Read abua Izikiel 43 Bible Online

Izikiel 43 - abua bible

Izikiel 43

¹Oye phọ ụsighe ịmi ạghimom ọnhu-aḍibuo phọ aphogh bọ ạga emitenom erumuḍio phọ.

²Ịsiphe kụ ẹdi mị ạmiin ịdi ạḍinmananmana ạḍiḅaal ạdol Ẹnaan phọ Ịzirel ẹḍua emitenom erumuḍio phọ retu. Ẹḍogh Ẹnaan ighur ịdipho otu-ḅualhe, kụ ade phọ ẹmuanan rꞌạḍinmananmana ạḍiḅaal phọ.

³Uḍien phọ ọphon ạghigh nyọpo mị ạmiin bọ mem mọ Ẹnaan eru bọ ophiemi aJeruselem, rꞌọpo mị ạmiin bọ ọogaany Ọphiiny aKebar, kụ mị ạmina aḅololo aghisigh ạmi azuan ude.

⁴Ạḍinmananmana ạḍiḅaal phọ iḅugh ni ọnhu-aḍibuo otu ạga emitenom erumuḍio phọ kụ eḍigh ologhi Otu Ịiḅereghi phọ.

⁵Uwaloor Ọmoogh-we phọ uphoophe ịmi ạnyu kụ ụsighe ịmi asiemi ogiga ologhi phọ, esi dị mị ạmiin mọ eegu Ọmoogh-we phọ kụ imuza Otu Ịiḅereghi phọ.

⁶Oye phọ ạmeera ọogaany ạmi sịphe, kụ mị ạnaghan dị Ọmoogh-we phọ ụḅaanaan ịmi kꞌịsiphe ologhi Otu Ịiḅereghi phọ:

⁷“Oye dị kamugh ni, ịsien ạgada igbogh phọ ạmi. Mị kạtolan sịen rꞌawe phọ Ịzirel kụ ạda bịdi kꞌagee-pọ. Awe phọ Ịzirel rꞌạbudaam mọ ạbidi kóofoolomi mun ḍien iigbia phọ ạmi reten ooseeny ghan ịkaaghineen ạrumugh ḅịle rꞌoḍiighi ghan iḍim ạraalha ạbidi sịen esi phọ ẹphen.

⁸Ạbudaam mọ udoghoḍi rụnhu-aḍibuo phọ rꞌọkar ịḅaghaghaam aruutu phọ ạbidi ọmeremi otumeniom ịpe Otu Ịiḅereghi phọ ạmi, ẹrol dị iikpe bịn kụ ẹtol ogbo ayoor. Bịdi uufolomi ḍien iigbia phọ ạmi loor ạraraar isa phọ bịdi oḍighi ghan bọ, kụ mị aphiemi bịdi.

⁹Nyịidipho ẹkpianaan bịdi ọwile ooseeny ghan ịkaaghineen ạrumugh ḅịle ọsighiogh iḍim ạbudaam mọ ạbidi. Eḍighi ịyaar lọ bịdi ọdaphan ịphen phọ, mị kạtolan rꞌạbidi kꞌagee-pọ.”

¹⁰Kụ Ọmoogh-we phọ ạghaaph ạloghom mọ, “Oye dị kamugh ni, ḅẹni weye Ịzirel ịlo Otu Ịiḅereghi phọ, bịdi ọoḅeghion ḍịnya phọ ọloghom bọ otu phọ ophogh. Ḍighi ịdi umugholoor kasiph bịdi esi ẹkaraph eḍighinom ịyaar phọ ạbidi.

¹¹Eḍighi ịyaar dị umugholoor asiph bịdi esi ịpe bịdi moḍighi bọ, kụ agbi ogananami oḍeenaan ạbidi ịpe ạḍinya phọ ọloghom bọ Otu Ịiḅereghi phọ ẹḅem bọ: ịpe ọghonyi bọ, riḍighom rꞌarimitenom mọ, ịpe kạtol bọ, esereghiom ịyaar esi rꞌesi, rꞌoomo iilogh rꞌịlo ọdaphan. Gẹ oomo phọ ịne esi, ọbo ọmiin eḍighinom ịyaar rꞌịyaar kụ ọdaphan iilogh phọ.

¹²Phọn kụ ologh Otu Ịiḅereghi phọ: oomo ariisi phọ ekoom bọ sịphe ọkar ạnyu ẹeḅaraph phọ eḍighi esi iigbia.”

¹³Phọn kụ ẹtooghiom enmeny phọ, ọsighe oniin phọ ọtoom mọ ịdipho ọto bọ Otu Ịiḅereghi phọ. Okoom zin enmeny phọ uguph ni ḍikol dị iḍighi ooghdi ẹkulom ạḍighaagh ḍịkel ude rꞌooghdi ẹkulom ạḍighaagh ẹreghe, rꞌeegida dị ekoom ruukuna phọ ịyaldi rꞌoogh ẹkulom ạḍighaagh ḍiphoph.

¹⁴Ẹkpigh enmeny phọ dị ẹkar esoorom, emiigh kꞌạnyu azin phọ, iḍighi oniin akuḅu ḍiphoph. Ẹpheri phọ ẹkpigh phọ, ụlogh ọghiom ọman, emiigh eekuna phọ ooghdi ẹkulom ạḍighaagh kụ ekoom, kụ iḍighi ịyal akuḅu ḍiphoph. Ẹkpigh dị etum sịphe, ụlogh kẹn ọghiom ọman, emiigh eekuna phọ ooghdi ẹkulom ạḍighaagh kụ ekoom.

¹⁵Ẹkpigh ọkar ạnyu phọ, esi phọ oguom ghan bọ nịan rịkia phọ, iḍighi kẹn ịyal akuḅu ḍiphoph. Ẹdi epeelogh loor inya ạrughulukul phọ iphoph epu ịpheri phọ ariisi ạnyu phọ.

¹⁶Ọkar ạnyu enmeny phọ iileeny ni odiiny akuḅu tọrobo ạga.

¹⁷Ẹkpigh ogbo phọ kẹn iileeny ni, oḍual akuḅu tọrobo ạga, rꞌeegida dị ekoom kụ eḍighi ịyaldi rꞌoogh ẹkulom ạḍighaagh ḍiphoph. (Aḍikol phọ iḍighi ooghdi ẹkulom ạḍighaagh ẹreghe.) Esi ọodaghagh ọsiiny osi enmeny phọ ịrol ạga emitenom erumuḍio phọ.

¹⁸Ọkar Ogbogh Ọmoogh-we phọ ụḅeni ni ịmi mọ, “Oye dị kamugh ni, ler rụru ịphen mị kạḅeni bọ nyịna. Mem dị mọlhogh enmeny ẹkia phọ ọmadan, ịphen kụ ẹdi nạ kaḍighi ịlo oselemi ọosa enmeny phọ. Pạm ẹkia kụ arumom ạsu nịan sịphe ạnyu phọ kụ ạsaraghi sịphe phọ ịḅaal ịnam mọ ọphighironom bọ ẹkia phọ.

¹⁹Ạbupinyon rịkia phọ ạbuphe oḍighi bọ bụo eghun phọ aLivai, bụo ẹemara ẹemara phọ ạZedok bịn kụ ạbudi kotu egbodo ạmi okumu ghan ạmi. Mị Ọmoogh-we dị ạmoogh oomo ịikpo kụ mạto ịphen phọ. Nạ kạngo bịdi onyugheel aḍilephiri ạnam dị kọpinyonom ẹkia ootolom ịkaraph.

²⁰Nạ kạsighe ẹnum ịḅaal phọ kụ agbul rụghulukul phọ epeelogh bọ ephoph epu ịpheri phọ ariisi ạnyu enmeny phọ, rꞌaruukuna ẹkpigh ogbo enmeny phọ, rꞌoomo aruukuna phọ ekitonom bọ. Ịduon kụ ẹdi nạ kaselemi enmeny phọ kụ aseere dọl iigbia.

²¹Nạ kạsighe ḍilephiri ạnam mọ ọngo bọ ịlo ootolom ịkaraph phọ kụ ạsu esi lọ ọkar ọma omitiom dị ẹgbol ekool Otu Ịiḅereghi phọ.

²²Ḍịeri phọ aḍio phọ, nạ kạsighe ekpe lọ ẹgha íḍigh kụ ạphighironom ẹkia ootolaam ịkaraph. Selemiom enmeny phọ ịḅaal ekpe phọ ịdipho nạ aḍighinom bọ ịḅaal aḍilephiri ạnam mọ.

²³Mem dị nạ mạmadan oḍighi ịphen phọ, sịghe onyugheel aḍilephiri ạnam rꞌonyugheel odughuna, ịyal phọ ịne ẹgha kị́tol,

²⁴kụ uruomaan ịmi. Ạbupinyon rịkia phọ kooḍu boph, ọḅile ọsu nịan, ọpinyonom bịdi ụngo ịmi ịyaar aghuḍum.

²⁵Tọrobo aḍio tụtu ẹteeny oḍual aḍughul-otu, nạ kạngo ghan ekpe, ḍilephiri ạnam rꞌodughuna esi ịyaar aghuḍum ootolaam ịkaraph. Oomo phọ ịne ẹgha kị́tol.

²⁶Esi oḍual aḍughul-otu ariil ạrikia phọ koselemi ghan enmeny phọ oseere oḍighinom oḍighi.

²⁷Mem dị ariiḍio phọ ịphen memuneen, ariil ạrikia phọ komiigh ọphinyon ghan ạrikia oguom ạnian sịphe enmeny phọ, ḅịle rꞌạrikia ẹboroph awe phọ. Kụ pụruku oomo anyina kịḅeeraan ịmi. Mị Ọmoogh-we dị ạmoogh oomo ịikpo kụ mạḅem.”