Read abua Hosia 12 Bible Online

Hosia 12 - abua bible

Hosia 12

¹“Tọrobo ịyaar lọ awe phọ Ịzirel oḍighi kꞌạḍiroor kụ ẹteeny ḍughul oopho ni bịn ḅịle rꞌọphuenom. Iikeleghi rꞌọphueghi kụ iipaany ogbo ạbidi. Bịdi ọgian ḍịnya ịyo rꞌAsiria kụ omuulan ḍighi rꞌIjipt.”

²Ọmoogh-we phọ ạmoogh ni ọkpalham awe aJuda; ḅịle kẹn, ọdi kạliom ni Ịzirel loor eḍighinom mọ ạbidi. Ọdi kaḅulemian bịdi ịpe bịdi moḍighi bọ.

³ẠJekob, ọde ọde ạbidi, amirighan rꞌỊso umor phọ ọdi mem dị ịyal ạbidi ọrol ọkuruḅaka onhiin ạbidi rogirigiri; mem dị ạJekob ạmanam, ọdi eenan Ẹnaan —

⁴ọdi eenan ọokpaany kꞌạke kụ ạkpar apu. Ọdi amoghi kụ ạlom ḍịseph. Kụ ẹpe Bẹtel, Ẹnaan iru ẹteeny Jẹkob ọde ọde phọ ayira kụ ạḅaanaan nyọdi.

⁵Ọphon kụ Ọmoogh-we Ẹnaan Oomo Ịikpo phọ — Ọmoogh-we phọ kụ aḍien dị kooseenyom ghan nyọdi.

⁶Kụ nyịidipho, ẹemara ẹemara ạJekob, iḍuom ologhi esi Ẹnaan phọ anyina kụ eḅula esi ọdi. Isooromi loor kụ eḍighi ghan ịlo eseleman, kụ ẹmoogh ọkparam ekori ghan Ẹnaan phọ anyina ịpe ọdi kaḍighi bọ.

⁷Ọmoogh-we phọ ạḅem mọ, “Awe phọ Ịzirel obeeph dọl ịdipho aKenanait; bịdi ọmoogh ḍịḅeeraan oogbegheḍiom ghan bumuul ḍighi ạbidi esi ạrotoom rꞌogbiighiom.

⁸‘Yira moḍum,’ bịdi ọḅem. ‘Yira mọmoogh ẹelha. Kụ oye ólho dị kụḍagha iyira mọ aghuḍum ayira ạkuo iigbegheḍiom.’

⁹Kụ ọlo, mị, Ọmoogh-we Ẹnaan phọ anyina ọpo ịsighe bọ inyina ạḍuanam Ijipt, mị kaḍighi ịdi nyina kẹḅile etugh iloghi arugbogo, ịdipho nyina erugh ghan bọ mem mọ mị aru bọ ịteeny inyina ẹpe ẹdala phọ.

¹⁰“Mị ụḅaanaan riil phọ kụ ạgba uḍien ạḅeni bịdi, kụ esi ariil phọ kụ ẹdi mị ạphur we phọ ạmi rụru.

¹¹Ghạlamo ni ịduon phọ bịn rooseeny ni ịkaaghineen ạrumugh ẹpe Gịliad, kụ bụphe rooseeny ghan bọ bịdi komugh ni. Ilephiri ạsinam kụ ẹdi rọpinyonom rịkia sịphe Gịlgal, kụ arenmeny phọ edi bọ ẹpe phọ keten ruḅum asighiigh sịphe ạḍiyaghaghaany ade phọ.”

¹²Ịkpianaan ni Jẹkob ọde ọde phọ ayira osuma ogheel aMesopotamia, ekpisi dị ọdi kạmoogh ạnir, ọdi aḍighinaan oḍighi ọnon oye kụ aphogh ghan iyool-ịga oye phọ.

¹³Ọmoogh-we phọ arom oyil mọ ạtagharan we phọ Ịzirel dọl ạrebene ẹpe Ijipt kụ ạmaar ạpham bịdi.

¹⁴Awe phọ Ịzirel moḍighi ịdi mephin ologhi Ọmoogh-we phọ; bịdi ọkpe omuughu loor ịkaraph phọ ạbidi. Ọmoogh-we phọ kạliom ni bịdi loor aroofola phọ bịdi moofolomi bọ nyọdi.