Read abua Izikiel 36 Bible Online

Izikiel 36 - abua bible

Izikiel 36

¹Ọmoogh-we phọ ạḅem mọ, “Oye dị kamugh ni, ḅạanaan rạaḅaraph phọ Ịzirel kụ ạḅeni bịdi mọ ọnaghan dom mọ mị

²Ọmoogh-we dị ạmoogh oomo ịikpo ạmooghaan bọ bịdi: ạbumulogh-ḍien phọ Ịzirel ụnmoghoghoom kụ ọḅem, ‘Nyịidipho aroogbolom ageedi phọ ịpe ịlo ayoor!’

³“Mịinaan kụ ạghaaph aaleghemi ịphen mị Ọmoogh-we dị ạmoogh oomo ịikpo rạkaaph bọ. Mem dị areelhe phọ etuman bọ osiph ọḅile owum rạraar ạraaḅaraph phọ Ịzirel, oomo ạbidi ụgilaam Ịzirel.

⁴Kụ nyịidipho iler rụru ịphen mị Ọmoogh-we dị ạmoogh oomo ịikpo ịḅeni bọ inyina ạraaḅaraph phọ rꞌaroogbolom mọ, nyina asikol rꞌariḍiiny, nyina ariisi lọ ophiemi, rꞌanyina ạramha lọ ọwile ọḍuaghu kụ owum rạraar kụ oomo areelhe phọ ekoom bọ ẹnmoghoghoom.

⁵“Mị Ọmoogh-we dị ạmoogh oomo ịikpo mạghaaph amitiom rꞌophin ologhi ạmi esi areelhe phọ ekoom bọ, kụ ẹkar ẹkpaariom Idom. Esi iboh rꞌịgilaam, bịdi ee ọsighe de phọ ạmi kụ ọmooghom rọogho phọ.

⁶“Loor ịphen phọ, mịinaan de phọ Ịzirel; ḅẹni rạaḅaraph phọ, rogboolom mọ, sikol phọ rꞌariḍiiny phọ ịphen mị Ọkar Ogbogh Ọmoogh-we phọ rạḅem bọ rꞌophin ologhi igbeghian loor esi ịdipho areelhe phọ mọgilaam bọ ọḅile oḍighi ịlo osooromiom ạbidi.

⁷Mị Ọmoogh-we dị ạmoogh oomo ịikpo akunya mọ kopogh ni osooromi reelhe phọ ekoom bọ.

⁸Kụ ọlo ạnyu ạraaḅaraph phọ Ịzirel ireeny phọ kẹḅile ẹmoogh rịnya kụ imuumaan iimuma inyina awe phọ ạmi Ịzirel. Nyina ketigheel li ẹmha mem dị kébia.

⁹Mị idianaan ni inyina kụ mị kaḍighi ni ịdi kọḅile oḅeph de phọ anyina kụ ọḅile ọzuph ịizupha sịphe.

¹⁰Mị kaḍighi ịdi aḍita anyina kẹbugh. Nyina ketugh sịphe ạramha phọ kụ ẹḅile eselemi tọrobo ịyaar lọ ophiemi.

¹¹Mị kaḍighi ịdi awe rꞌạsinam kẹbugh ḍita. Aḍita anyina kẹbugh epu ịpe ẹrol ghan bọ ḅịle nyina kẹmar ịbadi ạnmuny. Mị kaḍighi ịdi nyina kẹtol sịphe ịdipho nyina ẹrol ghan bọ mem dị meten, ḅịle mị kịngo inyina edughom apuemi mem dị meten, kụ nyina egbi olegheri mọ mị kụ Ọmoogh-we phọ.

¹²Mị kiḅulemi inyina, weye phọ ạmi Ịzirel, ọḅile ọrol ịsiphe ade phọ. Keḍighi de ḍịo anyina, kụ kẹ́ngo mun ọgel dị ạnmuny anyina kọtol ọkoony.

¹³“Mị Ọmoogh-we dị ạmoogh oomo ịikpo ạḅem: agey ni mọ awe rọmagh ghan de phọ mọ ọbaam-awe kụ bịdi rọḅem ghan mọ rẹze ghan nmụny eelhe phọ.

¹⁴Kụ ọlo emiigh nyịidipho kụ ẹghi risigh kéḍighi mun ọbaam-awe dị rạze nmụny anyina. Mị Ọmoogh-we dị ạmoogh oomo ịikpo kụ mạḅem.

¹⁵Ade phọ kẹ́naghanan mun reelhe phọ dị rẹnmoghoghoom ḅịle rꞌọmiin aweye phọ dị ọnmir ophogh. Ade phọ kẹ́ze mun nmụny areelhe phọ. Mị Ọmoogh-we dị ạmoogh oomo ịikpo kụ mạḅem.”

¹⁶Ọmoogh-we phọ ạghaaph ụḅeni ịmi mọ,

¹⁷“Oye dị kamugh ni, mem mọ awe phọ Ịzirel ọrol ghan bọ sịphe ade phọ ạbidi, bịdi ụupu de phọ loor esi ạdol phọ rꞌeḍighinom mọ ạbidi. Mị ụsighe ẹrolom mọ ạbidi mọ ị́ḅaal ịdipho ạnir dị odi ẹmha ạnmariir.

¹⁸Mị uḍighi ịdi bịdi ologhoma ḍịkpar ophin ologhi ạmi loor esi ọkooghi arunu phọ ạbidi sịphe ade phọ ḅịle loor esi ịkaaghineen ạrumugh phọ bịdi mọphuenom bọ.

¹⁹Mị ughel bịdi esi ạdol phọ rꞌeḍighinom ịyaar phọ ạbidi, kụ mị ạwalalami bịdi ịnon areelhe.

²⁰Tọro ekpisi lọ bịdi ọghi, bịdi uruomaan ghan roofola ḍien iigbia phọ ạmi, loor esi dị awe ọḅem ghan mọ, ‘Bụen awe Ọmoogh-we phọ, kụ ọlo bịdi ụkpianaan ni ọḍua ịsiphe ade phọ ọdi.’

²¹Ọpo kụ ịyaar phọ mị ạmoogh bọ ịyaar oḍighinom aḍien iigbia phọ ạmi, loor esi dị awe phọ Ịzirel ụngo ghan roofola ḍien phọ tọrobo ekpisi lọ bịdi ọghi.

²²“Nyịidipho ḅẹni weye Ịzirel phọ dom mọ mị Ọmoogh-we dị ạmoogh oomo ịikpo ạmooghaan bọ bịdi: Ịpe mị kaḍighi bọ kẹ́mhu anyina awe phọ Ịzirel, kụ ọlo esi aḍien iigbia phọ ạmi nyina meefolomi bọ oomo areelhe lọ nyina ẹghi.

²³Mem dị mị agananami aḍeenaan reelhe phọ iigbia aḍigbogh aḍien phọ ạmi — ḍien phọ nyina eefolomi bọ sịphe igbo phọ ạbidi — kụ bịdi ogbi olegheri mọ mị kụ Ọmoogh-we phọ. Mị Ọmoogh-we dị ạmoogh oomo ịikpo mạḅem. Mị kịsighe ni inyina kụ aḍighi eḍeenaan reelhe phọ mọ mị oye aruukuan.

²⁴Mị kịsighe ni inyina eelhe kịrokiro rꞌẹmha kịrokiro aḅulemi de anyina.

²⁵Mị kịsaraghiom ni inyina mụserereeny ạmuum kụ aḍighi ịdi nyina kẹserere esi ịkaaghineen ạrumugh phọ anyina rꞌạtorobo ịnon ạraraar phọ ịpe mịphue bọ inyina.

²⁶Mị kịngo inyina emoom ekpom rꞌomoom ologhi. Mị kamuton ekpom aḍighiigh phọ anyina kụ ịngo inyina ekpom ọnaghanan.

²⁷Mị kạlogh uwaloor ạmi loor anyina kụ mị ạmiin mọ nyina ẹdaph ni iilogh phọ ạmi ẹḅile eeko ịto phọ mị mịngo bọ inyina.

²⁸Kụ nyina ẹtol de phọ mị ạngo bọ bụrude ạburude phọ anyina. Nyina keḍighi weye ạmi, kụ mị aḍighi Ẹnaan anyina.

²⁹Mị kịphel inyina ạsighe esi ạtorobo ịyaar lọ kịphue inyina. Mị kạto mọ ịbiakpa emuza ẹbalabala, bịn nyina kẹ́moogh mun ịgbakuro.

³⁰Mị kạbughe emuumom ireeny-arughuuny phọ rꞌịizupha iizo phọ anyina bịn ịgbakuro kẹtol mun dị kiifolomi inyina igbo areelhe phọ.

³¹Nyina kẹetughian ni ẹkaraph ẹzo phọ anyina rꞌariisi lọ nyina ẹpioghom, kụ nyina ẹmoogh ḍikia asiloor phọ anyina loor esi ịkaraph phọ rꞌạsipioghom mọ anyina.

³²We Ịzirel, mị rạwa mọ nyina ilegheri mọ mị ụ́tuan inyina kụ raḍighi bọ oomo phọ ịphen. Mị rạwa mọ nyina iloghoma umugholoor rꞌaroofola ịpe nyina meḍighi bọ. Mị Ọmoogh-we dị ạmoogh oomo ịikpo kụ mạḅem.”

³³Ọmoogh-we dị ạmoogh oomo ịikpo ạḅem, “Mem dị mị igbuurogh inyina esi oomo ịkaraph phọ anyina, mị kaḍighi ịdi nyina kẹḅile etugh rạmha phọ anyina, kụ aḍighi ịdi nyina keselemi rạraar lọ ọphueghi.

³⁴Tọrobo oye lọ arelhe ghan ọogaany iizo phọ anyina ạmiin ghan ni dị ạroogho masi aakpereghiom, kụ ọlo mị kaḍighi ịdi nyina kẹḅile eḅeph sịphe phọ.

³⁵Tọrobo oye kạḅem ni ịdi ade phọ ạḍien, eḍighi ghan bọ ẹdala phọ mẹghigh Oghoony Iden, ḅịle rꞌịdi ạramha phọ ophiemi bọ, owum ruphua, kụ ọwile eegulaan, awe mọḅile otughogh kụ okpeki.

³⁶Kụ areelhe phọ ekoom bọ kụ ípe bọ kelegheri ni mọ mị Ọmoogh-we phọ ạḅile ghan ni raselemi rạmha lọ ephe, kạḅile aḅeph rere dị úḅeph ghan. Mị Ọmoogh-we phọ maguanaan mọ mị kaḍighi ịduon — kụ mị kaḍighi ni.”

³⁷Ọmoogh-we dị ạmoogh oomo ịikpo ạḅem, “Mị kạḅile ni ạngo ọgel awe Ịzirel phọ ụlhom ịmi ọloghonaan ạḍighaagh, kụ mị kạbughe ḍita ạbidi ịdipho aḍita iyool-ịga.

³⁸Ạramha phọ nyịidipho mepheeghu bọ kẹḅile kụ emuza weye ịdipho iyool-ịga dị oliom ghan ile mem ẹyaal emuza ghan bọ Jeruselem. Kụ bịdi ogbi olegheri mọ mị kụ Ọmoogh-we phọ.”