Read abua Dạniel 1 Bible Online

Dạniel 1 - abua bible

Dạniel 1

¹Lhạ dị emuneniom ịraar dị aJehoyakim ạda Juda, ạNebukadnezar ọdaam eelhe phọ ạBabilon azuom ni ẹgham Jeruselem ạḅile akitonom ẹmha phọ.

²Ọmoogh-we phọ ạngo ni ọgel kụ ọdi asiph Jehoyakim ọdaam mọ ạḅile azirion iniin ẹelha Otu Ịiḅereghi phọ. Ọdi asiphi buniin awe agheelom obughotu aruru phọ ọdi ẹpe Bạbilonia, kụ adoghoḍi ẹpe iisoph phọ ẹelha phọ ọdi azirion bọ.

³Ọdaam eelhe phọ ạngo Aspenaz, ogbogh ọnyo iiḍighi phọ ọdi, mọ ọdi ạsaḅar igbo awe phọ Ịzirel odi bọ iiruen phọ nmụny ọto kꞌọdaam mọ rꞌikpolom awe phọ ọdi;

⁴bịdi oḍighi ni we dị ọnighe ọmiin, ọsu ologhi, ọtughemi agey, ọmaar ḍịnya, ḅịle ẹgha úḍigh; pịdi bịdi ọkpianaan ọrol okumu sịphe ogiga ọdaam mọ. Aspenaz kạtughemi bịdi ịlo ạal rꞌọge ọnhu ạBabilon.

⁵Ọdaam eelhe phọ ạto kẹn ni ạḅem mọ tọrobo aḍio kọngo ghan bịdi eniin ọdo eḍien ịdipho rọngo ghan bọ we ogiga phọ, kụ mọ, ịraar ạsia ịtuugha phọ ạbidi reten, kụ bịdi ogbi oru aghisigh ọno ọdaam mọ.

⁶Buniin ạnmuny dị ọsaḅar bọ uḍighi Dạniel, Hananaya, Mịsael rꞌAzaraya, oomo phọ ạbidi ạbuo eghun aJuda.

⁷Ogbogh ọnyo iiḍighi phọ aaghologh bịdi imoom asiḍien: Bẹltesazar, Sạdrak, Mẹsak rꞌAbed Nego.

⁸ẠDaniel agbiighi ni sịphe ologhi ọdi mọ ọno kạ́apu loor phọ ọno esi olheeghi ariiḍien rꞌọphughologh arimiim ịsiphe ogiga otu ọdaam eelhe phọ kụ ọdi ạlhom Aspenaz mọ ạlhoghonaan nyịno ḍịghaagh,

⁹kụ Ẹnaan eḍighi ịdi Aspenaz ạnma ghan ighirigiir Dạniel.

¹⁰Aspenaz rakiilaan ọdaam mọ kụ ạḅeni Dạniel mọ, “Ọdaam mọ mạḅem ni ịyaar dị nạ kale ghan ạḅile ạpughol, kụ eḍighi mạar lọ nạ ụ́bugh ịdipho ạbueri phọ ugheel ạnmuny phọ, ọdi katue ni ughiigh ịmi.”

¹¹Kụ ạDaniel ạghi ạteeny okoriom mọ ọpo Aspenaz aseere bọ mọ aphogh nyọdi rꞌịraar ạrighiri phọ ọdi.

¹²Kụ ọdi ạḅeni, “Uphogh iyoor esi aḍioph aḍughul-otu, ụngo ghan iyoor ịikiripha rꞌạmuum bịn.

¹³Kụ ụsighe iyoor ạtomaam ugheel ạnmuny phọ, bụphe role ghan bọ eḍien kꞌọdaam mọ, kụ ạdaphan ịpe yoor ọrol bọ kụ asoph ọoruen phọ ạna.”

¹⁴Ọdi ameeraam ni mọ ophoghom esi aḍioph aḍughul-otu.

¹⁵Mem dị amem mọ ẹteeny bọ, bịdi kụ ụmoogh ịnyaam ọḅile omoon opu oomo ạbuphe olhe ghan bọ eḍien kꞌọdaam mọ.

¹⁶Kụ emiigh sịphe kụ ẹghiom ghisigh, okoriom mọ ameera ni mọ bịdi olhe ghan ịikiripha kpạripe rꞌeḍien kꞌọdaam mọ.

¹⁷Ẹnaan ịngo ni inya phọ ugheel ạnmuny phọ olegheri-ịyaar rꞌẹmaar esi ạrinya rꞌigbogh ịitughian. Ọdi ạngoom kẹn ni Dạniel ẹmaar ọgba ghan ẹmhu ạramalha rꞌịmiin.

¹⁸Ịraar ạsia phọ ọdaam mọ aghol bọ remunughan, Aspenaz ạsighe oomo ugheel ạnmuny phọ ạghiomonaan kꞌạNebukadnezar,

¹⁹Ọdaam mọ ạḅaanaan ni oomo phọ ạbidi kụ ạDaniel, aHananaya, ạMisael rꞌAzaraya ọḅeeraan nyọdi opu oomo ạbueri phọ. Kụ bịdi oḍighi aani bụdi kọtol aani ghan sịphe ogiga ọdaam mọ.

²⁰Tọrobo aḍipuru lọ ọdaam mọ apuru, mụghumo ịiḅaghami lọ emite, inya phọ ạnmuny phọ ạbuen ulegheri ghan ni ḍioph amem opu ịlo oomo ariil uḍien ḅịle rꞌawe ịiḍaany eelhe phọ ọdi.

²¹ẠDaniel ạrol li otu ọdaam mọ tụtu ạSairos ogbogh ọdaam eelhe phọ aPasia azuom ẹgham ạkpar apu Bạbilonia.