Read abua Dạniel 6 Bible Online

Dạniel 6 - abua bible

Dạniel 6

¹ẠDarios agbiighi kụ ạmaaghi oniin okuron rꞌịyaldi abupoghom awe ọphamagh iiḍighi oomo arere phọ ọdi.

²Ịdi etum, ọdi ạsaḅar ri Dạniel rꞌịyal ạbunon mọ oḅiligha ghan ophogh ịlo abupoghom mọ roḍighi ọḅile ọwaanaan ọdaam mọ sụo.

³ẠDaniel ạnuun ni aḍeenaan mọ ọno ạmaar oḍighi apu bụeri phọ ạbuphe rꞌọdi roḍighi ghan bọ ḅịle rꞌabupoghom mọ. Loor esi ọdi mamitiom ḍien, ọdaam mọ agbiighi ọdaami ọdi mọ aphogh oomo arere phọ ọdi.

⁴Kụ iḍighi kụ ạbueri phọ ạbuphe rꞌọdi roḍighi ghan bọ ḅịle rꞌabupoghom mọ ọwaragha ghan ịyaar lọ ị́nighe kụ ọtuan ọḍaghaan areten phọ ạDaniel aphogh bọ rere phọ, kụ bịdi ụ́miin loor esi dị ạDaniel aḍighi oye oḍuom ologhi kụ óḍighi ịyaar lọ eeph ẹḅile eḍeenaan iguegue.

⁵Bịdi oopuruan kụ ọḅem mọ, “Yira kótue ọmiin rꞌeniin ịyaar ọtuan kụ ọkpalham ạDaniel emuton ịyaar dị egbolomaam ịiḅereghi phọ ọdi.”

⁶Kụ iḍighi kụ bịdi ọghi ọteeny ọdaam mọ kụ ọḅeni mọ, “Nạ ạDarios ogbogh ọdaam mọ, tọl kꞌagee-pọ!

⁷Oomo phọ ayoor ọphamagh bọ riisi eelhe phọ ạna — bụdi oseere ọmiin ghan iiḍighi, bupoghom areelhe rꞌạbudi otum bịdi, rꞌạbueri phọ ạbuo iiḍighi — momeeraam mọ nạ ogbogh ọdaam mọ lọgh ologh ạkparami agey. Ḅẹm mọ esi ịraardi aḍughul-otu mọ oye kụ́uḅereghi ẹnon ẹmugh mụghumo oye emuton nyịna ọdaam mọ. Tọrobo oye lọ apel ịto phọ ịphen kotoph osumeeny ologhi ooni dị ạnam-dịka kụ emuza.

⁸Kụ iḍighi kụ nạ ogbogh ọdaam mọ lọgh ologh azu ghụnugh ạkparami, ologh awe aMedia rꞌaPasia phọ rónme ghan mun bọ.”

⁹Kụ ạDarios ọdaam mọ agbi ọlogh ologh phọ ọdaphariom ḍịghaagh.

¹⁰Mem dị ạDaniel ạnaghan mọ mọdaphari ḍịghaagh ologh phọ, ọdi agheel kꞌọdi. Osoph ẹpe otu ạnyu phọ ọdi arughuugh-ookuugh ịrol li dị esoman Jeruselem. Ịsiphe phọ, ịdipho ọdi raḍighi ghan bọ tọrotoro amem, ọdi akpuḍian atuman rughuugh ookuugh phọ moghunyon bọ kụ ạaḅereghi Ẹnaan ịraar amem ḍio.

¹¹Mem dị ạbumulogh-ḍien phọ ạDaniel ọmiin mọ ọdi rạaḅereghi ghan Ẹnaan,

¹²oomo phọ ạbidi ụghi ni ọteeny ọdaam mọ ọkpalham Dạniel. Bịdi ọḅem mọ, “Nạ ogbogh ọdaam, nạ ụlogh ni ologh mọ esi ịraardi aḍughul-otu oye lọ ạaḅereghi ẹnon ẹmugh mụghumo oye emuton nyịna, pọ kotoph osumeeny ologhi ooni ạnam-dịka.” Ọdaam mọ ạphagharanaan ameera mọ, “Ii, ọgbagara ologh, ologh awe aMedia rꞌaPasia, ọpo rónme ghan bọ.”

¹³Pọ kụ amem dị bịdi ọḅeni ọdaam mọ, “ẠDaniel, oniin ọlo aJuda phọ odi bọ iiruen phọ, ọ́lhogh eegu nyịna ọdaam mọ, mụghumo ọ́naghanan ologh phọ nạ ạlogh bọ. Ọdi ragbor ghan kạaḅereghi ịraar amem ḍio.”

¹⁴Mem dị ọdaam mọ ạnaghan ịphen phọ, ịiḅaghami ni nyọdi kụ ạwa ghan reten ọtagharan ạDaniel. Ọdi ạkparagha ni tụtu erumuḍio phọ emeel ighool.

¹⁵Kụ awe phọ ọḅile oḅula kꞌọdaam mọ kụ ọḅeni nyọdi mọ, “Nạ ogbogh ọdaam mọ alegheri mọ ọdaphan iilogh awe aMedia rꞌaPasia, ologh ólho dị ọdaam mọ mạlhogh dị kotue onme.”

¹⁶Ọdaam mọ agbi ọto mọ osiph Dạniel kụ uroph osumeeny ẹpe ologhi ooni ạnam-dịka phọ. Ọdi ạḅeni Dạniel mọ, “Eḍighi ịdi Ẹnaan phọ ẹpe nạ rakumu ghan bọ rꞌịitaku phọ, kẹtagharan ni nyịna.”

¹⁷Ụsighe ni ḍighiigh okpereghiom ọnhu ooni phọ kụ ọdaam mọ ạdaphariom ni gulu ạbudaam mọ ọdi rꞌagulu abugbogh awe phọ ọdi ọbo oye kạki ghan bọ ọtagharan ạDaniel.

¹⁸Kụ ọdaam mọ arigheel ogiga phọ kụ ạrol ẹ́naani, eḍien ólhe, ómeera oye aḍigh dị kạḅaalami ologhi ọdi.

¹⁹Rekpoghoronu bịn ọdaam mọ aagborion ạghi sịphe ooni phọ.

²⁰Mem dị ọdi asi bọ pạ phọ, ọdi ạkururu kụ ạlho ạmagh mọ, “Dạniel, otelhedom Ẹnaan phọ edi ghan bọ bịn! Eḍighi ni ịdi Ẹnaan phọ nạ rakumu bọ rꞌịitaku erue ẹtagharan nyịna esi ạnam-dịka ḍụghum?”

²¹ẠDaniel ạphagharanaan, “Nạ ogbogh ọdaam tọl kꞌagee-pọ!

²²Ẹnaan kụ irom ọokpaany ọdi mọ ạkasi rụnhu ạnam-dịka phọ ọbo bịdi kiḍighi ghan bọ ịmi ịyaar. Ọdi aḍighi ịduon phọ loor esi dị ọdi alegheri mọ mị mạar ụ́piom ḅịle kẹn mị ịkaraph nyịna ogbogh ọdaam úḍighi.”

²³Ologhi ọdaam mọ ạkar ri ạḅaal kụ ọdi ạto mọ ophune Dạniel sịphe ooni phọ. Kụ iḍighi kụ ọkpaaghi nyọdi ophune kụ ọmiin mọ ịyaar nyọdi ị́ḅogh rꞌẹnum loor esi dị ọdi ạkpasi oḍuom ologhi ọdi esi Ẹnaan.

²⁴Kụ ọdaam mọ ạngo ịtooghi mọ osiphi oomo awe phọ ọkpalham bọ Dạniel, kụ oroph bịdi rꞌạnmariir ạbidi rꞌạnmuny ạbidi osumeeny ooni ạnam-dịka phọ. Tụtu bịdi rọteeny ude ooni phọ, ạnam-dịka phọ ezuom bịdi bịn ewunughi ịḅarara phọ ạbidi.

²⁵Kụ ạDarios ọdaam mọ ạge ḍịnya ạghiom we ạtorobo eelhe, ạtorobo eḍighinom ịyaar ḅịle rꞌọnhu kịrokiro sịen ade phọ “Mịmagh.

²⁶Mị ạto mọ sịen oomo arere phọ ạmi tọrobo oye aghiilaan ạḅile ạlogh eghuan Ẹnaan phọ ạDaniel. “Ọdi kụ Ẹnaan dị edi ghan bịn ḅịle ọdi kạda kꞌagee-pọ. Ọmar phọ ọdi kótue opiemi ḅịle ịikpo phọ ọdi kékureri.

²⁷Ọdi kụ rạpel ghan kạḅile ạtagharan; ọdi raḍighi ghan iikia rꞌịiḍaany ẹpe kꞌạke rꞌịsien ade phọ. Ọdi ạphel li Dạniel dị ạnam-dịka íkiigh.”

²⁸Edughom ịrolonaan ni Dạniel riiḍio phọ ịpe ạDarios kụ ạda bọ, ḅịle rꞌariiḍio phọ ạSairos ọlo aPasia phọ ạda bọ.