Read abua Izikiel 33 Bible Online

Izikiel 33 - abua bible

Izikiel 33

¹Ọmoogh-we phọ ụḅaanaan ịmi.

²Ọdi ạḅem mọ, “Oye dị kamugh ni, ḅẹni weye phọ ạna ịdi remite ghan mem lọ mị aseere ẹgham de. Awe eelhe phọ ẹpe ụsaḅar oniin ọnyo ạbidi oḍighi oye aḍikori.

³Mem dị ọdi ạmiin bụmulogh-ḍien dị rọobeeph, ọdi aphula ọkuodu ọphur ạruru tọrobo oye.

⁴Eḍighi ịyaar dị oye ạnaghan kụ ụ́sighe mọ ịyaar kụ ạbumulogh-ḍien phọ oru kụ oghiigh nyọdi, pọ ọdi kụ ẹdi kọkpalham esi aḍuugh phọ ọdi.

⁵Aḍuugh ọdi ẹḍua loor ọpioman ọdi, loor esi dị ọdi ọ́naghanan mem mọ ọphur bọ nyọdi rụru phọ. Mụghumo ọdi ạnaghanan ni, ọdi mukpetenaan ni.

⁶Kụ, ịlo eḍighi eḍighi, oye aḍikori ạmiin bụmulogh-ḍien phọ dị rotu kụ óphula ọkuodu phọ, ạbumulogh-ḍien phọ kotu kụ ọze buḍighinom ịkaraph phọ ạbuphe, kụ ọlo mị kạḅam ni ẹmhu oye aḍikori phọ ḍuugh awe phọ.

⁷“Nyịidipho, Oye dị kamugh ni, mị rạma nyịna oye aḍikori ọlo eelhe phọ Ịzirel. Nạ ạmoogh ọngo ạbidi ọphur ạruru phọ mị ạngo bọ nyịna.

⁸Eḍighi mạar dị mị ạghaaph aaleghemi mọ ọkaraph oye kamugh, kụ nạ nyọdi ọ́phur rụru onmia areten phọ ọdi ọbo ọdi ạphel ghuḍum ọdi, ọdi kamughom ni ịkaraph, kụ mị kạḅam ni ẹmhu ạna ḍuugh phọ ọdi.

⁹Eḍighi ịyaar dị nạ ạphur rụru ọkaraph oye kụ ọdi ọ́wile oḍighi ghan ịkaraph, ọdi kamughom ni ịkaraph, kụ ghuḍum ạna kọpel li.”

¹⁰Ọmoogh-we phọ ụḅaanaan ịmi. Ọdi ạḅem mọ, “Oye dị kamugh ni, ḅịle ạḅeni weye phọ Ịzirel ịphen bịdi rọkaaph bọ: ‘Ọḅam rụmhu ayira sịpioghom mọ rꞌịkaraph phọ yira moḍighi bọ. Yira rope. Yira kọtol bọ ika?’

¹¹Ḅẹni bịdi mọ agey ni ịduon mị Ọmoogh-we dị ạmoogh oomo ịikpo aru bọ Ẹnaan dị edi ghan, ịmi ị́ḅeeraan ọmiin mọ oḍighinom ịkaraph amugh. Kịḅeeraan ghụn ịmi ọmiin mọ ọdi ạbile oḍighi ghan ịkaraph phọ kụ ạtol. Weye Ịzirel, ịbile ịkaraph phọ nyina reḍighi ghan bọ. Eeghe kụ nyina rẹwa bọ omugh phọ?

¹²“Nyịidipho, Oye dị kamugh ni, ḅẹni weye phọ Ịzirel mọ mem dị ogey oye aḍighi ịkaraph, igey phọ ọdi aḍighi bọ képel nyọdi. Eḍighi ịyaar dị oye ạsipioghom kụ ạwile sịpioghom mọ, kọ́liom nyọdi, kụ eḍighi ịyaar dị ogey oye amiigh oḍighi ịkaraph, kọ́sar ghuḍum ọdi ọ́bilenaan.

¹³Mị katue ni aguanaan ghuḍum ogey oye kụ ọlo ọdi amiigh ọotughian mọ iiḅi phọ ọno maḍighi ghan bọ mẹkasian ni kụ ạḅile amiigh oḍighi ghan ịkaraph, mị kạ́atughian tọrobo iiḅi phọ ọdi maḍighi ghan bọ. Ọdi kamugh ni loor ịkaraph phọ ọdi.

¹⁴Mị katue ni ạpur rụru oye ạsipioghom mọ ọdi kamugh, kụ ọdi ạwile oḍighi ịkaraph kụ aḍighi ịdi eḍighi elhiom kụ ẹnighe —

¹⁵esi ọtomaam, eḍighi ịyaar dị ọdi aḅulemi tọrobo ịyaar lọ ọphaghan nyọdi kụ oliom ọmugh, ḅịle kẹn aḅulemi ịyaar lọ ọdi ami — eḍighi ịyaar lọ ọdi ạwile oḍighi ịkaraph kụ ạdaph iilogh dị ẹngo ghuḍum, ọdi kámugh, kụ ọlo kạtol li.

¹⁶Mị kạsar ạbilenaan ịkaraph phọ ọdi maḍighi bọ kụ ọdi ạtol loor esi dị ọdi maḍighi ịdi eḍighi elhiom kụ ẹnighe.

¹⁷“Kụ awe anyina rọḅem ghan mọ ịpe mị aḍighi bọ kéliom! Eeye, areten ạbidi kụ ịdi íḍighi elhiom.

¹⁸Mem dị oye aruukuan ạwile oḍighi iiḅi kụ ạḅile raḍighi ịkaraph, ọdi kamugh ni loor ịkaraph phọ.

¹⁹Mem dị oye ẹkaraph eḍighinom ạwileghi kụ aḍighi ịdi eḍighi elhiom kụ ẹnighe, ọdi mạphel ghuḍum ọdi.

²⁰Kụ ọlo nyina ạbuo Ịzirel ịḅem mọ ịpe mị aḍighi bọ kéliom. Mị kasoph ooruen ịngo inyina ạdaphan ịpe nyina eḍighi bọ.”

²¹Omuneniom oogh aḍio phọ omuneniom aḍioph ụnwanyu esi ạlha dị emuneniom ḍioph rꞌịyal sịphe ạdol iiruen phọ ayoor, oye dị asuma ẹpe Jeruselem aru kụ ụḅeni ịmi mọ ẹmha phọ memeel.

²²Dulhe dị eten kụ ọdi aru bọ, mị uloghoma ịdi ịnyaam Ọmoogh-we phọ eru esi ạmi. Mem mọ oye phọ aru bọ asi ḍịeri phọ ạḍiroor phọ, Ọmoogh-we phọ aḅulemi ụngo ịmi ịnyaam ọghaaphom.

²³Ọmoogh-we phọ ụḅaanaan ịmi.

²⁴Ọdi ạḅem mọ, “Oye dị kamugh ni, awe phọ ạbuphe orughogh bọ rạmha phọ mepheeghu bọ de phọ Ịzirel rọḅem ghan: ‘Ebraham aḍighi oniin oye kụ ọngo nyọdi oomo ade phọ. Ịbadi ayira kụ usugha, kụ nyịidipho ade phọ ạḍio ayira.’

²⁵“Ḅẹni bịdi ịpe mị Ọmoogh-we dị ạmoogh oomo ịikpo phọ rạḅem bọ: nyina ạa ephulupul ẹnam rꞌịḅaal dị edimom. Nyina eeseeny ịkaaghineen ạrumugh. Nyina ẹko enu. Eeghe kụ iḍighi bọ kụ nyina ẹetughian bọ mọ ade phọ ạḍio anyina?

²⁶Nyina eḍuom ologhi rolhool ẹgham anyina. Ạraraar isa phọ anyina ekia weye. Tọrobo oye rale ghan ẹmha. Eeghe kụ iḍighi bọ kụ nyina ẹetughian bọ mọ ade phọ ạḍio anyina?

²⁷“Ḅẹni bịdi mọ mị Ọmoogh-we dị ạmoogh oomo ịikpo ạpur bịdi rụru mọ agey ni ịduon mị aru bọ Ẹnaan dị edi ghan, we phọ ạbuphe orughogh bọ rạmha phọ mepheeghu bọ kọze ni. Bụphe orughogh bọ riiḅila ariikpisi phọ ilhom ịnam kụ kẹba. Bụphe ạaghian bọ ạnyu ạraaḅaraph phọ rꞌaropogh aruugum mọ komughom rꞌạreezegh.

²⁸Mị katene eelhe phọ de dị ịyaar ílho, kụ ịikpo phọ bịdi roobagaam ghan bọ kekunughian. Ạraaḅaraph phọ Ịzirel kebeeph iboom dị rꞌoye kátelhe ạ́ḅeeny.

²⁹Mem dị mị ạliom we phọ esi ịkaraph phọ ạbidi kụ atene eelhe phọ de dị rꞌịyaar ílho, kụ bịdi ogbi olegheri mọ mị kụ Ọmoogh-we phọ.”

³⁰Ọmoogh-we phọ ạḅem mọ, “Oye dị kamugh ni, awe phọ ạna rọkaaph ghan ịlo ạna mem dị bịdi oozuanan ọogaany iikpe ẹmha phọ ḅịle rꞌạrunhu-aḍibuo aruutu ạbidi. Oniin rạḅeni ghan nyoniin mọ, ‘Iḍighi pạ ọghi ọnaghan ekpo ọnhu lọ ẹḍua esi Ọmoogh-we phọ eru nyịidipho.’

³¹Esi ịduon phọ ịbadi awe ookpomoghan ọnaghan ịlo nạ kạkaaph, kụ ọlo bịdi róḍighi ịlo nạ ạḅeni bịdi oḍighi. Ikpo ọnhu ẹphomoghian edi ịidoronhu ạbidi, kụ ọlo bịdi omeeraam dị bịdi bịn kụ kole ẹper.

³²Esi ạbidi nạ kẹ́non ịyaar dị epel ọmoor-sụor dị rạmoor, sụor ẹphomoghian ạḅile rapeghom ọne. Bịdi rọnaghan ghan oomo ikpo ọnhu ạna kụ rọ́daphan koḍighi rꞌeniin.

³³Kụ mem dị oomo ikpo ọnhu phọ ạna ẹtuugh emite — kụ bịdi olegheri mọ oyil ạrol li ogbo ạbidi.”