Read abua Izikiel 37 Bible Online

Izikiel 37 - abua bible

Izikiel 37

¹Mị uloghoma ni ịikpo esomanan Ọmoogh-we phọ, kụ uwaloor ọdi ụsighe ịmi kụ asumeeny loor eḍiiny esi dị ade phọ eekpereghiom ịgharaghar ịḅarara.

²Ọdi urelhiom ịmi oomo eḍiiny phọ, kụ mị ạmiin mọ iboom ịḅarara kụ edi kụ mọ mẹgharaghar igey.

³Ọdi ụḅeni ịmi, “Oye dị kamugh ni, ịḅarara phọ ịphen ketue ni ẹmoogh ghuḍum ḍụghum?” Mị ạphagharanaan, “Ọmoogh-we dị ạmoogh oomo ịikpo, nạ bịn kụ katue ạpagharanaan ịpe!”

⁴Ọdi ạḅem mọ, “Mịinaan ịḅarara phọ. Ḅẹni ịḅarara phọ ịphen mẹgharaghar bọ ẹnaghan ekpo ọnhu Ọmoogh-we phọ.

⁵Ḅẹni bịdi mọ mị Ọmoogh-we dị ạmoogh oomo ịikpo rạḅeni bịdi: mị kạlogh ḍiphooghu loor anyina kụ ạḅile ịngo inyina ghuḍum.

⁶Mị kịngo inyina ighiph rꞌiphulupul kụ ikpereghiom inyina ḍizu. Mị kạlogh ḍiphooghu loor anyina kụ ạḅile ịngo inyina ghuḍum. Kụ nyina egbi olegheri mọ mị kụ Ọmoogh-we phọ.”

⁷Kụ mị ạmiinaan ịdipho ụḅeni bọ ịmi. Mem dị mị rạkaaph, mị ạnaghan dị reekaraghan kụ ịḅarara phọ emiigh otulughan.

⁸Mị odi ni rapogh bịn ighiph rꞌiphulupul eekpereghiom ịḅarara phọ rꞌaḍizu phọ. Kụ ọlo aḍiphooghu ị́tol ologhi asiloor phọ.

⁹Ẹnaan ịḅeni ịmi, “Oye dị kamugh ni, mịinaan ookuugh phọ. Ḅẹni ookuugh phọ mọ Ọmoogh-we dị ạmoogh oomo ịikpo ạto ạngo mọ ạḍua tọrobo ọogaany aru aḍigh sịen asiloor phọ ịphen memugh bọ, kụ ọḅile ọngo ạbidi ghuḍum.”

¹⁰Kụ mị ạmiinaan ịdipho ụḅeni bọ ịmi. Aḍiphooghu iḍigh ni siloor phọ kụ bịdi ẹmoogh ghuḍum kụ eḅerenu ẹmeera. Bịdi ụbugh ni dị ọman ḍita ẹgham.

¹¹Ẹnaan ịḅeni ịmi, “Oye dị kamugh ni, awe phọ Ịzirel ọkigh ịḅarara phọ ịphen. Bịdi ọḅem mọ bụno mọgharaghar, kụ mọ oḍuom ologhi iḍueneen ólho mun.

¹²Loor ịphen phọ mịinaan weye phọ ạmi Ịzirel ạḅeni bịdi mọ mị Ọmoogh-we dị ạmoogh oomo ịikpo kakpenyon riiḍi phọ ạbidi amiteghom bịdi kụ ạsighe bịdi atu de phọ Ịzirel.

¹³Mem dị mị akpenyon iiḍi phọ riisi phọ oḍi bọ weye phọ ạmi kụ amiteghom bịdi, bịdi kolegheri ni mọ mị kụ Ọmoogh-we phọ.

¹⁴Mị kạlogh ḍiphooghu ạmi loor ạbidi, ạngo bịdi ghuḍum, kụ aḍighi ịdi bịdi kọtol sịphe ade phọ ạbidi. Kụ bịdi ogbi olegheri mọ mị kụ Ọmoogh-we phọ. Mị maguanaan mọ mị kaḍighi ni ịduon — kụ mị kaḍighi ni. Mị Ọmoogh-we dị ạmoogh oomo ịikpo kụ mạḅem.”

¹⁵Ọmoogh-we phọ ạḅile ni ụḅaanaan ịmi.

¹⁶Ọdi ạḅem, “Oye dị kamugh ni, sịghe ḍịpe kụ ạge sịphe phọ ikpo ọnhu phọ ịphen, ‘Ọmar phọ aJuda.’ Kụ ạsighe ḍịnon ạḍipe kụ ạge sịphe phọ ikpo ọnhu phọ ịphen, ‘Ọmar phọ Ịzirel.’

¹⁷Kụ ạpham ịyal phọ ịpe phọ eekuna etulom eekuna ịdi bịdi kẹtol mụdi aḍiniin ạḍipe.

¹⁸Mem dị awe ạna opuru nyịna mọ ẹmhu phọ ika,

¹⁹ḅẹni bịdi mọ mị Ọmoogh-we dị ạmoogh oomo ịikpo kạsighe ḍịpe phọ ạḍiphe eḍighi bọ Ịzirel atulom eekuna phọ eḍighi bọ Juda. Mị kạḅar ịyal phọ ịpe phọ aḍighi ḍiniin kụ mị ạpam ḍịghaagh ạmi.

²⁰“Pạm ḍịghaagh ạna ịyal phọ ịpe phọ awe phọ ọmiin.

²¹Ḅẹni bịdi mọ mị Ọmoogh-we dị ạmoogh oomo ịikpo kạsighe oomo awe phọ ạmi ạḍuanam sịphe areelhe phọ bịdi mọghi bọ, aakpomoghi bịdi, kụ aḅulemi bịdi de ạbidi.

²²Mị kạḅophoghi bịdi eḍighi eniin eelhe sịphe ade phọ, ạnyu ạraaḅaraph phọ Ịzirel. Bịdi kọmoogh oniin ọdaam dị kạda bịdi, kụ bịdi kódia mun oḍighi ịyal areelhe ḅịle ọpatanaan kạ́tol mun oḍighi ịyal ạramar.

²³Bịdi kọ́puenaan mun siloor ạbidi rꞌịḅoria ịkaaghineen ạrumugh, kọ́sighe ịkaraph ọpuenaan siloor ạbidi. Mị kaḍighi ịdi bịdi kokpetenaan oomo areten ạsipioghom mọ bịdi ruaal ghan bọ ịmi. Mị kaselemi bịdi; bịdi koḍighi weye ạmi kụ mị aḍighi Ẹnaan ạbidi.

²⁴Ọdaam dị kạkigh Devid otelhedom mọ ạmi kụ kaḍighi ọdaam ạbidi. Bịdi kọmoogh mụḅoph rꞌoniin oye dị ạda kụ ọnaghanan iilogh phọ ạmi agey.

²⁵Bịdi kọtol de phọ mị ạngo bọ Jẹkob otelhedom mọ ạmi, de phọ ạburude ạburude ạbidi ọrol ghan bọ. Bịdi kọtol sịphe kꞌagee-pọ, ḅịle ịdipho kụ ẹdi ạnmuny ạbidi rꞌẹemara ẹemara ạbidi kọtol. Ọdaam dị kạkigh Devid otelhedom mọ ạmi kụ kạda bịdi kꞌagee-pọ.

²⁶Mị kakiran ịyo rꞌạbidi dị kẹmeera enye mọ ịyaar bịdi kẹ́ḅogh kꞌagee-pọ. Mị kạmeremi bịdi ạḅile ạbughe ḍita ạbidi, kụ mị ạlogh Otu Ịiḅereghi ạmi de ạbidi, esi dị kạtol kꞌagee-pọ.

²⁷Mị kạtol sịphe rꞌạbidi; mị kaḍighi Ẹnaan ạbidi kụ bịdi oḍighi weye ạmi.

²⁸Mem dị mị aseere Otu Ịiḅereghi phọ ạmi dị kạtolan rꞌạbidi kꞌagee-pọ, kụ areelhe phọ egbi olegheri mọ mị Ọmoogh-we phọ mạsaḅar Ịzirel mọ bịdi oḍighi weye ạmi.”