Read abua Izikiel 26 Bible Online

Izikiel 26 - abua bible

Izikiel 26

¹Ḍịḅel aḍughul-otu ụnwanyu phọ, sịphe ạlha phọ ẹman bọ ḍioph rꞌaḍiniin esi ạdol iiruen phọ ayoor, Ọmoogh-we phọ ụḅaanaan ịmi.

²Ọdi ạḅem mọ, “Oye dị kamugh ni, ịphen kụ ịdi awe ẹmha phọ aTaya rọlooghiom rꞌọḅaal ologhi. Bịdi ọlo mọ ‘Mọowalalami Jeruselem! Ịikpo ọwaam ikpoki phọ ạbidi mephe! Ọdi iyira kúupikian mun.’

³“Nyịidipho, ịphen kụ ịdi mị Ọmoogh-we dị ạmoogh oomo ịikpo rạḅem: Mị kụ ạmulogh-ḍien ạna, ẹmha phọ aTaya. Mị kạḅeni ni ịbadi areelhe ozuom nyịna, kụ bịdi kotu mụdi oologh ogbogh ọphiiny.

⁴Bịdi kolereghi iikpe phọ okitonom bọ ẹmha phọ ạna kụ aḅomoghi iiphopha aruutu phọ. Kụ mị aḅeer ạsighe oomo ophugh kụ asugheeny oopho asighiigh.

⁵Ạbuo ạkoni ina kotere ịzuguru ạbidi ạnyu phọ, sịphe phọ ọdi ạmeera bọ ogbo ọphiiny phọ. Mị Ọmoogh-we dị ạmoogh oomo ịikpo kụ mạḅem. Areelhe phọ kebum rạraar phọ aTaya,

⁶kụ bịdi ọsighe rolhool ẹgham ọziom bụphe orugh bọ rạmha phọ ịsiphe ogbo ade phọ. Kụ aTaya agbi olegheri mọ mị kụ Ọmoogh-we phọ.”

⁷Ọmoogh-we dị ạmoogh oomo ịikpo ạḅem mọ, “Mị kạsighe atu ọkar ogbogh ọdaam dị apu oomo ạbudaam — Nẹbukadnezar ọdaam eelhe phọ ạBabilon — mọ azuom Taya. Ọdi kạḍua ẹpe ephunom mọ rꞌaḍiboom aḍita ạbuo ẹgham, rꞌạrusu rꞌarughuugh-ude rꞌawe dị kobiom.

⁸Kọze bụphe orugh bọ rạmha ogbo ade phọ mem dị robe elephiri phọ. Ạbumulogh-ḍien phọ koguphogh sikol rꞌaroḅol opukian asiloor kụ ọḅiir ọkparami iikpe ikikimaam inyina.

⁹Bịdi kọsighe rạḅam kụ ọozighiḍiom iikpe phọ anyina kụ ọgurogh ruutu ẹedaneen phọ anyina rꞌịidoony arukuron.

¹⁰Ọoru phọ ạrusu phọ kemitiom bọ kiikpereghiom ni inyina. Ạḍiaḅa erelhe ạrusu phọ reḍur bọ rạraar ariigida rꞌarughuugh-ude adool phọ kemenyon iikpe anyina mem dị bịdi rọteeny rụnhu-aḍibuo ẹmha phọ mophiemi bọ.

¹¹Awe phọ ạbidi rọtol ghan bọ ạnyu ạrusu phọ kụ ee ẹgham mọ koḍigh reten phọ rꞌẹgham kụ ọziom weye anyina rꞌarolhool ẹgham ạbidi. Iboom ịmeremiom asiḅidi phọ kolereghi ude.

¹²Ạbumulogh-ḍien anyina kọsighe ẹelha phọ anyina rꞌaruphua phọ anyina kụ obum. Bịdi kolereghi iikpe anyina kụ oogulemi ịma aruutu phọ anyina. Bịdi kotool oomo asighiigh rꞌireeny rꞌoomo iikpe phọ oḅomoghi bọ kụ osumughi ọphiiny.

¹³Mị kakunughi oomo ạsuor anyina, kụ mị akpomori ephegh ọne phọ anyina.

¹⁴Mị kasugheeny oopho asighiigh esi dị ạbukoniom ina kotere ghan ịzuguru ạbidi. Kótue mun ọḅile oselemi ẹmha phọ. Mị Ọmoogh-we dị ạmoogh oomo ịikpo mạḅem.”

¹⁵Ọmoogh-we dị ạmoogh oomo ịikpo ạwa ọḅeni ịduon ẹmha phọ aTaya: “Mem dị mọkpar ropu nyịna, awe phọ ạbuphe orugh bọ ọogaany otu-ḅualhe phọ kọmoogh ni oghiilaan ọnaghan ịlooghi ạbuphe rọkanyan bọ.

¹⁶Oomo ạbudaam areelhe ọphiiny phọ kosoroghu sịgada ạbidi. Bịdi kọkporonaan iguragura ạrusuoma ạbidi kụ ọsighenaan yogh ilooneen arukpe ạbidi kụ ọtologhu ude opiigha. Bịdi kokpereghaan ni iboom loor esi ịpe mimitenaan bọ inyina kụ kótue mun ọbile okpereghaan phọ.

¹⁷Bịdi kọmoor ḍụor phọ aḍien omoghinaan nyịna: “‘Ẹmha phọ aḍien phọ eeleghaan bọ mophiemi! Moboor rụnwunyaru phọ ạbidi ọsighe sịphe igbogh ạriphiiny phọ. Awe ẹmha phọ ẹphen kụ uphogh ghan rịphiiny phọ kụ oḍighi ghan eḍighinom aḍiigu esi ạbuphe orugh bọ ọogaany phọ.

¹⁸Nyịidipho, ḍio phọ ọdi ameel bọ, arere phọ ạmuum mọ akoom bọ repiigha, kụ awe phọ ạbidi okperenom ọmiin ọdo oogulemi phọ.’”

¹⁹Ọmoogh-we dị ạmoogh oomo ịikpo ạḅem mọ, “Mị kaagulemi nyịna ịdipho ẹmha dị mephe dị oye úlho. Mị kaakpereghiom nyịna mụum otu-ḅualhe phọ.

²⁰Mị kạsighe nyịna ạkiom ọmar iḍim, ạrolan rꞌawe phọ ọrol ghan bọ geedi phọ. Mị kaḍighi ịdi nạ kạtol aḅirini dị odi ude, esi dị ạraraar ị́nighe, kụ ọrolan rꞌawe dị momugh. Loor ịduon phọ rꞌoye kátugh mun kꞌạna ọbo ọsighe ạdol ạna de awe dị odi aḅirini.

²¹Mị kaḍighi nyịna eḍeenaan oghiilaan, kụ ẹpe kụ keḍighi ekureriom ạdol ạna. Awe kọwa ni nyịna, kụ nyịna kọ́miin.” Ọmoogh-we dị ạmoogh oomo ịikpo kụ mạḅem.