Read abua Izikiel 5 Bible Online

Izikiel 5 - abua bible

Izikiel 5

¹Ọmoogh-we phọ ạḅem mọ, “Oye dị kamugh ni, sịghe elhool lọ eroph kụ aghulaam ọleem ạna rꞌoomo ạsilaal ẹmhu ạna. Kụ agbi ọlogh ạsilaal phọ esi ọtoom ẹemor kụ adi esi ịraar abin.

²Sụ nịan muniin abin sịphe ẹmha phọ mem dị oghoonyom mọ maten. Sịghe mụnon abin ạkiriph rꞌelhool ạna mem dị nạ ratelhe yogh ọgbal ẹmha phọ. Wạawalami mụphe osugha bọ ạngo ookuugh; kụ mị aporoghom rꞌelhool ạmi.

³Seere ọman ẹphurukpu ạsilaal kụ aphurughiom ẹsoph ukpe.

⁴Reru reten, ḅịle ạsighe ẹphurukpu asumeeny ụnian ọdi ẹemor. Esi ạbidi kụ ẹdi ạnian phọ keemor kụ eleeny ẹki oomo phọ eelhe Ịzirel.”

⁵Ọkar Ogbogh Ọmoogh-we phọ ạḅem, “Pogh Jeruselem. Mị useere nyọdi sịphe ogbo aḅirini phọ kụ ịnon areelhe ekoom nyọdi.

⁶Kụ ọlo aJeruselem ạḅaar ẹmhu esi ịtooghi phọ ạmi kụ aḍeenaan mọ ọno kụ eeph apu ịpheri phọ areelhe phọ, ạḅile aḍighi ẹ́naghanan apu reelhe phọ ekoom bọ nyịno. AJeruselem aghel ịtooghi ạmi kụ ómeera ooko iilogh phọ ạmi.

⁷Nyịidipho, ler rụru, Jeruselem, esi ịphen mị Ọkar Ogbogh Ọmoogh-we phọ rạḅem bọ. Esi émeera ọnaghanan iilogh phọ ạmi rꞌẹ́pamaghan ịtooghi phọ ạmi, nạ maḍighi igbogh ịiḅaghami apuemi reelhe phọ ekitonom bọ nyịna. Nạ mạdaph eḍighinom ạraraar ịnon areelhe.

⁸Kụ esi ịduon phọ mị Ọkar Ogbogh Ọmoogh-we phọ rạḅeni nyịna mọ mị ạmulogh-ḍien ạna. Mị kasoph ọoruen ạngo nyịna ekpisi dị oomo areelhe phọ kọmiin.

⁹Loor esi oomo ạraraar phọ ikia bọ ịmi kụ nạ raḍighi ghan bọ, mị kạliom ni Jeruselem ịdi mị kőḍighi ghan kụ káḍighi mun.

¹⁰Loor esi ịduon phọ, ạburude rꞌaburunhiin sịphe Jeruselem kọba nmụny ạbidi, ḅịle ạnmuny kọba bụrude rꞌaburunhiin ạbidi. Mị kạliom nyịna kụ ạwalalami bụlo úmugh ạkiom rikpisi kịrokiro.

¹¹“Kụ iḍighi, kụ esi ịduon mị aḍighi bọ Ẹnaan phọ edi ghan bọ — ẹphen kụ ekpo ọnhu Ọkar Ogbogh Ọmoogh-we phọ — loor esi dị nạ mạapuom Otu Ịiḅereghi ạmi oomo ịkaraph ạraraar isa phọ nạ aḍighi yogh bọ, mị kasoph nyịna aler ịdi ọnma ighirigiir kạ́tol.

¹²Amuniin abin esi ịraar awe phọ ạna komuughu ni esi ẹzegh rꞌọkoony sịphe ẹmha phọ; muniin abin esi ịraar phọ koogboom rolhool ẹgham oler ude ọgbal ẹmha phọ; kụ mị kạawalami mụphe asugha bọ ạngo ookuugh phọ kụ aporoghom elhool ẹgham.

¹³“Nạ kaloghoma ni oomo ịikpo ofughughuuny rꞌọghagh ologhi phọ ạmi tụtu ịgbaanyan ịmi. Mem dị oomo phọ ịphen kụ memite, nạ kameeraam ni mọ mị Ọmoogh-we phọ mạḅaanaan nyịna ịdi eḍighi bọ ọghagh ologhi ạmi mạbugh esi iloghi émeeraam mọ ạna.

¹⁴Tọrobo ọlo ạḍua reelhe phọ ekoom bọ nyịna dị aten kạnmirom ni aphogh nyịna kụ ạgbol ạkel.

¹⁵“Mem dị mị ạsighe ofughughuuny rꞌophin ologhi phọ ạmi kụ ạliom nyịna, oomo areelhe phọ ekitonom bọ nyịna kekiilaan ni. Bịdi kophogh nyịna rꞌaḍiboom aḍikia kụ ogbi ọnmoghoghoom.

¹⁶Mị kaḍue ni reten ọmooghom eḍien phọ ạna kụ nạ ạtol ọkoony. Eephina ọkoony phọ kẹkigh esi ạna ịdipho ịkpina dị ọraph oghiighom ạna.

¹⁷Mị katom ọkoony rꞌilhom ịnam ọze ạnmuny ạna, kụ mị ạḅile atom ẹzegh, mụkpoogh ologhi rꞌẹgham oghiigh ạna. Mị Ọmoogh-we phọ kụ mạḅem.”