Read abua Hosia 2 Bible Online

Hosia 2 - abua bible

Hosia 2

¹Esi ịphen phọ, iighologh bumor phọ anyina mọ, “Awe Ẹnaan,” rꞌabumarani phọ anyina mọ, “Bụphe Ọmoogh-we phọ ạphomoghian bọ.”

²Nmụny ạmi, ịḅaanaan onhiin anyina — ọbo ọdi kạ́nir ạmi mun, kụ mị kólom ọdi mun. Ịḅaanaan nyọdi ọdi ạwile olhe ẹmha rꞌorelhe yogh.

³Eḍighi ịyaar dị ọdi ụ́bile, mị kạtolomi nyọdi ẹdaḅa ịdipho aḍio phọ ọmar bọ nyọdi.

⁴Mị kạ́moogh ọnma ighirigiir ạnmuny ọdi; bịdi ạnmuny ạnir erelhe dị umugholoor ụ́moogh. Ọdi rꞌaloor ạḅem mọ, “Mị kạki kꞌạruga ạmi — bịdi ụngo ịmi eḍien rꞌạmuum, rꞌonemeneme ạsuoma asuphuugh, mụnum-ọliv rꞌamiim.”

⁶Loor ịphen phọ, mị kakoonyom nyọdi rꞌireeny iiḅurom kụ mị ạlogh iikpe okikima areten ọdi.

⁷Ọdi kakiil li ạdaph rụga phọ ọdi kụ kạ́teeny ạ́pam bịdi. Ọdi kạwa ni bịdi kụ kạ́miin. Pọ kụ amem dị ọdi kạḅem mọ, “Mị raḅula kꞌọḅel olhom ạmi — ịnighenom ịmi mem mọ ọpo kụ epu dọl ạmi nyịidipho.”

⁸Oomo amem ọdi ómeera ghan ologhoma mọ mị kụ ọpo ạngo bọ nyọdi ịbiakpa, miim, mụnum-ọliv rꞌoomo asilva rꞌagol phọ ọdi ạpham bọ kụ aaseenyom ghan Baal.

⁹Loor ịphen phọ, mem ibugha phọ, mị kạsighiogh ni ruunmo ạmi ịbiakpa rꞌamiim kụ ạsighe rọnemeneme ạsuoma asuphuugh phọ mị ạngo bọ nyọdi oonmenan ghan phọ.

¹⁰Mị kạtolomi nyọdi ẹdaḅa risigh ạruga phọ ọdi kụ rꞌoniin kátue ạpel nyọdi ạsighe esi ịikpo ạmi.

¹¹Mị kakunughi tọrobo ookpomoghan ọdi, rạyaal amalhe phọ rꞌareephegh ạtorobo ạlha rꞌụnwanyu rꞌaḍio ophooghian phọ.

¹²Mị kapiemi ni ireeny avain rꞌạfig phọ ọdi, ịpe ọdi ạḅem bọ mọ ạruga ọno kụ ụngo nyịno ọphamam ghan ạbidi. Mị kakiton iizo avain rꞌiimuma phọ ọdi atene ẹdala dị ẹyaghaghaany; ilhom ịnam kụ kepiemi.

¹³Mị kạliom ni nyọdi ịdi eḍighi bọ ọdi úwula ịmi kụ rạsuanaan ghan Baal ịnsens ịlo ooseenyom ọdi; mị kạliom ni nyọdi esi amem mọ ọdi adoghoḍian bọ rạla ạraghaagh ọbo ọdi ạḅeeraan rụga phọ ọdi. Ọmoogh-we phọ kụ ạḅem.

¹⁴Ịduon phọ mị kạḅile ni ạsighe nyọdi ạkimom ẹpe ade ịisaar phọ; ẹpe kụ ẹdi mị kạsighe ikpo ọnhu ẹphomoghian kụ ạmooghom nyọdi.

¹⁵Mị kaḅulemi ni iizo avain phọ ọdi ạmoogh bọ ạngo nyọdi kụ akiton Eḍiiny Ịiḅaghami atene Ọnhu-aḍibuo Oḍuom Ologhi. Ọdi kạḅogh loor ụngo ịmi ịdipho ọdi aḍighi ghan bọ mem isina phọ, ọdi ạḍua bọ Ijipt aru.

¹⁶Kụ ọdi ạḅile ụmagh ịmi mọ olhom ọno — kụ́magh mun ịmi mọ aBaal ọno.

¹⁷Mị kámeera mun ọdi ạḅile aghol ḍien aBaal ạghaaphom.

¹⁸Mem mọ ọpo mị kakiran ni ịyo rꞌoomo ilhom ịnam rꞌịnun, bịn bịdi kóḍighi mun we phọ ạmi ịyaar. Mị kạḅile kẹn ạsighiogh oomo ạreenema ẹgham sịphe ade phọ, oomo isiko rꞌạsikumugh, kụ aḍighi ịdi awe ạmi kọtol rꞌẹepho dị ịyaar kẹ́ḅogh.

¹⁹Ịzirel, mị kaḍighi nyịna ạnir ạmi; Mị kịrolom inyina dọl ogey oye omeeraam; Mị kaḍeenaan ẹphomoghian oomo amem rꞌọnma ighirigiir kụ aḍighi nyịna ọlo ạmi kꞌagee-pọ.

²⁰Mị kaḍighi ni ịpe mị aguanaan bọ kụ aḍighi nyịna ọlo ạmi, kụ nạ ụsighe ịmi mọ Ọmoogh-we.

²¹Mem mọ ọpo mị kạnaghanan ni ịiḅereghi awe phọ ạmi Ịzirel. Mị kaḍighi ịdi ọlophia kạloph sịen ade phọ, kụ ade phọ emite ịbiakpa rꞌiimuma avain rꞌọliv.

²³Mị kạmeremi ni we phọ ạmi sịphe ade phọ kụ aḍume bịdi. Mị kaḍeenaan ni ẹphomoghian bụphe oghol ghan bọ mọ “Ẹ́pomoghian,” rꞌạbuphe ọmagh ghan bọ mọ “Káwe ạmi,” mị kạḅem mọ, “Nyina awe ạmi,” kụ bịdi ọpagharanaan mọ, “Nạ kụ Ẹnaan ayoor.”