Read abua Izikiel 44 Bible Online

Izikiel 44 - abua bible

Izikiel 44

¹Oye phọ urelhiom ịmi ạghimom ọnhu-aḍibuo erugh phọ ọpo ạkelan bọ ạga emitenom erumuḍio Otu Ịiḅereghi phọ. Ọnhu-aḍibuo phọ ughughi ni,

²kụ Ọmoogh-we phọ ụḅeni ịmi mọ, “Ọnhu-aḍibuo phọ ọphon kokughi bịn kụ kókughuron mun. Oye ólho dị omeera mọ ạḍua sịen phọ aḍigh loor esi dị mị Ọmoogh-we Ẹnaan phọ Ịzirel mạḍua sịphe phọ aḍigh. Kokughi ni ọkiom ghisigh.

³Ọkpana ọdaam mọ rạda bọ atue ni ạki sịphe phọ ale eḍien iigbia egbodo ạmi. Ọdi kaḍigh osoph eḍighom mọ ẹphen bịn amite.”

⁴Kụ oye phọ ụsighe ịmi ạghimom ọnhu-aḍibuo ạga ephunom mọ kụ asiemi sịphe ghisigh Otu Ịiḅereghi phọ. Mị ạtol rapogh, bịn mị ạmiin dị ạḍinmananmana ạḍiḅaal egbodo Ọmoogh-we phọ kụ emuza Otu Ịiḅereghi phọ. Mị uḅololo ni ạsighe ghisigh ạmi azuom ude,

⁵kụ Ọmoogh-we phọ ụḅeni ịmi mọ, “Oye dị kamugh ni, ler rụru tọrobo ịlo nạ ạnaghan ạḅile ạmiin. Mị kạḅeni nyịna iilogh Otu Ịiḅereghi phọ rꞌịlo ọdaphan. Mạar alegheri weye lọ omeera mọ oḍigh ni ọḅile omite Otu Ịiḅereghi phọ rꞌạbulo úmeera.

⁶“Ḅẹni weye ọḅaar ẹmhu phọ Ịzirel mọ mị Ọmoogh-we dị ạmoogh oomo ịikpo kápogh mun ạ́ḅitonaan rạraar isa phọ bịdi moḍighi yogh ghan bọ.

⁷Bịdi mọopu Otu Ịiḅereghi phọ ạmi ịdipho bịdi ọngo bọ ọgel kụ aruuruen dị úḍuna, awe dị ịmi ụ́naghanan, kụ oḍigh Otu Ịiḅereghi phọ mem mọ ọphinyon ghan bọ ẹnuum rꞌịḅaal ạrikia mọ rụngo ịmi. Ịduon phọ pọ awe phọ ạmi mogbonyon ịyo phọ ạmi esi oomo ạraraar isa phọ bịdi moḍighi yogh ghan bọ.

⁸Bịdi rꞌaloor kọ̋pham oḍighi Otu Ịiḅereghi phọ, kpạripe ghụn, ọḅile ọḅeni ruuruen mọ bịdi ọpham esi phọ.

⁹“Mị Ọmoogh-we dị ạmoogh oomo ịikpo ạkaaph amitiom mọ ooruen dị úḍuna, oye dị ịmi ụ́naghanan, kúḍigh Otu Ịiḅereghi ạmi, ghạlamo ooruen dị odianan rꞌawe phọ Ịzirel.”

¹⁰Ọmoogh-we phọ ụḅeni ịmi mọ, “Mị rạliom bụo aLivai phọ ạbuphe ọḅaram bọ rꞌạbueri phọ awe phọ Ịzirel ughinom bọ ịmi ọḍua kụ ooseeny ịkaaghineen ạrumugh.

¹¹Bịdi otue ni ukumu ịmi sịphe Otu Ịiḅereghi phọ esi ọmaar ophogh ịnhu-aḍibuo phọ rꞌoḍighi ghan iiḍighi Otu Ịiḅereghi phọ. Bịdi otue ni ọze ịnam lọ awe ọngo mọ ọphinyonom ạrikia, ḅịle bịdi kọtol oḍighinaan oḍighi weye phọ.

¹²Kụ ọlo loor esi dị bịdi kụ oḍiemiom ghan bọ weye Ịzirel esi iiḍighi ooseeny ịkaaghineen ạrumugh phọ kụ oḍighi ịdi awe phọ oḍighi ịkaraph, mị Ọmoogh-we dị ạmoogh oomo ịikpo akunya ni mọ kọliom ni bịdi.

¹³Bịdi ịmi kúkumu esi oḍighi ariil ạrikia ḅịle kótuman Ẹphan phọ. Ọphon kụ ạmalhiom ạbidi esi ạraraar isa dị bịdi moḍighi.

¹⁴Mị mạḅogh rạngo bịdi ighiil iiḍighi lọ koḍighi ghan sịphe Otu Ịiḅereghi phọ.”

¹⁵Ọmoogh-we dị ạmoogh oomo ịikpo ạḅem mọ, “Ariil ạrikia phọ ạbuo eghun phọ kꞌaLivai, bụphe oḍighi bọ ẹemara ẹemara phọ ạZedok, ukumu ni ịmi rꞌoomo ologhi ạbidi sịphe Otu Ịiḅereghi phọ mem mọ bụeri phọ awe phọ Ịzirel ughel bọ ịmi. Kụ nyịidipho bịdi kụ kukumu ịmi kụ otu ghisigh ạmi ọngo ẹnuum rꞌịḅaal ạrikia mọ.

¹⁶Bịdi bịn kụ koḍigh Otu Ịiḅereghi phọ ạmi, oḍighi oḍighi sịphe enmeny phọ kụ oḍiemiom ghan oḍighi ooseeny sịphe Otu Ịiḅereghi phọ.

¹⁷Mem lọ bịdi ọgbatanu eḍighom mọ ọghi oḍigh ogiga ologhi Otu Ịiḅereghi phọ bịdi kọkpologhian ọyegheyeghe ạsuoma. Bịdi kọ́kpologhian ịyaar lọ oḍighinom suphuugh ịnam mem lọ bịdi odi oḍighi ẹpe ogiga ologhi ḅịle rꞌologhi Otu Ịiḅereghi phọ.

¹⁸Ọbo bịdi koloman ghan bọ, bịdi konyora ọyegheyeghe onyoraam rꞌọyegheyeghe atrauza, kụ kọ́ḅaram okuughaam.

¹⁹Tụtu bịdi romite kọghi ogiga erugh phọ ẹpe awe phọ odi bọ, bịdi kọpur ọkporonaan iinmenan phọ bịdi ọrolom bọ oḍighi sịphe Otu Ịiḅereghi phọ osereghi sịphe iisoph iigbia phọ. Bịdi kọkpologhian ịnon iinmenan ọbo iinmenan iigbia phọ ạbidi keḍighi ghan bọ oye ịlo ị́nighe.

²⁰“Ạbupinyon rịkia phọ kókula ẹmhu ḅịle kómeera ạsilaal ạbidi emite ẹdoony. Bịdi kọbile ẹdoony ịdi ẹkpianaan bịn.

²¹Ạbupinyon rịkia phọ kọ́pughol miim kụ ogbi oḍigh ogiga ologhi phọ.

²²Oyil ạrikia kạ́tol dị kapin ạnir dị oye aphin kụ mạwile; ọdi kapin osooreeny ọnyani ọnyo Ịzirel mꞌekpukele ạnir ọnon oyil ạrikia lọ mamugh.

²³“Ạbupinyon rịkia phọ kọtughemi weye ạmi ọgbatan ghan ịlo eḍighi iigbia rꞌịlo íḍighi, rꞌịlo ụ́upu rꞌịlo mọopu.

²⁴Mem dị ọokonoghian ologh amite, ariil ạrikia phọ kụ kọoḅeghion rạghaaph dị ẹdaphan iilogh phọ ạmi. Bịdi kọpamanam rạyaal iigbia ọdaphan iilogh phọ ạmi rꞌeḍighinom ạraraar phọ ạmi kụ ọḅile oseere ḍio ophooghian phọ dọl iigbia.

²⁵“Ugbi ni dị oyil ạrikia kạḅogh oḍim ạapuom loor ọdi, emuton lọ aḍighi oḍim ọde mꞌonhiin, ọony mꞌọnyani, umor mꞌumarani ọdi dị ilom ụ́bal.

²⁶Mem dị ọdi mạḅile aselemian loor, ọdi kạtol oḍual aḍughul-otu,

²⁷kụ ạki aḍigh ogiga ologhi Otu Ịiḅereghi phọ, kụ ạpighiron ẹkia oselemian aloor, ẹrol dị ọdi ạḅile aḍighi oḍighi Otu Ịiḅereghi phọ. Mị Ọmoogh-we dị ạmoogh oomo ịikpo kụ mạḅem.

²⁸“Ạbupinyon rịkia phọ ọmoogh oḍighi ọphinyon ghan ạrikia eḍighi bin ạbidi esi ạraraar dị mị mạngo Ịzirel dị kodiom erua oghiil atum oghiil. Bịdi kọ́pam ruphua ẹpe Ịzirel; ogina ạmi bịn kụ oomo ịdi bịdi ọwa.

²⁹Ạrikia ịbiakpa, ạrikia ịlo ịkaraph rꞌạrikia ọkpe-oḅulemi phọ keḍighi eḍien ariil ạrikia phọ, ḅịle bịdi kọboor tọrobo ịyaar sịphe Ịzirel lọ useenaan ịmi.

³⁰Ạbupinyon rịkia phọ kụ kọmoogh ọkar igey ịḅel ibugha phọ ḅịle tọrobo ẹnon ịyaar lọ ụngo ịmi. Tọrobo amem lọ ọsa ạbred, bịdi kọngo bụpinyon rịkia phọ ẹḅel eeḅoghoḍi dị eḍighi ruunmo, kụ ạḍiseph ạmi emeelom sịdol phọ ạbidi.

³¹Ạbupinyon rịkia phọ kọ́ba ẹnun mꞌẹnam lọ ẹpu bịn kụ emugh ḅịle mụghumo ẹnon ẹnam kụ ighiigh.”