Read abua Izikiel 21 Bible Online

Izikiel 21 - abua bible

Izikiel 21

¹Ọmoogh-we phọ ụḅaanaan ịmi.

²Ọdi ạḅem mọ, “Oye dị kamugh ni, tuphughiom Jeruselem. Tuphughiom riisi phọ awe rooseeny ghan bọ. Pụr rụru de phọ Ịzirel

³mọ mị Ọmoogh-we phọ rạḅem ghan: mị ạmulogh-ḍien ạna. Mị katuph elhool ẹgham ạmi kụ ạze oomo anyina, bugey rꞌạbukaraph iniin phọ.

⁴Mị kaḍighinom elhool ẹgham ạmi ịkaraph tọrobo oye emiigh ẹpe ephunom mọ esi ẹphen esoorom mọ.

⁵Tọrobo oye kalegheri ni mọ mị Ọmoogh-we phọ maruph elhool ẹgham ạmi kụ mị káseere mun.

⁶“Oye dị kamugh ni, kụph mụdi ekpom ạna kụ retuuru rꞌamukum ologhi. Kụph esi ọto esi dị tọrobo oye kaphogh nyịna.

⁷Mem dị bịdi opuru nyịna mọ eeghe kụ nạ rạkuph bọ, ḅẹni bịdi mọ aloor esi ọghaaph phọ ọpo ratu bọ. Mem dị ọdi aru, iloghi ạbidi kemuza rꞌoghiilaan, ạraghaagh ạbidi kedugh ni, ạkpo ologhi ạbidi kạmoogh mabi, kụ aruukum ạbidi eekpeka. Amem mọ mẹteeny, mesi ni sịen.” Ọmoogh-we dị ạmoogh oomo ịikpo mạḅem.

⁸Ọmoogh-we phọ ụḅeni ịmi mọ,

⁹“Oye dị kamugh ni, mịinaan. Ḅẹni we phọ ịpe mị Ọmoogh-we phọ rạkaaph bọ: “Elhool ẹgham, elhool ẹgham moghola kụ ogbuur

¹⁰Nyọdi okola ịlo oghiighom, ogbuur ịlo ọraphan ịdipho ọnmem iboh kẹ́tol, ịdi eḍighi bọ awe phọ ạmi ụ́maghami ịyaar oomo ọphur ạruru rꞌọliom.

¹¹Elhool ẹgham mọ rogbuur ri, ịlo ookolobian ọdi ẹlo oḍighinom Nyọdi okola ni kụ ogbuur ịlo kọlogh ologhi ạḍighaagh ọziom.

¹²Moghi esi amukum ologhi, Oye dị kamugh ni; elhool ẹgham mọ ẹphen oseere ẹlo awe phọ ạmi rꞌẹlo oomo abuḍiemiom mọ Ịzirel. Kọze bịdi ọḅaram oomo ạbueri phọ awe phọ ạmi.

¹³Mị rạdegh we ạmi kaphogh, kụ eḍighi mạar dị úmeera ukiton, oomo ạraraar phọ ịphen kemitenaan ni bịdi.

¹⁴“Nyịidipho, Oye dị kamugh ni, mịinaan. Kpoolha rạghaagh ạna, bịn elhool ẹgham mọ keben kụ ẹḅile eben. Elhool phọ, elhool dị rẹze ghan, elhool dị rẹngo ghan eepuph kụ ẹkanyan.

¹⁵Ọdi raḍighi ghan ịdi awe ạmi kotoph ạkpo ologhi kụ okpetaan omeel. Mị rạpaarogh ni ẹmha phọ ạbidi rꞌelhool dị rẹtaphan ịdipho ọnmem kụ eekolobian ni ịlo oghiigh.

¹⁶Sạm ạghi elhiom rꞌekeeny phọ, nạ elhool ẹgham dị eroph! Sạm tọrobo ekpisi dị nạ asoman.

¹⁷Mị kẹn kakpoolha rạghaagh ạmi, bịn ọghagh ologhi phọ ạmi mamuneen. Mị Ọmoogh-we phọ kụ mạḅem.”

¹⁸Ọmoogh-we phọ ụḅaanaan ịmi.

¹⁹Ọdi ạḅem, “Oye dị kamugh ni, kọghoron amitiom ịyal areten ekpisi dị ogbogh ọdaam ạBabilon phọ kạḍua atu rꞌelhool ẹgham ọdi. Ịyal phọ areten phọ kemiigh ni eniin phọ eelhe phọ. Gim eḍeenaan esi phọ areten phọ eḍighi bọ ịḅari.

²⁰Eniin keḍeenaan ọdaam-ẹmha phọ eten dị rẹki eelhe ạbuo Amon, ẹpe ẹmha phọ Raba; kụ ẹpheri phọ eten dị rẹki eelhe phọ aJuda, ẹpe ẹmha phọ aJeruselem ọkparami bọ.

²¹Ogbogh ọdaam ạBabilon phọ ạmeera ọogaany eḍeenaan phọ ogim bọ sịphe ịraar-areten phọ. Esi ọwa olegheri ẹghen eten ẹlo ọghi, ọdi apighemi ịkpina phọ; ọdi ạki ḍipuru esi ịkaaghineen ạrumugh ọdi; ọdi ạaḅeghion ni ẹnam dị ọphighironom ẹkia.

²²Nyịidipho! Ạḍighaagh elhiom ọdi ẹpam ẹkpina dị ọge ‘Jeruselem’. Ẹkpina phọ rẹḅeni ghan nyọdi ịlo ọghi ọmeremi ạraḅam, ịlo ọlo ạḍiolo ẹgham, ịlo osereghi ạraḅam ọḅagham ạrunhu-aḍibuo phọ, ịlo ọḅiir iikpe, ḅịle rꞌoguph asikol.

²³Awe phọ aJeruselem kómeeraam ịphen phọ loor esi ịge ạmuḅoph phọ bịdi mọgian bọ. Kụ ọlo ịmiin phọ ịphen ịlo ọghiom ologhi bịdi esi ịkaraph phọ ạbidi ḅịle rꞌọphur ạbidi rụru mọ kosiphi ni bịdi.

²⁴Ịphen kụ ịpe mị Ọmoogh-we dị ạmoogh oomo ịikpo rạkaaph bọ. Ịkaraph anyina mogananami. Tọrobo oye alegheri ni ịdi nyina ẹpioman. Nyina eḍeenaan ịkaraph anyina esi ạtorobo eḍighinom ịyaar anyina. Nyina ẹmeera esi apum, kụ mị kịḅogh inyina ạngo bụmulogh-ḍien anyina.

²⁵“Nạ ọkaraph ọolha-ẹmha Ịzirel dị úlho dọl iigbia, aḍio ạna, aḍio eekuna ọliom ạna, retu ni.

²⁶Mị Ọmoogh-we dị ạmoogh oomo ịikpo mạḅem. Zughuronaan eghoony ọdaam ẹmha phọ ạna rꞌọkaghaam mọ ạna. Ịyaar kẹ́tol mun iniin phọ ịpe ẹrol ghan bọ. Poophe uwekulom mọ ạrolomi esi ịtooghi! Soore ude bụphe rọtooghi bọ!

²⁷Eegulaan, eegulaan! Agey ni, mị kaḍighi ẹmha phọ eegulaan. Kụ ọlo ịphen phọ kémite tụtu oniin phọ ọpo mị mạsaḅar bọ ọlo ọliom ẹmha phọ aru. Pọ kụ amem dị mị kạḅogh ẹmha phọ ạngo nyọdi.

²⁸“Oye dị kamugh ni, mịinaan. Ḅẹni ịpe Ọmoogh-we dị ạmoogh oomo ịikpo phọ rạḅeni bọ bụo Amon phọ, bụphe rọgilaam bọ Ịzirel. Ḅẹni bịdi mọ, “‘Elhool ẹgham eekolobian ni ịlo ophiemi; elhool phọ ogbuur ịlo oghiigh, ịlo ọraphan ịdipho ọnmem.

²⁹“‘Uḍien phọ ịpe nyina ẹmiin bọ ọkpe ni, ḅịle ịmiin phọ ịpe nyina ẹmiin bọ ọkpe ni. Nyina ebeeph rꞌịkaraph, kụ aḍio anyina retu ni, aḍio eekuna ọliom anyina. Elhool ẹgham kemeelom ạnyu irum anyina.

³⁰“‘Ipoophe ạnyu elhool phọ. Mị kiigbonaan inyina ịiruen sịphe esi phọ ẹpe ịlhem bọ inyina, sịphe ade phọ ẹpe ịmar bọ inyina.

³¹Nyina keloghoma ọghagh ologhi ạmi mem dị mị ạkatan nyọdi esi anyina ịdipho ạnian dị reemor. Kụ mị kịḅogh inyina ạlogh rạghaagh awe ẹkaraph ẹzo, rephelegbe esi ophiemi.

³²Kiphiemiom inyina nịan. Ịḅaal anyina kozu ologhi eelhe phọ anyina, kụ oye ólho dị kạḅile ịitughian inyina.’” Ọmoogh-we phọ kụ mạḅem.