Read abua Ịkunuma 4 Bible Online

Ịkunuma 4 - abua bible

Ịkunuma 4

¹Agol phọ ayoor ạnmana ghan bọ mạḅuura; asighiigh Otu Ịiḅereghi phọ mẹwalala ẹpe areten phọ.

²Ugheel ạnmuny ạZayon ụman mạar iboom esi ayoor ịdipho agol, kụ nyịidipho oseere bịdi ịdipho oopho aroko ạmuum.

³Ghạlamo onhiin elhom ẹnam bịn kạngo ni mạmaam nmụny, kụ awe ạmi ọkighogh ifagara ịnun dị rẹezeghi bụbam.

⁴Bịdi rọbile ghan nmụny asipugh ạbidi komuughu ọkoony eḍien rꞌạmuum; ạnmuny rọlomian ghan eḍien dị oye bịdi kạ́ngo.

⁵Awe dị amem ẹrol dị ole ghan ọkar egey eḍien romuughu ọkoony sịphe areten phọ; bụdi ookonom igbogh rọowalion esi atopha ọmiin eḍien olhe.

⁶Mọmiine we ạmi opuemi we ẹmha ạSodom, dị oozuanaan ekperenom emeel rạghaagh Ẹnaan.

⁷Ụ́pueghi ghan ịkpana ạnmuny ọdaam mọ ayoor kụ ọḅaal ghan ịdipho ibikpo, okakara rꞌịnyaam, kụ oda rꞌomoon aloor.

⁸Nyịidipho bịdi ọmina kụ elegh ụ́logh ogbo areten; sighisigh ạbidi aḍuugh mewile; Aḍizu ạbidi ẹkaraghar ịdipho ạḍipe ị́ikpamaghan loor ịḅarara ạbidi.

⁹Bụphe omugh bọ mem ẹgham mọ kụ ụnighe opu bụphe omugh bọ mem dị ẹgham mọ mẹpho, bụdi ọrol ọkoony ẹnum ẹnum kụ omugh, dị eḍien ị́tol ọpham aghuḍum mọ ạbidi.

¹⁰Ịiḅaghami phọ emeelom ghan bọ weye phọ ạmi irumom ḍiigu; aburunhiin dị ọmoogh ni ẹphomoghian ụsa nmụny ạbidi kụ otene eḍien olhe.

¹¹Ọmoogh-we phọ amitiom oomo ophin ologhi phọ ọdi; ọdi ạsu nịan ẹpe Zạyon dị elhe ẹmha phọ kꞌude.

¹²Rꞌoye ọ́rol, ghạlamo rꞌạbudi ọdaaghi ịnon areelhe, dị ameeraam mọ awe ịitughian ẹgham kotue ni oḍigh rụnhu-aḍibuo aJeruselem.

¹³Kụ imite ni loor esi dị ariil ẹmha phọ ụpioghom kụ ariil ạrikia oḍighi ịdi aḍuugh ẹteeny we dị ịyaar ụ́piom.

¹⁴Abuḍiemiom ẹmha phọ oyeela reten phọ mụdi awe ikpom ariḍien, kụ ọphuughi rꞌịḅaal dị rꞌoye bịdi kạ́ḅogh.

¹⁵“Ịḍuaghu!” awe ọlo. “Nyina mẹepuan! Ịmi kị́ḅogh!” Kụ bịdi oyeela ọḍua eelhe ọgba eelhe dị rꞌoye ụ́magh.

¹⁶Ọmoogh-we phọ ọ́moogh mun ịyaar oḍighinom ạbidi; ọdi ạawalami bịdi rꞌaloor. Ọdi ọ́lhogh mun eghuan bụpinyon rịkia rꞌabuḍiemiom mọ ayoor.

¹⁷Yoor ogon tụtu yoor útue mun úgon pẹleeny dị rátu. Yoor okori ghan ọmoogh ọloghonaan ạḍighaagh esi eelhe dị ị́moogh ẹlo ọngo.

¹⁸Ạbumulogh-ḍien phọ uphogh ghan iyoor; yoor útue mun útelhe ogbo areten phọ. Ariiḍio ayoor memunughan; ekureriom mọ mesi.

¹⁹Rꞌookuugh dị apu uga lọ ạḍua okuaḍio rasoor kụ ịdi bịdi uphorogh iyoor osoore rạaḅaraph; bịdi uphorogh iyoor sịphe aroogbolom mọ, bịdi ụteeny iyoor ịlo ịiḍaany sịphe ade ịisaar phọ.

²⁰Bịdi ee ọsighe eten aghuḍum ayoor, ọdaam mọ Ọmoogh-we phọ mạsaḅar bọ, ọpo yoor oḍuom bọ ologhi eenan ạtorobo oye lọ uzuom iyoor.

²¹Ịmilogh ẹghiom, weye Idom ra Ụz; ịmoogh ọḅaal ologhi ịlo nyina erue. Ịiḅaghami ịlo anyina retu ni dị kébia; nyina kẹbelebele aani ni rꞌẹdaḅa aroofola.

²²ẠZayon mạkpe ịlo ịkaraph ọdi; Ọmoogh-we phọ kúseere mun iyoor dọl iiruen ebia. Kụ ọlo, Idom, Ọmoogh-we phọ kịliom ni inyina; ọdi kagananami ni ịkaraph phọ anyina.