Read abua Izikiel 8 Bible Online

Izikiel 8 - abua bible

Izikiel 8

¹Omuneniom oogh aḍio omuneniom odiiny ụnwanyu esi ạlha dị emuneniom odiiny kꞌamem mọ ụsighe bọ iyoor ọḍuanam ẹpe Juda ọrolomi dọl iiruen, abuḍiemiom mọ ayoor uru ni ookpomoghan ologhi otu ạmi rꞌạmi. Ekperenom bịn ịikpo Ọmoogh-we dị ạmoogh oomo ịikpo eru esi ạmi.

²Mị aphogh ạnyu kụ ạmiin uḍien nịan dị ẹghigh oye. Emiigh esin phọ esoor ọdi ạghigh nịan, kụ emiigh esin phọ ẹghi ạnyu, ọdi rạmu ịdipho enaba dị ogbuur.

³Ọdi asele amitiom ịyaar dị ẹghigh ḍịghaagh kụ aḍur sịlaal ạmi. Esi uḍien kụ uwaloor Ẹnaan uphoophe ịmi ạghiom okuaḍio kụ useere ịmi Jeruselem. Ọdi ụsighe ịmi ạghi ọnhu-aḍibuo ologhi ẹpe ephunom mọ, sịphe Otu Ịiḅereghi phọ, esi dị oseere ẹkaaneen ẹmugh, dị ẹghagh ologhi Ẹnaan iboom.

⁴Sịphe mị ạmiin ḍịḅaal phọ rẹtaphan bọ dị eḍeenaan bọ esomanan Ẹnaan phọ Ịzirel, ọkaraghi ịdipho mị mạmiin ghan bọ mem mọ ọpo mị ạrol bọ ọgbal Ọphiiny aKebar.

⁵Ẹnaan ịḅeni ịmi mọ, “Oye dị kamugh ni, pogh ạghiom ẹpe ephunom mọ.” Mị aphogh kụ sịphe etuman bọ enmeny ạrikia sịphe ọnhu-aḍibuo eḍighom mọ mị ạmiin ẹkaaneen ẹmugh phọ eḍighi bọ ọghagh ologhi Ẹnaan.

⁶Ẹnaan ịḅeni ịmi mọ, “Oye dị kamugh ni, nạ rạmiin ni ịphen remite bọ ḍụghum? Mịin rạraar isa phọ awe phọ Ịzirel roḍighi yogh bọ sịen, ruphorogh ghan ịmi kọkele ọḅile ọkele sịphe esi iigbia phọ ạmi. Nạ kạmiin ni ghạlamo ạraraar dị eḍighi roofola epu ịphen phọ.”

⁷Ọdi ụsighe ịmi ạghi eḍighom ogiga erugh phọ kụ uḍeenaan ịmi epogh sịphe aḅidi phọ.

⁸Ọdi ạḅem mọ, “Oye dị kamugh ni, bạay ḅidi phọ sịen akputon.” Mị ạay akputon kụ ạmiin eghuugh.

⁹Ọdi ụḅeni ịmi mọ, “Kịa aḍigh ologhi kụ aphogh ịkaraph ạraraar isa dị bịdi roḍighi sịphe.”

¹⁰Esi ịduon phọ mị ạghi ologhi kụ aphogh. Iikpe phọ uukpereghiom rꞌịkaaghineen ạrakaraph-ịyaar rꞌịnon ịnam dị ị́ḅaal ḅịle rꞌịpheri phọ ạraraar phọ ịpe awe phọ Ịzirel ooseeny ghan bọ.

¹¹Oḍualdi abuḍiemiom Ịzirel ụrol li sịphe, ọḅaram Jaazanaya ọony aSafan. Tọrobo ọnyo ạbidi ạpham ịyaar ọsuom ịnsens kụ ạmughi ramite ghan sịphe ịnsens phọ.

¹²Ẹnaan ipuru ịmi mọ, “Oye dị kamugh ni, nạ ạmiin ni ịpe abuḍiemiom mọ Ịzirel roḍighi bọ esi ịbooghian? Oomo phọ ạbidi rooseeny ghan ologhi osoph dị ịkaaghineen ạrumugh emuza. Bịdi rọgba ghan mọ, ‘Ọmoogh-we phọ iyoor rụ́miin ghan! Ọdi mạwile eelhe phọ.’”

¹³Pọ kụ amem dị Ọmoogh-we phọ ụḅeni ịmi mọ, “Nạ kạmiin ịdi bịdi koḍighi ghạlamo ạraraar ophin ologhi dị epu ịpe.”

¹⁴Kụ ọdi ụsighe ịmi ạghi ọnhu-aḍibuo ạga ephunom Otu Ịiḅereghi phọ kụ uḍeenaan ịmi nmạriir dị romoghi esi aḍuugh phọ aTamuz, ẹkaaneen ẹmugh phọ.

¹⁵Ọdi apuru mọ, “Oye dị kamugh ni, nạ ạmiin ni ịpe phọ? Nạ kạmiin ghạlamo ịnon ạraraar isa dị eeph epu.”

¹⁶Kụ ọdi ụsighe ịmi ạghi ogiga ologhi Otu Ịiḅereghi phọ. Sịphe etuman bọ eḍighom Ạdol Iigbia phọ, ịbaay enmeny phọ rꞌeten orelhe phọ, ụrol ḍita dị ịghiom ni ịyaldi rꞌoogh awe. Bịdi mọgumom rạman ạbidi sịphe Ạdol Iigbia phọ kụ rokpuḍian kosoorom ọghiom ẹpe erumuḍio phọ remite ghan bọ, rooseeny ghan erumuḍio phọ remite bọ.

¹⁷Ọmoogh-we phọ ụḅeni ịmi mọ, “Oye dị kamugh ni, nạ ạmiin ni ịpe phọ? We aJuda phọ ạbuen ị́gbaanyan oḍighi ghan oomo ạraraar ophin ologhi phọ nạ mạmiin bọ sịen ḅịle roleenye ạmuukpoogh oomo eelhe phọ. Eeye, bịdi moru roḍighi rạraar isa phọ ịphen sịen ologhi Otu Ịiḅereghi phọ rꞌaloor kụ rụngo ịmi ọghagh ologhi dị ạpughan. Mịin ịdi bịdi ụgilaam ịmi esi ọkaraghi eten dị ẹkpianaan ịlo ophin ologhi.

¹⁸Bịdi kologhoma ni oomo ịikpo ọghagh ologhi phọ ạmi. Mị kạ́bilenaan bịdi mꞌoḍeenaan ạbidi rꞌẹnum ọnma ighirigiir. Bịdi kọlooghi ịiḅereghi ụngo ịmi ịlo bịdi kotue, kụ ọlo mị káler rụru ạ́ngo bịdi.”