Read abua Dạniel 8 Bible Online

Dạniel 8 - abua bible

Dạniel 8

¹Lhạ phọ ạḍiphe emuneniom bọ ịraar phọ kꞌamem mọ ạBelsazar amiigh bọ ọda phọ, mị ụḅile ni ạmiin uḍien.

²Sịphe uḍien phọ ekperenom bịn mị aloghoma dị mị masi Sụsa ẹkpana ẹmha ẹpe ẹkpigh phọ Ilam. Mị ụmeera ọgbal Ọphiiny Ulai,

³kụ sịphe ọgbal ọphiiny phọ mị ạmiin odughuna dị ạmoogh ịyal ịidoony ạraphaal, oniin ạdoony ạḅile aḍighi omoom apu nyọori phọ.

⁴Mị ụmiin dị odughuna phọ rạkuloghom ghan rạphaal ọdi kạghiom ẹpe emeelom erumuḍio phọ, rꞌẹpe ephunom mọ, rꞌẹpe esoorom mọ. Ẹnam ílho dị erue ekikima nyọdi mụghumo okpetenaan ịikpo ọdi. Ọdi aḍighi ghan tọrobo ịlo ẹḅeeraan nyọdi ạḅile aphoophe loor.

⁵Ịduon mị odi bọ ni raakia ẹmhu ịphen phọ, bịn ạtu-ọga aghiil ẹpe erumuḍio phọ remeel ghan bọ bịn aru, aghiil li ịdi ạrada phọ ude ísi ghan. Ọdi ạmoogh oniin okakara ọphaal igbo ariḍien ọdi.

⁶Ọdi arelhe ạghi ekpisi dị odughuna phọ odi, ọpo mị ạmiin bọ dị ạmeera ọogaany ọphiiny phọ, kụ azuom nyọdi rꞌogbogh oghur.

⁷Mị ụmiin ni ịdi ọdi azuom elephiri odughuna phọ. Ọdi ạsighe ni ọghagh ologhi kụ ạkulom odughuna phọ bịn awunughi ịyal phọ ạraphaal phọ. Odughuna phọ ọ́moogh ịnyaam ọmerenyan. Ulher nyọdi ude kụ ọozeghi, oye ọ́rol dị arue ạtagharan nyọdi.

⁸Ạtu-ọga phọ alegheri bịn kụ raabaga. Kụ ọlo mem dị ịikpo phọ ọdi melhegheri ẹphughan, uwun ni ọphaal phọ ọdi. Sịphe ọdi ạrol ghan bọ inya ikakara ạraphaal emite, oniin aphogh ghan kịrokiro ạpakiri.

⁹Sịphe inya ạraphaal phọ, ọbam ọphaal amite ni anyu oniin, kụ ịikpo phọ ọdi ẹrara esi ẹpe esoorom mọ ḅịle rꞌẹpe erumuḍio remite ghan bọ kụ ẹḅile enyeene ẹpe Ade Oguanaan phọ.

¹⁰Ọdi ạkpar ri ịikpo asi esi dị azuom ẹgham weye ẹgham kꞌạke, rꞌạraanaan phọ rꞌaloor, kụ ọdi alhereghi ni buniin ạbidi ude bịn ạazeghi.

¹¹Ọdi kẹn ạgilaam ni ọkpana oye ẹgham kꞌạke, akikima rịkia phọ ọphinyon ghan bọ ọngo ḍio etum ḍio phọ, kụ ạḅile ạapu Otu Ịiḅereghi phọ.

¹²Awe ụpioghom ghan sịphe phọ kpạripe rꞌọphinyon ạrikia aḍio etum ḍio, uḍighi ghụn ịdi ogey omeeraam mọ ọ́man mun ịyaar. Tọrobo ịyaar lọ ọphaal phọ aḍighi ịnighenom ghan ni nyọdi.

¹³Kụ mị ạnaghan dị oniin ọokpaany kꞌạke apuru ghan nyoniin, “Ạraraar phọ ịphen phọ ọmiin bọ uḍien phọ kẹtol kꞌạpur amem? Ịkaraph dị ẹloghori ịduon phọ kẹsighe esi ạrikia aḍio etum ḍio phọ kꞌạpur amem? Kọozeghi ghan we ẹgham kꞌạke phọ rꞌOtu Ịiḅereghi phọ kꞌạpur amem?”

¹⁴Mị ạnaghan ọphori phọ ọokpaany kꞌạke phọ dị ạphagharanaan mọ, “Ịphen phọ kẹtol esi ọonir okuron rꞌooghdi aḍughul-otu, kụ ạrikia adulhe rꞌạḍiroor kẹ́tol riiḍio phọ ịphen phọ. Kụ ogbi nụun ọosa Otu Ịiḅereghi phọ oseere ịdipho ạrol ghan bọ.”

¹⁵Mị odi rạatughian ghan ọnaghanan ẹmhu uḍien phọ, bịn oye ạmeera ghisigh ạmi ekperenom.

¹⁶Mị ụnaghan ẹḍogh dị ẹmagh ẹḅeenyom Ọphiiny Ulai kụ ẹḅem, “Gebriel, gbạ ạagelion ạḅeni nyọdi ẹmhu ịpe ọdi ạmiin bọ.”

¹⁷AGebriel aru ni ạmeera utuman ịmi, kụ mị aḅololo loor oghiilaan. Ọdi ụḅeni ịmi mọ, “Oye dị kamugh ni, nạghanan ẹmhu phọ. Uḍien phọ agbolomaam eekuna aḅirini phọ.”

¹⁸Ọdi odi ni rạkaaph, bịn mị aḅololo ude ạghaaru. Kụ ọdi ụpham ni ịmi ạmeremi,

¹⁹kụ ạḅem mọ, “Mị raḍeenaan ghan nyịna ịpe ạghelhe phọ Ẹnaan kạtol bọ. Uḍien phọ ạma agbolomaam mem eekuna phọ.

²⁰“Odughuna phọ nạ ạmiin bọ dị ạmoogh ịyal igbogh ạraphaal phọ ạmeera esi ạramar aMedia rꞌaPasia.

²¹Ạtu-ọga phọ ạmeera esi ọmar phọ aGris, kụ okakara ọphaal phọ sịphe igbo ịyal ariḍien phọ ọdi, pọ ọḅel ọdaam mọ.

²²Inya ạraphaal phọ emite bọ mem mọ mowun bọ ọḅel ọphaal phọ ẹmeera esi inya ạramar phọ dị kodi ẹḅel eelhe phọ omitiom kụ bịdi kẹ́moogh ịnyaam ịdipho ọḅel ọmar phọ.

²³“Mem dị ekureriom ạramar phọ ịpe mekpekian kụ bịdi meeph osi esi dị kọ́bile ọlhiom ạbidi, kụ oniin ọdaam amite dị ạḅaar ẹmhu, ụ́moogh igbiririph, ạḅile aḍighi oye iikeleghian.

²⁴Ọdi kạmoogh ni ịnyaam — kụ ọlo kési ẹkpar ọdi. Ophiemi dị ọdi kạsighe atumom kẹbugh ni iboom ḅịle ọdi katue ni aḍighi tọrobo ịyaar lọ ọdi ạwa. Ọdi kaagulemi ni we dị ọmoogh ni ịikpo ḅịle kẹn rꞌawe phọ Ẹnaan.

²⁵Loor esi dị ọdi oye ikeḍi, areten iikeleghian phọ ọdi keḍighi ghan ni ekol. Ọdi kaabagaam loor ọdi kụ apiemi ịbadi awe dị ọphur ạruru kạ́tol. Ọdi katuphiom ghạlamo rꞌọkar ogbogh Ọdaam Ạraalha, kụ kopiemi ni nyọdi reten dị oye kụ kạ́logh ḍịghaagh.

²⁶Uḍien ịpe ạrikia adulhe rꞌạḍiroor phọ ịpe mọogelion bọ ni ọḅeni nyịna kemite ni. Kụ ọlo bọoghi ni nyịidipho, loor esi dị kebia ni kụ egbi nụun omite.”

²⁷Mị uukurughan ni ạḅile ạrol émoon ịbadi aḍughul-otu kụ agbi oḅetenu ọghi oḍighi oḍighi phọ ọpo ọdaam mọ ạḅogh bọ ụngo ịmi, kụ ọlo mị ukiriri ni esi uḍien phọ ḅịle rꞌịduon mị útue bọ ụnaghanan.