Read abua Izikiel 47 Bible Online

Izikiel 47 - abua bible

Izikiel 47

¹Oye phọ urelhiom ịmi aḅula eḍighom Otu Ịiḅereghi phọ. Ạmuum ạḍua eeḍian eḍighom mọ amite kụ akil rạki ạga emitenom erumuḍio, ạga phọ Otu Ịiḅereghi phọ aphogh bọ. Ạḍua ạga esoorom Otu Ịiḅereghi phọ kụ ạḅeeny ạga esoorom enmeny ẹkia phọ.

²Kụ oye phọ ụsighe ịmi amitenom ekool Otu Ịiḅereghi eten ọnhu-aḍibuo ạga ephunom mọ kụ uugoom ịmi asiom ọnhu-aḍibuo phọ aphogh bọ ạga emitenom erumuḍio phọ. Ạḍibam aḍikol ạmuum ịrol dị ạmuum akil ramite ọnhu-aḍibuo ạga esoorom mọ.

³Rꞌoreeny-ọtoom ọdi, ọdi ạto oogh okuron akuḅu asoor ẹpe ạmuum mọ akil bọ rạki ạga emitenom erumuḍio phọ kụ ụḅeni ịmi mọ mị ụguph ḍikol phọ ụḅeeny. Ạmuum mọ asi rịikpighonu.

⁴Kụ ọdi ạḅile ạto ịnon oogh okuron akuḅu, kụ ạmuum mọ asi ruukum ạmi. Ọnon oogh okuron akuḅu ọghiom ghisigh, ạmuum ạteeny esin ạmi.

⁵Kụ ọdi ạḅile ạto ịnon oogh okuron akuḅu, ịsiphe kụ ẹdi esi phọ ẹkel ude dị mị útue ụ́guph úten. Ịkel ẹphughan ọḅeeny emuton ọmughi.

⁶Ọdi ụḅeni ịmi mọ, “Oye dị kamugh ni, mạar aphogh oomo phọ ịphen.” Kụ oye phọ urelhiom ịmi aḅula ọgbal ọphiiny phọ.

⁷Kụ mem dị asi sịphe, mị ụmiin ni mọ ịbadibadi ireeny kụ edi iigbom ọphiiny phọ, pạkiri elhiom rꞌekeeny.

⁸Ọdi ụḅeni ịmi mọ, “Ạmuum mọ ạmuen akil rạḅeeny de phọ kụ asi emitenom erumuḍio phọ kụ asoor Eḍiiny ạJodan kụ asoor Ọphiiny-Ạla. Ọdi anmiom mụum ạla Ọphiiny-Ạla phọ mụbo ạmuum.

⁹Tọrobo ekpisi lọ aḍikol phọ ekil ẹghi, ọdo kịrokiro ịnam rꞌina kụ kẹtol. Aḍikol phọ keḍighi ịdi ạmuum Ọphiiny-Ạla phọ bọ katen mụo ighool, kụ tọrobo ekpisi lọ akil ạghi, kạngo ghuḍum.

¹⁰Emiigh kꞌẠruunu Adir En Gedi kụ esi Rụunu Adir En Eglaim, ạbukoniom ina kọtol ọgbal ọphiiny phọ, kụ bịdi ọtere yogh ịzuguru ạbidi sịphe mọ ẹgharaghar. Ịbadibadi ọdo ina kemuza sịphe ịdipho emuza bọ Ọphiiny aMeditarenian phọ.

¹¹Kụ ọlo ạmuum mọ odi bọ ologhi ịtoḅo phọ rꞌạruunu ọgbal ọphiiny phọ kótene mun mụo ighool. Kạtol sịphe aḍighi esi dị komitiom ghan boph.

¹²Tọrobo ọgbal ọphiiny phọ ọdo kịrokiro ireeny kesi ni dị kẹngo eḍien. Ạrinya phọ kékeel ọnam, kụ késophe omuum iimuma. Bịdi kemuum ghan imoom iimuma tọrobo ụnwanyu loor esi dị ạmuum odi ghan loor ạbidi dị ạḍua ḍikol ạmuum Otu Ịiḅereghi phọ kụ aru. Ireeny phọ kemitiom ghan eḍien kụ kọsighe rịnya phọ ạbidi ookonomom weye.”

¹³Ọmoogh-we dị ạmoogh oomo ịikpo ạḅem mọ, “Ịphen kụ ạruuku ade phọ kodiemi bọ ḍioph rꞌịyal arughunughun phọ, dị eghun phọ ạJosef ọmoogh ịyal asibin.

¹⁴Mị ughunya ni rꞌạburude ạburude anyina mọ mị kạngo bịdi bin ẹmoogh sịen ade phọ aḍien; nyịidipho idian eelemi ẹngo siloor anyina.

¹⁵“Ọku ạga ephunom mọ ạki ạga emitenom erumuḍio amiigh kꞌỌphiiny aMediterenian kụ asi ẹmha aHetlon, rꞌEḍighom ạHamat, rꞌẹmha aZedad,

¹⁶ḅịle rꞌạramha aBerota rꞌaSibraim (ịphen phọ kọmiin ịbaay eelhe ọmar phọ ạDamaskos rꞌeelhe ọmar phọ ạHamat), kụ ẹki esi ẹmha aTikon (dị etuman ọku ọmar phọ aHauran).

¹⁷Ịduon kụ ẹdi ọku ạga ephunom mọ amiigh kꞌỌphiiny aMeditarenian ạki ạga emitenom erumuḍio phọ kụ asi ẹmha phọ Enon, rꞌarere ạDamaskos phọ etuman bọ Hạmat edi ạga ephunom mọ.

¹⁸“Ọku ạga emitenom erumuḍio phọ ạki esoorom emiigh kꞌeniin esi ịbaay ade phọ ạDamaskos rꞌade phọ aHauran, rꞌỌphiiny ạJodan dị aḍighi ọku ade phọ Ịzirel ạga emeelom erumuḍio rꞌạGiliad ạga emitenom erumuḍio, kụ ẹghi esi Tạmar ẹpe Ọphiiny-Ạla phọ.

¹⁹“Ọku ạga esoorom ạki ogbo ạga esoorom rꞌạga emeelom erumuḍio emiigh kꞌạTamar kụ esi ebaraph ạmuum mọ aKades Meriba, kụ ẹghi ogbo ạga ephunom rꞌạga emeelom erumuḍio sịphe ọku Ijipt kụ ẹghi esi Ọphiiny aMeditarenian phọ.

²⁰“Ọku ạga emeelom erumuḍio, Ọphiiny aMeditarenian kụ aḅegh kụ anyeene ephunom ạki asi esi ạga emeelom erumuḍio Eḍighom ạHamat.

²¹“Idian de phọ aḍien eelemi ẹngo rughunughun phọ anyina;

²²keḍighi bin ẹmoogh anyina. Aruuruen lọ odianan rꞌanyina kụ mọmar nmụny sịen kọmoogh aani ni bin ade phọ mem dị nyina edian. Kopoghom bịdi ekpeḍien dị bịdi ọkar oḍighi bụo Ịzirel kụ kodi ẹdo kụ opinom bin ade phọ rꞌarughunughun phọ Ịzirel.

²³Tọrobo ooruen kụ odi sịphe ade phọ kapin aani ịdipho awe eghun phọ ọdi ophin bọ. Mị Ọmoogh-we dị ạmoogh oomo ịikpo kụ mạḅem.”