Read abua Dạniel 10 Bible Online

Dạniel 10 - abua bible

Dạniel 10

¹(Lhạ phọ emuneniom bọ ịraar phọ kꞌamem mọ ạSairos amiigh bọ ọda eelhe phọ aPasia, ụghaaph ni dom ọḅeni Dạniel, nyọpo ọḅile bọ oghol ghan mọ ạBeltesazar. Adom mọ iḍighi ni ḍigey kụ ẹkpar ịikia ọnaghanan. Ụugelion ni ọgba ẹmhu phọ ọḅeni nyọdi uḍien.)

²Mem mọ ọpo phọ, mị ụrol ọto esi ịyaldi rꞌoniin aḍughul-otu.

³Mị úle egey eḍien ḅịle ẹnam mị ụ́ba; mị ụ́pughol miim ḅịle sịlaal mị ụ́zaranaan tụtu ịyaldi rꞌaḍiniin aḍughul-otu eten.

⁴Ḍio phọ ạḍiphe emuneniom bọ ịyaldi rꞌinya ọḅel ụnwanyu ạlha phọ, mị ụmeera ọogaany ogbogh Ọphiiny ạTaigris.

⁵Mị uphogh ni ạnyu kụ ạmiin oye dị ạkpologhian ịyegheyeghe arukpe rꞌokuughaam ogey agol.

⁶Aloor phọ ọdi ịmu ghan ịdipho ikpo-ẹbe. Aghisigh ọdi ạḅaal mụdi aḍio kụ ịmeephian, kụ ariḍien phọ ọdi iimor ịdipho ạnian. Ạraghaagh rꞌaruwol ọdi rẹmu mụdi enaba dị ọmaar ogbuurogh, kụ ẹḍogh ọdi ighur ịdipho ạḍiolo aḍigbogh aḍita awe dị ookpomoghan.

⁷Mị bịn kụ ụmiin uḍien phọ. Awe phọ ạbuphe ọrol bọ rꞌạmi ụ́miin rꞌịyaar kụ ọlo aruugu asiph ni bịdi kụ oghiil ạaghian yogh.

⁸Ogina ạmi bịn kụ usugha sịphe phọ, rạmiin ghan iikia phọ ịphen phọ. Ịnyaam ịmi ị́rol mun, ḅịle aghisigh ạmi anmia ni dị oye ịmi ụ́logh mun elegh.

⁹Mem dị mị ạnaghan bọ ẹḍogh ọdi, mị aḅololo ude ạghaaru kụ mị ạmina sịphe aghisigh ạmi azuan ude.

¹⁰Kụ ạḍighaagh ịpham ịmi ephoophe esiemi dị mị ạmeeraam rạghaagh rꞌaruukum; kụ mị rapiigha yogh.

¹¹Ọokpaany kꞌạke phọ ụḅeni ịmi mọ, “Dạniel, Ẹnaan ẹphomoghian ni nyịna. Ḅetenu ạmeera alher rụru ịphen mị kạkaaph. Murom ịmi oru ọteeny ạna.” Ọdi rọḅem ịduon phọ, bịn mị aḅetenu ạmeera; mị rapiigha.

¹²Kụ ọdi ạḅem mọ, “Dạniel, kákiilaan. Ẹnaan mẹnaghan ịiḅereghi ạna kꞌạḍiḅel aḍio phọ nạ asooromi bọ loor phọ ạna pịdi nạ ạmoogh ọnaghanan ạḍughum. Mị maru ọngo ọphagharanaan ịiḅereghi phọ ạna.

¹³Ọokpaany kꞌạke phọ ọpo aḍighi bọ ọkpana ọmar phọ aPasia ukikima ịmi esi ịyaldi rꞌoniin aḍughul-otu. Kụ ọlo ạMaikel, oniin ọkpana ọokpaany phọ Ẹnaan aru ọloghonaan ạmi ḍịghaagh, loor esi dị ogina ạmi bịn kụ usugha ẹpe Pasia.

¹⁴Mị maru oḍighi ịdi nạ kạnaghan ịdi kemitenaan weye ạna mem dị retu. Ịphen phọ uḍien ịlo amem dị edi ghisigh.”

¹⁵Ọdi rọḅem bọ ịduon phọ, bịn mị unaan ude phọ, ọnhu mị ụ́tagharan.

¹⁶Kụ ọokpaany kꞌạke phọ, dị ạghigh oye, ạgbuton ḍịghaagh ọdi kụ ạḅogh ịidoronhu ạmi. Mị ạḅeni nyọdi, “Oye phọ, uḍien phọ udughe ni ịmi ịdi mị kạ́bile ophiigha.

¹⁷Mị ạkigh ẹbene dị ạmeera ghisigh ọde-otu ọdi. Mịna kạḅaanaan nyịna ika? Mị ụ́moogh mun ịnyaam ḅịle mꞌaḍiphooghu loor ạmi.”

¹⁸Ọdi ạḅile kẹn ni ụpham ịmi, kụ ịnyaam eḍigh loor ạmi.

¹⁹Ọdi ạḅem mọ, “Ẹnaan ẹphomoghian ni nyịna; loor ịduon phọ kámeera ịyaar ẹeḅaghami nyịna mụghumo ookperemi ạna.” Ọdi rọḅem ịduon phọ, bịn mị ạkaraghi aamanam kụ mị ạḅem mọ, “Oye phọ, ụḅeni ịmi ịyaar phọ nạ rạwa bọ ọghaaph phọ. Nạ maḍighi ịdi mị malhoghoma loor.”

²⁰Ọdi apuru mọ, “Nạ alegheri ni ịpe mị ạtuan bọ kụ aru esi ạna ḍụghum? Mị maru ogananami ịpe ọge bọ sịphe Ạḍinya Igey phọ oḍeenaan ạna. Nyịidipho mị ạmoogh ogheel ḅịle eenan ọkpana ọokpaany phọ aPasia. Ịpe reten, kụ ọkpana ọokpaany aGris amite. Oye ọloghonaan ạmi ḍịghaagh ólho emuton Mạikel, ọokpaany phọ rạaḅaki ghan bọ Ịzirel.