Read abua Izikiel 42 Bible Online

Izikiel 42 - abua bible

Izikiel 42

¹Kụ oye phọ ụsighe ịmi ạghimom ogiga erugh phọ kụ uḍighom ịmi otu dị ạrol ạga ephunom Otu Ịiḅereghi phọ, ụ́kar ụ́kelan otu phọ ọpo ạrol bọ ạga emeelom erumuḍio phọ Otu Ịiḅereghi phọ.

²Otu phọ ọphon ạman ooghdi akuḅu ḍịdoony kụ aḍighi ịyaldi rꞌoogh akuḅu ẹreghe.

³Ḍiniin ạga aphogh ebalalaany esi dị ẹman ḍioph akuḅu ẹreghe dị ẹrol ḍiniin ạḍighaagh rꞌOtu Ịiḅereghi phọ, kụ ḍịeri phọ ạḍighaagh phọ aphogh iikpe ịisua ogiga erugh phọ. Ụlogh esi phọ ịraar ookpe, nyoniin apeeliom ghan nyọori phọ odi bọ ude.

⁴Sịphe ạga ephunom otu phọ ọphon, eten ịrol dị ẹman oogh akuḅu ẹreghe kụ eḍighi ooghdi akuḅu ḍịdoony rꞌariisi oḍigh ạga phọ ọpo phọ.

⁵Iisoph ạnyu ịsiphe otu phọ ighomogh epu ịpe ẹrol bọ ogbo phọ rꞌịpe esoorom mọ loor esi dị ephighiom ịsiphe ude phọ ụlogh ọghiom ọman ẹnum.

⁶Iisoph ịraar phọ ariisi phọ ịrol ẹkololoony ẹrolom kụ úsuughiom rọko ịdipho ịpheri phọ.

⁷Sịphe esoorom iikpe-erugh, otu phọ ịmoogh oogbiim dị aḍighi ịyaldi rꞌoogh akuḅu, oolemi-odi ạḍidoony otu phọ, kụ iisoph ẹrol ịyaldi rꞌoogh akuḅu phọ ịpe esugha bọ. Ẹpe ọkar ạnyu phọ iisoph ịrol oomo ạḍidoony otu phọ.

⁹Eeḍian ịyal iisoph phọ ịphen eekuna emitenom erumuḍio otu phọ, esi phọ iikpe phọ emiigh bọ, ọnhu-aḍibuo ạrol dị ạḍua aḍigh ogiga erugh phọ. Sịphe ạga esoorom Otu Ịiḅereghi phọ, otu dị ạkar ạghigh nyọdi ạrol dị ụ́kar ụ́kelan otu phọ ọpo ạga emeelom erumuḍio phọ Otu Ịiḅereghi phọ.

¹¹Ghisigh iisoph phọ, esi orelhe ịrol dị ẹghigh nyọpo ạga ephunom mọ. Ịmoogh eniin ẹtoom mọ, eniin ẹrolom, rꞌeniin ạrunhu-aḍibuo.

¹²Ọnhu-aḍibuo ạrol eeḍian iisoph ạga esoorom otu phọ, eekuna emitenom erumuḍio phọ, esi phọ iikpe phọ emiigh bọ.

¹³Oye phọ ụḅeni ni ịmi mọ, “Oomo aruutu phọ ịphen ariisi iigbia. Ologhi aruutu phọ, ariil ạrikia phọ bụphe rọki ghan bọ egbodo Ọmoogh-we phọ kụ role ghan ọkar eḍien iigbia. Loor esi dị iisoph phọ ariisi iigbia, ariil ạrikia phọ kọḅam ọkar eḍien iigbia phọ sịphe: rịkia ịbiakpa, rịkia ịlo ịkaraph, rꞌạrikia ipueriom mọ.

¹⁴Mem lọ ariil ạrikia moḍigh Otu Ịiḅereghi phọ kụ rọwa ọghi ogiga erugh phọ, bịdi ọmoogh ọkporonaan iinmenan phọ bịdi ọkpologhian bọ mem mọ rokumu bọ Ọmoogh-we phọ, ọkpologhian ịnon iinmenan kụ ogbi omite esi lọ awe ookpomoghan.”

¹⁵Mem dị oye phọ mạtooghi ạmadan oomo ologhi Otu Ịiḅereghi phọ, ọdi ụsighe ni ịmi amitenom ọnhu-aḍibuo ạga emitenom erumuḍio phọ kụ ạtooghi erugh phọ.

¹⁶Ọdi ạsighe ọtoom oreeny phọ kụ ạto ạga emitenom erumuḍio phọ, kụ eḍighi 250 akuḅu.

¹⁷Kụ ọdi ạḅile ạto ạga ephunom mọ, ạga esoorom mọ rꞌạga emeelom erumuḍio phọ; tọrobo ạga iḍighi ḍiniin ạḍidoony, 250 akuḅu; ịduon phọ pọ iikpe phọ ekoom ịigaany dị eeleeny, 250 akuḅu tọrobo ạga. Iikpe phọ kụ iḍighi ọku dị ạgbatan ịlo edi dọl iigbia rꞌịlo ílho.