Read abua Dạniel 11 Bible Online

Dạniel 11 - abua bible

Dạniel 11

¹“ẠMaikel kụ ạmerenyan eenan ọḅile ọloghonaan ạmi ḍịghaagh.

²Kụ ịphen mị kạḅeni bọ nyịna nyịidipho igey ni.” Ọokpaany kꞌạke phọ ạḅem mọ, “Ịraar ạbunon ạraalha kọda ni Pasia, kụ ọdi amuneniom inya atum; ọdi kagbo ni apu oomo ạbueri phọ. Mem dị ịikpo phọ rꞌẹelha phọ ọdi mẹkaraghi ẹbugh, ọdi kagbekian ni eelhe phọ aGris.

³“Pọ kụ amem dị ophelegbe-ọolha kamite. Ọdi kạda ni ebadabada eelhe, ạḅile aḍighi ghan tọrobo ịlo ẹḅeeraan nyọdi.

⁴Kụ ọlo, mem dị ịikpo phọ ọdi mẹkaraghi ẹbugh, eelhe phọ ọdi kemeel kụ edia inya ạriikpigh. Ạraalha dị úḍighi ẹemara ẹemara ọdi kụ kọda esi phọ ọdi kụ ọlo bịdi kọ́moogh ịikpo phọ ọdi ạmoogh ghan bọ.

⁵“Ọdaam mọ Ijipt kạmoogh ni ịikpo, kụ ọlo oniin oḍiemiom ẹgham ọdi kụ kạmoogh ịnyaam apu kụ ạda eelhe dị epu nyẹen ọdi.

⁶Ịbadi ạsia reru reten, ọdaam eelhe phọ Ijipt kaḍigh ooḍikuan rꞌọdaam eelhe phọ ạSiria kụ ạnughenyan ọnyani ọdi nyọdi. Kụ ooḍikuan phọ kábia kụ kokiigh ni ọnyani phọ, olhom mọ ọdi, ọony phọ ọdi rꞌoomo abutelhedom mọ kọdaph bọ nyọdi.

⁷Kébia kụ oniin ọnyo asiya ọdi aḍighi ọdaam eelhe. Ọdi kazuom ni ẹgham ọdaam eelhe phọ ạSiria, aḍigh otu-ịikpo phọ ạbidi, kụ ạkpar apu bịdi.

⁸Ọdi kạpam ni aḅulolom Ijipt ịkaanaan ạrumugh phọ ạbidi rꞌaruphua agol rꞌasilva phọ ịpe mọḅogh bọ ọngo rụmugh phọ. Mem dị ịminighan ạsia ẹepho reten,

⁹ọdaam eelhe phọ ạSiria kaḍigh Ijipt rꞌẹekpara ekpeḍien kụ ọlo konyu ni nyọdi oḅulemi ọman.

¹⁰“Ạnmuny alephiri ọdaam eelhe phọ ạSiria kọnyaaghian kụ ookpomoghi ḍiboom aḍita awe ẹgham. Oniin ọnyo ạbidi kạtara ịdipho ạmuum-aḍigho kụ azuom otu-ịikpo ẹpomoghian.

¹¹Rꞌophin ologhi ọdi, ọdaam mọ Ijipt kạki eenom ẹgham ọdaam eelhe phọ ạSiria kụ asiphi ḍiboom aḍita awe ẹgham ọdi.

¹²Ọdi kaabaga ni loor esi ọkpar opu phọ ọdi rꞌịbadi awe ẹgham mọ ọdi mạze bọ, kụ ọlo ọdi kạ́kpar ghan apu oomo amem.

¹³“Ọdaam eelhe phọ ạSiria kạki ni aakpomoghi we ẹgham dị opu bụphe ọdi ạmoogh ghan bọ. Mem dị ọkar amem mọ kẹteeny, ọdi kạpam ni ḍigbogh aḍita awe ẹgham dị ịinya phọ emunughan kụ atumom.

¹⁴Pọ kụ amem dị ịbadibadi awe kọḅaar ẹmhu esi ọdaam mọ Ijipt. Ḅịle kẹn buniin awe ekpom bụo ẹmha phọ anyina, Dạniel, kọḅaar aani ni ẹmhu loor esi uḍien dị bịdi mọmiin, kụ ọlo kọkpar ri opu bịdi.

¹⁵Kụ ọdaam eelhe phọ ạSiria kakoonyom ni ẹmha dị oghoony ni kụ aziton ạsighe. Awe ẹgham mọ Ijipt, kóbe mun ọkiom risigh; ghạlamo arephelegbe ẹgham mọ kọ́moogh mun ịnyaam.

¹⁶Ọlo ạSiria phọ kaḍighom rꞌẹekpara ekpeḍien kaḍighi bịdi ịlo ẹḅeeraan nyọdi, oye kámirighan nyọdi. Ọdi kạmeera ni sịphe Ade phọ Oguanaan bọ kụ akpobiom rꞌịikpo phọ ọdi.

¹⁷“Ọdaam eelhe phọ ạSiria kagbiighi ni ọsighe oomo awe ẹgham mọ eenom ẹgham. Kụ esi oḍighi ịlo oogulemi eelhe esi ẹpomoghian phọ ọdi, ọdi kaḍigh ni ooḍikuan rꞌẹpomoghian phọ ạḅile ạnughenyan ọnyani ọdi ẹpomoghian phọ; kụ ọlo igbiighi phọ ọdi kẹ́meera.

¹⁸Ịpe reten kụ ọdi azuom reelhe phọ orugh bọ ẹpe ọgbal ọphiiny phọ kụ ạkpar apu ịbadi ạbidi. Kụ oḍiemiom ẹnon eelhe kạkpar ri apu nyọdi kụ akureri ophoophe aloor phọ ọdi; ọkar agey ọdi kakiton ni oobaga ọdaam eelhe phọ ạSiria ạḅam ẹmhu ọdi.

¹⁹Ọdaam mọ kaḅula ni ẹpe aruutu-ịikpo phọ ịsiphe ade phọ ọdi, kụ ọlo kọkpar ri opu nyọdi, kụ ịphen phọ kụ keḍighi eekuna ọdi.

²⁰“Ọnon ọdaam eelhe katum ni nyọdi. Ọphon phọ katom ni ọnyo oḍighi dị kạgbiphoghom we phọ rꞌiisogh pịdi ọbughe ẹelha ọmar phọ ọdi. Ekulha amem bịn kokiigh ni ọdaam mọ ọpo kụ ọlo kéḍighi egaan ḅịle kéḍighi erugh ẹgham.”

²¹Ọokpaany kꞌạke phọ ạghaaph ni ạagelion ạḅemom mọ: “Ọdaam eelhe phọ ạSiria dị atum pạ kaḍighi oye ạsipioghom dị ọbo ọ́kpe ọda kụ ọlo katu ni ekperenom bịn ạsighe ạgada phọ reten ikeḍi.

²²Tọrobo oye lọ akikima nyọdi, ghạlamo rꞌogbogh oyil ạrikia phọ Ẹnaan phọ ni, kọgboton ni otene ọgbal kụ okiigh.

²³Esi ọgian ạrinya ạmuḅoph ọdi kaakeleghi ni ịnon areelhe kụ ạtol ghan ọmoogh ịnyaam ọghiom aghisigh, ghạlamo ịduon eelhe phọ ọdi ạda bọ eghom bọ ni.

²⁴Ọdi kazuom ẹkpigh dị ẹmoogh ẹelha dị ọphur ạruru kạ́tol kụ aḍighi yogh rạraar dị ạburude ạburude ọdi kőḍighi ghan. Kụ ọdi agbi nụun odiemi ạbumatuan ọdi ruphua rꞌạraraar phọ ịpe ọdi awum bọ ẹgham mọ. Ọdi kagbiighi ni ozuom aruutu-ịikpo, kụ ọlo amem mọ ọdi kẹnuun ni emuneen.

²⁵“Ọdi kaḅom ni ẹmhu aakpomoghi ọopa aḍita awe ẹgham okori oruphiom ẹgham ọdaam mọ Ijipt, ọpo kaakpomoghi bọ kẹn ni ḍita awe ẹgham eenan ọdi, Kụ ọlo kookeleghi ni ọdaam mọ Ijipt bịn kátue aḍighi ịyaar.

²⁶Abutomoghiom ọdi bụphe ọkaraghi bọ otuman nyọdi kọpue ni nyọdi. Kọze ni ịbadi awe ḅịle awe ẹgham mọ ọdi komuneen ni.

²⁷Ịyal phọ ạbudaam mọ kozuan ni olian eḍien kụ ọlo igbiighi ạbidi keḍighi ịkaraph kụ oniin kạgbaam ghan ni nyoniin ọkpe. Bịdi kọ́moogh ịpe bịdi rọwa bọ ịdi eḍighi bọ amem ịpe phọ kẹ̋teeny.

²⁸Ọdaam eelhe phọ ạSiria kạpam ni rạraar phọ ọdi awum bọ atighelom otu, ạnya rꞌịkpuku ophiemi awe phọ Ẹnaan eghiran bọ ịyo. Ọdi kaḍighi ịlo ẹḅeeraan nyọdi kụ agbi ogheel ẹpe ade phọ ọdi.

²⁹“Ẹnum amem, ọdi kạḅile kẹn azuom Ijipt kụ egi phọ ẹphen ạraraar kenmia ni.

³⁰Awe aRom koḍiku ni rughuugh ạmughi otu ozuom ọdi, kụ aḍiigu esiph nyọdi. “Kụ ọdi agbi oḅula rꞌophin ologhi kụ ọwa ịlo ophiemi omeeraam awe phọ Ẹnaan. Ọdi kạdaphan oroma awe phọ ạbuphe moghel bọ omeeraam mọ ọpo.

³¹Buniin awe ẹgham ọdi kọopu Otu Ịiḅereghi phọ. Bịdi kosophe ni rạraar aghuḍum aḍio ḍio phọ kụ oseere Ḅạphanya Amuphe ọmeremi esi.

³²Loor ikeḍi, ọdaam eelhe phọ kaḍigh ni ooḍikuan rꞌawe phọ ạbuphe moghel bọ omeeraam mọ ạbidi, kụ bụphe ọdaph bọ Ẹnaan kọmerenyan ni obe.

³³Abuḍiemiom dị ọsuughi iloghi kodian ghan ni olegheri ịyaar phọ ạbidi rꞌịbadi ạbunon awe, kụ ọlo kébia kụ ọze buniin ạbidi ẹgham mꞌomugh dị ạnian kụ ekoph, ḅịle ạruḅa komi ni buniin ọsighe oḍighi bụo ikoli.

³⁴Odi rọze ịduon phọ rọghiom, kụ awe phọ Ẹnaan ọmoogh ọony ẹnum ọloghonaan ạḍighaagh, ghạlamo ịduon ịbadi awe dị kọdaph bọ bịdi kọtuan sụo dị bịdi kọmoogh.

³⁵Kọze ni buniin ikpolom awe olegheri-ịyaar phọ, kụ ọlo ịphen phọ kewoph ni we phọ. Ịphen phọ kụ kẹtol ghan tụtu eekuna phọ eru, amem mọ Ẹnaan mẹto bọ eseere.

³⁶“Ọdaam eelhe phọ ạSiria kaḍighi ni ịlo ẹḅeeraan nyọdi. Ọdi kaabaga ni mọ ọno apu ni ẹmugh, ạḅile kẹn apu Ọkaraghi Egbogh Ẹnaan phọ. Ọdi katue ni aḍighi ghan ịduon tụtu ẹteeny mem mọ Ẹnaan kẹliom bọ nyọdi. Ẹnaan keḍighi ni ọkaraghi ịpe ọdi magbiighi bọ.

³⁷Ọdaam ẹmha phọ kạḅitonaan ni ẹmugh phọ ẹpe ạburude ạburude phọ ọdi okumu ghan bọ, ḅịle rꞌeru phọ ẹpe ạnmariir ọphomoghian bọ. Ọkar agey, ọdi kạḅitonaan ni tọrobo ẹmugh, loor esi dị ọdi kạatughian ghan mọ ọno apu ni tọrotoro ọnyo ạbidi.

³⁸Kpạripe ghụn ọdi kakueni ni eru phọ reeko ghan bọ ruutu-ịikpo phọ. Ọdi kạsighe gol, silva rꞌikpo-ebe rꞌịnon igey aruunmo ạngo eru dị ạburude ạburude ọdi ụ́uḅereghi ghan.

³⁹Esi okori ghan aruutu-ịikpo phọ ọdi, ọdi kạma ni we dị rooseeny ghan eeruen eru oḍighinom oḍighi phọ ọdi. Ọdi kakueni ni iboom we phọ ọsighe bọ nyọdi mọ ọdi ạda ni. Ọdi kadoghoḍi bịdi igbogh asidom, kụ ạḅile ạsighe de aanmoom bịdi ruunmo.

⁴⁰“Mem dị eekuna amem ọdaam eelhe phọ ạSiria mẹkar rekureri, ọdaam mọ Ijipt katuphiom ni ẹgham nyọdi, kụ ọdaam eelhe phọ ạSiria kamerenyan ni abianaan rꞌoomo ịikpo ọdi. Ọdi kabiom ni rughuugh-ude, rꞌịnam ạsu, rꞌịbadi arughuugh ạmuum. Ọdi kaḍigh ni ịbadi areelhe rꞌẹekpara ekpeḍien ịdipho ạmuum-aḍigho.

⁴¹Ọdi kazuom ni ẹgham ghạlamo Ade phọ Oguanaan bọ kụ ạze sịmuunir awe, kụ ọlo areelhe phọ Idom rꞌạMoab rꞌẹkpigh phọ Amon esugha bọ kokpetenaan ni.

⁴²Mem dị ọdi kazuom bọ ẹgham oomo areelhe phọ ịpe, Ijipt kẹn ni bịn kókpetenaan.

⁴³Ọdi kạsighiogh ni ruphua phọ Ijipt ịpe ạaghi yogh bọ, gol rꞌasilva rꞌịnon ịkpana ạraraar ạbidi. Ọdi kạkpar ri apu Lịbia rꞌạSudan.

⁴⁴Pọ kụ amem dị ịinaghan kẹḍua ẹpe erumuḍio phọ remeel ghan bọ ḅịle rꞌephunom mọ etu kụ ekperemi nyọdi, kụ ọdi kabe ni rꞌophin ologhi kụ ạze ịbadibadi awe.

⁴⁵Ọdi kẹn kadoghoḍi igbogh arugbogo ọdaam mọ ịbaay otu-ḅualhe phọ rꞌẹeḅaraph phọ Otu Ịiḅereghi phọ ạmeera bọ. Kụ ọlo, ọdi kamugh ni, ịdi oye ọloghonaan ọdi ạḍighaagh kạ́tol.”