Read abua Izikiel 46 Bible Online

Izikiel 46 - abua bible

Izikiel 46

¹Ọmoogh-we dị ạmoogh oomo ịikpo ạḅem mọ, “Ọnhu-aḍibuo ạga emitenom erumuḍio phọ ẹḍua bọ eḍigh ogiga ologhi phọ kokughi ni esi odiiny aḍughul-otu iiḍighi phọ, kụ kokughuron ḍio ophooghian rꞌẸyaal Aḍimoom Ạlha phọ.

²Ọkpana ọdaam mọ ạda bọ kạḍua ogiga erugh phọ kụ aḍigh ogbogh osoph eḍighom ọogaany ọnhu-aḍibuo phọ kụ ạmeera ọgbal ịḅaghaghaam mọ, kụ ariil ạrikia phọ ọsu ghan rịkia phọ ọdi ikpom kụ ọpighiron rịkia ẹboroph phọ ọdi. Ịsiphe phọ ọgbal ọnhu-aḍibuo phọ kụ ẹdi ọdi kạtol kụ aaseeny kụ ạḅile amite erugh. Ọnhu-aḍibuo phọ kókughi tụtu kꞌadulhe.

³Tọrobo aḍio ophooghian rꞌạtorobo Ẹyaal Aḍimoom Ạlha phọ, oomo awe phọ kokpuḍughian aani ooseeny Ọmoogh-we phọ ghisigh ọnhu-aḍibuo phọ.

⁴“Ḍio ophooghian phọ ọkpana ọdaam mọ kạsighe odiiny ạnmuny iyool-ịga rꞌoniin odughuna, oomo ịne dị ẹgha kị́tol, atuomaan Ọmoogh-we phọ esi ẹkia dị kọsu ikpom.

⁵Esi ạtorobo odughuna dị ọphighironom ẹkia, aruunmo ḍioph oḍual rꞌạpakiri aruuku ịbiakpa kụ kẹdapham ghan; ḅịle rꞌesi ạtorobo ọony oyool-ọga tọrobo ịyaar lọ ẹḅeeraan ọngo. Esi ạtorobo ẹkia ịbiakpa, aruunmo ịraar aruuku ạmunum-ọliv kụ kẹdapham ghan.

⁶Ḍio Ẹyaal Aḍimoom Ạlha phọ, ọdi kạngo onyugheel aḍilephiri ạnam, odiiny ạnmuny iyool-ịga rꞌoniin odughuna, oomo ịne dị ẹgha kị́tol.

⁷Esi ạtorobo aḍilephiri ạnam rꞌesi ạtorobo odughuna, aruunmo ḍioph oḍual rꞌạpakiri aruuku ịbiakpa kụ kẹdapham ghan; ḅịle rꞌesi ạtorobo ọony oyool-ọga tọrobo ịyaar lọ ẹḅeeraan ọngo. Esi ạtorobo ẹkia ịbiakpa, aruunmo ịraar aruuku ạmunum-ọliv kụ kẹdapham ghan.

⁸Ọkpana ọdaam mọ kamite ogbogh osoph eḍighom ọogaany ọnhu-aḍibuo phọ eniin phọ eten phọ ọdi ạḍua bọ aḍigh.

⁹“Mem lọ awe phọ oru ooseeny Ọmoogh-we phọ ḍio ạtorobo ẹyaal, bụphe ọḍua bọ ọnhu-aḍibuo ạga ephunom mọ kụ oḍigh kọḍua ọnhu-aḍibuo ạga esoorom mọ kụ omite mem dị bịdi mooseeny, kụ bụphe ọḍua bọ ọnhu-aḍibuo ạga esoorom mọ kụ oḍigh kọḍua ọnhu-aḍibuo ạga ephunom mọ kụ omite. Oye kụ́tol dị kakiton eniin eten aḍigh kụ kạḅile akiton sịphe phọ amite, ọdi ạmoogh okiton ẹlo edi ẹḅeenyom.

¹⁰Ọkpana ọdaam mọ kaḍigh mem lọ awe phọ oḍigh, kụ amite mem lọ bịdi ọḍua.

¹¹Riiḍio ile rꞌạrayaal, esi ạtorobo aḍilephiri ạnam rꞌesi ạtorobo odughuna, ạrikia ịbiakpa ḍioph oḍual rꞌạpakiri aruuku ịbiakpa kụ kẹdapham ghan; ḅịle rꞌesi ạtorobo oyool-ọga tọrobo ịyaar lọ ẹḅeeraan ọngo. Esi ạtorobo ẹkia ịbiakpa, aruunmo ịraar aruuku ạmunum-ọliv kụ kẹdapham ghan.

¹²“Mem lọ ọkpana ọdaam mọ ạda bọ rạwa ọngo Ọmoogh-we phọ ịlo eḍigh ologhi ọdi, iini ẹkia oguom ạnian mꞌẹkia ẹboroph, kokughuronaan nyọdi ọnhu-aḍibuo ạga emitenom erumuḍio phọ mọ aḍigh ogiga ologhi phọ. Ọdi kạpighironom ẹkia iniin eḍighinom mọ ọdi aḍighi bọ ḍio ophooghian phọ, kụ kokughi ọnhu-aḍibuo phọ mem dị ọdi mamite.”

¹³Ọmoogh-we phọ ạḅem mọ, “Tọrobo ạḍiroor ọony oyool-ọga lọ ạman ḍiniin ạlha dị ẹgha úḍigh kụ ẹdi kọsu ikpom dị keḍighi ẹkia Ọmoogh-we phọ. Ẹkia phọ ẹphen koḍighi ghan tọrobo aḍio.

¹⁴Ḅịle kẹn, ẹkia ịyal igbogh ịtoom ịgbieneen ịbiakpa kụ ẹdi koḍighi ghan ḍịroor ạḍiroor, ọḅaram eeku ạmunum-ọliv dị kokironom ghan ịbiakpa phọ. Iilogh ẹkia phọ dị ọngo Ọmoogh-we phọ kẹtol kꞌagee-pọ.

¹⁵Ọony oyool-ọga phọ, ịbiakpa phọ rꞌạmunum-ọliv phọ kọngo Ọmoogh-we phọ tọrobo ạḍiroor tụtu kꞌagee-pọ.”

¹⁶Ọmoogh-we dị ạmoogh oomo ịikpo ạto: “Eḍighi ịyaar lọ ọkpana ọdaam mọ ạda bọ kụ ạngo ekulha ade dị ọdi ạmoogh nyoniin ọony ọdi ịdipho ịyaar dị ọngaani, pọ keḍighi ẹlo ọony phọ eḍighi ịyaar eghunotu ọdi.

¹⁷Kụ eḍighi ịyaar dị ọkpana ọdaam mọ ạda bọ ạngo tọrobo ekulha ade ọdi oye lọ raḍighinaan oḍighi nyọdi, kẹḅile eḍighi ẹlo ọkpana ọdaam mọ mem dị Ạlha Oḅulemi Ạraraar ẹteeny. Ẹlo ọdi, kụ ọdi rꞌạnmuny ọdi kụ kọmoogh bịn.

¹⁸Ọkpana ọdaam mọ ạda bọ kạ́sighe ruphua awe phọ rạghaagh ạbidi. Tọrobo ade lọ ọdi ạngo nmụny ọdi keḍighi ẹkpigh ade ịsiphe ọngo bọ nyọdi ọbo ọdi kạkpiloghom ghan bọ tọrobo ọnyo awe phọ ạmi reten oziton ade ạbidi.”

¹⁹Kụ oye phọ ụsighe ịmi ạghimom eḍighom iisoph phọ repogh bọ ephunom mọ dị etuman ọnhu-aḍibuo ạga esoorom ogiga ologhi phọ. Ịphen iisoph iigbia ariil ạrikia phọ. Ọdi ạma esi ạga emeelom erumuḍio iisoph phọ,

²⁰kụ ạḅem mọ, “Ịsien kụ esi phọ ariil ạrikia phọ kọsa ghan bọ iphulupul ẹnam dị kọpighironom ẹkia ootolom ịkaraph ḅịle rꞌịlo ạrikia ọkpe-oḅulemi phọ, ọḅile ọgbaghaḍi ịgbieneen ịbiakpa ẹkia, ọbo kọsighe ghan bọ ịyaar iigbia ọkimom ogiga erugh phọ, esi lọ keḍighi ịyaar weye phọ.”

²¹Kụ ọdi urelhiom ịmi ạghimom ogiga erugh phọ kụ uḍeenaan ịmi mọ tọrobo eniin sịphe inya ạrughulukul phọ, ọbam ogiga ạrol li dị ẹman ịyaldi akuḅu ḍịdoony ḅịle ḍioph rꞌoogh akuḅu ẹreghe.

²³Tọrobo ọbam ogiga ạmoogh iikpe asighiigh dị ekoom, rꞌariisi ọkpooni ạnian dị ọlogh ọkpaariom.

²⁴Oye phọ ụḅeni ịmi mọ, “Ịphen kụ ariisi ịisa phọ abutelhedom Otu Ịiḅereghi phọ kọsa ghan bọ rịkia lọ awe phọ ọngo.”