Read abua Izikiel 6 Bible Online

Izikiel 6 - abua bible

Izikiel 6

¹Ọmoogh-we phọ ụḅeni ni ịmi mọ,

²“Oye dị kamugh ni, pogh ạghiom ẹpe ạraaḅaraph phọ Ịzirel kụ ạngo bịdi dom mọ ạmi.

³Ḅẹni rạaḅaraph phọ Ịzirel mọ ọnaghan ikpo ọnhu phọ Ọmoogh-we phọ — ọnaghan ịpe mị Ọmoogh-we dị ạmoogh oomo ịikpo rạḅeni bọ rạaḅaraph rꞌaroogbolom rꞌasikol rꞌariḍiiny phọ: mị katom elhool ẹgham ọghi ophiemi ariisi phọ ịpe awe rooseeny ghan bọ ịkaaghineen ạrumugh phọ.

⁴Renmeny ạrikia phọ kokirion ni ozuemi ude kụ renmeny ịnsens phọ oḅomoghi. Oomo awe phọ odi bọ sịphe kọze ni sịphe esomanan ịkaaghineen ạrumugh phọ ạbidi.

⁵Mị kạawalami ni iḍim awe phọ Ịzirel; mị kạawalami ni ịḅarara phọ ạbidi akitonom renmeny phọ.

⁶Oomo ạramha phọ Ịzirel kopiemi ni, ọbo oomo arenmeny phọ ạbidi rꞌịkaaghineen ạrumugh phọ ạbidi ọgbe eḍighi ịpherepe, renmeny ịnsens phọ ạbidi oḅomoghi, ḅịle tọrobo ịyaar dị bịdi oḍighi kepe ni.

⁷Kọze ni we tọrobo ekpisi, kụ bụlo osugha komeeraam ni mọ mị kụ Ọmoogh-we phọ.

⁸“Mị kameera ni abuniin okpetenaan ịizian phọ kụ ọwalalami bịdi ogbo areelhe phọ,

⁹ekpisi dị bịdi kọtol dọl iiruen. Ẹpe bịdi kụutughian ni ịmi kụ olegheri mọ mị kụ ụliom bọ ni bụno ạḅile aafolomi bụno, ịdi eḍighi bọ iloghi émeeraam mọ ạbidi ịwile ịmi kụ bịdi ọsighe ịkaaghineen ạrumugh kpạripe rꞌạmi. Kụ bịdi kọḍagha ni siloor ạbidi esi ịkaraph ạraraar omutonaan-ephoogh phọ bịdi moḍighi bọ.

¹⁰Bịdi kolegheri ni mọ mị kụ Ọmoogh-we phọ ḅịle mọ ọphur ạruru phọ ạmi óḍighi oopho ọpaar.”

¹¹Ọmoogh-we dị ạmoogh oomo ịikpo ạḅem mọ, “Piliphiil rạghaagh ạna! Kpạakpa rạda ạna! Moghi esi ọto loor ẹmhu oomo ịkaraph ạraraar isa phọ awe phọ Ịzirel moḍigh yogh bọ. Bịdi komuughu ni esi ẹgham, esi ịgbakuro rꞌesi ạreezegh.

¹²Bụphe ọkelan bọ komeelom ẹzegh kụ omugh; bụphe oosulom bọ ẹgham kụ kẹze; bụlo osugha ọkoony kụ kạze. Bịdi kologhoma ni oomo ịikpo ọghagh ologhi phọ ạmi.

¹³Iḍim kẹwalala ni igbo ịkaaghineen ạrumugh phọ kụ ekitonom renmeny ạrikia phọ, ẹwalala ạnyu ạtorobo eegbolom dị ephoph, ạnyu ạtorobo ẹeḅaraph, eeḍian ạtorobo oḍiil oreeny rꞌạtorobo aḍigbogh ạḍiogh, rꞌạtorobo esi lọ bịdi ọphinyon ghan rịkia oguom nịan ọngo ịkaaghineen ạrumugh phọ ạbidi. Pọ kụ amem dị tọrobo oye kalegheri mọ mị kụ Ọmoogh-we phọ.

¹⁴Agey ni, mị kạgbuton amitiom ḍịghaagh ạmi kụ apiemi eelhe ạbidi. Amarugh phọ ạbidi kaḍighi ọkpagha emiigh kꞌẹdala ẹpe ạga esoorom mọ kụ ẹghi esi ẹmha aRibla ẹpe ạga ephunom mọ, kósugheeny rꞌeniin esi dị awe phọ Ịzirel orugh. Pọ kụ amem dị tọrobo oye kalegheri mọ mị kụ Ọmoogh-we phọ.”