Read abua Hosia 9 Bible Online

Hosia 9 - abua bible

Hosia 9

¹Weye Ịzirel, ịbile olheeghi ghan ạrayaal phọ anyina elhiom awe dị Ẹnaan úlegheri. Nyina mẹḅitonaan Ẹnaan phọ anyina, ẹsighe iloghi anyina esi ọdi. Sịphe oomo ade phọ, nyina maala siloor anyina ịdipho ạnmariir-erelhe dị rolhe ẹmha esi eru aBaal kụ mẹphomoghian ịbiakpa phọ nyina egbi bọ mọ ọdi ịkpiom inyina!

²Kụ mọony amem bịn nyina kẹ́moogh mun ịbiakpa rꞌạmunum-ọliv dị ạmanam, kụ amiim kạ́tol.

³Awe phọ Ịzirel kọ́tol mun sịen ade Ọmoogh-we phọ. Buniin anyina koḅula ni ẹpe Ijipt, buniin olhe eḍien ạḅaphanya ẹpe Asiria.

⁴Ẹpe iiruen areelhe phọ ịpe, bịdi kótue ọsighe ruunmo amiim otuomaan Ọmoogh-we phọ, ḅịle ọpinyonaan rịkia phọ ạbidi ọngo nyọdi. Tọrobo ọlo alhe eḍien ạbidi, pọ mạapuan loor mụdi alhe eḍien esi amaḍi. Kẹpoomiom ọkoony phọ bịn, rꞌeniin kẹ́tol dị kọsighe ọkimom Otu Ịiḅereghi phọ ọngo Ọmoogh-we phọ.

⁵Kụ ẹteeny mem dị kole rạyaal oghueniom Ọmoogh-we phọ, bịdi koḍighi eeghe mem mọ ọpo?

⁶Mem dị igbogh ịiḅaghami phọ esoor kụ awe phọ ọwalala, awe phọ Ijipt kookpomoghi bịdi — ookpomoghi ẹlo amaḍi sịphe Memfis. Eekoom asilva phọ ạbidi rꞌariisi phọ aruutu phọ ạbidi ẹrol ghan bọ, ạroogho kụ kasi aakpereghiom rꞌireeny iiḅurom.

⁷Amem ọliom mẹteeny, mem dị awe kọsighe ịdi ẹkpianaan bịdi. Mem dị ịpe phọ emite, Ịzirel kolegheri ni! Nyina mọ, “Oyil phọ ọphon uwo elologhi. Oye phọ ọphon ẹsiiny bọ aḍighi ọpirighi ni.” Nyina awe phọ ighel ịmi iboom loor esi dị ịkaraph anyina ẹbugh ni.

⁸Ẹnaan mirom ni ịmi ịdipho oyil ọphur ạruru Ịzirel awe phọ ọdi. Ghạlamo ịduon phọ, tọrobo ekpisi lọ mị ạghi, nyina eelekian osiph ạmi mụdi ẹnun. Ghạlamo ịsiphe Otu Ịiḅereghi Ọmoogh-we phọ bịn awe phọ kụ ạbumulogh-ḍien oyil phọ.

⁹Bịdi úloghoma loor ịkaraph dị bịdi roḍighi, ịdipho amem mọ bịdi ọrol bọ ẹpe Gibia. Ẹnaan kẹetughian ni ịkaraph ạbidi kụ ẹliom bịdi.

¹⁰Ọmoogh-we phọ ạḅem mọ, “Ẹḅel amem dị mị ạmiin bọ Ịzirel, ịghigh mụdi ọmiin iimuma avain dị resi de ịisaar. Ẹḅel amem dị mị ạmiin bụrude oko anyina, ịghigh mụdi ọmiin ịḅel iimuma ireeny ạfig dị mẹḅaal lhạ phọ. Kụ mem dị bịdi oru osi Eegum aPior, bịdi umiigh ni ooseeny aBaal, kụ íbia bịn bịdi ọloghori ọphuenaan siloor ịdipho aruru phọ bịdi ọphomoghian bọ.

¹¹Igbogh phọ Ịzirel kẹpeeph ịdipho ẹnun ẹḍua, nmụny kọ́maranaan mun bịdi, ạnmariir kọ́tol mun rꞌeghun, nmụny kóomor mun.

¹²Kụ ghạlamo bịdi uukonom ni nmụny, mị kạsighe ni bịdi ạḍuanam kụ rꞌoniin kạ́tol dị kámugh. Mem dị mị ạḅitonaan we phọ ạbuen, imananaany kụ kemitenaan bịdi.”

¹³Ọmoogh-we, mị rạmiin nmụny ạbidi dị roporogh ghan kọkpaariom ọze.

¹⁴Eeghe ịyaar kụ ẹdi mị kạlom esi ạna oḍighi awe phọ ạbuen? Seere nmạriir ạbidi ẹ́mar! Seere bịdi dọl dị kótue ookonom nmụny asipugh ạbidi!

¹⁵Ọmoogh-we phọ ạḅem mọ, “Oomo ẹkaraph eḍighinom mọ ạbidi imiigh ni sịphe Gịlgal. Ịsiphe kụ ẹdi mị amiigh bọ ọlogh ạbidi ḍien phọ. Kụ loor esi ịkaraph phọ bịdi moḍighi bọ, mị kaporogh ni bịdi ạsighe sịphe ade phọ ạmi. Mị kạ́pomoghian mun bịdi; oomo abuḍiemiom ạbidi mọḅaar ẹmhu esi ạmi.

¹⁶Awe phọ Ịzirel ọkigh ẹezupha dị ạsini phọ mẹgharaghar kụ iimuma ímuum mun. Bịdi kọ́moogh mun nmụny, kụ ghạlamo bịdi ụmoogh ni, mị kạze nmụny dị ọman mạar esi ạbidi.”

¹⁷Ẹnaan phọ mị rakumu bọ kạḅitonaan ni we ọdi, loor esi dị bịdi kọ̋naghanan nyọdi. Bịdi koḍighi we dị koyeela ghan sịphe oomo areelhe phọ.