Read abua Izikiel 9 Bible Online

Izikiel 9 - abua bible

Izikiel 9

¹Pọ kụ amem dị mị ạnaghan Ẹnaan dị ẹlo mọ, “Itu ẹphen, nyina awe phọ ạbuphe kọmiine bọ ẹmha phọ. Ịsighe rẹenema phọ anyina erumom.”

²Egina amem bịn odiiny awe ụḍua ni ẹpe ọnhu-aḍibuo erugh ọpo ephunom Otu Ịiḅereghi phọ oru, tọrobo ọnyo ạbidi ạpam ẹenema. Rꞌạbidi ạrol li oye dị aanmenan ịyegheyeghe arukpe, ạpam ịyaar ọgeom. Oomo phọ ạbidi oru kụ ọmeera ọogaany enmeny enaba phọ.

³Pọ kụ amem dị ạḍiḅaal phọ rẹtaphan bọ ḍịphe esomanan Ẹnaan phọ Ịzirel eḅetenu sịphe ạruukpaany aghuḍuul phọ, sịphe ọdi ạrol ghan bọ, ẹmeera kụ erelhe ẹghi ẹpe eḍighom Otu Ịiḅereghi phọ. Ọmoogh-we phọ ạmagh oye phọ aanmenan bọ ịyegheyeghe arukpe phọ mọ,

⁴“Kịa akitonom oomo ẹmha phọ aJeruselem kụ ạlogh elegh sịphe aghisigh ạtorobo oye ọlo akururu kụ rẹeḅaghami loor esi oomo ạraraar isa phọ ịpe awe roḍighi yogh bọ sịphe ẹmha phọ.”

⁵Kụ mị ạnaghan Ẹnaan phọ dị ẹḅeni bụeri phọ awe phọ mọ, “Ịdaph nyọdi ekitonom ẹmha phọ, kụ ẹze. Késugheeny oniin; kẹ́nma ighirigiir esi rꞌoniin.

⁶Ịze ikumoor awe phọ, ugheel ạnmuny, risina ạnmanyaan, burunhiin rꞌịbam ạnmuny. Kụ ọlo kẹ́ḅogh tọrobo ọlo ạmoogh elegh phọ sịphe elhor ọdi. Imiigh sịen sịphe Otu Ịiḅereghi phọ ạmi.” Esi ịduon phọ bịdi omiighom rꞌabuḍiemiom mọ bụphe ọmeregha bọ sịphe Otu Ịiḅereghi phọ.

⁷Ẹnaan ịḅeni bịdi mọ, “Ịipu Otu Ịiḅereghi phọ. Imuzeḍiom rigiga ọdi rꞌasizu dị memugh. Iḅetenu ẹghi oḍighi!” Esi ịduon phọ bịdi omiigh ọze awe phọ sịphe ẹmha phọ.

⁸Ịduon ọze phọ rạki bọ ni ghisigh, mị bịn kụ ụrol sịphe. Mị alher loor ạmi azumeri risigh sịphe ude phọ kụ ạlho mọ, “Ọkar Ogbogh Ọmoogh-we, nạ ạkagham ologhi oomo ịphen Jeruselem dị nạ kạze tọrobo ọlo asugha sịen Ịzirel ḍụghum?”

⁹Kụ Ẹnaan ẹphagharanaan mọ, “Awe phọ Ịzirel rꞌaJuda ọmoogh apum ilhom ịkaraph. Bịdi mọko enu tọrobo ekpisi sịen ade phọ kụ momuzeḍiom Jeruselem rꞌạsipioghom. Bịdi ọḅem mọ mị Ọmoogh-we phọ mạwile eelhe phọ ạbidi ḅịle mọ mị bụno rạ́miin.

¹⁰Kụ ọlo mị kạ́moogh igbiririph esi ạbidi; mị kaḍighi ạngo bịdi ịpe bịdi moḍighi bọ bụnon.”

¹¹Reru reten, oye phọ aanmenan bọ ịyegheyeghe arukpe phọ arigheel kụ ạghaaph ạḅeni Ọmoogh-we phọ mọ, “Mị maḍighi ịpe nạ ạtooghi bọ amuneni.”