Read abua Izikiel 27 Bible Online

Izikiel 27 - abua bible

Izikiel 27

¹Ọmoogh-we phọ ụḅeni ịmi mọ,

²“Oye dị kamugh ni, mọor ḍụor omoghinaan aTaya,

³ẹmha phọ ẹpe phọ edi bọ ọogaany ọphiiny kụ remuulan ghan bọ ḍighi rꞌawe lọ orugh tọrobo ọgbal ọphiiny. Ḅẹni nyọdi ịphen Ọmoogh-we dị ạmoogh oomo ịikpo phọ rạḅem bọ: “Taya, nạ uubaga ịlo ẹser-sẹr ẹnighe ạna,

⁴Amarugh ạna pọ ọphiiny. Awe phọ ọlogh bọ nyịna ụghighemi ịma ụnwunyaru;

⁵Bịdi ụsighe ịma ireeny ẹpe Eegum ạHermon kụ odoghoḍiom kụ inmom-nmom ọsaga ạLebanon kụ ẹdi ọmeremiom ghan ạgalaga.

⁶Bịdi ọsighe sịogh ẹpe Bạsan kụ ọkaam ịlom; bịdi ụdiom ude ụnwunyaru phọ ireeny dị ọsighe ẹpe Sạipros kụ okpiom oḍu ọoma

⁷Rukpe arughuugh ịzoghi phọ uḍighinom ọnemeneme ukpe, ịnemeneme arukpe dị olho dị ọsighe ẹpe Ijipt, dị kꞌẹekela bịn kọlogh ni elegh. Rukpe ookpereghiom ạraraar uḍighinom ọkar ịma ukpe ozu oghozo dị ạḍua ekpu-ogbo phọ ạSaipros.

⁸Awe ịzoghi phọ ạna ạbuo ạramha aSaidon rꞌAvad. Awe ẹmaar ạna ạbuo ịzoghi phọ.

⁹Bụo ạmaka ụnwunyaru phọ awe ạbuo ạBiblos dị ọkar ọtughemi. Bụo ịzoghi dị ọḍua tọrobo ụnwunyaru dị odi ghan ọphiiny omuul ḍighi ologhi aruutu aḍighi ạna.

¹⁰“Awe ẹgham bụo aPasia, Lịdia rꞌạLibia ụrolan rꞌaḍita ẹgham ạna. Bịdi ukereri ịsuaram ạbidi rꞌaroghoony ạbidi esi ạdol phọ ạna. Bịdi kụ awe phọ oruomaan bọ nyịna ḍien igbogh phọ.

¹¹Awe ẹgham ạbuo Avad kụ uphogh ghan iikpe ạna, kụ awe ạbuo aGamad ophogh ghan iiphopha aruutu phọ ạna. Bịdi ukereri ịsuaram ạbidi loor iikpe ạna. Bịdi kụ awe phọ oḍighi bọ ịdi nạ ạnighe.

¹²“Nạ umuul ghan ḍighi ẹpe Spen kụ ạsighe silva, okuron, ạmama, rꞌạleezu kụ ạkpiom ịbalabala aruphua.

¹³Nạ umuul ḍighi ẹpe Gris, Tubal rꞌạMesek kụ aanmenenom rạraar ạna rẹbene rꞌạraraar enaba.

¹⁴Nạ uunmenenom rạraar ạna rụsu oḍurom adool, ạrusu ọghimom ẹgham, rꞌịnam adool dị ẹḍua ẹpe Bẹt Togama kụ eru.

¹⁵Awe ẹpe Rods umuulan ḍighi rꞌạna; awe ịigaany ạriphiiny ụngo nyịna oḍu-ạruuma rꞌiḍiil ireeny oonmenenom aruphua ạna.

¹⁶Awe ạSiria ugho rạraar aḍighi ạna rꞌịbadi aruphua ạna. Bịdi ụngo ẹmerald, rukpe ozu oghozo, ilooneen arukpe, ogey ọnemeneme ukpe, ibi rꞌịtogh-tọgh ạraraar ọkpiom aruphua ạna.

¹⁷AJuda rꞌỊzirel ụkpiom ruphua ạna ẹnuum aḍiowo, mụnum-ọliv rꞌạraraar ọdughemiom ịisa.

¹⁸Awe ạDamaskos ugho ruphua ạna kụ ọkpiom miim dị ọsighe Hẹlbon rꞌawul dị ạḍua Sahar. Bịdi ugho ruphua ạna kụ ọkpiom rukuron rꞌạraraar eḍu ịisa.

²⁰Awe aDedan ugho ruphua ạna kụ ọkpiom rukpe ọde ọrolom.

²¹Awe Arebia rꞌawe dị ọda de aKedar ụkpiom ruphua ạna nmụny iyool-ịga rꞌiyool-ịga rꞌạrutu-ịga.

²²Ruphua ạna, abumuul ḍighi ẹpe Siba rꞌaRaama uunmenenom ikpo ẹbe rꞌagol rꞌịma ạraraar eḍu ịisa.

²³Ạramha phọ ạHaran, Kane rꞌIden, abumuul ḍighi aSiba, ạramha Ashur rꞌaKilmad — oomo ạbidi umuulan ghan ḍighi rꞌạna.

²⁴Bịdi aalha nyịna rukpe dị ẹnighe iboom, rukpe ozu oghozo rꞌịdi olooghi, reetere ọde ude dị ẹnighe, rꞌiḍigh dị ọmaar ọphur.

²⁵Ruphua ạna ụsaanyom ghan ḍita igbogh ạrunwunyaru. “Nạ ụghigh oghuugh ephua dị odi ạnyu ạmuum ọphiiny dị ạsaany ḍiboom adool.

²⁶Mem dị awe ịlom mọ ạna ọsighe nyịna omitiom ẹpe ọphiiny, ookuugh emitenom erumuḍio aḅiemi nyịna ogbo ọphiiny.

²⁷Oomo ẹelha aruphua ạna, oomo ạbuo ịzoghi phọ odianan bọ ḍita phọ, ạbuo ạmaka ịsiphe ụnwunyaru phọ rꞌabumuul ḍighi ạna, tọrobo oye ẹgham lọ odi ụnwunyaru phọ — oomo, oomo awe uphe ụmuum mem dị ụnwunyaru phọ ạna aḅi.

²⁸Ịlooghi awe ịzoghi phọ roḅiighi bọ imenyon oogbom ọphiiny phọ.

²⁹“Tọrobo ụnwunyaru, awe phọ mọḍuaghu kụ tọrobo oye sịphe phọ apun ạnyu.

³⁰Oomo ạbidi romoghinaan nyịna iboom, rookuom ophugh ẹmhu kụ kookila ude loor ọoru.

³¹Bịdi ọtuan nyịna okula rụmhu kụ oonmenan rukpe-ọto. Iloghi ạbidi ị́ḅaal kụ romoghi.

³²Bịdi ọmooraan nyịna ḍụor amaḍi; ‘Ạnhian kụ ẹdi kọtomaam Taya, Taya ẹmha phọ mokpomori bọ ẹpe ude ọphiiny?

³³Mem mọ ọsaany ghan bọ ruphua ạna ọghi ẹmha ẹḅeenyom ạriphiiny, nạ uḍighi ịiḅaghami ạngo tọrobo eelhe. Ạbudaam uḍighi we ikpoki esi ẹelha aruphua phọ ạna.

³⁴Nyịidipho nạ maḅi ọphiiny, nạ maḅi kꞌude ạmuum otu-ḅualhe phọ. Aruphua phọ ạna rꞌoomo ạbuphe roḍighinaan bọ nyịna mophe rꞌạna ẹpe ọphiiny phọ.’

³⁵“Oomo ạbuphe orugh bọ ọogaany ọphiiny phọ rookia ọmiin ịpe emite bọ. Ghạlamo rꞌạbudaam mọ bịn rokiilaan ni, ḅịle aḍiigu kụ ẹdi ọge sighisigh ạbidi.

³⁶Nạ maten, aten kꞌagee-pọ, kụ abumuul ḍighi oomo aḅirini phọ ọmoogh oghiilaan, oghiilaan mọ kẹtolom aani bịdi iniin phọ ịne.”