Read abua Izikiel 17 Bible Online

Izikiel 17 - abua bible

Izikiel 17

¹Ọmoogh-we phọ ụḅaanaan ịmi.

²Ọdi ạḅem mọ, “Oye dị kamugh ni, ḅẹni bụo Ịzirel ḍidogh

³ịlo bịdi kolegheri ịpe mị Ọmoogh-we dị ạmoogh oomo ịikpo phọ rạḅeni bọ bịdi. Eniin amem ogbogh ugah ạrol li sịphe rꞌịma asuphuugh rꞌigbogh araphaaph dị ẹrar. Ọdi ạpheeph ạghi ẹpe ạraaḅaraph phọ ạLebanon kụ awun ạnyu ọsaga ạsighe

⁴arool ạghi de abumuul ḍighi, kụ aseere ologhi ẹmha abugbogh abumuul ḍighi.

⁵Reten ọdi ạsighe onyugheel oreeny sịphe ade phọ Ịzirel kụ ạzuph nyọdi sịphe ozo ẹnuum, esi dị ạmuum ạrol oomo amem oḍighi ịlo ọdi kapoph.

⁶Oreeny phọ ạraarogh kụ aḍighi ọwekele, oreeny-amiim dị ạrara. Ịla phọ ephoph ẹghi ạnyu ẹpe uga phọ ạrol bọ, kụ ạsini phọ ẹkel ẹghi ude. Oreeny-amiim mọ ukpereghiom rꞌịla rꞌạrinya.

⁷“Ọnon ogbogh uga ạrol li sịphe rꞌigbogh araphaaph rꞌiboom asuphuugh. Kụ nyịidipho oreeny avain phọ ạghiom sịni ọdi ẹpe uga phọ ạrol bọ, ạḅile akiton rịnya ạghiom kẹn ẹpe phọ, esi oḍuom ologhi phọ mọ ọdi kạngo nyịno mụum dị ạbugh apu mụphe ạrol bọ sịphe ozo phọ ọno odi bọ raḍum.

⁸Kụ ọlo oreeny avain phọ mọzuph kꞌẹnon amem ologhi ozo dị ạnuum rꞌạmuum dị ạmanam ọbo ọdi ạsu rịnya ạḅile amuum rughuuny kụ aḍighi ọkaraghi ogbogh oreeny-amiim.

⁹“Esi ịduon phọ mị Ọmoogh-we dị ạmoogh oomo ịikpo apuru: Oreeny-amiim mọ ọphon kạtol li ạḅile apoph ḍụghum? Kéḍighi ịdi ọḅel uga phọ katuphuron nyọdi, ạkaphion rughuuny phọ, ạḅile aḅonyon ịla phọ ạsighiogh kụ ạbile ọdi ạghar ḍụghum? Ọony ẹnum ịikpo bịn kẹgbaanyan oruphuron ọdi, kị́ikpo egbogh eelhe.

¹⁰Agey ni, nyọdi ọzuph ni, kụ ọlo ọdi kạtol li apoph? Ọdi kạ́kar mem dị ookuugh ẹpe erumuḍio phọ remite ghan bọ ạgur nyọdi? Ọdi kạ́kar sịphe ẹpe ọdi rapoph bọ?”

¹¹Ọmoogh-we phọ ụḅeni ịmi mọ,

¹²“Puru bụo ịgbagharan phọ ạbuen mụghumo bịdi olegheri ni ẹmhu aḍidogh phọ. Ḅẹni bịdi mọ ọdaam-ẹmha ạBabilon phọ aru Jeruselem kụ ạsighe ọdaam mọ rꞌạbuo iiḍighi ọdi agheelom ẹpe Bạbilonia.

¹³Ọdi ạsighe oniin ọlo eghun ọdaam mọ, ạgian ḍịnya ọḅoph ọnhu rꞌọdi, kụ aḍighi ịdi ọdi aghunya ịlo ọnaghanan ọdi. Ọdi asiph ikpolom awe ạḍuanam ịdipho ạbuo ikoli

¹⁴esi okikima eelhe phọ ọbo kẹḅile ghan bọ eḅetenu, ḅịle rꞌịlo oḍighi ịdi ịge ạmuḅoph phọ kooko ni.

¹⁵Kụ ọlo ọdaam mọ aJuda ạgbagharan ni kụ arom rụukpaany ọdi ọghi Ijipt ịlo ọmoogh ịnam-ạsu rꞌaḍita awe ẹgham. Ọdi kạkpar ri apu ḍụghum? Ạghelhe kạtol li ḍụghum? Ọdi kạ́ka ịge ọḅoph ọnhu phọ kụ akeel dị kọ́liom.”

¹⁶Ọmoogh-we dị ạmoogh oomo ịikpo ạḅem mọ, “Ọkaraghi agey ịduon mị kụ aru bọ Ẹnaan dị edi ghan, ọdaam mọ ọphon kamugh ẹpe Bạbilonia ịdi eḍighi bọ ọdi ạka ịyo phọ ọdi ḅịle rꞌịge ọḅoph ọnhu phọ ọdi maḍighi bọ rꞌọdaam ẹmha ạBabilon phọ, ọpo aseere bọ nyọdi sịphe ạgada ọda phọ.

¹⁷Ghạlamo aḍita ạbuo ẹgham ọdaam mọ Ijipt rꞌoomo ịikpo phọ ạbidi kótue ọloghonaan ḍịghaagh nyọdi ee mem dị bụo ạBabilon phọ ọlogh roḅol opukian asiloor kụ oguphogh sikol ịlo bịdi kọziom ịbadi awe.

¹⁸Ọdi ạka ni ịyo phọ ọdi ḅịle rꞌịge ọḅoph ọnhu phọ ọdi maḍighi bọ. Ọdi aḍighi ni oomo ạraraar phọ ịphen kụ nyịidipho ọdi kákpetenaan.”

¹⁹Ọmoogh-we dị ạmoogh oomo ịikpo ạḅem mọ, “Ọkaraghi agey ịduon mị kụ aru bọ Ẹnaan dị edi ghan, mị kạliom ni nyọdi esi ọka ịge ọḅoph ọnhu phọ ọpo ọdi aghunya bọ esi aḍien ạmi ịlo ooko.

²⁰Mị kạatarion ọzuguru kụ asiphom nyọdi ologhi ọdi. Mị kạsighe nyọdi ạki Bạbilonia kụ ạliom nyọdi ẹpe ịdi eḍighi bọ ọdi ọ́moogh omeeraam esi ạmi.

²¹Ọkaraghi abugey awe ẹgham ọdi kọze esi ẹgham, kụ bụphe kokpetenaan bọ kọwalalami esi ạtorobo ạga. Pọ kụ amem dị nyina kelegheri mọ mị Ọmoogh-we phọ kụ mạḅem.”

²²Ịphen kụ ịdi Ọmoogh-we dị ạmoogh oomo ịikpo ạḅem: “Mị kạsighe ạnyu ọsaga dị aphoph kụ ạkapharan ạsighe ọmiigh dị kọ̋kpo; mị kạzuph nyọdi ạnyu ẹeḅaraph dị ephoph,

²³ạnyu ẹeḅaraph Ịzirel dị ephoph epu oomo ịdi. Ọdi kạsu ịla kụ amuum ikpo kụ aḍighi ịma ọsaga. Tọrobo ọdo ịnun ketugh sịphe kụ ẹwa oghoph sịphe uba phọ.

²⁴Oomo ireeny ịsiphe ade phọ kelegheri mọ mị kụ Ọmoogh-we phọ. Mị aler ude iiphopha ireeny phọ kụ aḍighi ịdi ịbam ireeny phọ kepoph ẹki ạnyu. Mị ạnuemi iḍiil ireeny phọ kụ aḍighi ịdi ịgharaghar ireeny phọ keḍighi iḍiil. “Mị Ọmoogh-we phọ mạghaaph. Mị kaḍighi ni ịpe mị mạḅem bọ mọ mị kaḍighi.”