Read abua Izikiel 20 Bible Online

Izikiel 20 - abua bible

Izikiel 20

¹Iḍighi omuneniom aḍioph aḍio omuneniom oogh ụnwanyu phọ esi ạlha dị emuneniom oḍual sịphe ạdol iiruen phọ ayoor. Buniin abuḍiemiom ạbuo ookpomoghan Ịzirel uru ni ḍipuru esi ạmi ịlo ịpe ẹḅeeraan bọ Ọmoogh-we phọ, kụ bịdi ọrol ude sịphe risigh ạmi.

²Kụ Ọmoogh-we phọ ụḅaanaan ịmi. Ọdi ạḅem mọ,

³“Oye dị kamugh ni, ḅạanaan we phọ ạbuen kụ ạḅeni bịdi mọ Ọkar Ogbogh Ọmoogh-we phọ rạḅem ghan: Nyina meru opuru ogbi phọ ạmi, kị́dipho? Ọkaraghi igey ịduon mị kụ aru bọ Ẹnaan dị edi ghan, mị kámeera nyina ipuru ịmi rꞌeniin ịyaar. Mị Ọmoogh-we dị ạmoogh oomo ịikpo mạḅem.

⁴“Nạ aakolobian ni osoph ọoruen ọngo ạbidi ḍụghum, oye dị kamugh ni? Pọ ḍighi ịduon. Kịom bịdi ologhi esi ạraraar isa phọ ạburude ạbidi oḍighi bọ.

⁵Ḅẹni bịdi ịphen mị rạkaaph bọ. Mem mọ mị ạsaḅar bọ Ịzirel, mị uguanaan bịdi oguan. Mị ugananami loor ạmi esi ạbidi sịphe Ijipt kụ ạḅeni bịdi: Mị kụ Ọmoogh-we Ẹnaan phọ anyina.

⁶Pọ kụ amem mọ mị aguanaan bọ ọsighe ạbidi omitiom Ijipt kụ ororori ạbidi ọghi ade dị mị mạsaḅar ḍi ạbidi, ade ẹelha rꞌẹnuum, ade ẹetool rꞌọninom dị ẹnighe epu oomo ịdi.

⁷Mị ạḅeni bịdi mọ oroḅologhi ịkaaghineen ạrumugh isa phọ bịdi ọphomoghian bọ, ḅịle kẹn mọ kụ́pue siloor ạbidi rụmugh ọkpe phọ Ijipt, ịdi eḍighi bọ mị kụ Ọmoogh-we Ẹnaan phọ ạbidi.

⁸Kụ ọlo bịdi ụupu ịmi kụ oghel olher ạruru. Bịdi útoḅologhi ịkaaghineen ạrumugh isa phọ ạbidi mꞌọwile ạrumugh phọ Ijipt. Mị uukolobian ni ịlo omeera bịdi kologhoma oomo ịikpo ọghagh ologhi phọ ạmi ẹpe ologhi Ijipt.

⁹Kụ ọlo mị úḍighi, loor esi dị ịpe mituom roofola ḍien phọ ạmi, ịdi eḍighi bọ sịphe esomanan phọ igbo awe bụphe bịdi orughan bọ mị mạghaaph amitiom esi Ịzirel mọ mị katorori bịdi amitiom sịphe Ijipt.

¹⁰“Kụ iḍighi kụ mị aḍiemiom bịdi omite Ijipt oḍigh ẹpe ẹdala phọ.

¹¹Mị ạngo bịdi ịtooghi ạmi kụ ạtughemi bịdi iilogh phọ ạmi, ịpe ketuom bọ ghuḍum esi ạtorobo ọlo aako bịdi.

¹²Mị aḍighi ooko aḍio ophooghian phọ eḍeenaan ẹlo ọḅoph-ọnhu ogbo ayoor, ịlo ọghiom ạbidi ologhi mọ mị Ọmoogh-we phọ maḍighi bịdi we iigbia.

¹³Kụ ọlo ghạlamo ịsiphe ẹdala phọ bịdi ụupu ni ịmi. Bịdi ọka iilogh phọ ạmi kụ oghel ịtooghi ạmi, ịpe retuom ghan bọ ghuḍum esi ạtorobo ọlo aako bịdi. Bịdi ọkaraghi kụ ọopu ḍio ophooghian phọ. Mị uukolobian ni ịlo omeera bịdi kologhoma ịikpo ọghagh ologhi phọ ạmi ẹpe ologhi ẹdala phọ kụ ophiemi ạbidi.

¹⁴Kụ ọlo mị úḍighi, loor esi dị ịpe mituom roofola ḍien phọ ạmi igbo areelhe phọ ịpe mịmiin bọ ịmi dị aḍiemiom Ịzirel amitiom Ijipt.

¹⁵Kụ iḍighi kụ mị aguanan sịphe ẹdala phọ mọ mị kạ́sighe bịdi ạki de phọ mị mạngo bọ bịdi, de ẹelha rꞌẹnuum, de dị ẹnighe epu oomo arere.

¹⁶Mị uguanan loor esi dị bịdi moghel ịtooghi phọ ạmi, ọka iilogh ạmi kụ ọopu ḍio ophooghian phọ — ẹḅeeraan bịdi ooseeny ghan ịkaaghineen ạrumugh phọ ạbidi.

¹⁷“Kụ ọlo mị ụnma ni bịdi ighirigiir. Mị agbiighi mọ mị kạ́ze bịdi ẹpe ologhi ẹdala phọ.

¹⁸Kpạripe, mị ạphur rụru ugheel phọ igbo ạbidi: kéeko iilogh phọ ạburude ạburude anyina ọlogh bọ; kẹ́daph eḍighinom ạraraar ạbidi mꞌọopuom asiloor anyina rꞌịkaaghineen ạrumugh phọ ạbidi.

¹⁹Mị kụ Ọmoogh-we Ẹnaan phọ anyina. Iiko iilogh phọ ạmi rꞌịtooghi phọ ạmi.

²⁰Ịsighe ḍio ophooghian phọ eḍighi ḍio iigbia, ọbo eḍighi eḍeenaan ịyo phọ yira oghiran bọ, ẹḅile ịghiom inyina ologhi mọ mị kụ Ọmoogh-we Ẹnaan phọ anyina.

²¹“Kụ ọlo oghiil phọ ọpo ạḅile kẹn ni ụupu ịmi. Bịdi ọka iilogh phọ ạmi kụ úuko ịtooghi phọ ạmi, ịpe ketuom bọ ghuḍum esi ạtorobo ọlo aako bịdi. Bịdi ọopu ḍio ophooghian phọ. Mị uukolobian ni ịlo omeera bịdi kologhoma ịikpo ọghagh ologhi phọ ạmi ẹpe ologhi ẹdala phọ kụ ọze oomo ạbidi.

²²Kụ ọlo mị úḍighi, loor esi dị ịpe mituom roofola ḍien phọ ạmi igbo areelhe phọ ịpe mịmiin bọ ịmi dị aḍiemiom Ịzirel amitiom Ijipt.

²³Kụ iḍighi kụ mị aguanan sịphe ẹdala phọ. Mị aghunya mọ mị kạwalalami bịdi oomo aḅirini phọ.

²⁴Mị uḍighi ịphen loor esi dị bịdi moghel ịtooghi phọ ạmi, ọka iilogh phọ ạmi kụ ọopu ḍio ophooghian phọ ọḅile ooseeny iniin phọ ịkaaghineen ạrumugh phọ ạburude ạburude ạbidi mokumu ghan bọ.

²⁵“Pọ kụ amem dị mị ạngo bịdi iilogh dị ị́nighe rꞌịtooghi dị ị́sighe ghuḍum ítu.

²⁶Mị ameera bịdi ọopu siloor ạbidi rꞌinmo ạbidi, kụ mị ameera bịdi ọphinyonom rịkia ịḅel ạnmuny ạbidi. Ịphen iḍighi ịlo ọlhiom ạbidi rꞌoḍeenaan ạbidi mọ mị kụ Ọmoogh-we phọ.

²⁷“Nyịidipho, Oye dị kamugh ni, ḅẹni bụo Ịzirel phọ ịphen mị Ọmoogh-we dị ạmoogh oomo ịikpo phọ rạḅeni bọ bịdi. Ẹphen ẹnon eten dị ạburude ạbidi uronyon ịmi esi ẹ́moogh omeeraam.

²⁸Mị ạsighe bịdi asiemi de phọ mị maguanaan bọ ọngo ạbidi. Mem dị bịdi ọmiin iiphopha aroogbolom rꞌiḍiil ireeny, bịdi ọphinyon rịkia ọngo oomo ạbidi. Bịdi ụngo ịmi ọghagh ologhi loor esi ạrikia phọ bịdi oguom ghan bọ nịan phọ ḅịle rꞌesi amiim mọ bịdi ọsighe bọ oru ịdipho inmo.

²⁹Mị apuru bịdi: Ịpe eeghia iiphopha ariisi dị nyina rẹki ghan bọ? Kụ iḍighi kụ moghol bịdi mọ ‘Iiphopha ariisi’ kꞌaḍio arodon.

³⁰Nyịidipho ḅẹni bụo Ịzirel phọ ịphen mị Ọmoogh-we dị ạmoogh oomo ịikpo phọ rạkaaph bọ: Iḍighi ika kụ nyina keḍighi bọ iniin ịkaraph phọ ạburude phọ anyina oḍighi bọ kụ esi oghiil ọdaph ịkaaghineen ạrumugh phọ ạbidi?

³¹Ghạlamo kꞌarodon nyina rẹngo ni igina phọ inmo phọ kẹḅile ẹepuom siloor anyina rꞌigina phọ ịkaaghineen ạrumugh phọ esi ọphinyonom ạrikia nmụny anyina ọngo ạbidi sịphe ạnian phọ. Kụ nyina ạbuo Ịzirel phọ egbi ọḅile oru opuru ịpe mị rạwa bọ! Ọkaraghi agey ni ịduon mị Ọmoogh-we dị ạmoogh oomo ịikpo phọ kụ aru bọ Ẹnaan dị edi ghan, mị kámeera nyina ipuru ịmi rꞌeniin ịyaar.

³²Nyina megbiighi ẹnya ọrol ịdipho ịnon areelhe, ịdipho awe phọ ạbuphe orugh bọ ịnon areelhe phọ kụ rooseeny ghan bọ ireeny rꞌasighiigh phọ. Kụ ọlo ịpe kétue emite.

³³“Ọkaraghi agey ni ịduon mị Ọmoogh-we dị ạmoogh oomo ịikpo phọ kụ aru bọ Ẹnaan dị edi ghan, mị ịphur inyina rụru mọ mị kịdaam inyina rꞌạḍiikpara ạḍighaagh rꞌoomo ịikpo phọ ạmi.

³⁴Mị kiḍeenaan inyina ịikpo phọ ạmi rꞌọghagh ologhi ạmi mem dị mị iikpomoghi inyina egina esi kụ ịsighe inyina aḅulemi ọḍua ẹpe oomo areelhe phọ mị ịwalalami bọ inyina.

³⁵Mị kịsighe inyina atu sịphe ‘Ẹdala Areelhe Phọ’, kụ mị asoph ọoruen iphume inyina risigh anyina.

³⁶Mị nyịidipho kịliom inyina ọkaraghi ịdipho mị ạliom bọ bụrude phọ anyina sịphe Ẹdala aSainai,” Ọmoogh-we dị ạmoogh oomo ịikpo phọ ạḅem.

³⁷“Mị kikpobiom inyina ạḅile aḍighi ịdi nyina keeko ịyo phọ ạmi.

³⁸Mị kạsighe sịphe igbo anyina bụphe rọgbagharan ghan bọ koḍighi ịkaraph. Mị kạsighe bịdi amitiom sịphe arere phọ ẹpe bịdi orugh bọ nyịidipho, kụ ọlo mị kámeera bịdi origheel sịphe ade phọ Ịzirel. Pọ kụ amem dị nyina kelegheri mọ mị kụ Ọmoogh-we phọ.”

³⁹Ọmoogh-we dị ạmoogh oomo ịikpo ạḅem, “Kụ nyịidipho, oomo anyina ạbuo Ịzirel, ịgbaanyami siloor! Ikumu ịkaaghineen ạrumugh phọ anyina ẹghiom risigh! Kụ ọlo mị ịphur inyina rụru mọ mem dị ịphen eten nyina ẹmoogh ọnaghanan ạmi kụ ọwile oofolomi ghan aḍien iigbia phọ ạmi esi ọngooghi ghan inmo ịkaaghineen ạrumugh phọ anyina.

⁴⁰Sịphe ade phọ, ạnyu ẹeḅaraph iigbia phọ ạmi, eephopha ẹeḅaraph phọ Ịzirel, oomo anyina awe phọ Ịzirel kiiseeny ghan ịmi. Nyina kẹḅaal li ologhi ạmi ḅịle mị kagon ni lọ nyina kiruom ịmi rịkia phọ anyina, ọkaraghi igey inmo phọ anyina, rꞌinmo iigbia phọ anyina.

⁴¹Mem lọ mị mimitiom inyina sịphe areelhe phọ ẹpe mị ịwalalami bọ inyina kụ iikpomoghi inyina egina esi, mị kạsighe ni rịkia lọ nyina eguom nịan, kụ areelhe phọ kọmiin ni mọ mị aḍighi iigbia.

⁴²Mem dị mị iḅulemi inyina ẹpe Ịzirel, de phọ ḍịphe mị aguanaan bọ mọ mị kạngo bụrude ạburude anyina, pọ kụ amem dị nyina kelegheri mọ mị kụ Ọmoogh-we phọ.

⁴³Pọ kụ amem dị nyina kẹetughian oomo ạraraar umugholoor phọ nyina eḍighi bọ rꞌịpe nyina ẹepu bọ siloor anyina loor esi oomo ịkaraph ạraraar phọ nyina eḍighi bọ.

⁴⁴Mem dị mị aḍighi ịlo ọphamanam eghuan phọ ạmi, nyina ạbuo Ịzirel phọ kelegheri ni mọ mị kụ Ọmoogh-we phọ, ịdi eḍighi bọ mị inyina úḍighi ịdi ẹkpianaan oḍighi esi ịkaraph ạroozo phọ anyina.” Ọmoogh-we dị ạmoogh oomo ịikpo mạḅem.

⁴⁵Ọmoogh-we phọ ụḅaanaan ịmi.

⁴⁶Ọdi ạḅem mọ, “Oye dị kamugh ni, pogh ạghiom ẹpe esoorom mọ. Kạaph ịkaraph esoorom mọ ạḅile ạmiinaan ịkaraph ẹekpua esoorom mọ.

⁴⁷Ḅẹni ẹekpua phọ ẹpe esoorom mọ ịlo ọnaghan ịpe Ọmoogh-we dị ạmoogh oomo ịikpo rạkaaph bọ: Ipogh mị rạkpooni nịan dị kele ẹman tọrobo oreeny dị odi ologhi ạna, mụghumo abil mꞌạkaraghar. Ịyaar kẹ́tol dị ketue eḍime nịan phọ. Ạnian phọ keleeny ẹḍua ẹpe esoorom mọ ẹki ẹpe ephunom mọ, kụ tọrobo oye kaloghoma ni ẹghologhol asinem ạnian phọ.

⁴⁸Oomo ạbidi kọmiin mọ mị Ọmoogh-we phọ ạlogh bịdi esi ạnian kụ mọ oye kátue aḍime nịan phọ.”

⁴⁹Kụ ọlo mị ụlo ni kụ ạḅem mọ, “Ọmoogh-we dị ạmoogh oomo ịikpo, kụ́kpaariom ịmi, mị oḍighi ịdipho! Tọrotoro oye rạkunuma ni mọ mị rạkaaph ghan oomo amem rꞌasidogh.”