Read abua Izikiel 28 Bible Online

Izikiel 28 - abua bible

Izikiel 28

¹Ọmoogh-we phọ ụḅaanaan ịmi.

²Ọdi ụḅeni ịmi mọ, “Oye dị kamugh ni, ḅẹni ọdaam mọ ạda bọ Taya ịphen mị Ọmoogh-we dị ạmoogh oomo ịikpo phọ rạḅeni bọ nyọdi: ophoophe aloor phọ ạna ạphughan bọ, nạ ạḅem mọ nạ ẹmugh, nạ ạtomaam loor ẹmugh kụ ạḅem mọ nạ ạtolom ạgada igbogh dị ạriphiiny ekoom. Nạ rakue ni. Nạ iphulupul rꞌịḅaal, kẸ́naan.

³Nạ agbi mọ nạ ạmoogh ologhi apu Dạniel, dị kótue ọbooghinaan nyịna ịyaar.

⁴Ologhi ạna rꞌẹmaar ạna kụ ịngo nyịna ẹelha agol rꞌasilva.

⁵Nạ umuul ḍighi olegheri ịyaar kụ ạrol ghan ọmoogh ạsuo. Pọ eeghe ịdi nạ raabagaam ẹelha ạna!

⁶“Nyịidipho, ịphen kụ ịdi mị Ọmoogh-we dị ạmoogh oomo ịikpo rạḅem: Loor esi dị nạ agbi bọ mọ nạ ạmoogh ologhi ịdipho ẹmugh,

⁷mị katom bụmulogh-ḍien dị ọnma ighirigiir ụ́moogh azuom nyịna. Bịdi kopiemi oomo igey ạraraar phọ nạ ạsighe bọ ologhi rꞌẹmaar kụ ạmooghom.

⁸Bịdi koghiigh nyịna kụ ọsighe nyịna ọkimom oḍi de ạmuum.

⁹Mem dị bịdi oru oghiigh ạna, nạ kạḅeni bịdi mọ nạ ẹmugh ḍụghum? Mem dị nạ azuan bụphe koghiigh bọ nyịna, nạ kạtolom iphulupul rꞌịḅaal kẸ́naan.

¹⁰Nạ kamugh ḍuugh aghoogh esi ạraghaagh aruuruen. Mị Ọmoogh-we dị ạmoogh oomo ịikpo kụ mạto ạngo.”

¹¹Ọmoogh-we phọ ạḅile ni ụḅaanaan ịmi.

¹²Ọdi ạḅem, “Oye dị kamugh ni, mọogh ọto esi ịpe kemeelom bọ ọdaam mọ aTaya. Ḅẹni nyọdi ịpe mị Ọmoogh-we dị ạmoogh oomo ịikpo rạḅem bọ: Amem ịrol li dị nạ uḍighi eḍeenaan ịdi eseleman. Pọ eeghe ologhi rꞌẹnighe ạna!

¹³Nạ ụrol ẹpe Iden, oghoony ịizupha phọ Ẹnaan, kụ ạloghoḍian tọrobo ọdo ịma ạraraar: ạrubi, ạdayamon; ạtopas, ạberil, rꞌakalenia, rꞌạjaspa; ạsafair, ẹmerald rꞌạtukuos. Nạ ụmoogh rạraar iḅo dị eḍighi gol. Uḍighinaan nyịna ḍio phọ ọlhem bọ nyịna.

¹⁴Mị aseere ọokpaany kꞌạke dị ạmoogh eegu sịphe okori ghan ạna. Nạ ụrol ạnyu ẹeḅaraph iigbia ạmi kụ arelhe ghan sịphe ogbo ịnmananmana ikpo ẹbe.

¹⁵Ẹeghara ạna iseleman ni emiigh kꞌamem mọ ọlhem bọ nyịna tụtu nạ amiigh oḍighi ịkaraph.

¹⁶Oomo amem nạ ugho ghan ạḅile aal, kụ ịphen kụ inyu nyịna ẹlhogh asighiton rꞌạsipioghom. Kụ mị ạkpaariom nyịna ọḍua ẹeḅaraph iigbia phọ ạmi, kụ ọokpaany kꞌạke phọ aphogh ghan bọ nyịna aphorogh nyịna ạsighe sịphe ịnmananmana ikpo ẹbe phọ.

¹⁷Nạ uubaga oḍighi oye dị ạnighe, kụ ooleghaan aḍien phọ ạna aḍighi ịdi nạ aḍighi ghan ịlo uwelologhi. Loor ịduon phọ kụ mị aḍur nyịna aseere ude kụ ạwile nyịna ọphurom ạruru bụnon ạbudaam.

¹⁸Nạ uḍighi ghan ịkaraph esi ikooghi phọ rꞌibool phọ ạna dị tụtu ariisi ịiḅereghi phọ ạna ẹphuughi. Kụ mị ạsu nịan ẹmha phọ kụ ele kꞌude. Oomo ạbulo rophogh nyịna nyịidipho ọmiin dị moogulemi otene ọoru.

¹⁹Nạ mạḍua, ạḍua kꞌagee-pọ, kụ oomo areelhe dị oru olegheri ạna ọmoogh oghiilaan, oghiilaan mọ kẹtolom aani bụno iniin phọ ịne.”

²⁰Ọmoogh-we phọ ụḅeni ịmi,

²¹“Oye dị kamugh ni, ḅạaghiom ẹmha phọ aSaidon.

²²Ḅẹni we phọ odi bọ ẹpe mọ mị Ọmoogh-we dị ạmoogh oomo ịikpo ạḅem mọ ịlo ạbidi: Mị kụ ạmulogh-ḍien ạna Saidon; awe kuboom ịmi esi ịdi mị aḍighi nyịna. Bịdi kolegheri mọ mị kụ Ọmoogh-we phọ, mem dị mị aḍeenaan dọl aruukuan ạmi esi ọliom ạbuphe odi bọ kꞌạna.

²³Mị karuom nyịna rẹezegh kụ aḍighi ịdi ịḅaal kekilogh reten ạna. Kozuom nyịna tọrobo ọogaany, ḅịle kọze ni we phọ ạna. Kụ nạ agbi olegheri mọ mị kụ Ọmoogh-we phọ.”

²⁴Ọmoogh-we phọ ạḅem, “Oomo areelhe phọ ekoom bọ kụ ephogh ghan bọ Ịzirel ẹḅitonaan kéḍighi mun iiḅurom rꞌikpakara ireeny dị kẹngo Ịzirel ịiḅaghami. Kụ bịdi olegheri mọ mị kụ Ọmoogh-we dị ạmoogh oomo ịikpo.”

²⁵Ọmoogh-we dị ạmoogh oomo ịikpo ạḅem mọ, “Mị kạsighe we phọ Ịzirel ạḍuanam reelhe phọ mị ạwalalami bọ bịdi aḅulemi, kụ oomo areelhe olegheri mọ mị oye aruukuan. Awe phọ Ịzirel kotugh de ạbidi, de phọ mị ạngo bọ Jẹkob otelhedom mọ ạmi.

²⁶Bịdi kọtol sịphe rꞌẹepho. Bịdi kodoghoḍi ruutu kụ ọzuphogh iizo iimuma avain. Mị kạliom oomo amatuman ạbidi lọ ophogh ghan bịdi ọḅitonaan, kụ Ịzirel ịyaar kẹ́ḅogh. Kụ bịdi ogbi olegheri mọ mị kụ Ọmoogh-we Ẹnaan phọ ạbidi.”