Read abua Izikiel 48 Bible Online

Izikiel 48 - abua bible

Izikiel 48

¹Ọku ạga ephunom mọ ạki ạga emitenom erumuḍio ạḍua Ọphiiny aMeditarenian kụ asi ẹmha aHetlon rꞌEḍighom ạHamat, rꞌẹmha Enon kụ ạteeny ọku ogbo ạramar ạDamaskos rꞌạHamat. Tọrobo eghun kẹsighe ghan eniin ẹkpigh ade dị emiigh kꞌọku ạga emitenom erumuḍio kụ ẹki ạga emeelom erumuḍio kụ egbi ọteeny Ọphiiny aMeditarenian, ọdaphan ịduon ẹḍua ephunom kụ ẹteeny esoorom: Dạn Ạser Nạftalai Mạnase Ifraim Ruben Juda

⁸Ẹpheri phọ ẹkpigh ade phọ koseere kịro dị koḍighinom egey ịyaar. Kẹman ḍioph ịyal rꞌạpakiri itobi ẹreghe emiigh kꞌephunom kụ ẹteeny esoorom. Ạḍidoony phọ, emiigh kꞌemitenom erumuḍio kụ esi emeelom erumuḍio, keḍighi ḍiniin rꞌạḍiphe ọngo bọ rughunughun phọ. Otu Ịiḅereghi phọ kạtol li sịphe ẹkpigh phọ ẹphen.

⁹Ọkar ogbo ẹkpigh phọ ẹphen, ẹdi ọsaḅar oseere ḍioph ịyal rꞌạpakiri itobi ḍịdoony ḍioph itobi ẹreghe kụ ẹdi kọḅogh ọngo Ọmoogh-we phọ.

¹⁰Ạbupinyon rịkia phọ kọmoogh ni ẹkpigh esi iigbia phọ ẹphen. Emiigh emitenom erumuḍio kụ esi emeelom, abin ạbidi kaḍighi ḍioph ịyal rꞌạpakiri itobi, kụ emiigh ephunom kụ esi esoorom oogh itobi. Otu Ịiḅereghi Ọmoogh-we phọ kạtol ogbo ekpisi phọ.

¹¹Ekpisi iigbia phọ ẹphen kẹtolonaan bụpinyon rịkia ạbuo ẹemara ẹemara ạZedok. Bịdi ukumu ịmi rꞌoomo ologhi ạbidi kụ ụ́daph bụeri phọ awe phọ Ịzirel oḍighi ghan ịkaraph, ịdipho bụeri phọ ạbuo eghun aLivai oḍighi bọ.

¹²Loor esi ịduon phọ, bịdi kọmoogh ekpisi dị ọsaḅar kụ etuman ẹlo ạbuo aLivai, kụ kẹkar eḍighi esi iigbia dị epu oomo ịne.

¹³Ạbuo aLivai phọ kẹn kọmoogh ekpisi dị ọsaḅar, ạga esoorom ẹpe ariil ạrikia phọ. Ẹpe phọ kẹn keḍighi ḍioph ịyal rꞌạpakiri itobi ẹḍua emitenom erumuḍio kụ ẹteeny emeelom, kụ oogh itobi ẹḍua ephunom kụ ẹteeny esoorom.

¹⁴Ekpisi phọ oseenaan bọ Ọmoogh-we phọ kụ ịkar ẹnighe oomo ade phọ, kụ rꞌeniin kẹ́tol dị kobool, koonmenenom ḅịle koḅughe ọngo ọnon oye. Eḍighi esi iigbia kụ keḍighi ẹlo Ọmoogh-we phọ bịn.

¹⁵Ẹkpigh sịphe ekpisi phọ ọsaḅar bọ dị esugha, nyẹpe ẹman bọ ḍioph ḍioph ịyal rꞌạpakiri itobi ḍịdoony ịyal rꞌạpakiri itobi ẹreghe, íḍighi esi iigbia, kụ ọlo eḍighi esi oomo awe. Ẹnighe ni dị bịdi kotugh sịphe kụ oḅeph ghan de phọ. Egbogh ẹmha phọ kẹtol sịphe ogbo ekpisi phọ,

¹⁶kụ keeleeny oomo ịigaany, dị ọto ịyal ọonir rꞌịyal okuron rꞌooghdi akuḅu tọrobo ọogaany.

¹⁷Okoom ẹmha phọ tọrobo ọogaany ẹyaghaghaany esi kẹtol li dị ẹman oniin okuron ịyaldi rꞌoogh akuḅu dị egborori ẹḅeeny.

¹⁸Ade dị esugha, mem dị mọlhogh ẹmha phọ, ekpisi phọ ẹpe ẹkar bọ eḅegheri esoorom ekpisi iigbia phọ — oogh itobi ḍịdoony ịyal rꞌạpakiri itobi ẹreghe ạga emitenom erumuḍio phọ ḅịle oogh itobi ḍịdoony ịyal rꞌạpakiri itobi ẹreghe ạga emeelom erumuḍio phọ — keḍighi esi dị awe phọ kotugh bọ sịphe ẹmha phọ koḅeph ghan iizo.

¹⁹Ẹnighe dị tọrobo oye lọ arugh sịphe ẹmha phọ, úgbi eghun dị oye phọ odianan, kaḅeph ni ozo sịphe ade phọ ạḍiphe.

²⁰Kụ oomo ekpisi phọ edi bọ sịphe ogbo ẹkpigh phọ ọsaḅar bọ oseere keeleeny oomo ịigaany, ḍioph rꞌịyal rꞌegbem itobi tọrobo ọogaany, kụ kẹḅaram ekool phọ ẹmha phọ edi bọ.

²¹Ọghi emitenom rꞌemeelom erumuḍio phọ riisi phọ ịpe Otu Ịiḅereghi phọ, ade ariil ạrikia phọ, ade ạbuo aLivai phọ, rꞌẹmha phọ ediighi bọ, ade phọ esugha bọ ạḍio ọkpana ọdaam mọ ạda bọ. Ade phọ eḅegheri ạga emitenom erumuḍio kụ ẹteeny ọku emitenom erumuḍio phọ, ẹḅile eḅegheri ạga emeelom erumuḍio kụ ẹteeny Ọphiiny aMeditarenian. Ẹkuan ẹpe ephunom mọ rꞌẹkpigh phọ eḍighi bọ ẹlo aJuda; ẹḅile ẹkuan ẹpe esoorom mọ rꞌẹkpigh phọ eḍighi bọ ẹlo ạBenjamin.

²³Ạga esoorom ẹkpigh phọ ẹphen ọsaḅar bọ oseere, tọrobo ọnyo arughunughun phọ esugha bọ kạsighe ghan eniin ẹkpigh ade dị emiigh kꞌọku ạga emitenom erumuḍio kụ ẹki ạga emeelom erumuḍio kụ egbi ọteeny Ọphiiny aMediterenian, ọdaphan ịduon ẹḍua ephunom kụ ẹteeny esoorom: Bẹnjamin Sịmion Ịsaka Zẹbiulon Gạd

²⁸Ạga esoorom ẹkpigh phọ ọngo bọ eghun ạGad, ọku phọ ạki ogbo ạga esoorom rꞌạga emeelom erumuḍio emiigh kꞌạTamar kụ esi ebaraph ạmuum mọ aKades, kụ ẹghi ogbo ạga ephunom rꞌạga emeelom erumuḍio sịphe ọku Ijipt kụ ẹghi esi Ọphiiny aMeditarenian phọ.

²⁹Ọmoogh-we dị ạmoogh oomo ịikpo ạḅem mọ, “Ịpe kụ ịdi kodi de phọ rịikpigh kụ ọngo rughunughun phọ Ịzirel mọ ọmooghogh.”

³⁰Edi bọ ḍioph rꞌịyal ariḍighom osi ẹmha phọ aJeruselem. Tọrobo iikpe esi inya phọ ạbidi ịman ghan ịyal ọonir rꞌịyal okuron rꞌooghdi akuḅu kụ ẹmoogh ịraar arughuugh, tọrobo eghuugh ughol ọgbagham eniin eghun. Rughuugh iikpe ạga ephunom mọ ughol ọgbagham Ruben, Juda rꞌaLivai; ịpe iikpe ạga emitenom erumuḍio phọ ughol ọgbagham Jọsef, Bẹnjamin rꞌạDan; ịpe iikpe ạga esoorom mọ ughol ọgbagham Sịmion, Ịsaka rꞌạZebiulon; rꞌịpe iikpe emeelom erumuḍio phọ ughol ọgbagham Gạd, Ạser rꞌạNaftalai.

³⁵Oomo ạḍidoony iikpe inya ịigaany ẹmha phọ ịman esugha ọonir akuḅu. Aḍien ẹmha phọ emiigh kꞌạnyiidipho kụ ẹghiom ghisigh keḍighi, “Ọmoogh-we Phọ Odi Ni Sịen!”