Read abua Izikiel 18 Bible Online

Izikiel 18 - abua bible

Izikiel 18

¹Ọmoogh-we phọ ụḅaanaan ịmi.

²Ọdi ạḅem mọ, “Ạḍien eeghe aḍidogh awe rooḅula ghan bọ tọrobo amem sịen ade phọ Ịzirel? “‘Ọde rꞌonhiin kụ ule oloomini kụ ọlo ạralaay ạnmuny phọ kụ reekiigh.’”

³Ọmoogh-we dị ạmoogh oomo ịikpo ạḅem mọ, “Ọkaraghi agey ni ịduon mị kụ aru bọ Ẹnaan dị edi, nyina kéeḅula mun ḍidogh phọ aḍien sịen ade phọ Ịzirel.

⁴Aghuḍum ạtorobo oye aḍighi ọlo ạmi, aghuḍum ọde phọ rꞌạkuo ọony phọ kẹn. Oye phọ ọpo aḍighi bọ ịkaraph phọ kụ ọpo kamugh bọ.

⁵“Eḍighi mạar dị ọkaraghi ogey oye odi, aseleman kụ ẹzo ẹnighe.

⁶Ọdi ráaseeny ghan ịkaaghineen ạrumugh phọ ạbuo Ịzirel mꞌolhe ạrikia phọ ọngo bọ rạphan, riisi dị ogbi. Ọdi rátorori ghan ạnir ọnon oye ọghi esi ịkaraph mꞌọrolan esi rꞌạnir mem dị odi ẹrol.

⁷Ọdi ránoma ghan mꞌomi ịyaar oye. Ọdi raḅulemi ghan ịpe oliom ọmugh ạngo bọ nyọdi ịlo oseenaan. Ọdi rạngo ghan eḍien bụlo ọkoony rasiph kụ kạngo iinmenan bụo ẹdaḅa phọ.

⁸Ọdi rátene ghan ọmugh ịlo ạsuo. Ọdi akel oḍighi ịkaraph kụ rạngo ghan ogey ọotughian esi ạtorobo ịgbaragbara.

⁹Ọdo oye nyọon raako ghan ịto ạmi kụ amiigha loor ạpam iilogh phọ ạmi. Ọdi aseleman ni, pọ ọdi kạtol li,” Ọmoogh-we dị ạmoogh oomo ịikpo ạḅem.

¹⁰Kụ, eḍighi mạar dị oye phọ ọphon ạmoogh mọony dị rami ghan kạḅile ạze we, ọdi raḍighi ghan iniin ạraraar phọ ịphen

¹¹ịpe ọde phọ ọdi rꞌamem úḍighi bọ. Ọdi rale ghan rịkia dị ọngo esi ạraphan dị ogbi kụ karorori nmạriir ạbunon awe ọghi esi ịkaraph.

¹²Ọdi raagbegheḍiom ghan rukulom mọ, ọdi rami ghan, ọdi rámitiom ghan ịpe oliom ọmugh ạngo bọ nyọdi ịlo oseere. Ọdi rạki ghan rạphan ạbuo aruru, raaseeny ghan ịkaaghineen ạrumugh isa,

¹³kụ kạngo ọmugh ịlo ạsuo. Ọdi kạtol li ḍụghum? Eeye, ọdi kạ́tol. Ọdi maḍighi oomo ạraraar isa phọ ịphen, kụ esi ịduon phọ ọdi kamugh ni. Ọdi kụ ẹdi kọkpalham ịlo aḍuugh phọ ọdi.

¹⁴Nyịidipho eḍighi mạar dị oye ọphon amuneniom bọ ịyal phọ ạmoogh mọony. Ọdi ạmiin oomo ịkaraph phọ ọde phọ ọdi aḍighi ghan bọ, kụ ọ́daph eḍighinom ịyaar phọ ọdi.

¹⁵Ọdi óoseeny ịkaaghineen ạrumugh awe phọ Ịzirel, mꞌolhe ạrikia phọ ọngo bọ rạphan dị ogbi. Ọdi órorori ạnir ọnon oye ọghi esi ịkaraph,

¹⁶mꞌọkpiloghom ạtorobo oye mꞌomi ịyaar oye. Ọdi aḅulemi ni ịpe oliom ọmugh ạngo bọ nyọdi ịlo oseere. Ọdi rạngo ghan eḍien bụo ọkoony kụ kạngo iinmenan bụo ẹdaḅa.

¹⁷Ọdi akel oḍighi ịkaraph kụ rạ́ngo ghan ọmugh ịlo ạsuo. Ọdi raako ghan iilogh ạmi kụ kạḅile ạnaghanan ịtooghi ạmi. Ọdi kámugh loor esi ịkaraph ọde phọ ọdi, kụ ọkaraghi igey ni ọdi kạtol li.

¹⁸Ọde ọdi, ḍịeri phọ ạḍighaagh phọ, aagbegheḍiom ni ạḅile ami, kụ oomo amem aḍighi ịkaraph esi ạtorobo oye. Kụ iḍighi kụ ọdi amugh ni loor esi ịkaraph phọ ọdi rꞌaloor maḍighi bọ.

¹⁹“Kụ nyina epuru mọ, ‘Iḍighi ika kụ ọony phọ ọ́miinom bọ loor esi ịkaraph ọde phọ ọdi?’ Ọphagharanaan phọ aḍighi ịduon ọony phọ aḍighi bọ ịpe esel bọ kụ eḍighi igey. Ọdi aako ni iilogh phọ ạmi ạḅile amiigha loor ạdaph, kụ iḍighi kụ agey ni ọdi kạtol li.

²⁰Ọdi ọpo phọ aḍighi bọ ịkaraph kụ kamugh. Ọony kạ́miinom loor esi ịkaraph ọde ọdi, mꞌọde loor esi ịkaraph ọony ọdi. Ogey oye kọngo ịikpia ịlo oḍighi igey, ḅịle ọkaraph oye kạmiinom ịlo ịkaraph phọ ọdi aḍighi bọ.

²¹“Eḍighi mạar dị ọkaraph oye ạwile oḍighi ịkaraph kụ aako iilogh ạmi, eḍighi mạar dị ọdi aḍighi ịpe esel bọ kụ ẹnighe, ọdi kámugh; ọdi ọkaraghi igey ni kạtol li.

²²Oomo ịkaraph phọ ọdi kọsar ri ọbilenaan, kụ ọdi kạtol li, loor esi dị ọdi aḍighi ịpe esel bọ.

²³Nyina rẹetughian ghan mọ mị ạmoogh ni ọḅaal ologhi ophiemi ọkaraph oye?” Ọmoogh-we dị ạmoogh oomo ịikpo apuru. “Eeye, mị rạwa ghụn mọ ọdi akiton pịdi ọdi ạtol.

²⁴“Kụ ọlo, eḍighi mạar dị oye elhiom eḍighinom ịyaar ạwile oḍighi igey kụ amiigh oḍighi oomo ịkaraph ạraraar isa phọ ịpe ạbukaraph awe roḍighi bọ, ọdi kạtol li ạkiom risigh? Eeye! Rꞌeniin igey phọ ọdi aḍighi bọ kọ́otughian. Ọdi kamugh loor esi ẹ́moogh omeeraam mọ ọdi rꞌịkaraph phọ ọdi.

²⁵“Kụ nyina ẹḅem mọ, ‘Ịpe Ọmoogh-we phọ aḍighi bọ ísel.’ Iler rụru ịngo ịmi, nyina ạbuo Ịzirel. Nyina ẹetughian mọ eḍighinom ịyaar phọ ạmi ísel ḍụghum? Eḍighinom ẹpe anyina ghụn kụ ẹdi ísel.

²⁶Mem dị oye elhiom eḍighinom ịyaar ạwile oḍighi igey kụ amiigh oḍighi ịkaraph kụ agbi omugh, ọdi amugh loor esi ịkaraph phọ ọdi maḍighi bọ.

²⁷Mem dị oye dị raḍighi ghan ịkaraph ạwile oḍighi ịkaraph kụ aḍighi ịpe esel bọ kụ ẹnighe, ọdi ạpel ghuḍum ọdi.

²⁸Ọdi aloghoma ịpe ọdi raḍighi bọ kụ ạbile oḍighi ịkaraph, esi ịduon phọ ọdi agey ni kámugh, kụ ọlo kạtol li ạkiom ghisigh.

²⁹Kụ nyina ạbuo Ịzirel ẹḅem mọ, ‘Ịphen Ọmoogh-we phọ aḍighi bọ ísel.’ Nyina ẹetughian mọ eten ạmi ísel. Eten ẹpe anyina kụ ẹdi ísel.

³⁰“Nyịidipho mị Ọmoogh-we dị ạmoogh oomo ịikpo rịḅeni ni inyina ạbuo Ịzirel mọ mị kasoph ọoruen ạngo tọrobo ọnyo anyina esi ịpe ọdi maḍighi bọ. Ikiton ẹḍua esi oomo ịkaraph phọ nyina reḍighi bọ, ḅịle kémeera ịkaraph anyina iphiemi inyina.

³¹Ịbile oomo ịkaraph phọ nyina reḍighi ghan bọ, kụ ẹmooghaan siloor anyina imoom iloghi rꞌarokpom. Iḍighi ika kụ nyina ạbuo Ịzirel rẹwa bọ omugh phọ?

³²Mị ụ́wa ophiemi rꞌoniin oye,” Ọmoogh-we dị ạmoogh oomo ịikpo ạḅem. “Ikiton ẹḍua esi ịkaraph anyina ọbo eḍum.”