Read abua Izikiel 29 Bible Online

Izikiel 29 - abua bible

Izikiel 29

¹Omuneniom aḍioph rꞌịyal aḍio omuneniom aḍioph ụnwanyu esi ạlha dị emuneniom ḍioph sịphe ạdol iiruen phọ ayoor, Ọmoogh-we phọ ụḅaanaan ịmi.

²Ọdi ạḅem, “Oye dị kamugh ni, ḅạaghiom ọdaam mọ Ijipt. Ḅẹni nyọdi ịdi kọliom nyọdi rꞌoomo ade phọ Ijipt.

³Ḅẹni mọ ịphen kụ ịdi Ọmoogh-we dị ạmoogh oomo ịikpo rạḅeni ọdaam mọ Ijipt: Mị kụ ạmulogh-ḍien ạna, nạ egbogh eghol, dị ẹmina ọphiiny. Nạ ụḅem mọ aNail phọ ọlo ạna kụ mọ nạ kụ ụlhem.

⁴Mị kạkom ḍiḅaph okpo ạna kụ mị aḍighi ịdi ena ịsiphe ọphiiny phọ ạna kelom nyịna ẹkpaariom. Kụ mị aḍur nyịna apune sịphe aNail phọ rꞌoomo ina phọ ẹḅaraghan bọ rꞌạna.

⁵Mị karoph nyịna rꞌoomo ina phọ ạḅam ạnyu ade ịisaar phọ. Aḍizu phọ ạna kẹtol sịphe ude phọ kụ kóḍi. Mị kạngo ịnun rꞌịnam mọ eḍighi eḍien ạbidi.

⁶Kụ oomo awe phọ Ijipt ogbi olegheri mọ mị kụ Ọmoogh-we phọ.” Ọmoogh-we phọ ạḅem mọ, “Awe Ịzirel phọ iḍuom ni ologhi inyina awe Ijipt ọloghonaan ạbidi ạḍighaagh, kụ ọlo nyina ị́nighe ípu oreeny dị adugh.

⁷Mem dị bịdi ịbedenom inyina, nyina ewunaan, egim ịipaaph ạbidi kụ ẹphurughi rạman ạbidi.

⁸Nyịidipho mị Ọmoogh-we dị ạmoogh oomo ịikpo rịḅeni ghan inyina mọ mị katom ni we dị kizuom inyina rꞌarolhool ẹgham kụ bịdi kịze inyina ḅịle rꞌịnam anyina.

⁹Ijipt keten oopho ade. Kụ nyina elegheri mọ mị kụ Ọmoogh-we phọ. “Loor esi dị nạ ạḅem bọ mọ aNail phọ ọlo ạna kụ mọ nạ kụ ụlhem,

¹⁰mị kụ ạmulogh-ḍien ạna rꞌạmulogh-ḍien aNail phọ ạna. Mị katene oomo Ijipt oopho ade, emiigh ẹmha aMigdol ẹpe ephunom mọ kụ ẹteeny Ạsuan ẹpe esoorom mọ, oomo ẹpe ẹḍua bọ ẹteeny ọku ạSudan.

¹¹Oye rꞌẹnam dị katelhe ạḅeeny ólho. Esi inyadi ạsia rꞌịyaar kẹ́tol mun sịphe.

¹²Mị katene Ijipt ẹkar ẹmha dị rꞌịyaar kẹ́tol sịen aḅirini phọ. Esi inyadi ạsia ạramha phọ Ijipt keegulaan ni, keegulaan epu ịlo ẹrol ẹnon ẹmha. Mị kaḍighi we Ijipt ọkiighi ịnon ạramha kụ ọtologhu. Bịdi kosumughu ọki tọrobo ẹmha bịn ọtol aani rꞌịnon areelhe.”

¹³Ọmoogh-we dị ạmoogh oomo ịikpo ạḅem, “Inyadi ạsia reten kụ mị ạsighe we phọ Ijipt ạḍuanam reelhe phọ mị ạwalalami bọ bịdi aḅulemi,

¹⁴kụ mị aḍighi ịdi bịdi kọtol ạga Ijipt phọ esoorom bọ, ọkar ạmuḅel amarugh phọ ạbidi. Sịphe phọ bịdi koḍighi ọmar dị adugh,

¹⁵ọmar dị ạkar adugh sịphe oomo phọ ịne, kụ bịdi kọ́da mun ịnon areelhe. Mị kasooromi bịdi ịdi bịdi kótue mun oḍighi ịdi ẹnon eelhe kẹnaghanan bịdi.

¹⁶Ịzirel kótue mun ọbedenom bịdi ọloghonaan ạḍighaagh. Ạdol Ijipt kẹkiom ologhi Ịzirel ịdi eeph ọbedenom ạbidi. Kụ Ịzirel ogbi olegheri mọ mị kụ Ọmoogh-we dị ạmoogh oomo ịikpo.”

¹⁷Ḍịḅel aḍio ọḅel ụnwanyu phọ, esi ạlha dị emuneniom ịyaldi rꞌoḍual sịphe ạdol iiruen phọ ayoor, Ọmoogh-we phọ ụḅaanaan ịmi.

¹⁸Ọdi ạḅem mọ, “Oye dị kamugh ni, ạNebukadnezar ogbogh ọdaam mọ ạBabilon azuom ni Taya. Ọdi aḍighi ịdi awe ẹgham ọdi orool dool dị ẹemor iboom kụ ạrumhu ẹḅaal kụ ạrupha ephinogh, kụ ọdaam mọ ọ́moogh ịyaar ḅịle awe ẹgham mọ ụ́moogh ịyaar sịphe oomo ịiḅaghami phọ ạbidi.

¹⁹Kụ nyịidipho, ịphen kụ ịdi mị Ọmoogh-we dị ạmoogh oomo ịikpo rạḅem ghan: mị rạḅogh de phọ Ijipt kạlogh ḍịghaagh ạNebukadnezar ogbogh ọdaam mọ, ọdi ami, ạḅile awum ạḍuanam oomo aruphua phọ Ijipt ịdi kẹmeera esi ikpoki dị ọkpe we ẹgham mọ.

²⁰Mị ạḅogh Ijipt rạngo nyọdi esi ịikpia dị rọkpe nyọdi loor esi dị awe ẹgham ọdi uḍighinaan ghan ịmi oḍighi. Mị Ọmoogh-we dị ạmoogh oomo ịikpo kụ mạḅem.

²¹“Mem dị ịpe emite, mị kạngo ịnyaam we Ịzirel, kụ aḍighi ịdi nạ Izikiel kạkaaph ọghaaph amitiom, esi dị tọrobo oye kạnaghan ịlo nạ ạghaaph ẹrol dị bịdi olegheri mọ mị kụ Ọmoogh-we phọ.”