Read abua Izikiel 41 Bible Online

Izikiel 41 - abua bible

Izikiel 41

¹Ẹdi etum, oye phọ ụsighe ịmi aḍighom osoph ogbo phọ, Ạdol Iigbia phọ. Ọdi ạto eten phọ ẹḍua bọ eḍigh: ịman ịraar akuḅu ḍịkel ude

²kụ oogh akuḅu ẹreghe, rꞌiikpe ekeeny rꞌelhiom dị aḅidi phọ ạman 2.5 akuḅu. Ọdi ạto ọkar osoph phọ: aḍighi ịyaldi akuḅu ḍịdoony, ḅịle ḍioph akuḅu ẹreghe.

³Kụ ọdi aḍigh ọkar osoph ologhi phọ. Ọdi ạto eten phọ ẹḍua bọ eḍigh, ịman oniin akuḅu ḍịkel ude, kụ eḍighi ịraar akuḅu ẹreghe, rꞌiikpe ekeeny rꞌelhiom dị aḅidi phọ ạman 3.5 akuḅu.

⁴Ọdi ạto ọkar osoph phọ, kụ aḍighi ḍioph akuḅu oomo ịigaany. Kụ ọdi ụḅeni ịmi mọ, “Ịsien kụ Ẹphan phọ.”

⁵Oye phọ ạto ḅidi iikpe-ologhi Otu Ịiḅereghi phọ, kụ eḍighi ịraar akuḅu. Ọkpaariom iikpe phọ, okoom oomo Otu Ịiḅereghi phọ, ạnmuny iisoph ịrol dị ẹman ịyal akuḅu ẹreghe.

⁶Iisoph phọ ịphen iḍighi ịraar ẹedaneen kụ tọrobo ẹedaneen ẹmoogh ịraardi iisoph. Iikpe-erugh phọ tọrobo ẹedaneen ighom ekpo epu ịpe ogbotu ude phọ, ọbo iisoph phọ emeelom iikpe bịn kébiririom.

⁷Ịduon kụ ẹdi iikpe Otu Ịiḅereghi phọ, ọrol erugh kụ ropogh, ịrol mụdi eeleeny ekpo kụ esi ạnyu phọ. Ọkpaariom iikpe-erugh Otu Ịiḅereghi phọ, ịphalagbal iisoph phọ, ụlhoghoḍi ịyal ibol-bol areten ọsiiny ạnyu, ọbo edugh ọḍua ude osi ẹlo ogboku ḅịle rọghi ẹedaneen ẹpe ạnyu phọ.

⁸Iikpe-erugh iisoph phọ ịphen aḅidi phọ ạman 2.5 akuḅu; oniin ọnhu-aḍibuo kụ ẹdi kọḍua oḍigh iisoph ạga ephunom mọ Otu Ịiḅereghi phọ, ḅịle oniin kụ ẹdi kọḍua oḍigh ịpe ạga esoorom mọ. Mị ụmiin mọ ạḍikololoony ade dị ẹman 2.5 akuḅu ẹreghe kụ ikoom Otu Ịiḅereghi phọ; iḍighi ịraar akuḅu kụ epeeliom ude phọ eru ạnyu kụ eelenyan ephighiom iisoph phọ ọogaany iikpe Otu Ịiḅereghi phọ. Ịbaay ạḍikololoony ade phọ rꞌaruutu phọ ariil ạrikia phọ orugh bọ, ephoghoghoony esi ịrol dị ẹman ḍioph akuḅu dị esophom ịigaany Otu Ịiḅereghi phọ.

¹²Ọkar ẹekela ephoghoghoony esi phọ, ạga emeelom erumuḍio Otu Ịiḅereghi phọ, otu ạrol dị ạman inyadi rꞌoogh akuḅu ḍịdoony rꞌịraardi rꞌoogh akuḅu ẹreghe; iikpe phọ aḅidi phọ aḍighi 2.5 akuḅu ooghironom.

¹³Oye phọ ạto akoom Otu Ịiḅereghi phọ, kụ eḍighi ooghdi akuḅu ḍịdoony. Kụ ẹḍua ọman Otu Ịiḅereghi phọ, ẹḅeeny ephoghoghoony esi phọ ẹpe emeelom erumuḍio phọ, ạḍikel phọ iḍighi kẹn ooghdi akuḅu.

¹⁴Ogborori ọḅeeny arisigh Otu Ịiḅereghi phọ, ọḅaram ephoghoghoony esi ekeeny rꞌelhiom, iḍighi kẹn ooghdi akuḅu.

¹⁵Ọdi ạto ḍịdoony otu phọ kụ osi ạga emeelom erumuḍio phọ, ọḅaram reten ologhi otu phọ ekeeny rꞌelhiom, kụ eḍighi kẹn ooghdi akuḅu. Osoph eḍighom Otu Ịiḅereghi phọ, Ạdol Iigbia phọ rꞌẸphan phọ,

¹⁶oomo phọ ịne ukpoghom iimugha ipoḍi ireeny emiigh ogbotu phọ kụ esi rughuugh ookuugh phọ. Rughuugh ookuugh phọ ịphen kotue ni okughi.

¹⁷Iikpe-ologhi Otu Ịiḅereghi phọ, esi dị ephooph epelom rughuugh phọ, ụkar kụ okpoghom ịkaaghineen

¹⁸areelhe ḅịle rꞌạruukpaany aghuḍuul. Areelhe eten ạruukpaany aghuḍuul oten, eniin etum nyeniin, ekoom oomo osoph phọ. Tọrobo ọokpaany aghuḍuul ạmoogh ịyal asighisigh;

¹⁹ghisigh oye dị okiton ophoghomi alhe phọ ḍiniin ạga, rꞌaghisigh ạnam-dịka dị okiton ḍịeri phọ ạḍighaagh phọ. Ịduon kụ ẹdi ẹrol kụ ekoom oomo iikpe phọ,

²⁰emiigh ogbotu kụ epelom eghuugh phọ.

²¹Ịḅaghaghaam ọnhu-aḍibuo Ạdol Iigbia phọ iileeny oomo ịigaany. Ghisigh eḍighom Ẹphan phọ, ịyaar ịrol dị ẹghigh

²²enmeny ịyaar aghuḍum dị ọkaam iimugha ireeny. Iḍighi 1.5 akuḅu ḍiphoph rꞌoniin akuḅu ẹreghe. Ịmeremiom ạrughulukul phọ, azin phọ, rꞌịigaany phọ, oomo phọ ịne uḍighinom iimugha ireeny. Oye phọ ụḅeni ịmi mọ, “Phọn kụ ịdaabili phọ ẹmeera bọ egbodo Ọmoogh-we phọ.”

²³Eghuugh ịrol eekuna eten phọ ẹghi bọ esi Dọl Iigbia phọ, kụ ẹnon kẹn ẹrol eekuna eten phọ ẹghi bọ esi Ẹphan phọ.

²⁴Arughuugh phọ iḍighi ịyal ịne eniin esi kụ eeghelaan ghan mem lọ oghughuron sịphe ogbo phọ.

²⁵Ịkaaghineen areelhe rꞌạruukpaany aghuḍuul ịrol sịphe arughuugh Ạdol Iigbia phọ, ịdipho ẹrol bọ sịphe iikpe phọ. Kụ ụsighe oreeny kụ oghophom egbodo ọnhu-aḍibuo osoph eḍighom mọ.

²⁶Ịigaany osoph phọ ọphon arughuugh-ookuugh ịrol li, kụ iikpe phọ ụnighemiom reelhe dị ọgeeghi.