Read abua Dạniel 7 Bible Online

Dạniel 7 - abua bible

Dạniel 7

¹Ḍịḅel ạlha phọ ạḍiphe ạBelsazar kụ ạda bọ Bạbilonia, mị ụmalha ni mạlha kụ ạmiin uḍien ḍughul. Mị ụge ni mạlha phọ ḍịnya, kụ ịphen kụ ịge phọ

²ịpe mị ạmiin bọ ḍughul phọ: Ookuugh aghugh oomo ịigaany phọ kụ ạgur ghan ạnyu ạmuum otu-ḅualhe phọ.

³Inya iboom ịnam ịḍua ni kꞌude ọphiiny phọ emite, eniin nyeniin ị́kigh.

⁴Ẹḅel phọ ịghigh ạnam-dịka, kụ ọlo ẹmoogh raphaaph ịdipho ịlo uga. Mị odi ni rapogh bịn ụphanyi ni raphaaph phọ ọsighiogh. Uphoophe ẹnam mọ ọmeremi mụdi oye, kụ ọngo nyọdi ologhi oye.

⁵Ẹnam mọ emuneniom bọ ịyal phọ ịghigh eephe-ạno dị ẹmeeraam ruwol ọman phọ. Ẹnam mọ ilomom rạlhaal phọ ọdi ịraar ịḅarara ịkala oku kụ ẹḍogh ẹḅeni mọ, “Kịom ni. Bạ iphulupul phọ ịlo nạ arue!”

⁶Mị ạtol li rapogh, bịn ẹnon ẹnam emite egaan. Ịghigh ootiir kụ ọlo sịphe ọman phọ ẹmoogh inya araphaaph dị ẹghigh ịlo ẹnun, kụ ẹmoogh kẹn inya ạrumhu. Arisigh phọ ọdi aḍeenaan igbogh ịtooghi.

⁷Ịduon mị odi bọ ni rapogh, bịn ẹnam dị emuneniom inya iru ni emite. Ẹphen phọ ịmoogh ni ịikpo, eeph ọmiin, ẹḅile eḍigh ḍiigu. Ẹnam mọ ẹmoogh igbogh ạralaal okuron dị eezighiḍiom ghan ịnam lọ ọdi asiph kụ ạḅile ẹezeghi bịdi. Ọdi ạgbatanaan ni ịpheri phọ ịnam mọ; ọdi ạmoogh ḍioph ạraphaal.

⁸Mị odi akananaam rapogh ghan rạphaal phọ, bịn mị ạmiin ọbam ọphaal dị ramite aani ogbo ịpheri phọ. Ọdi awunughi ịraar ạraphaal ịpe ẹrol bọ pạ phọ. Ọphaal phọ ọphon ạmoogh ni riḍien oye rꞌọnhu dị raabaga ghan rꞌophoophe aloor.

⁹Ịduon mị odi bọ ni rapogh bịn ọmeremi yogh sịgada ọdaam eelhe. Ọpo odi ghan bọ kꞌagee-pọ phọ ạrolom nyoniin ạgada phọ. Iinmenan ọdi ịḅaal fororo mụdi ibikpo ḅịle ạsilaal ẹmhu phọ ọdi ẹghigh eriri-ogho. Ạgada igbogh phọ ọdi, ụmeremi ạnyu idighila ạnian kụ eemor ghan,

¹⁰ḅịle ẹphuluḅul ạnian ẹḍua ghan pạ phọ emite. Ịbadi ạsimuunir awe ụrol li sịphe phọ okumu ghan ọdi ḅịle ọopa awe ọmeera ghisigh ọdi. Otu osoph ịiruen phọ amiigh rạghaaph, kụ okpenyon rịnya phọ.

¹¹Ịduon mị odi bọ ni rapogh, mị ụnaghan ghan ni ịdi ọbam ọphaal phọ raabaga ghan ni kạghiom. Mị ạtol li kụ oghiigh ẹnam mọ emuneniom bọ inya phọ kụ oroph ḍizu phọ osumeeny ologhi ạnian ophiemi.

¹²Kụ ạanyi ịikpo ịpheri phọ ịnam mọ kụ ọlo omeera mọ bịdi ẹrol ẹnum amem.

¹³Mem mọ mị rạmiin bọ uḍien phọ ogbo aḍughul, mị ụmiin ni ịyaar dị ẹghigh oye. Ọdi ratu ọteeny ạmi, ọotu akoom nyọdi, kụ ọdi ạghi ạteeny nyọpo odi ghan bọ bịn kꞌagee-pọ kụ ọmeremi nyọdi sịphe phọ.

¹⁴Ụngo nyọdi ạgada ịikpo, eghuan rꞌịikpo ạraalha pịdi awe ạtorobo eelhe rꞌeḍighinom ịyaar rꞌọnhu kịrokiro okumu ghan nyọdi. Ịikpo ọdi kẹtol kꞌagee-pọ, ḅịle ọmar ọdi kákunughian.

¹⁵Ạraraar phọ mị ạmiin bọ uḍien iḍigh ni ruugu esi ạmi, ẹḅile ịiḅaghami ịmi iboom.

¹⁶Kụ mị ạghi ạteeny oniin ạbuphe ọmeregha bọ sịphe, kụ mị ạlom mọ ọdi ạghaaph ạagelion oomo phọ ịphen phọ. Kụ iḍighi kụ ọdi ụḅeni bọ ịmi ẹmhu phọ.

¹⁷Ọdi ạḅem mọ, “Inya phọ iboom ịnam mọ ịphen, pọ inya areelhe dị kemite sịen ade phọ.

¹⁸Kụ kọḅogh ni ịikpo ạraalha ọngo we Ọkaraghi Egbogh Ẹnaan phọ, kụ ọpam ni bịn kꞌagee-pọ kꞌagee-pọ.”

¹⁹Kụ mị ạwa olegheri opuemi ịsiphe ịlo ẹnam mọ ẹpe emuneniom bọ inya phọ, ị́kigh aani bọ ịpheri phọ — ẹnam aḍiigu phọ ẹpe reezighiḍiom ghan bọ ịyaar lọ ọdi asiphom rạraaph enaba phọ ọdi rꞌạralhaal okuron phọ ọdi kụ ẹezeghi bịdi.

²⁰Kụ mị ạwa olegheri ịlo aḍioph ạraphaal phọ ẹrol bọ sịphe ẹmhu phọ ọdi, ḅịle rꞌọphaal phọ ọpo ạḅile bọ asi kụ aḍighi ịdi ịraar ạraphaal sịphe ịpheri phọ emeleghu. Ạmoogh ni riḍien rꞌọnhu kụ aphoophe loor aabaga ghan iboom. Ọdi kụ aḍigh ruugu epu oomo ịpheri phọ.

²¹Ịduon mị odi bọ ni rapogh, ọphaal phọ ọpo phọ aruphiom ẹgham weye phọ Ẹnaan bịn ạkpar apu bịdi.

²²Pọ kụ amem dị ọpo odi ghan bọ bịn aru kụ asoph ọoruen agheelemi we Ọkaraghi Egbogh Ẹnaan phọ. Amem mọ mẹteeny dị kọḅogh ịikpo ạraalha ọngo we phọ Ẹnaan.

²³Ịphen kụ ịdi ọogelion bọ ụḅeni ịmi: “Ẹnam mọ emuneniom bọ inya phọ, pọ eelhe dị emuneniom inya dị kẹtol sịen ade phọ kụ kẹgbatanaan ni ịnon areelhe. Ọdi kaazighiḍi ni oomo ade phọ ạḅile ạazeghi ạlogh ude.

²⁴Aḍioph ạraphaal phọ, pọ aḍioph ạraalha dị kọda eelhe phọ ẹpe phọ. Kụ ọnon ọdaam ạḅile amite; ọdi kạkar ạgbatanaan bụḅel phọ kụ ạkpar apu ịraar ạraalha.

²⁵Ọdi kạkaaph ghan ịkaraph ịlo Ọkaraghi Egbogh Ẹnaan phọ kụ ạkpiloghom we phọ Ẹnaan. Ọdi raḍighi ghan ịlo onme iilogh phọ Ẹnaan rꞌạrayaal oghueniom Ẹnaan, kụ awe phọ Ẹnaan kọtol eeḍian ịikpo phọ ọdi ịraar ạsia rꞌạpakiri.

²⁶Ịphen reru reten, kụ kosoph ịiruen ẹpe kꞌạke opume, ọboor ịikpo phọ ọdi kụ oogulemi nyọdi ọman.

²⁷Kọḅogh ni ịikpo phọ rꞌigbogh oomo ạramar ịsien ade phọ ọngo we Ọkaraghi Egbogh Ẹnaan phọ. Ịikpo ạgada igbogh ạbidi kákunian kụ bụlo ọdaaghi sịen ade phọ kokumu ghan bịdi, ọḅile ọnaghanan bịdi.”

²⁸Phọn kụ ekureriom ọghaaph phọ. Aruugu usiph ni ịmi iboom dị tụtu mị amaghagha, ḅịle mị oye ụ́ḅeni oomo phọ ịphen phọ.