Read abua Joel 1 Bible Online

Joel 1 - abua bible

Joel 1

¹Ḍịen kụ adom Ọmoogh-we phọ dị ạghiom Joel, ọony ạPetuel.

²Iler rụru, nyina ikumoor awe, tọrobo oye lọ ọdi Juda ạnaghan! Ịyaar lọ ẹghigh ịphen memite ghan ni mem anyina ḅịle mꞌamem ạburude anyina ḍụghum?

³Ịḅeni nmụny anyina ịlo ịphen phọ; bịdi kọḅeni nmụny ạbidi dị kọḅile kụ ọḅeni ọnon oghiil.

⁴Aḍita etum ḍita igurubia eḅor ịizupha phọ; ẹlo aḍiniin aḍita esugheeny, ḍịeri phọ ẹtaal ẹman.

⁵Iḅetenu emoghi, nyina awe dị rọyegheyeghe; Imoghi, nyina ạbupughol miim; Iimuma ireeny avain oḍighinom amumoom amiim mophiemi.

⁶Aḍigbogh aḍita igurubia mezuom de ayoor; bịdi ẹmoogh ịikpo kụ ẹpughan ogbi; ạralaal ạbidi etoph ịdipho ịlo ạnam-dịka.

⁷Bịdi mephiemi iizo ireeny avain ayoor, kụ mẹraal iizin ireeny ạfig phọ Bịdi mekponyon roopho phọ, tụtu ịla phọ mẹḅaal.

⁸Imoghi, nyina awe phọ, ịdipho ọnyani lọ amoghi ḍuugh oye lọ ọdi rạwa ạal ilhom.

⁹Ịbiakpa rꞌamiim ílho mun ọngo ịsiphe Otu Ịiḅereghi phọ; ariil ạrikia phọ umoghi loor esi dị bịdi ụ́moogh ruunmo ọngo Ọmoogh-we phọ.

¹⁰Iizo phọ ịyaar ílho mun; Ade phọ remoghi loor esi dị mophiemi ịbiakpa phọ, iimuma ireeny avain phọ mẹgharaghar, kụ ireeny ọliv phọ megheel ọnam.

¹¹Ikururu yogh, nyina abuḅephom iizo phọ; Imoghi yogh, nyina ạbuphe ropogh ghan bọ ireeny avain phọ, loor esi dị ịizupha ịbiakpa rꞌabali phọ — ii, oomo phọ ịizupha phọ mophiemi.

¹²Ireeny avain rꞌireeny ạfig phọ megheel ọnam; oomo ireeny iimuma megheel ọnam emugh. Iboh awe phọ mẹḍua.

¹³Ịkpologhian rụsuoma ọto kụ emoghi, nyina ariil ạrikia phọ, bụphe okumu ghan bọ sịphe enmeny phọ! Iḍigh Otu Ịiḅereghi phọ kụ emoghi oomo aḍughul phọ! Ịbiakpa rꞌamiim ílho mun ọngo Ẹnaan phọ anyina.

¹⁴Ịto ẹḅeni we mọ ọkaagh ẹḍogh; ẹḅeni bịdi mọ oru ookpomoghan. Iikpomoghi buḍiemiom mọ rꞌoomo awe phọ aJuda mọ oḍigh Otu Ịiḅereghi Ọmoogh-we Ẹnaan phọ anyina kụ omoghiom nyọdi.

¹⁵Aḍio Ọmoogh-we phọ mekpekian; aḍio phọ Ẹnaan Oomo Ịikpo phọ kemitiom bọ ophiemi phọ. Pọ eeghe aḍiigu dị kẹtol ḍio phọ ạḍiphe!

¹⁶Ạpeleeny iyoor ílho mem dị ropiemi ịizupha ayoor. Iboh ílho sịphe Otu Ịiḅereghi Ẹnaan phọ ayoor.

¹⁷Ikpo ịizupha rẹnu sịphe ạḍigharaghar ade phọ. Ikpo ílho oseere kụ aruutu ooko ghan ikpo phọ edi oopho.

¹⁸Ạsinam reḅeela loor ọkoony loor esi dị ạroogho ọraal ólhoonaan bịdi; asita iyool-ịga phọ kẹn rẹmiinom.

¹⁹Mị amoghiom nyịna, Ọmoogh-we, ịdi eḍighi bọ ạroogho phọ rꞌireeny phọ mẹgharaghar, mụdi ạnian kụ ilhe.

²⁰Ghạlamo rꞌilhom ịnam eḍum bịn remoghiom ni nyịna, ịdi eḍighi bọ asikol ạmuum mọ mẹgharaghar.