Read abua Izikiel 10 Bible Online

Izikiel 10 - abua bible

Izikiel 10

¹Mị uphogh ni eḅugulu ịyaar phọ ẹrol bọ rụmhu ạruukpaany aghuḍuul phọ kụ ạnyu ạbidi ịyaar ẹrol dị ẹghigh ịdipho ạgada ọdaam dị oḍighinom ạsafair.

²Ẹnaan ẹḅeni oye phọ aanmenan bọ ịyegheyeghe arukpe phọ mọ, “Kịa ịbaay idighila phọ eeḍian ạraraar phọ ọlhem bọ kụ amuzeḍi rạghaagh ạna rꞌiiḅu dị reda. Kụ agbi ọwalalami iiḅu phọ ạnyu ẹmha phọ.” Mị agon ọdi ạghi.

³Ạruukpaany aghuḍuul phọ ọmeregha ạga esoorom Otu Ịiḅereghi phọ mem mọ ọdi aḍigh bọ ologhi, kụ ọotu amuza ogiga ologhi phọ.

⁴Ạḍiḅaal phọ rẹtaphan bọ ẹlo esomanan Ọmoogh-we phọ iḅetenu ẹmeera esi phọ ạruukpaany aghuḍuul phọ ọrol bọ kụ erelhe ẹghi ẹpe eḍighom Otu Ịiḅereghi phọ. Pọ kụ amem dị ọotu phọ amuza Otu Ịiḅereghi phọ, kụ ogiga phọ raamor rꞌạḍiḅaal phọ.

⁵Ạḍiaḅa dị araphaaph ạraraar phọ ẹmoogh bọ ḍiphooghu phọ emitiom ụnaghan ni ghạlamo kꞌẹpe ogiga erugh phọ. Ịḅa ịdipho ẹḍogh Ẹnaan Oomo Ịikpo phọ.

⁶Mem dị Ọmoogh-we phọ ạto ạngo oye phọ aanmenan bọ ịyegheyeghe arukpe phọ ọsighe ẹphurukpu ạnian sịphe ịbaay idighila phọ ịpe ẹrol bọ eeḍian ạruukpaany aghuḍuul phọ, oye phọ ạghi ni ologhi kụ ạmeera ọogaany oniin odighila phọ.

⁷Oniin ọokpaany aghuḍuul ạlogh ḍịghaagh ọdi ologhi ạnian phọ ḍịphe ẹrol bọ sịphe igbo phọ ạbidi, ạson amitiom ạnyu iniin iiḅu, kụ ạlogh bịdi ologhi ạraghaagh oye phọ aanmenan bọ ịyegheyeghe arukpe phọ. Oye phọ ạsighe iiḅu phọ kụ ạḍua.

⁸Mị ụmiin dị tọrobo ọokpaany aghuḍuul ạmoogh ịyaar dị ẹghigh ḍịghaagh oye eeḍian ạtorobo ophaaph ọdi.

⁹Mị ạḅile kẹn ạmiin mọ inya idighila ẹrol bọ, oomo ạbidi ẹeghighighan, eniin ọogaany ạtorobo ọokpaany aghuḍuul phọ. Idighila phọ ẹmhu ịdipho ịbekulari, kụ tọrobo odighila ạmoogh ni ọnon odighila dị asophom nyọdi eelemi rụghulukul dị eeleeny.

¹¹Mem dị ạraraar phọ ẹmoogh bọ ḍiphooghu phọ erelhe, bịdi irue ni ẹghi tọrobo ạga, dị íighiraan. Oomo phọ ạbidi irelhe egina amem sịphe ạga phọ bịdi ẹwa bọ ọghi phọ, dị íighiraan.

¹²Asiloor ạbidi, ạraman, ạraghaagh, araphaaph rꞌidighila ukpereghiom rꞌariḍien.

¹³Idighila phọ ịphen iḍighi ni ọkaraghi iniin ịdipho ịpe mị mạmiin ghan bọ sịphe ọḅel uḍien phọ ạmi.

¹⁴Tọrobo ọokpaany aghuḍuul ạmoogh inya asighisigh. Ọḅel phọ ghisigh ḍilephiri ạnam, otum mọ ghisigh oye, omuneniom ịraar phọ ghisigh ạnam-dịka, kụ ọpo aḍighi bọ inya phọ ghisigh uga.

¹⁵(Bịdi oḍighi ni iniin ạruukpaany aghuḍuul phọ ịpe mị mạmiin ghan bọ ọgbal Ọphiiny aKebar.) Mem dị ạruukpaany aghuḍuul phọ eḅetenu sịphe okuaḍio phọ

¹⁶kụ erelhe, idighila phọ ịdaphan ghan rꞌạbidi. Tọrobo amem dị bịdi ọrar raphaaph ạbidi ịlo ọpheeph, idighila phọ ịḅile kẹn ẹghi rꞌạbidi.

¹⁷Mem dị ạraraar phọ ẹmoogh bọ ḍiphooghu phọ eḅoorian, ḅịle mem dị ạraraar phọ ẹmoogh bọ ḍiphooghu phọ ẹpheeph, idighila phọ ẹghi rꞌạbidi, ịdi eḍighi bọ ạraraar phọ ẹmoogh bọ ḍiphooghu phọ iilemi ghan bịdi.

¹⁸Pọ kụ amem dị ạḍiḅaal phọ rẹtaphan bọ ḍịphe esomanan Ọmoogh-we phọ ẹḍua eḍighom Otu Ịiḅereghi phọ kụ erelhe ẹghi esi dị ephoph epel rụukpaany aghuḍuul phọ.

¹⁹Bịdi ọrar raphaaph ạbidi kụ ọpheeph ọghi ạnyu ọḍua sịen ade phọ ịdipho mị rapogh bọ ni, kụ idighila phọ ẹghi rꞌạbidi. Bịdi ophooghian sịphe ọnhu-aḍibuo ạga emitenom erumuḍio Otu Ịiḅereghi phọ, kụ ạḍiḅaal phọ rẹtaphan bọ ẹrol ạnyu ạbidi.

²⁰Mị ạlogh elegh bịdi mọ iniin phọ ạruukpaany aghuḍuul phọ ịpe mị mạmiin ghan bọ ni eeḍian Ẹnaan phọ Ịzirel sịphe Ọphiiny aKebar.

²¹Tọrobo ọnyo ạbidi ạmoogh inya asighisigh, inya araphaaph, rꞌịyaar dị ẹghigh ḍịghaagh oye eeḍian ạtorobo ophaaph.

²²Asighisigh ạbidi ịghigh ọkaraghi asighisigh phọ mị mạmiin ghan bọ ọgbal Ọphiiny aKebar. Tọrobo ịyaar phọ ẹmoogh bọ ḍiphooghu irelhe onyen bịn ẹghi.