Read abua Izikiel 23 Bible Online

Izikiel 23 - abua bible

Izikiel 23

²Ọdi ạḅem mọ, “Oye dị kamugh ni, eniin amem ịyal abumarani ụrol li.

³Mem mọ bịdi oḍighi bọ risina kụ orugh sịphe Ijipt, bịdi uroph ni ẹnighe ạbidi kụ oḍighi bulhiom ẹmha.

⁴Okumoor phọ ughol mọ Ohola (ọdi ạmeera esi aSameria), kụ ọḅam mọ oghol mọ Oholiba (ọdi ạmeera esi aJeruselem). Mị aphin ịyal phọ ạbidi, kụ bịdi ụmaranaan ịmi nmụny.

⁵Ghạlamo ịduon ọdi aḍighi bọ ni ọlo ạmi, Ohola ạrolan ghan ni esi olhe ẹmha phọ kụ ạḍiḅeeraan ạruga ọdi dị ọḍua Asiria kụ oru emuza loor ọdi.

⁶Bịdi uḍighi we ẹgham dị ọkpologhian iḍiil, we eghuan rꞌabugbogh ạbuo ịtooghi; oomo phọ ạbidi uḍighi riiḅi ugheel ẹgham dị rọtol ghan ạnyu ạrusu kụ ee.

⁷Ọdi kụ ọyuga ọlo oomo phọ ạbuo ịtooghi Asiria, kụ ẹkaraph ẹephua ọdi erorori nyọdi ẹghi ọopu aloor ọdi esi ooseeny ghan ịkaaghineen ạrumugh Asiria.

⁸Ọdi aḍighi ạghiom risigh ịpe ọdi mamiigh bọ ịlo oliom ẹmha sịphe Ijipt, ẹpe ọdi aroph bọ ẹnighe phọ ọdi. Emiigh kꞌamem mọ ọdi aḍighi bọ ọnyani, alephiri ụmina ghan rꞌọdi kụ oḍighi nyọdi oliom ẹmha.

⁹Esi ịduon phọ mị ạḅogh nyọdi ạngo rụga ạbuo Asiria phọ ọdi, bụphe ọdi ạwa bọ iboom mọ.

¹⁰Bịdi ọkarion nyọdi ạrol ẹdaḅa, ọsighe nmụny rꞌạnmanyaan ọdi, kụ roḍighi pạ kụ oghiigh nyọdi rꞌelhool ẹgham. Tọrobo ekpisi ạnmariir ụghalaghian ghan ịlo memitenaan nyọdi.

¹¹“Ghạlamo ịdipho umarani phọ ọdi Oholiba ạmiin bọ ni ịphen phọ, ọdi eeph ghụn ạḅile ạbugh esi olhe ẹmha phọ apu ịpe Ohola ạrol bọ.

¹²Ọdi kẹn ẹkaraph ẹephua imuza loor ọdi ẹlo awe eghuan rꞌabugbogh ạbuo ịtooghi Asiria phọ — ạbuo ẹgham dị odi esi iinmenan dị ekpoghoronu — kụ ẹlo ạbuo ịtooghi phọ bụphe robe ghan bọ ạnyu ạrusu, oomo ạbuphe ariiḅi ugheel ạnmuny phọ.

¹³Mị ụmiin ni mọ ọdi amunughan esi olhe ẹmha, mọ umor ạnir-ephoph phọ ọpo amuneniom bọ ịyal phọ eeph kẹn ịdipho ọḅel phọ.

¹⁴“Ọdi aḍiiny ạḅile aḍiiny esi olhe ẹmha phọ ọdi. Ọdi ạmoogh ḍịḅeeraan esi igbudu ạbuo ịtooghi ạBabilon dị ọkaaghi ologhi iikpe phọ kụ ogbul ịtogh-tọgh dị esoor, rꞌipoḍi ịyegheyeghe arukpe dị ẹregh okitonom risin ạbidi rꞌịma ạrakaghaam ạnyu ạrumhu ạbidi.

¹⁵

¹⁶Ịduon ọdi ạmiin bọ bịdi, ạḍiḅeeraan emuza esi ọdi kụ arom rụukpaany ạghiom bịdi ẹpe Bạbilonia.

¹⁷Ạbuo ạBabilon phọ oru ọmoogh ipesi rꞌọdi. Bịdi ọrolan rꞌọdi kụ ọopu nyọdi ịdi ẹphughan dị ekureriom mọ ọdi ạmoogh ḍikia rꞌạbidi.

¹⁸Ọdi ạyegheron loor ọdi kụ ameera tọrobo oye alegheri mọ ọdi oliom ẹmha. Mị ạghagham rꞌọdi ịdipho mị mạrolom bọ umarani phọ ọdi.

¹⁹Ọdi aḍighi oliom ẹmha dị eekuna ílho, aḍighi ghan ọkaraghi ịdipho ọdi aḍighi ghan bọ mem mọ ọdi aḍighi bọ ọnyani kụ arugh sịphe Ijipt.

²⁰Umuzeḍiom nyọdi rꞌẹephua awe igbogh ipesi bụdi ọmoogh oomo igbogh ạruuphua ịnam adool rꞌilephiri ạrusu.”

²¹(Oholiba, nạ ụwa ọḅile oḅula olhe ẹmha phọ nạ ạmoogh bọ apum ịdipho ọnyani sịphe Ijipt, ẹpe alephiri opheghom bọ rꞌạramamaam ạna kụ nạ aroph bọ ẹnighe phọ ạna.)

²²“Nyịidipho, Oholiba, ịphen kụ ịpe mọ Ọmoogh-we dị ạmoogh oomo ịikpo rạḅeni bọ nyịna. Ạruga phọ ạbuphe mọpher nyịna kụ ọlo mị kạngo bịdi ọghagh ologhi esi ạna kụ ạsighe bịdi otu okitonom nyịna.

²³Mị kạsighe atu oomo ạbuo ạBabilon rꞌaKaldia phọ, lephiri dị ọḍua Pẹkod, Soa rꞌaKoa rꞌoomo ạbuo Asiria. Mị kaakpomoghi oomo ariiḅi ugheel phọ ạbuphe rꞌạbuo ịtooghi, oomo abugbogh ạbuo ịtooghi rꞌoomo ariphigh ugheel ẹgham mọ ạbuphe robe ghan bọ ạnyu ạrusu.

²⁴Bịdi kọḍua ẹpe ephunom mọ kụ otu ozuom nyịna, otumom ḍita arughuugh eghiil ude rꞌawe ẹgham. Okopha ịsuaram rꞌaroghoony ạmama, bịdi kokitonom nyịna. Mị kạḅogh nyịna ạlogh ḍịghaagh ạbidi, kụ bịdi osophonaan nyịna ọoruen esi iilogh ạbidi.

²⁵Loor esi dị mị rạghagham nyịna ologhi, mị kameera ni bịdi oḍighi nyịna esi ọghagh-ologhi phọ ạbidi. Bịdi kosoph ọsighe izon ạna rꞌareḅeri ạna kụ ọze nmụny ạna. Agey, bịdi kọsighe nmụny ạna rꞌạnmanyaan ạna kụ ọlogh nịan bịdi imoom.

²⁶Bịdi kọpanyi ọsighe iinmenan ạna kụ ọsighe ịbekulari ạna.

²⁷Mị kakureri ẹephua ạna rꞌạraraar isa phọ nạ maḍighi bọ emiigh kꞌamem mọ nạ ạrol bọ sịphe Ijipt. Nạ kápogh mun ịnon ịkaaghineen ạrumugh mꞌọḅile kẹn ọotughian ịlo Ijipt rꞌamem.”

²⁸Ịphen kụ ịdi Ọmoogh-we dị ạmoogh oomo ịikpo ạḅem: “Mị kạḅogh nyịna ạngo we dị nạ ạlogh ḍien ọḅile okia nyịna.

²⁹Kụ loor esi dị bịdi ọlogh bọ nyịna ḍien, bịdi kọsighe ọḍuanam tọrobo ịyaar dị nạ maḍighi ạmoogh, kụ ọwile nyịna rꞌẹdaḅa, ozughuron ịdipho oliom ẹmha. Ẹephua ạna rꞌole ẹmha phọ ạna

³⁰meruom nyịna ịphen phọ. Nạ uḍighi oliom ẹmha ọlo areelhe phọ kụ ạapuom loor ạna rꞌịkaaghineen ạrumugh ạbidi.

³¹Nạ ụdaphan ịgbaranuom aruwol umarani phọ ạna, kụ esi ịduon phọ mị kạngo nyịna ogina phọ ọphugholom ạghelhe phọ mọ pụghol.”

³²Ọmoogh-we dị ạmoogh oomo ịikpo ạḅem mọ, “Nạ kạpughol sịphe ọphugholom umarani phọ ạna; ọdi ạtegh ạḅile ạkel ude. Tọrobo oye kạmilogh kụ ạgilaam nyịna; ọphugholom mọ mamuza.

³³Ọdi kạngo nyịna mukum ologhi rꞌookula, ọphugholom oghiilaan rꞌamuphe, ọphugholom aSameria umarani ạna.

³⁴Nạ kạpughol kụ amooph ọdi ạkaraghar, kụ ịpherepe ipoḍi ọdi ẹpaar mạmaam ạna. “Mị Ọmoogh-we dị ạmoogh oomo ịikpo kụ mạḅem.”

³⁵Nyịidipho ịphen kụ ịpe Ọmoogh-we dị ạmoogh oomo ịikpo phọ rạkaaph bọ: “Loor esi dị nạ uwula bọ ịmi kụ akiton ụgumom ịmi ọman, nạ kạmiinom ni loor esi ẹephua phọ rꞌole ẹmha phọ ạna.”

³⁶Ọmoogh-we phọ ụḅeni ịmi mọ, “Oye dị kamugh ni, nạ aakolobian ni osophonaan ọoruen Ohola rꞌOholiba ḍụghum?” Gbạanaan bịdi ịlo ịkaraph ạraraar isa phọ bịdi moḍighi bọ.

³⁷Bịdi molhe ẹmha ọḅile ọko enu — olhe ẹmha rꞌịkaaghineen ạrumugh kụ ọko enu ạnmuny phọ bịdi ụmaranaan bọ ịmi. Bịdi ọpinyonom rịkia nmụny phọ ạmi ọngo ịkaaghineen ạrumugh ạbidi.

³⁸Kụ ịpe bịn kị́di bịdi oḍighi. Bịdi ụupu Otu Ịiḅereghi phọ kụ úuko ḍio ophooghian phọ ọpo mị mamitiom bọ.

³⁹Ọkaraghi aḍio phọ ạḍiphe bịdi ọze bọ nmụny phọ ạmi ọphinyonom rịkia ọngo ịkaaghineen ạrumugh phọ, bịdi uru sịphe Otu Ịiḅereghi phọ ạmi kụ ọopu nyọdi!

⁴⁰“Ẹgba-gbạ amem bịdi ụghiom ghan ni sidom ọmagh awe mọ ọḍua kꞌekpisi dị ẹkel iboom oru, kụ awe phọ oru. Ịyal abumarani phọ obura mụum ọḅile ọlogha iḍiil ariḍien aḅekeeny rꞌịbekulari.

⁴¹Bịdi ọrol ghan ạnyu ịma ạgada dị asoorom, kụ sịphe esomanan ạbidi, bịdi ọmoogh ịdaabili dị ozuom igey ạraraar, ọḅaram ịnsens phọ rꞌạmunum-ọliv phọ ọpo mị mạngo bọ bịdi.

⁴²Ọnaghan ni ẹḍogh aḍita ighiil awe dị ọḍua ẹpe ẹdala phọ oru. Bịdi ọlogh rạla sịphe ạraghaagh ạnmariir phọ rꞌịma aroghoony ọdaam ẹmha ạnyu ạrumhu ạbidi.

⁴³Kụ mị ạḅeni loor ạmi mọ bịdi roḍighinom ịdipho oliom ẹmha ạnir dị aloor medugh loor esi olhe ẹmha.

⁴⁴Bịdi ọḅile oḅula ọghi esi abulhiom ẹmha phọ ạbuen amem etum mem. Bịdi ọḅile oḅula ọghi esi Ohola rꞌOholiba, bulhiom ẹmha ạnmariir phọ ạbuphe.

⁴⁵Awe elhiom eḍighinom ịyaar kokel bịdi kụ osiph bịdi ologh olhe ẹmha rꞌọko enu, ịdi eḍighi bọ bịdi odi ghan ole ẹmha kụ ạraghaagh ạbidi ẹbiphigha rꞌịḅaal.”

⁴⁶Ịphen kụ ịdi Ọmoogh-we dị ạmoogh oomo ịikpo ạḅem: “Sịghe aru ḍita awe dị úsereghian ịlo ookperemi ạbidi rꞌomi ạbidi.

⁴⁷Meera aḍita awe phọ ụ́nighe bọ oroḅol bịdi ikpo kụ ozuom bịdi rꞌarolhool ẹgham, ọze nmụny ạbidi kụ ọsuughi ruutu ạbidi.

⁴⁸Sịphe oomo ade phọ mị kakunughi olhe ẹmha, ịdipho ọphur ạruru esi ạtorobo ạnir ịlo kále ẹmha ịdipho bịdi oḍighi ghan bọ.

⁴⁹Kụ ịyal anyina abumarani phọ — mị kịlhiom ni inyina loor esi olhe ẹmha phọ anyina rꞌịkaraph phọ anyina esi ooseeny ghan ịkaaghineen ạrumugh. Kụ nyina egbi olhegheri mọ mị kụ Ọmoogh-we dị ạmoogh oomo ịikpo phọ.”