Read abua Izikiel 45 Bible Online

Izikiel 45 - abua bible

Izikiel 45

¹Mem dị kodi de phọ ọngo tọrobo eghun bin, muniin abin kọḅogh ni ọngo Ọmoogh-we phọ. Keḍighi ḍioph ịyal rꞌạpakiri itobi ḍịdoony ḍioph itobi ẹreghe. Oomo ekpisi phọ kẹtolom iigbia.

²Ekpisi phọ ẹphen ekulha ade kẹtol li dị keeleeny oomo ịigaany dị koseenaan Otu Ịiḅereghi phọ, ịyal okuron rꞌooghdi akuḅu tọrobo ạga, dị ẹyaghaghaany esi dị ẹman ịyaldi rꞌoogh akuḅu ẹreghe kụ kekoom.

³Oolemi odi ekpisi phọ ẹphen, ḍiniin ạḍighaagh ḍioph ịyal rꞌạpakiri itobi ḍịdoony oogh itobi ẹreghe, kụ ẹdi kọto ọsighe; Otu Ịiḅereghi phọ kụ kạtol, ọkar ekinian dị epu oomo ịne.

⁴Keḍighi ạga iigbia eelhe phọ, dị oseenaan bụpinyon rịkia lọ rokumu ghan Ọmoogh-we phọ sịphe Otu Ịiḅereghi phọ.

⁵Ẹpheri phọ oolemi odi ekpisi phọ koseere kịro dị keḍighi bin ạbuo aLivai, bụphe roḍighi ghan bọ oḍighi sịphe Otu Ịiḅereghi phọ. Ạramha kemite ni sịphe dị bịdi kotughogh.

⁶Esi dị etuman ạga iigbia phọ, ẹnon ẹkpigh, ḍioph ịyal rꞌạpakiri ḍịdoony ịyal rꞌạpakiri itobi ẹreghe, koseere kịro dị komitiom egbogh ẹmha dị tọrobo oye ọlo Ịzirel kạtol ghan.

⁷Koseenaan kẹn ni de ọkpana ọdaam lọ ạda. Emiigh ọku ạga emeelom erumuḍio ekpisi iigbia phọ ade phọ kẹkimom ạga emeelom erumuḍio esi Ọphiiny aMeditarenian; kụ emiigh ọku ạga emitenom erumuḍio kẹki esi ọku ạga emitenom erumuḍio eelhe phọ, ọbo ạḍidoony phọ eḍighi eniin rꞌekpisi phọ oseenaan bọ rughunughun phọ Ịzirel.

⁸Ekpisi phọ ẹphen keḍighi bin dị ọkpana ọdaam mọ kạmoogh sịphe ade phọ Ịzirel, bịn ọdi kạ́kpilighiom mun weye phọ kụ kạbile ḍịeri phọ ạga eelhe phọ eḍighi ẹlo arughunughun phọ Ịzirel.

⁹Ọmoogh-we dị ạmoogh oomo ịikpo ạḅem, “Nyina mẹpioman kꞌamem dị mebia, nyina ạbudaam mọ Ịzirel. Ịbile ọwa asighiton rꞌọkpiloghom. Iḍighi ghan ịlo eḍighi elhiom ẹḅile eeleeny. Kẹ́ḅile mun éporogh weye phọ ạmi ẹsighe sịphe ade phọ ạbidi. Mị Ọmoogh-we phọ kụ rịḅeni inyina ịduon.

¹⁰“Tọrobo oye ạtooghiom ghan ọtoom ẹemor rꞌọtoom ạḍidoony dị iigbegheḍiom kẹ́tol.

¹¹“Efa ọtoom ịyaar lọ ẹgharaghar keḍighi eniin rꞌạbafu ọtoom ịyaar lọ eḍighi mụum. Ẹkar ẹdi olegheri ahomer. Ịdi kọto ghan ịduon: oniin ahomer ạman ḍioph efa kụ ạman ḍioph ạbafu.

¹²“Kọto ghan ẹemor ịduon: ịyaldi agera ẹman oniin ạsekel odiinydi ạsekel ẹman oniin amina.

¹³“Ịduon kụ ẹdi kọngo ghan inmo sịphe ibugha phọ: ọbiakpa: bin, esi odiinydi asibin abali: esi odiinydi asibin mụnum-ọliv: bin, esi oniin okuron asibin (“Ḍioph ạbafu ẹman oniin ahomer, ẹman kẹn oniin akor.) Iyool-ịga: oniin esi ịyal okuron dị ẹḍua esi ạroogho phọ Ịzirel “Nyina kẹpam etumom rịkia ịbiakpa, rịkia oguom ạnian rꞌạrikia ẹboroph ẹrol dị ọsar ịkaraph anyina ọbile. Mị Ọmoogh-we dị ạmoogh oomo ịikpo kụ mạto.

¹⁶“Oomo awe ade phọ kọpam ruunmo phọ ịphen ọkiomaan ọkpana ọdaam mọ ạda bọ Ịzirel.

¹⁷Kẹtol esi ọdi omitiom ịnam ịlo ạrikia oguom ạnian rꞌịlo ạrikia ịbiakpa, rꞌaruunmo amiim ẹlo oomo eelhe phọ Ịzirel mem ạrayaal aḍimoom ạlha phọ, ariiḍio ophooghian phọ rꞌịnon ạrayaal. Ọdi kụ kamitiom rạraar aghuḍum ootolom ịkaraph, rꞌạrikia ịbiakpa, rꞌạrikia oguom ạnian, rꞌạrikia ẹboroph ogbuurogh ịkaraph awe phọ Ịzirel.”

¹⁸Ọmoogh-we dị ạmoogh oomo ịikpo ạḅem mọ, “Ḍịḅel aḍio ọḅel ụnwanyu phọ, nạ kạpighiron ḍilephiri ạnam dị ẹgha kị́tol aselemiom Otu Ịiḅereghi phọ.

¹⁹Oyil ạrikia phọ kạsighe ẹphurukpu ịḅaal ẹkia ootolom ịkaraph phọ kụ agbul ịḅaghaghaam Otu Ịiḅereghi phọ rꞌinya ạrughulukul enmeny phọ ḅịle rꞌịḅaghaghaam ịnhu aḍibuo-ọḍua oḍigh ogiga ologhi phọ.

²⁰Oḍual aḍughul-otu ụnwanyu phọ nạ kaḍighi iniin phọ ịne, akol ẹmhu oye lọ úlegheri kụ aḍighi ịkaraph ḅịle rꞌesi élegheri-ịyaar. Areten phọ ịphen kụ ẹdi nạ kaseere Otu Ịiḅereghi phọ dọl iigbia.

²¹“Ḍioph rꞌinya aḍughul-otu ọḅel ụnwanyu phọ nyina kemiigh olhe ẹyaal ọphel otene phọ. Esi oḍual aḍughul-otu, tọrobo oye kale ạbred dị yist ụ́logh.

²²Ḍịḅel aḍio ẹyaal phọ, ọkpana ọdaam mọ ạda bọ kạpighiron ḍilephiri ạnam esi ẹkia ootolom ịkaraph ọdi rꞌịpe oomo awe phọ.

²³Tọrobo aḍio sịphe oḍual asiḍughul-otu ẹyaal phọ ọdi kạze ghan oḍual ilephiri ạsinam rꞌoḍual idughuna dị ẹgha kị́tol esi ẹkia oguom ạnian ạngo Ọmoogh-we phọ. Ọdi kakiigh ghan kẹn ekpe ḍio ḍio ḍio dị emeera ịyaar aghuḍum ootolaam ịkaraph.

²⁴Esi ạtorobo aḍilephiri ạnam rꞌodughuna dị ọphighironom ẹkia, aruunmo ḍioph oḍual rꞌạpakiri aruuku ịbiakpa rꞌịraar aruuku ạmunum-ọliv kụ kẹdapham ghan.

²⁵“Ẹlo ạrayaal arubughotu phọ, ịpe remiigh ghan bọ omuneniom aḍioph rꞌoogh aḍio omuneniom oḍual ụnwanyu, ọkpana ọdaam mọ kạngo ghan ḍio ḍio ḍio iniin phọ ạrikia mọ ootolom ịkaraph, iniin phọ ạrikia oguom ạnian rꞌiniin phọ aruunmo ịbiakpa rꞌạmunum-ọliv.”