Read abua Izikiel 16 Bible Online

Izikiel 16 - abua bible

Izikiel 16

²Ọdi ạḅem mọ, “Oye dị kamugh ni, mạ amitiom ịkaraph ạraraar isa phọ ịpe awe phọ aJeruselem moḍighi yogh bọ.

³Ḅẹni Jeruselem ịpe Ọmoogh-we dị ạmoogh oomo ịikpo rạḅeni bọ nyọdi: “Nyịna ụmar sịphe ade phọ aKenan. Ọde ạna ọlo Ạmorait, kụ onhiin ạna ọlo ạHitait.

⁴Mem mọ ọmar bọ nyịna, oye ósoph ḍipugh ạna mꞌootol ạna mꞌogbul ạna rꞌaboph mꞌophurughiom ạna ukpe.

⁵Oye ọ́nma nyịna ighirigiir dị ẹmanam ịlo oḍighi ạna rꞌeniin ịyaar phọ ẹphen. Mem mọ ọmar bọ nyịna, oye nyịna ọ́phomoghian. Nyịna uroph omitiom esi ophoghoghoony ozo.

⁶“Pọ kụ amem dị mị aten sịphe kụ ạmiin nyịna dị raakila ologhi ịḅaal ạna. Nyina uukpereghiom rꞌịḅaal, kụ mị úmeera nạ amugh.

⁷Mị aḍighi nyịna ịdi nạ aphoph ịdipho oreeny dị amoon. Nạ ạbugh rꞌịikpo kụ aphoph kụ aḍighi esina ọnyani. Ạramamaam ạna ẹmaar emite, kụ ạsilaal ạna ephoph, kụ ọlo nạ ụrol ẹdaḅa.

⁸“Ịdipho mị ạḅile bọ aten, mị ạmiin mọ meru esi ạna omeel esi ẹphomoghian. Mị aakpereghi ẹdaḅa aloor phọ ạna rꞌạsuoma ạmi dị ạay ekpologhi kụ mị aguanaan ọphomoghian ạna. Agey ni, mị ughiran ịyo apinien rꞌạna, kụ nạ aḍighi ọlo ạmi.” Ịphen kụ ịdi Ọmoogh-we dị ạmoogh oomo ịikpo ạḅem.

⁹“Pọ kụ amem dị mị ạsighe mụum kụ aatolom ịḅaal phọ ạsighe esi ạna. Mị agbul mụnum-ọliv ạnyu aḍizu phọ ạna.

¹⁰Mị aanmenemi nyịna ịidoony ạrusuoma dị olo kụ ạḅile ạngo nyịna rokoro ịpe ọkaraghi ogey phọ ozu ẹnam, ọyegheyeghe ọkaghaam ḅịle rꞌonyoraam dị rạkorom.

¹¹Mị ạlogh nyịna ịkuta — rạla rꞌibi orum.

¹²Mị ạngo nyịna gulu-izon rꞌareḅeri-sụa rꞌịma eghoony ọdaam ẹmha ẹlo ozua.

¹³Nạ ạmoogh ịnme agol rꞌasilva, kụ nạ oomo amem aanmenan ghan rukpe dị ẹyegheyeghe rꞌịdi rẹkorom dị olo. Nạ ale ghan ạbred dị oḍighinom ọkaraghi igey ịgbieneen ịbiakpa, kụ ạmoogh ẹnuum aḍiowo rꞌạmunum-ọliv ọlo olhe. Ẹnighe ạna ẹraphan ghan, kụ nạ aḍighi ạnir dị ạda ẹmha.

¹⁴Nạ aaleghaan esi ạtorobo eelhe esi ẹnighe ạna dị eeleeny, ịdi eḍighi bọ mị kụ ọpo ạmaar bọ ạnighemi nyịna ịduon.” Ịphen kụ ịdi Ọmoogh-we dị ạmoogh oomo ịikpo ạḅem.

¹⁵“Kụ ọlo nạ ạsighe ọgel ẹnighe phọ rꞌaḍien phọ ạna bịn kụ rạminaam ghan tọrotoro oye dị aru.

¹⁶Nạ ụsighe iniin arukpe ạna oselemiom ariisi ooseeny phọ ạna, kụ ọkaraghi ịdipho oliom-ẹmha, nạ ụngo loor ạna esi ạtorobo oye.

¹⁷Nạ ạsighe ịkuta asilva rꞌagol ịpe mị mạngo bọ nyịna, ạsighe bịdi ạkaam ilephiri igbudu, kụ aliom ẹmha rꞌạbidi.

¹⁸Nạ ạsighe rukpe phọ olo bọ mị mạngo bọ nyịna kụ amunemi ạnyu igbudu phọ, kụ nạ ạngo igbudu phọ mụnum-ọliv phọ rꞌịnsens phọ mị mạngo bọ nyịna.

¹⁹Mị ạngo nyịna eḍien — ọkaraghi igey phọ ịgbieneen ịbiakpa, mụnum-ọliv rꞌẹnuum aḍiowo — kụ nạ ạngo ịdipho ẹkia ịlo ọkpar opu ọmoogh ạḍiḅeeraan esi ịkaaghineen ạrumugh phọ.” Ịphen kụ ịdi Ọmoogh-we dị ạmoogh oomo ịikpo ạḅem.

²⁰“Ịdi epu pạ, nạ ụsighe nmụny phọ rꞌạnmanyaan phọ nạ mụmaranaan bọ ịmi kụ ạphinyonom bịdi rịkia ạngo ịkaaghineen ạrumugh. Ị́gbaanyan nyịna ọrol ạdol ẹ́moogh omeeraam esi ạmi,

²¹dị nạ ụ́ḅaram ọsighe ạnmuny phọ ạmi kụ ọphinyonom ạrikia ọngo ịkaaghineen ạrumugh?

²²Mem mọ ọpo ạdol isa oliom ẹmha phọ ạna, nạ rꞌamem ọ́otughian ẹghoroghor phọ ạna — mem mọ nạ ạrol bọ ẹdaḅa raakila ghan ologhi ịḅaal phọ ạna.”

²³Ọmoogh-we dị ạmoogh oomo ịikpo ạḅem, “Nạ maphe! Ape! Nạ aḍighi oomo ịkaraph phọ ịpe, kụ agbi

²⁴ọlogh ariisi ooseeny ghan ịkaaghineen ạrumugh sịphe ọgbal ạtorobo eten ḅịle rꞌọphamanam olhe ẹmha.

²⁵Nạ ạghogh ẹnighe phọ ạna atenom esi ọogha. Nạ ạngo loor ạna tọrobo oye ọpo aru bọ, kụ nạ ụkaraghi uḍighi oliom ẹmha tọrobo aḍio.

²⁶Nạ ameera mọ ạbuo Ijipt abumatuman bụo ẹephua phọ ạna ọrolan esi rꞌạna, kụ nạ aḍighinom olhe ẹmha phọ ạna ịlo ọngo ạmi ọghagh ologhi.

²⁷“Nyịidipho mị maphoophe ḍịghaagh ạmi ịlo ọlhiom ạna ḅịle rꞌọsighe abin ạḍiseph phọ ạmi ọḍua esi ạna. Mị mạḅogh nyịna ạngo bụo aFilistia phọ, bụphe nyịna ụ́pomoghian bọ ḅịle iiḍighi olhe ẹmha phọ ạna rẹkagh bọ iloghi phọ ạbidi.

²⁸“Loor esi dị bụeri phọ nyịna ụ́gbaany, nạ ạghi bọ aphorogh ghan bụo Asiria. Nạ uḍighi oliom ẹmha ạbidi, kụ bịdi nyịna kẹn ụ́gbaany.

²⁹Nạ kẹn uḍighi ni oliom ẹmha ọlo ạbuo ạBabilon, eelhe abugbogh abumuul ḍighi phọ, kụ bịdi nyịna kẹn ụ́gbaany.”

³⁰Ịphen kụ ịdi Ọmoogh-we dị ạmoogh oomo ịikpo rạkaaph bọ: “Nạ maḍighi oomo ịphen ịdipho oliom ẹmha dị umugholoor úlegheri.

³¹Sịphe ọgbal ạtorobo eten nạ ạlogh riisi ooseeny ịkaaghineen ạrumugh ḅịle rꞌọphamanam olhe ẹmha. Kụ nạ ọ́wa ikpoki ịdipho oghiil oliom ẹmha.

³²Nạ ạkigh ạnir phọ ọpo ạal bọ ilom kụ raliom ghan bọ ẹmha ruuruen kpạripe rꞌọphomoghian olhom mọ ọdi.

³³Oliom ẹmha rọkpe ghan ni ikpoki, kụ ọlo nạ ụngo ghan inmo tọrobo ọlo elegherian ạna ạḅile ati ghan ọman bịdi mọ ọḍua ghan tọrobo ekpisi oru ọrolan esi rꞌạna.

³⁴Nạ aḍighi ni kịro ọdo oliom ẹmha. Oye nyịna ọ́kpaariom oḍighi oliom ẹmha. Nạ ọ́moogh ịikpia; nạ ghụn kụ ụkpe ghan bịdi! Agey ni, nạ ạgbatanaan ni.”

³⁵Kụ iḍighi kụ, Jeruselem, nạ oliom ẹmha! Nạghan ịdi Ọmoogh-we phọ rạkaaph.

³⁶Ịphen kụ ịdi Ọmoogh-we dị ạmoogh oomo ịikpo ạḅem: “Nạ ụkarion ạsighe rukpe ạna kụ, ịdipho oliom ẹmha, nạ ụngo loor ạna bụo ipesi ạna ḅịle rꞌoomo ịkaaghineen ạrumugh isa phọ ạna, kụ nạ ạze nmụny ạna ạphinyonom rịkia ạngo ịkaaghineen ạrumugh.

³⁷Loor esi ịduon phọ mị kạsighe atu oomo abugbaany ạruga phọ ạna aakpomoghi — bụphe ọḅeeraan ghan bọ nyịna rꞌạbuphe okia ghan bọ nyịna. Mị kạsighe bịdi atu okitonom nyịna ologhi eegida, kụ reten mị kạkarion ạsighe rukpe ạna kụ ameera bịdi ọmiin ẹdaḅa phọ ạna.

³⁸Mị kasoph ọoruen aphume nyịna esi olhe ẹmha rꞌọko enu, kụ esi ọghagh ologhi ạmi rꞌekpom mị kạliom nyịna rꞌaḍuugh.

³⁹Mị kạlogh nyịna esi ịikpo phọ ạbidi, kụ bịdi olereghi riisi phọ ịpe nạ rạtol ghan bọ kale ẹmha ạḅile aaseeny ịkaaghineen ạrumugh phọ. Bịdi kọsighiogh ni rukpe phọ rꞌịkuta phọ ạna kụ ọwile nyịna ẹdaḅa.

⁴⁰“Bịdi kọkpaariom ḍita awe mọ ọsighe ikpo oroḅol nyịna, ḅịle bịdi kọsighe rolhool ẹgham ạbidi kụ ọkiriph nyịna ịpherepe.

⁴¹Bịdi kọsuughi ruutu ạna nịan oler ude kụ omeera aḍita ạnmariir ọmiin mạlhiom mọ ạna. Mị kaḍighi ịdi nạ kakureri olhe ẹmha, ạḅile aḍighi ịdi nạ kakureri ọngo ghan inmo rụga phọ ạna.

⁴²Kụ ọghagh ologhi ạmi agbi omuneen, kụ mị aḅoorian. Mị kạ́kagh mun ologhi mꞌọḅile ogbeghe ạbidi.

⁴³Nạ mawula ịpe mị aḍighi bọ nyịna mem mọ nạ aḍighi bọ ọbumoony, kụ nạ mụngo ịmi ọghagh ologhi esi oomo ạraraar phọ nạ aḍighi bọ. Pọ kụ ịyaar phọ mị maḍighi bọ ịdi nạ ạmiinom ịlo oomo phọ ịdi. Uḍighi ika kụ nạ ạḅaram bọ olhe ẹmha esi oomo ịkaraph ạraraar isa phọ nạ aḍighi bọ?” Ọmoogh-we dị ạmoogh oomo ịikpo kụ mạḅem.

⁴⁴Ọmoogh-we phọ ạḅem, “Awe kodoghom nyịna ḍidogh phọ ạḍien Jeruselem: ‘Ịdipho onhiin, ịdipho ọnyani.’

⁴⁵Agey ni nạ ọnyani onhiin ạna. Ọdi aghel olhom ọdi rꞌạnmuny ọdi. Nạ ạkigh bumarani ạna, bụphe ọlogh bọ ḍien burulhom rꞌạnmuny ạbidi. Nạ rꞌabumarani ạramha ụmoogh onhiin ọlo ạHitait rꞌọde ọlo Ạmorait.

⁴⁶“Okumoor umarani ạna, aSameria ẹpe ephunom mọ rꞌạramha phọ ọdi. Ọbam umarani ạna rꞌạramha phọ ọdi, ạSodom ẹpe esoorom mọ.

⁴⁷Nyina ị́gbaanyan ọdaph ịgbaranuom aruwol phọ ạbidi rꞌọtuughaany eḍighinom ạraraar isa phọ ạbidi? Eeye, íbia bịn eḍighinom ạraraar phọ ạna meeph epu ịpe ạbidi.”

⁴⁸Ọmoogh-we dị ạmoogh oomo ịikpo ạḅem, “Ọkaraghi agey ịduon mị kụ aḍighi bọ Ẹnaan dị edi ghan bịn, umarani phọ ạna ạSodom rꞌạramha phọ ọdi rꞌamem úḍighi ịkaraph phọ ịpe nạ rꞌạramha phọ ạna moḍighi bọ.

⁴⁹Ọdi rꞌạnmanyaan ọdi uphoophe loor ịdi eḍighi bọ bịdi ụmoogh ịdi ẹbugh olhe kụ ọrol rꞌẹepho rꞌẹboroph, kụ bịdi úpogh rukulom mọ ụ́maghami ịyaar rꞌạbuphe ẹkparam bọ.

⁵⁰Bịdi uphoophe loor kụ oḅom ẹmhu kụ oḍighi rạraar phọ ịpe mị aghel bọ, esi ịduon phọ mị aphiemi bịdi, ịdipho nạ ạkaraghi bọ ni alegheri.

⁵¹“ASameria ọ́pioghom oolemi odi esi ịpe ạna. Nạ maḍighi ịdi eeph epu ịdi ọdi maḍighi ghan. Ạsipioghom mọ ạna kụ ọtomaam ịpe abumarani phọ ạna bịn bịdi moḍighi bugey awe.

⁵²Kụ nyịidipho ẹkpianaan nyịna ọkparam aroofola phọ ạna. Ịkaraph ạna ẹkaraghi ebeeph epu ịpe abumarani phọ ạna dị ọmeremi bịdi ọogaany ạna bịn bịdi moḍighi bugey awe. Nyịidipho ḅạal ologhi kụ arool umugholoor ạna, ịdi eḍighi bọ nạ aḍighi ịdi abumarani phọ ạna mọghigh we dị ọserere.”

⁵³Ọmoogh-we phọ ạḅeni Jeruselem mọ, “Mị kạḅile ni aḍume bịdi — Sọdom rꞌạramha ọdi ḅịle rꞌaSameria rꞌạramha ọdi. Agey ni, mị kạḅile kẹn ni aḍume nyịna.

⁵⁴Nạ kạmoogh umugholoor aloor phọ ạna, kụ aroofola ạna keḍeenaan bumarani ạna ịdi ẹnighenom bịdi.

⁵⁵Bịdi kọḅile ni ọmoogh edughom, ḅịle kooḅulemi ni nyịna rꞌạramha phọ ạna.

⁵⁶Nạ ọ́gilaam Sọdom riiḍio phọ ịpe nạ aphoophe bọ loor

⁵⁷kụ egbi ọteeny amem mọ mogananami bọ ịkaraph phọ nạ aḍighi bọ omitiom? Nyịidipho nạ ạkaraghi ạkigh nyọdi — oye aroofola esi ạbuo Idom rꞌaFilistia rꞌạbueri phọ asimatuman bụphe ọlogh bọ nyịna ḍien.

⁵⁸Nạ kạmiinom ịlo ịkaraph ạraraar isa phọ ịpe nạ maḍighi bọ.” Ọmoogh-we phọ kụ mạḅem.

⁵⁹Ọmoogh-we dị ạmoogh oomo ịikpo ạḅem mọ, “Mị kaḍighi nyịna ịpe nạ ạkpianaan bọ, ịdi eḍighi bọ nạ mạgunom ruguanaan ạna ạḅile ạka ịyo phọ.

⁶⁰Kụ ọlo mị kaako ni ịyo phọ mị aghiran bọ rꞌạna mem mọ ẹghoroghor phọ ạna, kụ akiran ịyo rꞌạna dị kẹtol kꞌagee-pọ.

⁶¹Nạ kạatughian ni ịpe nạ maḍighi bọ, kụ akiilom umugholoor mem dị mị kaḅulemi okumoor umarani ạna rꞌọbam umarani ạna ạngo nyịna. Mị kameera bịdi oḍighi ịdipho ạnmanyaan ạna, ghạlamo ịduon ịphen íḍighi bọ ni pạkiri ịyo phọ ạmi rꞌạna.

⁶²Mị kạasa ịyo phọ ạmi rꞌạna, kụ nạ alegheri mọ mị kụ Ọmoogh-we phọ.

⁶³Mị kạsar ạbile oomo ịkaraph phọ nạ maḍighi bọ, kụ ọlo nạ kạatughian ni bịdi kụ akiil umugholoor iboom ịlo ọtagharan ọnhu ạna.” Ọmoogh-we dị ạmoogh oomo ịikpo kụ mạḅem.