Read abua Izikiel 12 Bible Online

Izikiel 12 - abua bible

Izikiel 12

¹Ọmoogh-we phọ ụḅeni ịmi mọ,

²“Oye dị kamugh ni, nạ atugh ogbo awe ịgbagharan. Bịdi ọmoogh ni riḍien, kụ bịdi ịyaar ụ́miin; bịdi ọmoogh ni reḅeri, kụ bịdi ịyaar ụ́naghan ịdi eḍighi bọ bịdi rọ́naghanan ghan.

³“Nyịidipho, Oye dị kamugh ni, kookoroghi dool ịdipho oye lọ rasuma mem ịiḅaghami, kụ amite amiigh osuma kụ egbi oghul. Meera tọrobo oye ạmiin nyịna dị nạ rạḍua rạki ẹnon ekpisi. Ịdipho oḍighom ịyaar ạbuo ẹ́naghanan phọ ạbuphe kọlogh ni nyịna elegh.

⁴Mem dị aḍio edi ni, kookoroghi dool ạna ịlo ọghi ạdol iiruen, ḍighi ni ịlo bịdi kọmiin nyịna, ḅịle kẹn bịdi ọmiin ni mem adulhe dị nạ rạḍua ịdipho oye lọ rakeel dọl iiruen.

⁵Ịdipho bịdi ropogh bọ ni, bạay epogh akputon sịphe iikpe otu phọ ạna kụ ạsighe iikoroghian phọ ạna akitonom sịphe amitenom.

⁶Meera bịdi ophogh nyịna mem dị nạ rạḅam dool phọ ạna ạnyu ọpha ạna kụ ramite rạki sịphe ologhi ufiri phọ rꞌariḍien ạna dị okpereghi ọbo eḍighi ịdi nạ kạ́miin ẹpe nạ rạki bọ. Ịphen nạ aḍighi bọ keḍighi ọphur ạruru esi awe phọ Ịzirel.”

⁷Mị uḍighi ni ịpe Ọmoogh-we phọ ụḅeni bọ ịmi oḍighi phọ. Ḍio phọ ạḍiphe phọ mị uukoroghian ni dool ịdipho oye lọ rasuma mem ịiḅaghami, kụ dulhe phọ ạḍiphe phọ mem dị ufiri raḍigh mị ugbo ni epogh sịphe iikpe phọ rꞌạraghaagh ạmi kụ aten amite. Ịduon tọrobo oye rapogh bọ ni, mị ạḅam dool phọ ạnyu ọpha ạmi kụ ạḍua.

⁸Ḍịeri phọ ạḍiroor phọ Ọmoogh-we phọ ụḅeni ịmi mọ,

⁹“Oye dị kamugh ni, sịen awe ịgbagharan Ịzirel phọ ropuru bọ nyịna ịphen nạ raḍighi bọ,

¹⁰ḅẹni bịdi ịpe mị Ọmoogh-we dị ạmoogh oomo ịikpo rạḅeni bọ bịdi. Adom mọ ạḍien ạḍio ọkpana phọ rạtooghi bọ sịphe Jeruselem rꞌạḍio oomo awe phọ bụphe orugh bọ sịphe.

¹¹Ḅẹni bịdi mọ ịpe nạ maḍighi bọ, eḍeenaan ịpe kemitenaan bọ bịdi — bịdi koḍighi we dị oghiil ẹgham rꞌạbudi osiphi.

¹²Ọkpana phọ ọpo ạda bọ bịdi katool dool ọdi ọpha sịphe ufiri phọ kụ akiton epogh dị bịdi oguphanaan nyọdi sịphe iikpe phọ kụ akpetenaan. Ọdi kakpereghi riḍien ọdi kụ kạ́miin ẹpe ọdi rạki bọ.

¹³Kụ mị kạatarion ọseki ạmi amitiom kụ asiphom nyọdi. Pọ kụ amem dị mị kạsighe nyọdi ạki sịphe ẹmha phọ ạBabilon, ekpisi dị ọdi kamugh dị ẹmha phọ kạ́miin.

¹⁴Mị kạwalalami sịphe ạtorobo ạga oomo ạbuo iiḍighi phọ ọdi rꞌabutomoghiom ọdi rꞌabukoriom ọdi, kụ awe kọwa ni bịdi ịlo ọze ạbidi.

¹⁵“Mem dị mị ạwalalami bịdi ogbo awe ịnon areelhe phọ rꞌịsiphe iiruen areelhe phọ, bịdi kolegheri ni mọ mị kụ Ọmoogh-we phọ.

¹⁶Mị kameera ni ẹphurukpu ạbidi okpetenaan ẹgham mọ, ịgbakuro phọ rꞌạreezegh phọ, ọbo eḍighi ịdi sịphe ogbo areelhe phọ bịdi ologhoma ịpe eḍighinom ạraraar phọ ạbidi meeph bọ kụ olegheri mọ mị kụ Ọmoogh-we phọ.”

¹⁷Ọmoogh-we phọ ụḅaanaan ịmi mọ,

¹⁸“Oye dị kamugh ni, kpereghaan mem dị nạ rale kụ aphiigha rꞌoghiilaan mem dị nạ rạpughol.

¹⁹Ḅẹni oomo eelhe phọ mọ ḍịen kụ adom mọ Ọmoogh-we dị ạmoogh oomo ịikpo ạghiom bọ we phọ aJeruselem bụphe ọḅile bọ ni orugh sịphe ade phọ ạbidi: bịdi kokpereghaan ni mem dị bịdi role kụ opiigha rꞌoghiilaan mem dị bịdi rọpughol. De phọ ạbidi kokul ẹtol oopho, ịdi eḍighi bọ tọrobo ọlo arugh sịphe ráako ghan ologh.

²⁰Kopiemi rạmha dị nyịidipho awe omuza ni, kụ oḍighi eelhe phọ ẹdala. Pọ kụ amem dị bịdi kolegheri mọ mị kụ Ọmoogh-we phọ.”

²¹Ọmoogh-we phọ ụḅaanaan ịmi mọ,

²²“Oye dị kamugh ni, iḍighi ika kụ awe phọ Ịzirel rodogh ghan bọ ḍidogh phọ ạḍien: ‘Amem rebia, ịmiin repe’?

²³Nyịidipho ḅẹni bịdi ịpe mị Ọmoogh-we dị ạmoogh oomo ịikpo ạmoogh bọ ọḅem ịlo ịpe phọ. Mị kakureri ḍidogh phọ ạḍien. Kódogh ghan mun ḍidogh phọ ạḍien sịen Ịzirel. Kpạripe ghụn ḅẹni bịdi mọ: ‘Amem mọ mẹteeny, ḅịle ịmiin phọ remite!’

²⁴“Ogbo awe phọ Ịzirel uḍien ọkpe rꞌịmiin dị ítu ịne kẹ́tol mun.

²⁵Mị Ọmoogh-we dị ạmoogh oomo ịikpo kạḅaanaan bịdi, kụ ịpe mị ạḅem bọ kemite ni. Oobinya kạ́tol mun. Sịen amem aghuḍum mọ anyina, nyina ạbuo ẹ́naghanan, mị kaḍighi ni ịpe mị mịphur bọ inyina rụru mọ mị kaḍighi phọ. Mị mạghaaph,” Ọkar Ogbogh Ọmoogh-we phọ ạḅem.

²⁶Ọmoogh-we phọ ụḅeni ịmi mọ,

²⁷“Oye dị kamugh ni, awe phọ Ịzirel ọotughian mọ uḍien phọ ạna rꞌịmiin phọ ạna ịlo amem dị retu dị ẹkel li.

²⁸Esi ịduon phọ, ḅẹni bịdi mọ mị Ọmoogh-we dị ạmoogh oomo ịikpo rạḅem ghan: Oobinya kạ́tol mun. Ịpe mị mạghaaph bọ kemite ni. Mị Ọmoogh-we dị ạmoogh oomo ịikpo kụ mạḅem!”