Read abua Izikiel 4 Bible Online

Izikiel 4 - abua bible

Izikiel 4

¹Ẹnaan ịḅem mọ, “Oye dị kamugh ni, sịghe eeḅoghoḍi abiriki, seere ghisigh ạna, kụ ạgonyi sịkool ạnyu abiriki phọ dị kẹmeera esi ẹmha phọ aJeruselem.

²Esi ọmeera enye oghoonyom mọ, lọgh riini, ropogh ude, rugbogo, rꞌigbogh ạraḅam akitonom oomo ọdi.

³Sịghe ạgbagba okuron kụ ạmeremi aaghironom ịdipho iikpe dị eesophoghom nyịna rꞌẹmha phọ. Soman ẹmha phọ. Moghoonyom ẹmha phọ, kụ nạ kụ ẹpomoghian phọ rakoonyom bọ ẹmha phọ. Ẹphen keḍighi eḍeenaan ẹngo eelhe phọ Ịzirel.

⁴“Ịphen reten, mịna ọgho ekeeny ạna, kụ mị kạsighe apum eelhe phọ Ịzirel ạḅam ẹmhu ạna. Esi ịraar okuron rꞌesughadi asiḍughul-otu nạ kạtol li sịphe kụ ạmiinom loor esi apum mọ ạbidi. Mị masophonaan nyịna ọoruen dị ḍiniin aḍughul-otu kẹmeera ghan esi aḍiniin ạlha esi ịpe ọmiinom mọ ạbidi kaleeny bọ.

⁶Mem dị nạ ạmadan ịpe, kiton ạmina ọgho elhiom ạna kụ ạmiinom esi inyadi asiḍughul-otu loor esi apum mọ aJuda — ḍiniin aḍughul-otu esi aḍiniin ạlha ọliom ạbidi.

⁷“Gbon riḍien ạna sịphe oghoonyom bọ aJeruselem. Pighemi ẹeḅugh ạḍighaagh ạna asomori ẹpe ẹmha phọ edi bọ kụ ạmiinaan ịmiin nyọdi!

⁸Mị kạphaḍi nyịna ọbo nạ katue ghan bọ akiton oniin ọgho aten ọphori phọ tụtu oghoonyom mọ aten.

⁹“Nyịidipho sịghe ẹphurukpu awit, rꞌabali, rꞌẹkiḍi, rꞌạlentil, rꞌạmilet rꞌạspelt ạḅophoghi ạgbe, kụ aḍighinom ạbred. Ẹpe kụ eḍien dị nạ kale esi ịraar okuron rꞌesughadi asiḍughul-otu phọ nạ ạmina bọ ọgho ekeeny phọ ạna.

¹⁰Kọngo ghan nyịna eḍien dị ẹman ịyal okuron rꞌịraardi ịtoom ẹemor ḍio, kụ kẹtol ghan ni ẹteeny kꞌạḍieri phọ aḍio phọ.

¹¹Nạ kạ́pughol ghan muboom ạmuum, ịyal ạkoph ḍio.

¹²Nạ kạsighe ghan tụgharaghar ạriir awe ạkpooniom nịan, ạpoghi brẹd ạnyu ạnian phọ kụ ale ạbred phọ esi dị tọrobo oye kạmiin nyịna.”

¹³Ọmoogh-we phọ ạḅem mọ, “Ịphen phọ ẹmeera enye esi ịdi awe Ịzirel kole ghan eḍien ịpe Ologh phọ agbi bọ, mem dị mị mạwalalami bịdi iiruen areelhe.”

¹⁴Kụ mị ạphagharanaan mọ, “Kị́dipho, Ọmoogh-we dị ạmoogh oomo ịikpo. Mị kọ̋opu ghan loor ạmi. Emiigh kꞌẹghoroghor kụ ẹghi mị kạ́ang ghan ẹnam lọ ogina ọdi kụ emugh ḅịle mꞌẹlo ilhom ịnam kụ eghiigh. Mị kőlhe ghan tọro eḍien lọ ogbiighi mọ ị́ḅaal.”

¹⁵Esi ịduon phọ Ẹnaan ẹḅem mọ, “Pọ ẹnighe ni. Mị kameera ghụn nạ ạsighe rịir ạsinam ạkpooniom nịan kụ ạphoghi ạbred ạna ạnyu ịpa.”

¹⁶Kụ ọdi ạḅaram mọ, “Oye dị kamugh ni, mị kasoph akpere ẹngoom eḍien phọ ẹlo aJeruselem. Awe phọ odi bọ sịphe phọ kokururu ni rꞌẹ́ḅaal ologhi esi ịduon kọtooghi ghan bọ eḍien dị bịdi kole rꞌạmuum dị kọpughol.

¹⁷Eḍien rꞌạmuum ọphughol ạbidi kegbem ni; iloghi ạbidi keḅoronu, kụ aloor ạbidi kemiteghu ni.”