Read abua Izikiel 19 Bible Online

Izikiel 19 - abua bible

Izikiel 19

¹Ọmoogh-we phọ ụḅeni ni ịmi ọmoor ạḍuor ọto phọ aḍien ịlo ịyal ịkpana ạraalha Ịzirel:

²Eeghe ẹya ạnam-dịka dị onhiin ạna aḍighi! Ọdi aakonom nmụny ọdi ogbo ịigama ilephiri ạnam-dịka.

³Ọdi aakonom mọony kụ ạtughemi nyọdi ịlo ịtaya; ọdi aḍighi ọbaam-awe.

⁴Areelhe phọ ọnaghan ịlo ọdi kụ osiph nyọdi ḍiphil ologhi ooni. Rꞌạsiḅaph bịdi ọghogh nyọdi ọsighe osiemi Ijipt.

⁵Ọdi akori tụtu ọdi ạmiin mọ oomo oḍuom ologhi maphe. Pọ kụ amem dị ọdi aakonom ọnon ọony ọdi, kụ ọdi aphoph aḍighi ẹegama ạnam-dịka.

⁶Mem dị ọdi maphoph ạmanam, ọdi arelhe ghan rꞌịpheri phọ ạnam-dịka phọ. Ọdi kẹn ạtuugha ịlo ịtaya kụ aḍighi ọbaam-awe.

⁷Ọdi aḅomoghi ịikpara arikpisi, ọdi aphiemi rạma. Awe ịsiphe ade phọ ariḅio ekaph tọrobo amem lọ ọdi aroraan.

⁸Areelhe phọ ookpomoghan eenan ọdi; awe ọḍua tọrobo ekpisi oru. Bịdi ọotarion ịzuguru ạbidi kụ osiph nyọdi ologhi aḍiphil ạbidi.

⁹Bịdi ọlogh nyọdi ologhi okporoma kụ ọsighe nyọdi ọghiom ogbogh ọdaam ạBabilon phọ. Bịdi oseere nyọdi esi dị rokori ghan, ọbo eḍighi mạar dị ororaan ọdi kọ́naghan mun ạnyu aroogbolom phọ Ịzirel.

¹⁰Onhiin ạna ạghigh eghuuny oreeny-amiim avain dị ọzuph otumeniom okol. Loor esi dị ạmuum ạrol bọ iboom, oreeny-amiim mọ ạmoogh rịnya rꞌarughuuny.

¹¹Ịla ọdi ẹkpar, kụ ephoph eḍighi ịkpara ọdaam. Oreeny-amiim mọ aphoph ạkasian ịlo osi arukuaḍio phọ; tọrobo oye ạmiin ịdi ạrinya rꞌaḍiphoph ọdi ẹrol.

¹²Kụ ọlo ạraghaagh ophin ologhi eruphuron nyọdi sịphe ạsini phọ kụ eroph nyọdi sịphe ude phọ. Ookuugh phọ ẹpe erumuḍio phọ remite ghan bọ ạgharagharami rughuuny ọdi. Ịla ọdi uḅonyon ni ọsighe; bịdi ẹgharaghar kụ oguom nịan.

¹³Nyịidipho nyọdi ọzuph sịphe ẹdala ịisaar phọ, ologhi ade dị ẹgharaghar kụ ạmuum úlho.

¹⁴Ogboku oreeny-amiim mọ akoph nịan; ạnian ele ẹman ịla rꞌarughuuny ọdi. Ịla phọ kẹ́ḅile mun ẹ́moogh ịikpo, kéḍighi mun ịkpara ọdaam. Ḍịen kụ ạḍuor ọto; ḍịdi mọmoor ri kụ ọḅile ọmoor.