Ọdi mụkpaariom ịmi ọrol aloor aḍiniiran ạdol ufiri aḍuugh.

⁷Ọdi mụghoroghiom ịmi izime; mị ọnyo-ikoli dị ịlo okpetenaan ílho.

⁸Mị amoghi amitiom ọmoogh ạpeleeny; kụ Ẹnaan ị́naghanan.

⁹Mị ạbelebele mem dị mị ratelhe; iikpe aḍighiigh isophoghom ịmi tọrobo ạga lọ mị aphogh.

¹⁰Ọdi ukori ịmi mụdi eephe-ạno ọdi imeleghuom ịmi ịdipho ạnam-dịka.

¹¹Ọdi uphorogh ịmi asumeeny eḍum, ụphanyi ịmi ịpherepe, kụ ụwile ịmi.

¹²Ọdi aḍur kụmugh ọdi kụ uḍighi ịmi esoorom ịkpina phọ ọdi.

¹³Ọdi ạraph ịkpina ọdi ạlogh ologhi aloor ạmi.

¹⁴Awe ụmilogh ịmi oomo aḍio phọ; mị aten ịyaar ephegh esi oomo ạbidi.

¹⁵Ọkar ịminimiin kụ ẹdi ọdi ụngo ịmi ịdipho eḍien rꞌamiim.

¹⁶Ọdi agiirom ghisigh ạmi ude kụ abun ọlaay ạmi loor asighiigh.

¹⁷Mị mawula ịyaar lọ omoon aloor rꞌẹepho rꞌọḅaal ologhi aru.

¹⁸Mị ụ́moogh mun mem dị ẹdoony ọrol; oḍuom ologhi ạmi esi Ọmoogh-we phọ ólho mun.

¹⁹Ịitughian eephina ạmi, ẹ́moogh otu phọ ạmi, eḍighi elu eghiḍim.

²⁰Mị rạatughian ghan ịlo ịphen oomo amem kụ uwaloor ạmi akururu.

²¹Ghạlamo ịduon phọ oḍuom ologhi ratu ghan mem lọ mị ạatughian eniin ịyaar:

²²Ẹphomoghian Ọmoogh-we phọ rꞌọnma ighirigiir phọ ọdi amabi úlho ghan bọ edi ghan bịn.

²³Edi imoom ịdipho ạḍiroor, kụ amabi ólho ịdipho emitenom erumuḍio.

²⁴Ọmoogh-we phọ bịn kụ ịyaar dị mị ạmoogh, kụ ịduon phọ mị ạkpasaghi oḍuom ologhi ạmi loor ọdi.

²⁵Ọmoogh-we phọ aḍeenaan ẹnighe esi ạtorobo oye lọ ạmoogh oḍuom ologhi esi ọdi,

²⁶kụ ẹkar ẹnighe dị yira kokori rꞌọkparam — okori ọdi kụphel iyira —

²⁷kụ ẹkar ẹnighe ọtuugha ọkparam mọ ọphon kꞌamem ịḍoogh ayira.

²⁸Mem lọ yira rọmiinom, yira ọrol esi lọ oye úlho kụ ọkparam;

²⁹Yira ozumeri ẹmhu esi osooromi aloor, loor esi dị oḍuom ologhi atue ni ạtol.

³⁰Ghạlamo ukuphogh kụ ọgilaam, pọ yira ọsighe oomo phọ ịne.

³¹Ọmoogh-we phọ oye ọnma ighirigiir kụ kụ́ḅitonaan iyira kꞌagee-pọ.

³²Iini ọdi kụngo ni iyira okururu, kụ ọlo ẹphomoghian ọdi esi ayira edi ni ẹḅile ẹkpar.

³³Ọdi ọ́moogh ḍịḅeeraan oḍighi ịlo eeph esi ayira rꞌọngo ayira eephina.

³⁴Ọmoogh-we phọ alegheri ni mem lọ uwaloor ayira odi ikoli.

³⁵Ọdi alegheri ni mem lọ ụpharanaan iyira riliom mọ ọdi ụngo bọ iyira;

³⁶Ọdi alegheri ni mem lọ okiton ọnhu ịiruen otu ịiruen phọ.

³⁷Ịpe Ọmoogh-we phọ ạḅem bọ bịn kụ ịdi roḍighi ghan.

³⁸Igey rꞌịkaraph remite ghan mem lọ ọdi ạto.

³⁹Eeghe kụ yira rọmoogh ghan bọ ịyaar ọghaaph mem dị ụliom iyira loor ịkaraph ayira?

⁴⁰Itu ọoḅeghion reten phọ ayira kụ oḅula esi Ọmoogh-we phọ.

⁴¹Okpegheron iloghi ayira ọngo Ẹnaan ẹpe kꞌạke kụ ọoḅereghi.

⁴²“Yira moḍighi ịkaraph kụ ọḅaar ẹmhu, kụ ọlo nạ, Ọmoogh-we, iyoor kụ̋sar ụwilenaan.

⁴³“Nạ uphorogh iyoor kụ ụze iyoor; ọnma ighirigiir phọ ạna, ophin ologhi ạaghi ni,

⁴⁴ọotu ophin ologhi dị agbigiri dị ịiḅereghi ayoor kétue ẹbol ẹḅeeny.

⁴⁵Nạ mutene iyoor egu atopha aḅirini phọ.

⁴⁶“Ạbumulogh-ḍien ayoor mụgilaam iyoor ọḅile ụnmoghoghoom iyoor.

⁴⁷Yoor mọkar oḍighi ịiḅaghami ọḅile ope; yoor odi igbo aḍuugh rꞌaghuḍum kụ rokiilaan.

⁴⁸Ariḍien ạmi rekil rꞌizin mụdi ọphiiny ọmiin ghan awe ạmi dị ropiemi.

⁴⁹“Izin ạmi kezuughian mụdi okol ạmuum kụ késophe

⁵⁰tụtu Ọmoogh-we phọ ạrol kꞌạke kụ aphogh ụmiin iyira.

⁵¹Ologhi ạmi rạpu ghan mem dị mị ạmiin ịpe emitenaan bọ nmạriir ẹmha phọ.

⁵²“Ạbumulogh-ḍien usiph ịmi ịdipho ẹnun, dị mị úḍighi ịyaar ọtuan kụ ọlogh ạmi ḍien.

⁵³Bịdi usumeeny ịmi ooni imoom kụ okpereghiom ooni phọ ḍighiigh.

⁵⁴Ạmuum amiigh ookpereghiom ạmi, kụ mị agbi mọ aḍuugh mẹebeeph.

⁵⁵“Kꞌude ooni phọ, Ọmoogh-we, mị amoghi ạlom ọmoogh ạpeleeny,

⁵⁶kụ mem dị mị ạlom mọ nạghan emoghi ạmi, nạ ụnaghanan ni.

⁵⁷Nạ ụphagharanaan ịmi kụ ạḅem mọ mị kúkiilaan.

⁵⁸“Nạ uru ọtagharan ạmi, Ọmoogh-we, kụ ạphel ghuḍum ạmi.

⁵⁹Mọoghom ọnma ighirigiir ọoruen phọ; nạ alegheri ni ịkaraph phọ uḍighi bọ ịmi.

⁶⁰Nạ alegheri ni ịdi ạbumulogh-ḍien ạmi ụ́wa ọmiin ạmi, rꞌịdi bịdi ụmooghom ịmi ẹkaraph ezue.

⁶¹“Nạ mạnaghan ni ịdi bịdi ụgilaam ịmi, Ọmoogh-we; nạ alegheri ni oomo aruuzue phọ ạbidi.

⁶²Oomo aḍio phọ bịdi rọkaaph ghan ịlo ạmi kụ kọmoogh igbiighi ạbidi.

⁶³Emiigh ḍịroor kụ ẹteeny kꞌadulhe bịdi odi ghan ọnmoghoghoom ạmi.

⁶⁴“Lịom bịdi ẹdaphan ịpe bịdi moḍighi bọ, Ọmoogh-we.

⁶⁵Tonyon bịdi ạḅile aḍighi ịdi iloghi ạbidi keḅonyonu!

⁶⁶Wạ bịdi amitiom kụ agbuurogh bịdi sịen ade phọ!”