Read abua Dạniel 9 Bible Online

Dạniel 9 - abua bible

Dạniel 9

¹ẠDarios oye ọlo aMedia phọ, ọony phọ aZakzis, aḍighi ọdaam eelhe phọ ạBabilon.

²Ḍịḅel ạlha ọda phọ ọdi, mị odi rạaḅeghion ghan rịnya iigbia phọ kụ ạatughian ghan ịpe oḍualdi ạsia ạdol amuphe phọ aJeruselem kẹtol bọ, ọdaphan ịpe Ọmoogh-we phọ mạḅeni bọ Jerimaya oyil phọ.

³Kụ mị ạkaraghi ạaḅereghi Ẹnaan Ọmoogh-we phọ, ạlhom ghan, rꞌọkaagh ẹḍogh, ạkpologhian iinmenan ọto, ạḅile ạrol ghan ude esi ọoru.

⁴Mị ụuḅereghi ni Ọmoogh-we Ẹnaan phọ ạmi kụ aruphughian ịkaraph awe phọ ạmi. Mị ụḅem ni, “Ọmoogh-we Ẹnaan, nạ kụ ogbogh, ḅịle yoor roghueni ni nyịna. Nạ raako ghan ịyo phọ nạ maghiran bọ aḍeenaan ẹphomoghian dị rémuneen ghan esi ạbuphe ọphomoghian bọ nyịna roḍighi ghan bọ ịlo nạ ạto.

⁵“Yoor moḍighi ni ịkaraph, yoor ạbukaraph awe, yoor mọpioghom. Yoor moghel ịpe nạ ạto bọ ụngo iyoor mọ oḍighi ghan, kụ ọḅitonaan igey phọ ịpe nạ uḍeenaan bọ iyoor.

⁶Yoor ụ́naghanan butelhedom mọ ạna riil phọ, bụphe rokol ghan bọ ḍien phọ ạna kụ ọḅaanaan bụdaam mọ ayoor, buḍiemiom mọ ayoor, bụrude ạburude phọ ayoor, rꞌoomo eelhe phọ ayoor.

⁷Nạ, Ọmoogh-we, raḍighi ghan ịdi ẹnighe oomo amem, kụ yoor romuton ghan eephoogh siloor ayoor. Ịphen phọ kụ edianaan oomo phọ ayoor ạbuphe odi ghan bọ Juda rꞌẹpe Jeruselem rꞌoomo awe phọ Ịzirel bụphe nạ ạwalalami bọ ạghiom rạmha lọ etuman ḅịle rꞌịlo ẹkelan, loor esi dị bịdi nyịna úmeeraam.

⁸Ạraalha phọ ayoor, abuḍiemiom mọ ayoor, rꞌạburude ạburude phọ ayoor, moḍighi ni ịlo umugholoor ọḅile ọpioghom esi ạna Ọmoogh-we phọ.

⁹Nạ oye ọnma ighirigiir ḅịle rꞌọsar ọwilenaan, ghạlamo ịduon yoor mọḅaar bọ ẹmhu phọ ghisigh ạna.

¹⁰Yoor nyịna ụ́naghanan, Ọmoogh-we Ẹnaan phọ ayoor, mem mọ ọpo nạ ụḅeni bọ iyoor mọ ọmaar ọdaph iilogh phọ ịpe nạ ạngo bọ butelhedom mọ ạna, riil phọ mọ ụngo bọ iyoor.

¹¹Oomo Ịzirel mọka iilogh phọ ḅịle kẹn úmeera ụnaghan ịpe nạ ạḅem bọ. Yoor ụpioman ni nyịna, kụ iḍighi kụ nạ uruomaan iyoor itonyonaan phọ ịpe ọge bọ sịphe Ologh phọ aMozis, otelhedom mọ ạna.

¹²Nạ uḍighi ni ịpe nạ ạḅem bọ mọ nạ kuḍighi iyoor ḅịle rꞌabuḍiemiom mọ ayoor. Nạ ụlhiom ni Jeruselem apuemi ẹnon ọdo eelhe sịen ade phọ,

¹³ụngo ghan iyoor oomo ịminimiin phọ ịpe ọge bọ sịphe Ologh phọ aMozis. Kụ ghạlamo kꞌạnyiidipho, Ọmoogh-we Ẹnaan phọ ayoor, yoor kőmiigh oḍighi ịdi kẹḅeeraan nyịna, ọ́wileghi ịkaraph phọ ayoor, mụghumo ọ́daph igey phọ ạna.

¹⁴Nạ, Ọmoogh-we Ẹnaan phọ ayoor, uukolobian ni ọliom ayoor, kụ nạ aḍighi amitiom, ịdi eḍighi bọ oomo amem nạ raḍighi ghan ịdi ẹnighe, kụ yoor nyịna ụ́naghanan.

¹⁵“Ọmoogh-we Ẹnaan phọ ayoor, nạ uḍeenaan ịikpo phọ ạna esi ọsighe awe ạna omitiom ẹpe Ijipt, kụ ịikpo phọ ạna rọotughian ghan ni kꞌarodon. Yoor mọpioghom; yoor moḍighi ịdi ị́nighe.

¹⁶Nạ muḅegh ni iyoor mem dị eten; kụ kạ́kagham mun ologhi Jeruselem, ẹmha phọ ạna, eegbolom iigbia phọ ạna. Oomo awe areelhe phọ etuman bọ mophogh Jeruselem rꞌawe phọ ạna kẹn osooromi loor esi ịkaraph phọ ayoor ḅịle rꞌạsipioghom ạburude ạburude phọ ayoor.

¹⁷Seseeny, Ẹnaan, nạghan ịiḅereghi ạmi rꞌịlom ạmi. Ḅuuḅulemi Otu Ịiḅereghi phọ ạna, ọpo moogulemi bọ; ḅuuḅulemi ni pịdi tọrobo oye alegheri mọ nạ kụ Ẹnaan phọ.

¹⁸Ụnaghanan iyoor, Ẹnaan; uphogh iyoor kụ ạmiin ịiḅaghami phọ ịteeny bọ iyoor, rꞌịminimiin eelhe phọ romeera bọ ḍien phọ ạna. Yoor rọoḅereghi ghan nyịna loor esi dị nạ oye ọnma ighirigiir; kési egeny eḍighinom ịyaar ayoor.

¹⁹Ọmoogh-we, ụnaghan iyoor. Ọmoogh-we, sạr ịkaraph phọ ayoor ạwile. Ọmoogh-we, ụnaghanan iyoor, aḍighi ịlo ẹkpe! Ẹrol dị tọrobo oye alegheri mọ nạ kụ Ẹnaan phọ, káabinyemi! Eelhe phọ ẹphen rꞌawe phọ ạbuen ạbuo ạna.”

²⁰Mị odi ni rạaḅereghi, ratuphughian ịkaraph ạmi rꞌịkaraph awe phọ ạmi Ịzirel, kụ ạlom ghan Ẹnaan phọ ạmi Ọmoogh-we Ẹnaan phọ ạmi ọosa ooḅulemi Otu Ịiḅereghi iigbia phọ ọdi.

²¹Ịduon mị odi bọ ni rạaḅereghi bịn aGebriel, ọpo mị ạmiin bọ ẹḅel amem mọ, ạpheeph asoor ude sịphe mị ạrol bọ. Iḍighi mem ọphighiron ẹkia adulhe.

²²Ọdi ạghaaph ạagelion, “Dạniel, mị maru sịen ọloghonaan ạna ḍịghaagh ọnaghanan ịmiin phọ.

²³Mem mọ nạ amiigh bọ ọlom Ẹnaan phọ, ọdi ạnaghanan ni nyịna. Ọdi ạphomoghian ni nyịna, kụ mị maru ọḅeni ạna ọphagharanaan phọ. Nyịidipho, mạar alher rụru ịphen mị kạkaaph ạagelion uḍien phọ.

²⁴“Oḍual amem oḍualdi ạsia kụ amem dị Ẹnaan meseere ọtagharan awe anyina rꞌẹmha iigbia phọ esi ịkaraph ḅịle rꞌẹkaraph eḍighinom ịyaar. Kọsar ri ịkaraph ọbilenaan kụ ọmeremi iiḅi ịiruen kꞌagee-pọ, ọbo uḍien phọ rꞌịmiin phọ etu emite, kụ Otu Ịiḅereghi iigbia phọ kọḅile ni ọosa ọḅogh ọngo.

²⁵Legheri ịphen phọ kụ ạnaghan: Emiigh kꞌamem mọ ọto bọ ọngo mọ ọḅile oselemi Jeruselem mọ, tụtu oḍiemiom mọ ọpo Ẹnaan ẹsaḅar bọ aru, oḍual amem oḍualdi ạsia keten ni. Kọḅile ni oselemi Jeruselem rꞌareten rꞌikpolom ariisi ogonaam aloor kụ ẹmeera oḍual amem odiinydi rꞌịyal ạsia, kụ ọlo amem mọ ạmuen keḍighi mem ịiḅaghami.

²⁶Kụ mem ekureriom mọ, oḍiemiom mọ Ẹnaan ẹsaḅar bọ kokiigh ni reten dị ọdi ịyaar ụ́piom. Awe ẹgham ọdaam eelhe dị ạmoogh ịikpo koogulemi ni eelhe phọ rꞌOtu Ịiḅereghi phọ. Ekureriom mọ ketu ni mụdi ạmuum-aḍigho, ẹpamam ẹgham rꞌoogulemi phọ Ẹnaan meekolobian bọ eseere.

²⁷Ọdaam eelhe phọ ọpo phọ kạgian ni ḍịnya rꞌịbadi awe esi oḍual ạsia, kụ mem dị oolemi-odi amem mọ ạmuen meten, ọdi kakunughi ni rịkia rꞌinmo. Kọsighe ni ḅạphanya amuphe phọ ọḅam ọkaraghi ẹpe ọḅamaghi bọ sịphe Otu Ịiḅereghi phọ kụ kẹtol li sịphe tụtu ọpo aseere bọ azuan ruukuna phọ ịpe Ẹnaan meekolobian bọ eseenaan nyọdi.”